Napoli-Spal 1-0, 22/12/2018 – ‘A vedette accussì

Ajere, a ll’ora d’’a tiella, guagliú ô san Paolo riuscette a vvattere, pure si sulo p’uno a zzero ‘e profuche scise da Ferrara e sse mettette ‘e tre ppunte dint’â sacca e i’ mo che v’aggi’’a dicere, che ve pozzo dicere? Dico ca fósse stato meglio vencere signanno tre o quatto addaffe (reti), però meglio vencere p’uno a zzero ca ‘nu caucio ‘int’ê rine e rrussimà (pareggiare) o peggio ancòra, perdere, soprattutto ‘ncasa  e nnun mantenere ‘o passo d’’a vecchia zoccola ca, pe pparta soja ajeressera vattette p’uno a zzero ‘e pecurare rumanise. Pirciò dicimmo ca tutto summato ce putimmo starce  ringrazzianno ô Cielo de nun ‘ntussecarce capitune, ‘nzalata ‘e rinforzo, mussillo ‘e bbaccalà, scioccele, raffiuole e struffole! E ppacienza, pacienza si ajere ‘e tifuse ‘ncopp’ê bbemate (spalti) e cchille ‘ntribbuna-divano c’êttem’’a cuntentà, ‘mmece d’’e tre o quatto ca vulevemo, ‘e n’addaffa (rete) sola chella ca ô 46’ signaje ‘o Masto, [levanno ‘e vveróle dâ vrasa ô Jancone…] ca prutetto dô Ggialante[ca cu ‘a sola presenzia soja stuppaje dduje mammasantissime avverzarie] sfruttaje ‘nu tiro ‘e squina (corner) e ccu n’esatta tacararrassa(colpo di testa) mettette ‘a palla ê spalle d’’o purtiere avverzario.

Pacienza, dicevo, cumminfatte doppo ll’addaffa (rete) d’’o Masto ‘e cuane (azzurri) nun foveno cchiú crestiane ‘e signarne aute e ppure mantenenno ‘o pallino d’’o juoco cumme fove pe ttutt’’a mubbara nun sfruttajeno nisciun’ata accasiona avuta e ppirciò ch’êssemo’mparanza aizà ‘na statua taminna (preziosa) ô Lungagnone ca  ‘nfra 90’ e 91’ cu dduje granne tacculle (intervente) uno meglio ‘e n’ato  salvaje ‘o natiggia (risultao) e cce facette mettere ‘e tre ppunte dint’â sacca! ‘Nzomma chiste foveno ‘e fatte e mmo passammo ê ppaggelle

Meret [ ‘O Lungagnone] 8 – Dicisivo! Pe cquase tutta ‘a mubbara (partita) nunn’êtte ‘a fà quase niente, ma po s’abbuscaje ‘a pagnotta addivintanno prutacumista a  A ll’arrancua quanno fermaje m o palle ‘e Vicari, mo ‘e Lazzari, mo ‘e Paloschi e addirittura, cumme v’aggiu ditto fove ‘nu ciarcarcurío arzacco (eroe magico) ‘nfra 90’ e 91’!

Hysaj [MezaCucchiara] 6 – Atalossa (prestazione) urdinata cu quacche bbona cosa cumme chillu lanzo a ppiscà a lLorenzigno, ca sciupaje!) e unu sfregazzo (sbavatura) cu chillu tiro ‘e squina (corner) rijalato ô niajo (finale).

Albiol [‘O Masto] 7,5  – Granne overo! Nun sulo cummannaje a mmestiere ‘a trasera (difesa) nun sbaglianno niente, ma quanno vedette ‘a facenna cumprumessa scennette annante signanno chell’addaffa (rete) bbella e ‘mpurtante ca v’aggiu ditto!

Koulibaly [‘O Ggialante] 7 – Ô ssolito dê pparte soje nun se passaje fermanno chi capitasse e sse facette apprezzà pure scennenno ‘nnante palla ô pere ‘nu paro ‘e vote; ‘e cchiú nun sulo pruteggette ‘o Masto ô mumento ‘e ll’addaffa (rete), ma poco doppo poco mancajhe ca ‘e capa nun signasse ‘o doje a zzero!.

Ghoulam 6 – Facette ‘o ssuĵo pure senz’essere ancòra chillo ‘e tridice mise fa..

[dô 79’ Luperto s.v. – Jucaje poco pe ddarele ‘nu zifo (voto)]

Callejon [Peppe ‘a ‘nguenta] 6 – Ê vvote se tenette fora dâ munavara (manovra) cumme si ‘o fatto nun fósse ‘o suĵo e ccuntinuaje a nnun truvà ‘a porta; dètte però ‘na mana a ll’epata difaja (fase difensiva).

Rog [‘A Bbelva] 6,5 – Artalossa (prestazione) pusitiva p’’a cegna (grinta) ca ce mettette, azzannanno feliette e gghienno pure a ttirà. Tutto summato me piacette.

[dô 66’  Fabian Ruiz [Anema longa] 5,5 – Me dispiace, ma tanto ll’aggi’’a mettere datose ca partette cu ccegna (grinta), ma po venenno meno dint’ê mmecce, facette quacche fessaria.]

Hamsik [Marekiaro] 5,5 – Miezu zifo (voto) mancante pecché sì ô ssolito naviaje (smistò)  pallune  a ll’armidanno (centrocampo), ma purtroppo maje azzannaje ‘o sibbacco (matchi, nun cercaje ‘a porta, nè ccagnaje passo. E cche saciccio!

Zielinski 5,5 –Miezu zifo (voto) mancante pure a isso  pecché pe ttirà sí ‘o ffacette, ma malamente e ê vvote jette ‘ncerca inutilmente d’’a jucata cumpricata e a ll’arrancua (ripresa) se ne scennette assaje.

Mertens [Ciruzzo] 5 – Me dispiace, ma ajere nun me piacette; ‘a fora ‘e ‘najusaida (assist),cu ‘nu tiro ‘e squina (corner) assummaje ‘nu palo cuoveto pecché s’allargajetroppo a mmancina addó avesse pututo tirà primma e ssignà; p’’o riesto me parette sempe poco mascullo (lucido).’O Lancone ‘o tenette troppo ‘ncampo e ppe mme ajere fósse servuto ‘e cchiú sant’Arcadio!

[da ll’ 83’ Diawara s.v.– Jucaje poco pe ddarele ‘nu zifo (voto)]

Insigne [Lorenzigno] 5,5 – Miezu zifo (voto) mancante pecché durante ô primmo ajone (tempo) se vedette quase ‘nnaccasione d’’o stuco(gol) ca ll’arbitro ll’annullaje e a ll’arrancua (ripresa) quase sparette assummanno sulo ‘nu paro ‘e cupuliamente (scambi) cu Cciruzzo. Troppo, troppo poco!

All. Ancelotti [‘O Jancone] 6 – Pecché se vincette, ma nun s’’o mmeretasse; ‘o vvedette ca Ciruzzo e Llorenzigno steveno aizanno porvere, ma isso nun ne cagnaje allimmeno uno tenennose ‘mpanca a ssant’Arcadio ca cu ‘o Frosinone êva signato ddoje vote e n’ato, assaje cauzante, cu ‘o Cagliare. Cucciuto!

Arb: La Penna 4 – ‘Stu rumaniso ‘e ll’uttantatré dimustraje d’essere spaisato e dde nun sapé che cacchio nce facesse ‘mmiez’ô campo e ssiscaje a vvienetenne. ‘A facette grossa annullanno ‘o stuco (gol) ‘e Lorenzigno, addaffa (rete) ca – sempe ca nunn’è ccagnato ‘o reculamento – era bbona dàtose ca ‘o frattese steva sí ‘nnattasallulo (fuorigioco), ma quanno signaje avette ‘a palla da n’avverzario ca ‘o mettette ‘nghiuco n’ata vota. Aggio paura ca pure chisto sta ‘ncopp’ô stato paca d’Agnelli e ccumpagne!

E ffermammoce cca, dannoce appuntamento, si ‘o Cielo ‘o vvo’ p’’e vintisette doppo d’’o sibbacco (match) ‘e meza semmana ca ‘o Napule va a ffà a Mmilano contr’â scuatra d’’o bBiscione. E nnun facimmo cunte o prunuostice. Ve faccio tante, tante avucurie pe ‘stu santo Natale e vve saluto. Staveti bbe’. R.Bracale Brak