Ghoulam ggiustraje a mmestiere, Ounas ascette chiammannose ll’applavuse

Napoli-Frosinone, pagelle in lingua: tutti promossi o quasi, voti leggermente sotto la sufficinza per Hysaj, Luperto e Insigne.

Ghoulam ggiustraje a mmestiere, Ounas ascette chiammannose ll’applavuse

Napoli-Frosinone 4-0 – ‘A vedette accussì

Trezziole,biancale, tricchi-tracche, fuja-fuje e bbotte a mmuro e â faccia ‘e tutte ‘e  cestarielle ca pure ajeressera steveno assettate ‘ncopp’ê bbemate (spalti) a mmenà ‘a seccia, ma  però se ll’êtteno ‘a ppiglià cchiù ddinto ‘e dint’ ô prozo pecché ‘o Napule, cumme a dduje anne fa, scutuliaje malamente ‘o Frosinone cunzignannole quatto purpette[ô 7’ cu Zielinski, ô 40’ cu Ounas[se] i ô 68’ e ll’84’ cu ssant’Arcadio ] una meglia ‘e ll’ate; ggià dô primmo ajone ‘o Napule mettette ‘e ccose ‘nchiaro e ‘ncopp’a ll’artanío (binario) justo, ma tutt’’a mubbara (partita) risultaje overamente ‘nu bbuon’arcabbanno (viatico) p’’o sibbacco (match) ‘mpurtante  ‘e Ciampionsa marterí ca vene a lLiverpul[lo].

Over’è ca ‘o Frosinone, ô ssolito, se dimustraje ‘a scuatra tramme a mmuro ‘e sempe e nnun ce dètte nisciuno ‘mpiccio, ma è ssempe ‘na bbella suddisfazziona vencere pe cquatto a zzero cu ttutto ca chella d’ajere fove poco cchiú ‘e ‘nu tarribbo (allenamento), ma ce cunzentette  ‘e cunoscere finalmente ô Lungagnone i ô Mmerecato    e de fistiggià a Ghoulam(me) ca doppo tridice mise turnaje ‘ncampo e ffoveno tutte nutizzie pusitive!Però ‘a nutizzia cchiú ppusitiva fove ca se vincette e llargo mantenenno ‘a porta acrata (inviolata) i ‘o passo d’’a vecchia zoccola, arrassano ‘e seje punte ll’Interra.

Mo nce attocca sulo ‘e passà ê ppaggelle:

Meret [‘O Lungagnone] 6 – S’êtt’’a spurcà ‘e guante sulo sott’ô trentesimo  pe ffermà ‘nu pallunetto  ‘e Maiello ca però ‘o facette accussí bbatí (lento) ca ‘o Lungagnone avette tutt’’o tiempo ‘e cessà arreto, pigliarse ‘nu cafè, fà ‘na telefonata e aizà ‘e bbraccia pe ppiglià ‘a palla; troppo poco, cumm’infatte da chillu mumento nunn’êtt’’a fà cchiú nniente  e ffove  ll’amico Luperto, ‘nzurduto a ‘ntrasatta,  ca arresecaje ‘e romperle ‘o saciccio, però pe ffurtuna nun succedette!

Hysaj [Meza Cucchiara] 5,5 – M’aspettavo ‘e vedé ‘o Tignuto, ma ‘o Jancone mettette a mMeza Cucchiara ca s’’a cavaje bbuono quanno fove chiammato a ffà coccosa; peccato ca però  nun ‘ncarraje manco ‘nu jabbro (cross), puirciò lle levo miezu zifo (voto).

Koulibaly [‘O Ggialante] 6,5 – Cummannaje ‘a trasera (difesa) a mmestiere senza maje perdere cuncentrazziona e ssenza nisciunu sfregazzo (sbavatura):praticamente matàlo (perfetto).

Luperto 5,5 – Miso ô posto d’’o Masto, nun facette guaje però verzo ô niajo (finale) d’’o sibbacco  (gara)),perdette ‘e rrecchie, nun sentette ô Lungagnone e arresecaje  ‘e fà ‘nu retissante (clamoroso) daffimarma (autogol). Pirciò ll’aggiu levato miezu zifo (voto).

Ghoulam 7 – Benturnato! Che bbella atalossa (prestazione)!Sciso ‘ncampo  doppo tridice  mise, nun parette neppure ch’êva passato ‘nu bruttu argiumiammo (calvario); marciaje ca fove ‘nu piacere a vvederelo e ggiustraje a mmestiere ‘e mancina: dduje jusaide (assist), ddoje addaffe (reti) ‘e sant’Arcadio.

Ounas [Ll’Arillo] 7,5 – Signaje n’addaffa (rete) assaje bbella sfruttanno a cciammiello ll’accasione ca lle dètte ‘o Jancone: ‘nun sulo ‘o stuco (gol), ma cchiú ‘e ‘nu ricamo ‘ncorza e jusaide (assist) a mmestiere nun sfruttate dê cumpagne.,  Ascette chiammannose ll’applavuse.

[dô 73′ Younes [‘O Mmerecato] 6,5 – Avette pochi minuti a ddispusizziona, ma ‘e sfruttaje bbuono trasenno ‘int’â muntaca (area di rigore)spaventanno ll’avverzarie e ddimustranno d’essere ‘e sustanza.]

Allan [‘O ‘Ngrifato] 6,5 – Nun se sparagnaje i ô ssolito jucaje cu ‘o sanco a ll’uocchie ricuperanno pallune e gghiucannole a cciammiello.

Hamsik [Marekiaro] 6,5 – Presenza custante ‘int’ô juco cuano (azzurro), gestiunaje (gestí) cu ppricisione e ‘nteliggenza.

[da ll’80’ Diawara s.v. – Jucaje poco pe ddarele ‘nu zifo (voto).]

Zielinski 7 – ‘Ncapo ‘e sette minute sbluccaje, cu ‘nu bbellu stuco (gol) ‘a fora ‘na mubbara (partita) ca s’êv’’a vencere assulutamente.P’’o riesto  d’’o sibbacco (match) dètte sulo ‘na bbona mana, però ‘o nnicessario ll’êva ggia ffatto!

Insigne [Lorenzigno] 5,5 – Me dispiace p’isso ma ‘e cchiú nun pozzo metterle datose ca se pigliaje ‘na jurnata ‘e cassura (pausa) zumpettianno p’’o campo senza cunchiurere niente; nun sulo: quanno avette ‘a palla bbona a ttu ppe ttu cu ‘o purtiere Sportiello, mmece ‘e fà ‘o tiro a ggiro ‘ncopp’ô palo sguarnito, tiraje ‘mbracci’ô purtiere ggià accuvato ‘nterra.

[dal 75′  Rog [‘A Bbelva] s.v.– Pur’isso jucaje poco pe ddarele ‘nu zifo (voto).]

Milik [Sant’Arcadio] 8 – Pe cquase 70 minute ‘e cumpagne se scurdajeno ca nce steva e nnisciuno ‘o cercaje  cupulianno (dialogando) cu isso; però po a ll’arrancua (ripresa) Ghoulam[me] mettette ddoje palle addó steva isso e sant’Arcadio ‘e mmettette dinto. Che piacere!

All. Ancelotti [‘O Jancone] 7 – Naturalmente ‘nvista d’’a Ciampionsa  facette ‘nu rutizzio  (turnover) sustanziuso , mantenenno però tanaseja  (competitiva) ‘a  scuatra e nce dette ‘o piacere ‘e cunoscere ô Lungagnone i ô Mmerecato e soprattutto ‘e vedé turnà a  Ghoulam(me) i a mme, finalmente! pure chillo ‘e vedé ‘ncampo dô primmo minuto a ssant’Arcadio ca ne facette dduje!

arb. Manganiello 5 – Grossi ffetenzie nun ce ne facette, ma spisso caputaje carí (falli) ‘ndanno d’’o Napule.

E ffermammoce cca assaje cuntente  ‘e cumme è gghiuta e  mmettimmoce cu ‘a capa ggià  a mmarterí ca véne quanno   se va a Lliverpul[lo] pe ppassà ‘o turno ‘e Ciampionsa; i’ ce crero e ssi Ddi’ vo’ ve ne parlo miercurí ca vène.

Staveti bbe’!

ilnapolista © riproduzione riservata