Inter-Napoli 1-0, 26/12/2018 – ‘A vedette accussì

Che tuosseco che ce agliettettemo e cche ccollera ca ce pigliajemo ajeressera guagliú! Mannaggia ô demmonio scartellato,che mubbara stramaledetta! Nc’è ppoco ‘a fà nsi’ a cquanno Dela nun se decide a ppurtà ‘mparanza ‘a scuatra nosta a mMuntevergene, o a pPumpeje o â Madonna ‘e ll’Arco pe ffarele bbenericere,  nuje ‘o nniro ‘e seccia ca da tiempo ce ànnu menato e nce menano ‘ncuollo ‘e tanti cestarielle ca ce perzeguitano, nuje nun ce ‘o llevammo ‘a cuollo e nun fenesce chello ca ce capitaje ajeressera a Mmilano contro â bbanda ‘e chella faccia ‘e cestunia vecchia  ‘e Spalletti, quanno perdettemo p’uno a zzero ô 91’ ‘na mubbara (partita) scamosa e ccumbattuta ca se fósse pututo vencere a ll’89’ p’uno a zzero si Zielinski ‘mmece ‘e tirà ‘nchiana terra êsse miso ‘na meza ponta sott’â palla p’’a fà trasí sotto a ll’afachia (traversa) addó nun fósse pututo arrivà ‘o madaffío (difensore) ca fermaje ‘o tiro ‘nchiana terra!

Nunn’’o ffacette e mmo stammo chiagnenno addó avessemo pututo stà redenno p’esserce accustate [leva e mmiette] ‘e duje ppunte â vecchia zoccola ca, cumme da cuntratto, êva russimato (pareggiato) jenno a bBergamo contro a una d’’e scuatre assinneje (satelliti) soje! E’mmece mo ce simmo arrassate ‘e nove punte e i’ ancòra nun me capacito ca ‘o Ciuccio fallette ‘accasione d’ accurcià’ncopp’â vecchia zoccola anze perdette n’atu punto a ppietto d’’a primma ‘ncrassifica   doppo d’’a  scunfitta d’ajeressera quanno, cumme v’aggiu ditto, chillu cesso d’Asamoah fermaje ‘a cunchiusiona ‘e Zielinski ‘ncopp’â linia   salvanno ‘a facenna e ppo  Lautaro Martinez(zo) ô 92’ ce futtette pigliannose ‘e tre ppunte ‘e ‘nu sibbacco (match) ca vedette ‘nu primmo ajone (tempo) ‘mmano a lloro ca però nun facetteno ‘mpressione addó a ll’arrancua ‘o Ciuccio jucaje meglio e pparette ca puteva fà soja ‘a mubbara (partita) allimmeno nsi’ a cquanno Mazzoleni nun penzaje bbuono [avenno capito ‘nu cacchio pe n’ato…] ‘e farece ‘a ‘nfamità ‘e jettà fora apprimma a uno ca steva facenno stravedé: ‘o gGialante, ‘nu pierno d’’a trasera (difesa) nosta, e ddoppo pure a lLorenzigno, ca però nun steva facenno manco ‘o saciccio. E ffenette cumme fenenette.mannaggia ô demmonio scartellato!

Bbasta va’  Passammo ê ppaggelle:

Meret [‘O Lungagnone] 6,5 – Bbona atalossa (prestazione) ‘a soja; paraje tutt’’o ppussibbile senza però fà ‘o miraculo ‘ncopp’ô tiro, ca nun vedette manco ‘e partí, ‘e Lautaro Martinez(zo) ô 92’. Peccato! Nun s’’o mmeretava ‘e piglià n’addaffa.

Callejon [Peppe ‘a ‘nguenta] 6 – Cumme ô  ssolito pusitivo, e ssempe carimmo (generoso) pure quanno, cumme ajere fove miso a ffà ‘o terzino!

Albiol [‘O Masto] 6,5 – Nun smarrunaje maje dimustranno ‘sperienzia i ammanna (sicurezza).

Koulibaly [‘O Ggialante] 8 – Pe mme s’’o mmereta pe cchello ca facette ggiustranno arreto, salvanno n’addaffa ‘ncopp’â linia e cumbattenno cu ccegna (grinta), forza e ssaluta   cu ‘nu malo accunto tenenno sempe  dint’ê rrecchie ‘o sfuttò d’’e muidde (tifosi) d’’a scuatra ‘e casa; ‘mpunente pure a ll’epata (fase) uffenziva. Peccato ca chella munnezza ‘e Mazzoleni, ca ‘o teneva signalato apprimma ‘o nutizziaje (ammoní) pe ‘na cosa ‘e niente e ppo, nun cuntento, ‘o jettaje fora quanno se penzaje ca ‘o Ggialante lle steva sbattenno ‘e mmané a sfuttò p’averelo nutizziato (ammonito), addó ca ‘o nuosto lle steva signalanno ca Politano, menannese ‘nterra,  êva cuovueto ‘a palla cu ‘a mana…. ‘Na cosa ca proprio nun se po’ pparià!

Mario Rui 5 – ‘Nu zifo (voto) mancante pecché ‘o  purtechese nun sulo sufferette assaje a pPolitano, senza maje farese vedé annante, ma   se purtaje ‘ncopp’â cuscienzia d’avé lassato sulo ô 92’ a Lautaro Martinez(zo). Bucciato!

[dô 77’  Ghoulam s.v. – Facette assaje poco pe ddarele ‘nu zifo!]

Zielinski 6 – ‘Nfra lieve e mmiette tnto s’ammeretaje cu ‘na bbona arrancua quanno facette quacche cusarella, pure si senza troppu zuco e ocunnimma e ‘nu primmo ajone (tempo) senza maje fà coccosa pe ffarese nutà, jucanno senza maje arresecà e ttruvà ‘a porta!

Allan [‘O ‘Ncrifato] 5 – Me dispiace metterle poco, ma ajeressera nun me piacette: ricuperaje sí quacche ppalla, ma senza mettere ‘a solita cegna (grinta) nicessaria, nè ffove priciso quanno facette quacche ppasiglio (passaggio) o tiraje; me parette pure a ccurto ‘e sciato.

Hamsik [Marekiaro] 5,5 – Me dispiace p’’o capitano, ma ‘e cchiú nun se mmeretaje: cumme lle succede spisso ‘int’ a  ccierti mubbare (partite) ‘e spessore, pure ajeressera se jette annascunnenno e ppo jellato cu ‘o ssupierchio ‘ncapo ‘e vinticinche minute se nn’êtte ‘ascí, doppo ‘e ‘na fessaria ‘nsustazzione (in impostazione), pe bbia ca a ppe isso se prucuraje n’arisabbo (infortunio) â coscia ‘e dritta.

[dô  25’  Maksimovic 5 – Purtroppo se mmeretaje ‘nu zifo (voto) mancante datose ca, trasuto a ffriddo, me parette ll’aseno ‘mmiez’ê suone sufferenno troppo assaje a pPerisiccio e ffacennose vedé poco o niente annante.]

Fabian Ruiz [Anema Longa ] 5 – Pur’ isso ajeressera se mmeretaje ‘nu zifo (voto) mancante datose ca nun ghiucaje bbuono mustrannose poco ésusso  (tranquillo) e ‘mpriciso quanno tiraje.

Insigne [Lorenzigno] 3,5 – E ll’aggiu trattato! ‘O frattese ajeressera fove ‘o peggio d’’a cummertazziona: maje ‘nu tiro decente, maje ‘na truvata geniale, maje ‘na ‘mmenzione sustanziosa; ‘nzomma troppi fessarie p’essere isso. Che lle sta piglianno? E cchi ‘o ssape! Pe gghionta ‘e ruotolo perdette ‘a capa e sse facette jettà fora secutanno, cumme a ‘nu criaturo ‘ncazzato a cKeità ca ll’êva pruvucato. Fesso!

Milik [Sant’Arcadio] 6 – Fove ‘o meglio lla nnante, jucaje jennose a ccercà ‘a palla, cuntrastananno e ccercanno ‘e custrí ‘o juoco; cercaje allora ‘e fà coccosa allimmeno ‘e capa, ma ‘e cchiú nun putette  dato ca  fove lassato sulo e scurdato e mmanco Lorenzigno cupuliaje cu isso! E cche sacicciO! Proprio nun capette pecché ‘o Jancone facette ascí ascí a isso e nno a lLorenzigno!!!.

[dô 71’ Mertens [Ciruzzo] 4,5 – Me dispiace ‘e metterle accussí ppoco, ma ancòra me sto’ addimannanno si trasette o rummanette ‘mpanca!]

all. Ancelotti [‘O Jancone] 5 – Me dispiace, ma quanno se perde ‘o primmo a essere respunzabbile è ‘o mutarribbo (allenatore) ca sbaglia, cumme sbagliaje ‘o nuosto ca ajeressera vulette fà ‘nu sibbacco (match) aspettanno ‘e ggrazzie ‘e Cesare, ‘mmece ‘e menà cresommele, e nnun ne caccaje niente; forze sfurtunato, ma pure scunchiusunato a llevà sant’Arcadio pe ttené ‘ncampo a lLorenzigno ca aizaje porvera.

arb. Mazzoleni 3 – ‘Stu coso curiuso ‘e ‘na manera o n’ata ce à dda sempe rompere ‘o pasticciotto; ajeressera ‘o facette siscanno, pe ppartito pigliato, sempe contro a nnuje e soprattutto cacciannone ô Ggialante pe ‘ndebbulirece ‘a trasera (difesa) e ffacette ‘o favore a Spalletti,â scuatra soja e soprattutto â   vecchia zoccola!

Fermammoce cca. E ssi dDi’ vo’ ce dammo appuntamento a ddummeneca  ca vene  doppo d’’a mubbara (partita) casalinca ‘e sapato vintinove  contr’ô Bbologna, n’ata scuatra scamosa ma ca se mmereta d’essere scardata ‘e ccorne… E ce   ll’âmm’’a scardà, guagliú! Assulutamente.

Staveti bbe’