ilNapolista

Sant’Arcadio ricette: ”Levateve ca m’’o vvech’i’!”

Cagliari-Napoli, le pagelle in lingua: il gol su punizione vale un voto altissimo per Milik, bene anche Zielinski e Allan.

Sant’Arcadio ricette: ”Levateve ca m’’o vvech’i’!”

Cagliari-Napoli 0-1, 16/12/2018 – ‘A vedette accussì

Che cuntentezza guagliú! canta Napule p’’a muimma (missione) aluaffata (compiuta) guagliú! S’êv’’a vencere e sse vincette, rummannno a otto punto dâ vecchia zoccola, ô ssolito aiutata a vvencere cu ‘o Turino e nun ve dico che ffesta ‘ntribbuna-divano ajeressera ô 91’ quanno sant’Arcadio ce ‘o mettette a ppitoffio a cchella faccia ‘e prozo cu ‘abarbetella ‘e Maràn(ne), a cCragno i ttutta scuatra soja [â faccia d’’e tanti cestarielle ca nce stanno sempe cu ll’uocchie ‘ncuollo e ca ce vonno male]e sse vincette, mettennoce tre ppunte dint’â sacca, ‘nu sibbacco (match) ca fove sulo scamuso e ppareva ca nun fossemo capace ‘e venirne a ccapo. Però ‘nCielo steva scritto ca se fósse vinciuto e ssuccedette. Pirciò, pe ‘na vota, che cuntentezza guagliú! Canta Napule E ppassammo ê ppaggelle:

Ospina [Pastacrisciuta] 7,5: Serata sí ‘e Pastacrisciuta ca se facette truvà sempe pronto ‘nu paro ‘e vote ‘nterra e ddoje o tre ascenno auto

Malcuit [‘O Tignuto] 7: Assaje cummincente ‘ncopp’â curzia ‘e dritta furnette n’atalossa(prestazione) ‘mpurtante e ascette sulo a ddiece minute dâ mustalà (dalla fine) pe ffà spazzio a pPeppe ‘a ‘nguenta

[Da ll’ 80’ Callejon [Peppe ‘a ‘nguenta] 6: Facette ‘o ssuojo]

Maksimovic 6: Mazziato quase subbeto, strignette ‘e diente e difennette senza sfregazze (sbavature) restanno però sempe arreto.

Koulibaly [‘O Ggialante] 6,5: Assaje pusitivo se facette sèntere e ccomme!, lla a ccentro.

Ghoulam 7: Taminno (prezioso) ‘ncopp’â curzia ‘e mancina e mmacú (insidioso) cu ‘e tire ‘e squina (calci d’angolo).

Ounas 6: Se détte da fà ‘ncopp’â curzia, ma cu ppocu zuco, faticanno assaje a vvacante!

[Dô 71’ Insigne [Lorenzigno] 6: Pur’isso cercaje ‘e fà coccosa ô niajo(finale), ma poco ne cacciaje.

Allan [‘O ‘Ncrifato] 6,5: Se piazzaje ‘nnante â tasera (difesa) nostafacenno ‘o cane ‘e presa.

Diawara 6: ‘A fora ‘e cocche sfregazzo (sbavatura) cu ‘e pasiglie (passaggi) curte, p’’o riesto jette bbuono.

[Dô 61’ Mertens [Ciruzzo] 6,5: Avette súbbeto ‘nu bbuonu tatirro (impatto.) cupulianno (dialogando) cu sant’Arcadio.

Zielinski 6,5: Se ‘mpignaje ‘nfra ‘e llinie tentanno inutilmente cocche cunchiusione.

Fabian Ruiz 6: Me fósse aspettato ‘e cchiú, ma, doppo ‘nu primmo ajone(primo tempo) scarzulillo criscette sulo a ll’arrancua (nel secondo tempo),assicuranno ll’artafavucca idadaja (superiorità numerica.). Poco!

Milik [Sant’Arcadio] 9: Se dètte da fà, ma pe bbona parte d’’o sibbacco (match) nisciuno lle dètte ‘na mana. Però nun se scuraggiaje e ccuntinuaje a ccapa sotta a ffà ‘o duvere suojo; sfurtunatiello apprimma cu ‘na bbona cabbesera (colpo di testa) mannaje ‘a palla a ffà ttittí-ttattà ‘nfra afachía (traversa) e turreno ‘e juoco, ma senza ca ‘a palla passasse ‘a linia janca…, però po, arrivate ô 91’, levaje ‘e vverole dô ffuoco ô Jancone jenno a ttirà isso [cundicenno a cCiruzzo e lLorenzigno:”Levateve ca m’’o vvech’i’!”] chella grama timmuria (punizione) ca ll’arbitro ce cuncedette e ppiazzaje ‘na cagliosa ‘int’â rezza ‘e Cragno ca se menaje, ma nun ce putette arrivà e sta ancòra rusecannose ‘a carusella! Overamente taminno (prezioso).

all. Ancelotti 6: Pecché se vincette e cquanno se vence vence ‘mprimmose ‘o muntarribbo (allenatore) ca pure ajeressera tenette arteteca cagnanno ‘nu tummolo ‘e jucature e ppresentanno n’atu taschello (schieramento) a ssurpresa tenenno fora a mMarekiaro, a lLorenzigno, a cCiruzzo, a pPeppe ‘a ‘nguenta, ma po, pe ll’idunzarrio (sprint) ô niajo (finale) fove custretto a ffà trasí ll’urdimi ttre, pure si ncunchiusione ce penzaje sant’Arcadio!

Arb. Doveri 3: A isso i â chenca soja: chisto ce porta bbuono, ma è scemo i ‘o ddimustraje cchiú ‘e ‘na vota ajeressera; ’ngenerale nun fove maje cummincente cu ‘e ddicisione a ccape ‘e saciccio pigliate; ‘mparticulare, chi sa’ pecché decidette ‘e nun siscà maje ‘na timmuria (punizione a ffavore d’’o Ciuccio manco cu ‘nu curtiello ‘ncanna e llassaje correre rtutte o quase ‘e carí (falli) ‘e ll’isulane; pe ffurtuna cagnaje ficra (idea) ô 91’ siscanno chella ca sant’Arcadio fravecaje ‘mporta. Vulite vedé ca fove chillo d’’a VARra ca ll’alluccarle ‘int’ê rrecchie: “Ma tu che ccacchio staje facenno? Chist’è ccarí (fallo), sesca!…” E isso ‘o ffacette. Menu male.

E ccu cchesto ve saluto, fermannoce cca e ddànnoce appuntamento, si dDi’ vo’ a ddummeneca ca vene doppo d’’a tarra (sfida) ‘e sapato a ll’ora d’’a tiella ô san Paolo contr’â scuatra ca scenne da Ferrara, pe ffarece ll’avucurie ‘e Natale e ppe ccuntarve ca ‘o Napule à vinciuto n’ata vota. Accussí sperammo. Staveti bbe’.

ilnapolista © riproduzione riservata