Sant’Arcadio ce mettette tre mminute pe ddà tre ppunte ô Napule

Atalanta-Napoli, pagelle in lingua: Milik protagonista, bravo Ancelotti. Tra i peggiori ci sono Maksimovic, Mertens e Callejon.

Sant’Arcadio ce mettette tre mminute pe ddà tre ppunte ô Napule

Atalanta-Napoli 1-2 – ‘A vedette accussì

Che suddisfazziona e cche sfizzio chella d’ajeressera quanno ‘o Napule jette a ccunquistà ‘int’ô cesso bbercamasco tre ppunte d’oro vattenno, pure si sulo pe ddoje a uno, ll’Atalanta [una d’’e scuatre assineje (satelliti)d’’a vecchia zoccola] e ddico suddisfazzione e sfizzio pecché ‘na nichemata (vittoria )’ncopp’ô campo bbercamasco tene sempe ‘nu sapore particulare datose ca lla s’è vvinciuto sempe poco, spisso  agliuttenno pinnule amare e, ppe gghionta ‘e ruotolo, suppurtanno uffese ‘e fuoco dê tifuse lucale.

Ajeressera però s’avutaje ‘o Vangelo, cagnajeno ‘e ccose e ffoveno lloro ca s’êtten’’a purgà p’alliggerí ‘e ddoje brasciole ‘mbuttunate ca ‘o Napule lle nfrucette ‘ncanna!’E ccose jetteno accussí: s’era accumminciato da scarze dduje minute quanno ‘o Ciuccio mettette súbbeto ‘e fatte ‘nchiaro facenno capí ê lucale qua’ erano ‘e ‘ntenzione soje  e Anema Longa accumparenno a ccentro d’’a muntaca (area di rigore)jette a rrecogliere ‘na granna palla ‘e Lorenzigno e cce ‘o mettette a ppitoffio acchillu mastammuoccelo ‘e  Berisha purtannoce ‘mmeizo (in vantaggio); se cuntinuaje cu ‘o Napule ca attaccaje a ccapa sotta e avette allimmeno n’atu paro d’accasione p’aumentà ‘o meizo (vantaggio), ma purtroppo nun ‘e sfruttaje accussí quanno se jetteno a ppiglià ‘na cosa cavera ce fermajemo ‘ncopp’a ll’uno a zzero nuosto.

Turnate ‘ncampo pe ll’arrancua (ripresa) ‘a scuatra ‘e chella faccia ‘e cestunia vecchia ‘e Gasperini  s’urganizzaje cercanno ‘e farese vedé d” pparte ‘e Pastacrisciuta,ma senza cacciarne niente nsi’ a cquanno ô 56’ Zapatone mantenuto ‘nghiuco da chillu ‘ntontero ‘e Maksimoviccio nun recugliette sotto porta ‘na palla streveza e rrussimaje (pareggiò). A ‘stu punto, che v’aggi’’a dicere, ce scennette ‘o core ‘int’ê ccazette e ‘ntribbuna divano s’accumminciajeno a ffà scungiure aspettanno ca ‘o Jancone se ‘mmentasse coccosa pe risolvere ‘a facenna, ma êttem’ ‘aspettà nsi’ a ll’82’ quanno finalmente  se decidette a ffà trasí a ssant’Arcadio ô posto ‘e Ciruzzo ca steva facenno poco o niente e ffove proprio ‘o pulaccone nuosto ca ‘ncapo ‘e tre mminute [85’], cu ‘a primma palla decente tuccata, ce levaje ‘e vverole dâ vrasa signanno n’addaffa (rete) ca lèvate[cuntrollo ‘ncorza ‘e carigginno (esterno) mancino e ssempe cu ‘o stesso pere palla ê spalle Berisha]. E ffove allora ‘na nichemata (vittoria) nicessaria e mmeretata guagliú!!!

Passammo ê ppaggelle:

Ospina 6 – Nun’ êtte ‘a fà quase niente ‘a fora ‘e ggestiunà cca e lla ‘o pallone cu ‘e piere e  nnun tenette itimma (responsabilità) ‘ncopp’a ll’addaffa (rete) pigliata

Maksimovic 5 – Turnato titulare nun facette tutto chello ca Jancone se fósse aspettato: troppi prane (errori), mustrannose spisso poca sicurtà (sicurezza) e ssenza maje scennere ‘ncopp’â curzia soja p’appressurà (spingere); facette ‘a frittata ô 56’ mantenno  ‘nghuioco a  zZapatone ‘nnaccasione d’’o stuco (gol) bercamasco ca fove tutt’itimma (responsabilità) soja; ‘nzomma serata no

[dô 77′  Hysaj [Meza Cucchiara] 6 – Facette ‘o duvere suĵo]

Albiol [‘O Masto] 6 – Zapatone lle dètte che ffà ,e isso nun se sparagnaje cumbattenno cu ‘e bbone e ccu ‘e ttriste.P’’o riesto cuntaje seje sarvatagge, dduje pallune ‘ntercettate e dduje tire stuppate!

Koulibaly [‘o gGialante] 7 – Nun sbagliaje praticamente niente nè tacatammanno (anticipando),nè marcanno e ffacette valé tutt’’a forza e pputenza ‘e ll’arbadanía (fisico) soja.

Mario Rui 7,5 – Forze ‘a meglia mubbara (partita) d’’o purtuchese ca fove uno d’’e meglie soprattutto arreto cu ttre o quatto nchiusure troppo bbelle; ‘e cchiú fove isso ca a ll’85’ rijalaje a ssant’Arcadio a palla d’’o doje a uno.

Callejon [Peppe ‘a ‘nguenta] 5,5 – Miezu zifo (voto) mancante pecché manco ajeressera riuscette a spezzà (interrompere ) ‘o dijuno ca cuntinua ggià da troppu tiempo, rummanenno a ssicco e mmantenennose sempe troppo vascio.

Allan [‘o’Ncrifato] 6,5 – ‘E gammuncielle (muscoli) suoje se sentetteno e ccomme ‘mmiez’ô campo e ll’arbitro nun lle sparagnaje quase súbbeto ‘nu cartellino jalizzo ca ‘o cundizziunaje ‘nu poco.

Hamsik [Marekiaro] 6 – Me fósse aspettato ‘e cchiú dô capitano ca ‘mmece faccette ‘o stritto nicessario senza esaggerà maje, gestiunanno  (gestendo) quacche ppallone ca lle capitaje, ma senza maje furzà ‘a jucata.

Fabian Ruiz [Anema Longa] 6,5 – Ce mettette sí e nno  90 sicunne pe sbluccà ‘o sibbacco (match) e pp’’o riesto dètte ‘na bbona mana arreto, ma a ll’arrancua  (ripresa)se ne scennette ‘e posa

[dô 77′  Zielinski 6 – Facette sulo atto ‘e presenza.]

Insigne [Lorenzigno] 5,5 – Miezu zifo (voto) mancante pecché si è overo ca  ajeressera mettette ‘mmiezo súbbeto chella bbella palla sfruttata da Anema longa,ma fove ‘a sola cosa apprezzabbile pecché po dette sulo ‘na mana arreto e all’arrancua (ripresa) praticamente sparette.

Mertens [Ciruzzo] 5 – Me dispiace pe ll’arillo berga ca ajeressera fove d’’e pegge e aizaje porvera pe troppu tiempo e ‘o Jancone s’’o chiammaje ‘mpanca…ma ‘o ffacette troppo tarde!

[da ll’ 82′ Milik [sant’Arcadio] 8 – Ce mettette justo tre mminute pe rrijalà ô Napule tre ppunte overo d’oro signanno n’addaffa (rete) spettaculare, cuncentraton ‘e  Il gol è da bomber vero, un concentrato  ‘e tacnia (tecnica) e pputenza. Êss’ avuto ‘a trasí primma!]

all. Ancelotti [‘O Jancone] 6,5 – Scigliette ‘e servirese ‘e ll’unnece ‘e Ciampionsa e nnun se sbagliaje, pure si dduje o tre ‘e lloro lassajeno a ddesiderà, ma smarrunaje forte a nnun fà trasí primma a ssant’Arcadio!

Arb. Giacomelli 5 –  ‘Stu triestino è scemo, fesso e ccecato, grossi fetenzie nun ce ne facette,ma siscaje a bbienetenne cumme si nunn’avesse maje liggiuto ‘o reculamento e nnutizzaje (ammoní) ‘e cuane â primm’accasione, ma fove ‘e maneca larga cu ‘e lucale!

E fermammoce cca cuntente ‘e cumme jette e soprattutto d’avé mantenuto ‘o passo d’’a vecchia zoccola. Mo ‘o Napule torna  a gghiucà p’’o campiunato sapato ca vene, p’’a ‘Mmaculata e ppirciò  si dDi’ vo’ ce sentimmo dummeneca  ca vene  e  spero ca ve pozzo   cuntà ca   ‘o Napule à vinciuto n’ata vota  visto ca sàpato ce ‘a vedimmo cu ‘o Frosinone  ca  nun me pare ch’è ‘nu   bbrutto accunto (cliente)!Sempe ca nun me sbaglio. Staveti bbe’.

 

ilnapolista © riproduzione riservata