N’ata meza delusione doppo d’’o ttuosseco a Parigi

Migliore in campo Koulibaly che si è meritato un 7,5. Ancora una volta il recupero è stato fatale al Napoli di Ancelotti

N’ata meza delusione doppo d’’o ttuosseco a Parigi

Mannaggia ê cane ‘e cancielle

Mannaggia ê cane ‘e cancielle, guagliú! N’ata meza delusione ajeressera ô san Paolo zeppato ‘e ggente… E sí, sí pecché  doppo d’’o ttuosseco ca ce pigliajemo ô vintiquatto d’uttombre a pParigge addó chille d’’o  Parísangermèn(ne), ce angappajeno ‘ncopp’ô doje a ddoje, ‘int’a ll’ antijsso (recupero) a ppochi siconne dô mustalà (fine) e cce levajeno ‘o sfizzio ‘e vatterele â casa lloro, nujeaute ‘ntribbuna divano c’eramo frusciate ca ‘o Ciuccio se fósse vennicato ô san Paolo… vincenno e ‘mmece ‘mmece nunn’êvemo fatto ‘o cunto cu ‘a jastemma ’e ll’ antijsse (recuperi)ca pure ajeressera nce custajeno care e d’’e troppi cestarielle ca ce teneno ll’uocchie ‘ncuollo.

E ccumminfatte ajeressera jettemo sotto p’uno a zzero ô 47’accumminciato, ‘int’a ll’ antijsso (recupero) d’’o primmo ajone (tempo)[ca pe ll’arbitro êss’avuto fermarse ô 46’] e a ll’arrancua (ripresa) êttem’’a secutà ‘o natiggia (risultato) e ccumme ‘o Cielo vulette ce riuscettemo sulo ô 62’ quanno Lorenzigno signaje tiranno a mmestiere ‘o  ricore ca ll’arbitro ce aveva giustamente cuncesso pe bbia ca Buffon(ne) ‘nchietta cu tThiago Silva êveno arrunzato a pPeppe ‘a ‘nguenta stennenolo.

E accussí pure ajeressera, cumm’era succieso a pParigge c’êttemo accuntentà ‘e ‘nu russimmo (pareggio) ca però ce sta stritto visto ca ‘e francise, pe ttutt’’o primmo ajone (tempo) nunn’êveno fatto ato pe vvencere ca ‘e cuntrullà ‘a zurea (il ritmo) senza maje però mettere serie penziere a pPastacrisciuta,addó ca ‘o Napule, turnato ‘ncampo cu ‘o sanco a ll’uocchie, primma d’angappà ‘o russimmo (pareggio) martellaje ‘a porta d’’e francise e ppe ddoje o tre vvote Ciruzzo jette vicino a mmenarla dinto e bBuffon(ne) c’ êtt’’a mettere ‘na pezza tanto ca abbiajemo a ppenzà: “ Vuó vedé ca chesta è ‘na ‘na mubbara (partita) signata!?…”

‘Nzomma, pe ccomme jetteno ‘e fatte, si ‘o Napule êsse vinciuto pe ddoje a uno nun fósse stata cosa scannalosa e nnisciuno êsse pututo dicere niente! E ‘mmece fenette cu ‘nu russimmo (pareggio) e mmo mo, doppo ca ‘a Stella Rossa vattette ‘o Liverpul(lo), p’‘o trascurzo artairra (qualificazione) pe cumme s’è mmisa ‘a crassifica, se ne parla doppo ll’artalle sibbacche (i prossimi match)… E i’’a penzo pusitiva!

Passammo ê ppaggelle

OSPINA[Pastacrisciuta] 6   ‘Ncopp’a ll’addaffa (rete) pigliata cu ‘nu tiro da troppo vicino, putette fà assaje poco; p’’o riesto nunn’êtte ‘a fà cape d’angelo!

MAKSIMOVIC 6  È overo ca mantenette bbona ‘a pusizziona e ppruvaje a scennere ‘ncopp’ô curzia ‘e dritta, ma ‘naccasione d’’o stuco  (gol) d’’e francise [47’] cadette, cumme a ‘nu marvizzo,‘int’â casaròla   (trappola) ‘e Mbappè,lassannolo pasiglià (passare) ‘a palla a bBernat(te) ca ce futtette. [Dô 76’ HYSAJ[Meza Cucchiara] 6  Trasette cu ‘a capa justa luttanno ‘ncopp’a ògne ppallone. Bravo!]

KOULIBALY[‘O Ggialante] 7,5  Lle sto’ ancòra sbattenno ‘e mmane pe ccomme durante ô primm’ajone (tempo) levaje palla a Mbappè ‘mmitannolo a ss’alungà ‘a palla pe ppo arpiunarla levannocela dê piere.P’’o riesto  vederlo jucà fove sempe ‘nu spettaculo.

ALBIOL[‘O Masto] 6,5 – Chiammato a frunteggià avverzarie malentenziunate, o cu ‘e bbone o cu ‘e ttriste riuscette a ffà ‘o spezziale cu granna sperienzia.

MARIO RUI 6   Tutto summato lle pozzo dà ‘o seje pure si jette meglio a ll’epata difenziva  (nella fase difensiva) ca a cchella uffenziva.

ALLAN [‘O ‘Ncrifato] 6,5  ‘Nu cane ‘e presa ca jette ‘ncopp’a ògne ppallone cu ccegna (grinta) e azzaja (rabbia) mettenno toppa a ògne artadidda (minaccia). Sette purmune, nun se fermaje maje.

HAMSIK[Marekiaro] 5,5   Me dispiace ‘e nun puterle mettere ‘o seje, ma ajeressera ‘o capitano nun facette sèntere ‘a presenza soja e ggiraje a vvacante senza riuscí a ffistiggià a ‘o fatto d’avé surpassato a pPalo ‘e Fierro/Bruscolotti cumme primmo jucatore d’’o Napule pe mmubbare (partite) jucate. FABIAN RUIZ[Anema Longa] 5,5 ‘A chiena i ‘a vacante:se cumpurtaje a mmestiere ‘ncuntrasto, ma venette meno quanno se trattaje ‘e bbinà (costruire) e ccunchiundere ‘mporta.[dô 70’ ZIELINSKI 6   Pe ‘nu lato se dette da fà cu ttantu muvimento cercanno ‘e arapí ‘a chesema (varco) justo p’’e cumpagne, ma pur’isso nun cercaje maje ‘a porta. Peccato! ]

CALLEJON[Peppe ‘a ‘nguenta] 7  S’’o mmereta, cumme si êsse signato,  pecché cunquistaje ‘o ricore  d’’o russimmo (pareggio) futtenno ‘nchietta a tThiago Silva i a bBuffonn(e) cu ‘a cata  (taglio) soja arzamma (velenosa) e pp’’o riesto sulo Kherer(re) lle levaje ‘o sfizzio ‘e signà salvanno â disperataO

MERTENS[Ciruzzo] 6,5  Se dette da fà soprattutto a ll’arrancua (ripresa) bumbardanno ‘a porta franciosa, ma Buffon(ne), mannaggia a isso, ‘o fermaje sempe. Nun putette arrivà ô 90’ pe bbia ‘e ‘nu ‘mpiccio â spalla e sse nn’êtte ascí. Peccato![Da ll’82’ OUNAS s.v.Jucaje pochi minute e nnun lle se po’ ddà ‘nu zifo (voto). ]

INSIGNE[Lorenzigno] 7  Sempe cchiú zzaimmo (leader) d’’a scuatra, se dette da fà e  ‘nnaccasione d’’o ricore  tiraje overo bbello, futtenno a bBuffon(ne), cu ‘a freddezza d’’e granni jucature. Applavuse.

all. ANCELOTTI [‘O Jancone] 7 Se vedette e ccomme ‘a mana soja’int’ô juoco e ll’aglía (mentalità) d’’e jucature ca nce credetteno sempe e tturnate ‘ncampo cu ‘o sanco a ll’uocchie rispunnetteno â pruvucazziona d’’o stuco (gol) franciso, scamazzanno ‘a scuatra ‘e Cavani e ccumpagne ‘int’â mità ccampo soja nsi’ a ccunquistà ‘o russimmo (pareggio). Se ‘ncazzaje ggiustamente  cu ll’arbitro ca aveva cuncesso ô 45’ uno minuto  d’antijsso (recupero), ‘mmece – senza mutivo facette jucà nsi’ ô 47’ cunzentenno ê francise ‘e signà. 

arb. KUIPERS 5,5 – Arbitro ‘e granna ‘sperienza guvernaje a mmestiere ‘nu sibbacco  (match) dellicato, sbaglianno poco o niente ‘a fora d’’o fatto ‘e ll’antijsso (recupero) allungato a bbienetenne, cosa ca lle fa perdere miezu zifo (voto)!

E ffermammoce cca, cundicenno ca ajeressera  ‘o Napule dimustraje d’essere ‘na granna scuatra e ca ‘o russimmo pe ddoje a ddoje a Pparigge nun era stato ‘na bbotta ‘e mazzo, tante è overo ca ajeressera riaggette cu ccegna (grinta) forza e  azzaja (rabbia) a ‘nu stuco (gol) ch’êsse spezzate ‘e ggamme a cchiunque, ma no a unnece liune cumm’ê cuane (azzurri).

Bbasta accussí, mo se torna a gghiucà p’’o campiunato e ssi ‘o Cielo ‘o vvo’ ll’appuntamento è ppe ddummeneca ca vene quanno penzo e putereve cuntà ca sàpato a ssera jenno a gGenoa contr’ô Crifone ‘o Ciuccio ll’à sciaccato mettennose tre ppunte dint’â sacca. Accussí spero.

Staveti bbe’ R.Bracale Brak

ilnapolista © riproduzione riservata