Diawara perdette rica e ccumpasso, Insigne sparette dô campo

Sampdoria-Napoli, le pagelle in lingua: tutti bocciati, compreso mister Ancelotti. Solo Allan e Milik vanno vicini alla sufficienza.

Diawara perdette rica e ccumpasso, Insigne sparette dô campo

Sampdoria-Napoli 0-3 – ‘A vedette accussì

Che ccollera guagliú: da stanotte sto’ mmagnanno fèle e ttuosseco. Nun ce pozzo credere pecché jí a mMarassi e ppiglià tre ppallune da chilli quatto zappielle ‘e Giampaolo, senza riuscí a ssignà… è ‘na cosa can un sta né ‘ncielo, né ‘nterra e nun se po’ pparià. ‘Mmece, proto chesto succedette ajeressera ca ‘o Napule turnaje da Ggenova, no cu ttre ppunte dint’â sacca, cumme ce aspettavemo ‘ntribbuna divano…, ma cu ttre ppallune ‘int’ô sciavechiello ca cu cchille pigliate cu lLazzio e mMilanno fanno ggià seje palle recovete a ppietto d’’e ssóle cinche fatte: troppe pe stà sulo â terza ‘e campiunato… Che ccollera guagliú, che ffèle e cche ttuosseco! Ma pe fforza, pe fforza visto ca ajeressera ‘o Napule nun ce stette ,i ‘e Sampdoria ce ne fove troppa, tant’è overo ca, ascette fora d’’o semmenato, ggià ‘int’ô primmo ajone (tempo) mettennoce sotto pe ddoje a zzero cu cu ‘nu Defrel(le) scatenato ca pe ddoje vote [11’ e 32’] ce facette chiagnere i ‘a scuatra duriana mettette ‘a jonta i accunciaje ‘o piso a ll’arrancua (ripresa)cu ‘na magaria ‘e mMerdarella ô 75’. I ‘o Napule? ‘o Napule niente!

Sparette dô campo doppo diece minute, doppo ll’unica azziona fatta ca vedette Lorenzigno sotto porta anticipato da Tonelli; da chillu mumento ‘e guagliune d’’o Jancone sufferetteno assaje ‘o juoco d’’e duriane e nnun ffoveno cchiú ccrestiane ‘e riaggí perdenno troppi pallune soprattutto a mmità ccampo e gghietteno ‘int’ê cchiavette arreto, ‘mmiezo e annante addó sulo sant’Arcadio cercaje ‘a porta duriana pure si maje periculosamente, fora ‘e ‘na vota ca mettette ‘o pallone dinto e cchillu cesso ‘e Massa [ch’è d’Imperia, capisce a mme] ce ll’annullaje pe ‘nu carí (fallo) ‘ncuoll’ô purtiere, ca vedette sul’isso dàtose ca sant’Arcadio rummanette fremmo senza moverse i ‘o purtiere lle se menaje ‘ncuollo.’Nzomma capite?:’a funicella corta i ‘o strummolo tiriteppo! Che fine à fatto ‘o Napule ‘e Sarri? Ora mo p’’o Jancone ‘o fatto è ttrist’assaje e ttène assaje ‘a faticà soprattutto accuncianno ‘e muvimente d’’a trasera (difensa) e ggestiunanno (gestendo) meglio ’a uarrada (rosa), visto ca oramaje chille so’ ‘e jucature ca tène a ddispusizziona!

A ‘stu punto lle mettesse quatto ‘mparanza,ma p’essere cchiú ppriciso, meglio passà ê ppaggelle:

Ospina 4 – Nunn’è ppussibbile tené ‘mporta uno ca ‘int’a ddoje mubbare (partite) cumplessivamente à pigliato quatt’addaffe (reti) cu cquatto tire arrivate ‘int’ô parlà’nfaccia d’’a porta; ajere ‘ncopp’ô primmo partette tarde e ‘ncopp’ô siconno se facette piscà piazzato malamente! E cche saciccio! Mettimmoce po ll’argavelle (disattenzioni) d’’a trasera (difesa) i ‘o quatro è ccumpleto!

Hysaj 4,5 – Ajere abballaje malamente pe troppu tiempo e ffacette overo ‘na pazzaria lassanno a dDefre(le) pe gghí a ttampunà a qQuagliarella ‘nnaccasione d’’o doje a zzero!

Albiol [‘o Masto] 4,5 – Me dispiace p’isso, ma nun fove chillo ‘e contro ô Milan(ne); ajeressera perdette spisso ‘a tramuntana sosprattutto cu mMerdarella ca ‘ncopp’ô doje a zzero s’’o facette cumme a n’arbetta (principiante)! Che ppeccato!

Koulibaly [‘o Gialante] 5 – Pure pe isso serata assaje cumpricata: nun riuscette a nchiudere ‘ncopp’ô miscio (vantaggio)n duriano e ffove carriato ‘int’â lota ‘nzieme a ttutt’’a trasera ‘nnaccasiona d’’a pareglia (raddoppio).

Mario Rui 4,5 – Fallette mo arreto, mo annante e ttutt’’e tre stuche (gol) ‘o vedetteno armannío (coinvolto) ‘e ‘na manera o ‘e n’ata: sliccato (scavalcato) dô lubbo (pallonetto) ‘ Saponara ‘ncopp’a ll’uno a zzero e ppigliato p’’o prozo ‘ncopp’ô doje e ttre a zzero!Nun ce simmo!

Allan 5,5 – Pe pparicchiu tiempo fove quase ll’unico a ppruvarce i a ffarese rispettà… po però pur’isso fove carriato ‘int’â zoza cu ‘o riesto d’’a scuatra misa sotto da ‘na Sampedoria ca nun ce aspettavemo.

Diawara 4,5 – Me deludette: tedussato (travolto) da ll’armidanno (centrocampo) duriano troppo ‘nsaluta, perdette rica e ccumpasso, jette ‘int’ê cchiavette, se ‘ncazzaje e arresecaje d’essere jettato fora primma ca ‘o Jancone s’’o chiammasse ‘mpanca.

[Dô 71′ Rog 5 – Facette assaje poco]

Zielinski 4,5 – Nun ce simmo: cchiú ‘e ‘nu passo arreto a ppietto ‘e chello fatto contr’ô Milan(ne): ajere jucaje senza ggenio zappettanno ‘o tturreno senza nisciunu zuco e cquanno lle capitaje ‘na palla bbona ‘nciampecaje ‘ncopp’ô pallone e nnun cunchiudette ‘nu cacchio!

Verdi 4,5 –  N’ata delusiona: ‘a fora ‘e quacche jabbro (cross)sbagliato,nun se nutaje e ddoppo meza antraffa (partita) fove chiammato ‘mpanca. [Dô 46′ OUNAS 5,5 Trasuto pe vvedé ‘e adderezzà ‘a varca ‘nfra chilli lla lla ‘nnante fove ‘o cchiú zzéruso (dinamico) ca pruvaje a ccagnà coccosa.]

Milik [Sant’Arcadio] 5,5 – Lassato sulo e ppigliato ‘mmiezo dê centrale duriane avette pochi pallune da jucà e rriuscette ‘nu paro ‘e vote a ffà spurcà ‘e guante a Audero, pure senza darle penziere. Cumme v’aggiu ditto signaje pure, ma – ripto – cchillu cesso ‘e Massa ce ll’annullaje pe ‘nu carí (fallo) ‘ncuoll’ô purtiere, ca vedette sul’isso dàtose ca sant’Arcadio rummanette fremmo senza moverse i ‘o purtiere lle se menaje ‘ncuollo.

Insigne [Lorenzigno] 4,5 – ‘Int’ê primme minute avette ‘na bbona accasione, ma se facette anticipà da Tonelli; po sparette dô campo e ‘o Jancone ll’êtt’’a chiammà ‘mpanca doppo quarantacinche minute! [Dô 46’ MERTENS[Ciruzzo] 5 ‘A serata nun fove bbona manco p’isso ca nun riuscette a spaccà ‘o munno cumm’êsse vuluto. Che ppeccato!

all. Ancelotti [‘o Jancone] 4 – Quanno se perde piglianno tre ppalle senza signà ‘a primma itimma (responsabilità) è d’’o mutarribbo (allenatore) ca mannaje ‘ncampo ‘na scuatra ca perdette cumpletamente mesure e fficre (idee), abballaje malamente cumme si êsse tenuto ‘o male ‘e mare, cumpletamente scuatrata arreto, ‘mmiezo e annante!Nun tutt’’e mise songo ‘e trentuno e nun ce putevemo penzà ‘e vencere asbedallanno (rimontando) cumm’’int’ê pprimme ddoje antraffe (partite)! È mmeglio ca se scorcia ‘e mmaneche e ffatica seriamente vedenno chello ca s’à dda fà! Ca ggià simmo sciuliate ô quinto posto ‘ncrassifica! Che fine à fatto ‘o Napule ‘e Sarri?

ArbMassa 4 – Nun sulo p’’o fatto ‘e sant’Arcadio, ma pure pecché – pe ppartito pigliato – siscaje sempe contr’ô Napule, favurenno ‘e duriane!
E bbasta accussí. Dummeneca nun se joca pe ddà spazzio â nazziunala tagliana i allora si ‘o Cielo ‘o vvo’ ce sentimmo pe llunnerí diciassette settembre doppo d’’o scontro casalinco cu n’atu bbrutto accunto:’a Fiorentina. E sperammo ca nun facimmo n’ata grezza!

Staveti bbe’

ilnapolista © riproduzione riservata