Sant’Arcadio è jucatore cumpleto, Allan facette ‘o cane ‘e presa

Napoli-Parma, le pagelle in lingua: tutti promossi, tanti voti positivi, Lorenzo Insigne è un faro per il gioco d’attacco di Ancelotti.

Sant’Arcadio è jucatore cumpleto, Allan facette ‘o cane ‘e presa

Napoli-Parma 3-0, 16/9/2018 – ‘A vedette accussì

Mo sí, mo sí guagliú! Finalmente s’accummencia a vvedé ‘a mana d’’o Jancone e ffinalmente ajeressera arrivaje ‘na nichemata larga e soprattutto mantenenno ‘a porta acrata (inviolata)! P’’a verità ‘a mana ggià s’era vista a tTurino, ma ajeressera se vedette ‘e cchiú, se vedette ‘nu rutizzio (turnover) esaggerato, ma ca funziunaje e sse vedette finalmente ‘na nichemata (vittoria) sustanziosa ca però êsse avut’ ‘a essere cchiú ‘mpurtante ggià dô primmo ajone (tempo) si sulo Anema longa e soprattutto Zielinski êsseno  sfruttate quatto  bbon’accasione avute e avesseno centrato ‘o parlà ‘nfaccia d’’a porta tucale ‘mmece ‘e sparacchià pallune ‘ncurva senza fà manco ‘o cellechio a sSepe.

Niente ‘a fà: ‘a porta nunn’ ‘a centrajeno e c’êttemo accuntentà ‘e nchiudere ‘o primmo ajone (tempo ‘ncopp’a ll’uno a zzero signato ô 4’ ‘a Lorenzigno ca sfruttaje a mmestiere ‘na bbella palla ‘e sant’Arcadio, spurcata da ‘nu tucale e avettem’ ‘aspettà ll’arrancua pe vedé ‘o stesso sant’Arcadio agghiustà ‘o piso d’’e ppurpette date ô Parma ‘na vota ô 47’ quanno Lorenzigno lle dette ‘na palla ‘ncopp’â via nova e isso ‘a sfruttaje cu ‘nu panesiglio da vinte metre e n’ata vota a ll’84’ quanno ‘o zacrarusullo (ariete) pulacco se facette truvà appustiato ô mumento justo,ô  posto justo azzicco ô palo ‘e mancina pe mmenà dinto ‘na palla ‘e Verdi forte e ttotra (tesa) passata ‘mmiez’ê ccosce ‘e duje ducale. ‘Nzomma ‘nu stuco  (gol) ô primmo ajone   (tempo) e dduje ô siconno  e ppure ‘o  Parma avette ‘e ppurpette soje i  ‘o Ciuccio se mettette dint’â sacca ‘a quinta nichemata (vittoria) ‘ncopp’a sseje jucate ‘ncampiunato,  sei turni di campionato,n’ arnaca  (successo) nicessaria pe presentarese a mmestiere sapato ca vene a ll’ora d’’e ppastarelle a tTurino ‘int’ô cesso d’’a vecchia zoccola e llanzarle ‘a tarra  (sfida) speranno ‘e cherrà (ripetere) ll’arnaca  (successo) d’’a tempurata (stagione) passata quanno ‘o gGialante ce ‘o mettette a ppitoffio ô meglio  purtiere d’’o munno i ‘o facette chiagnere!P’’o mumento nun dammoce nisciunu punio ‘mpietto e ppassammo ê ppaggelle:

Karnezis [‘O Creco] 6 – Pe nnun metterle s.v. visto ca nun’êtte’a fà quase niente ‘a fora ‘e ‘nu paro ‘e tacculle(interventi) aute, fatte a dduvere, cu ‘e punie.

Malcuit [‘O Tignuto] 6,5 – ‘A nuvità… e cche bbella nuvità! Me piacette assaje ‘stu guaglione d’’o nuvantuno ca nun sbagliaje ‘na chiusura, se magnaje ‘a curzia soja e appressuraje (spinse) cumme a ‘nu dannato, ricuperanno palle, zuppanno avverzarie  e mmettenno ‘mmiezo. Penzo ca Meza Cucchiara se po’ arrepusà cu ccommeto!

Koulibaly [‘O Ggialante] 6,5 – Lassato senza ‘o Masto fove isso a rrejere i a ccummannà  ‘a trasera  (difesa) e pp’uno cumme a isso ‘o Parma nun fove ‘nu prubblema.

Maksimovic 6 – Pe nnun metterle s.v. visto ca nun’êtte’a fà quase niente e mmiso dô Jancone pe ffà arrepusà ‘o Masto ‘nvista ‘e sapato,turnaje â casa dopp’ô sibbacco (match) senza farese ‘a doccia.

Mario Rui 6,5 – ‘A curzia ‘e mancina ‘o vedette sempe appressurà (spingere), tentaje ‘e signà cu ‘o pere ‘e dritta i ‘o sfresaje cu cchillu mancino.

Allan [‘O ‘Ncrifato] 7 – Senza Marekiaro fove isso ‘o cchiú vviecchio ‘e ll’armidanno  (centrocampo) e ss’’a vedette ‘e bbella mettennoce corza cegna (grinta) azzaja(rabbia) surore facenno ‘o cane ‘e presa i azzannanno ê feliette ‘e chi capitava pe ttutt’’o campo.

Diawara 6,5 – Superaje ll’esame ‘e jucà ô posto ‘e Marekiaro cu ‘na riggia  urdinata e ppricisa ‘mpignasse tanto ca a ll’urdimi minute lle venetteno ‘e ttesenne (crampi).Scummetto ca po’ ffà pure ‘e cchiú e fforze se ll’aspetta pure ‘o Jancone.

Zielinski 6 – ‘E cumpiacenza, pecché ce avesse levà miezu zifo (voto) visto ca ajere sciupaje allimmeno tre bbone accasione avute sparacchianno a ssalve fora e ddimustranno ‘e nunn’avé ancòra pariato ‘a pusizziona nova e ccercaje d’accentrarese troppo.

[Dô 76’ Verdi 6 – Currette tanto,se dètte da fà e mmettette ‘na granna palla ‘int’â muntaca (area di rigore) ca sant’Arcadio mettette a ffrutto.

Fabian Ruiz 6,5 – Jucatore ‘e qualità se facette apprezzà soprattutto durante ô primmo ajone, quanno accumminciaje ll’azziona d’’o primmo stuco (gol). Peccato ca quanno cercaje ‘a porta nun fove priciso, ma tenette bbuono ‘a pusizziona ca ll’à dato ‘o Jancone.

Insigne [Lorenzigno] 7,5 ‘- Nu  faro lla ‘mmiezo ô campo, servette a sant’Arcadio ‘na perna ca addivintaje ‘o doje a zzero.  Quanno po  ‘o Jancone ‘o levaje ‘a miezo, ascette dô campo chiammannose ll’applavuso d’’e muidde (tifosi) ca ‘o ringrazziajeno d’avé signato quase súbbeto ‘o primmo stuco (gol) ca è ggià ‘o quinto, d’avé tentato ‘e signarne n’ato fermato però dô palo e dd’avé carriato ‘o Napule pe cchiú dde n’ora.

[Dô 68’ Mertens [Ciruzzo] 6 – Trasette a ccose fatte e ffacette ‘o ssuojo senza esaggerà.

Milik [Sant’Arcadio] 8 – Jucatore cumpleto durante ô primmo ajone (tempo) jucajje cchiú p’’a scuatra ca p’isso stesso, ‘mpignannose a ffà spazzio p’’e cumpagne. Fove semp’isso ca mettette ‘mmiezo ‘a palla bbona pe lLorenzigno, ca pure si spurcata da ‘nu ducale arrivaje a ddistinazzione e ffove misa a ffrutto. A ll’arrancua (ripresa) fove isso ca accunciaje ‘o piso d’’e ppurpette apprimma ô 47’ quanno sfruttaje a mmestiere ‘na perna e’e Lorenzigno e ppo a ll’84’ quanno nchiudette ‘a pratteca cumme ggià v’aggiu cuntato.

all. Ancelotti [‘O Jancone] 7 – Quanno se vence e sse vence bbuono ‘o primmo applavuso è p’’o mutarribbo e ppe ccumme ggestiunaje ‘o sibbacco (match) cunfermanno ‘o quatto quatto duje visto a tTurino, ma sfruttanno tantu rutizzio  (turnover) p’ arrivà frische a ll’arfabba (lotta) ca ce aspetta sapato ca vene;  e mmo voglio vedé cumme se mette cu ll’unnice ‘a mannà contr’â vecchia zoccola.

Arb. Doveri 5,5 – Miezu zifo (voto) mancante pecché grossi fetenzie nun ce ne facette, ma ce avesse avuto dà ‘nu ricore a ffavore ch’era assaje cchiú gruosso ‘e chillo cuncesso, nun saccio ‘a chi, a ll’Interre contr’â Fiorentina!

Icunchiudenno dicimmo ca ‘o juoco nuovo d’’o Jancone funziona assaje pure cu ‘o rutizzio (turnover) esaggerato); doppo d’’e tre purpette date ô Turino a tTurino, arrivajeno chelle date ‘o Parma. Carlo E sse po’ ffà meglio!

E ffermammoce cca  dannoce appuntamento si dDi’ vo’ pe ddummeneca  ca vene doppo d’’o sibbacco (match) ca nce aspetta sapato all’ora d’’e ppastarelle ‘ncasa d’’a vecchia zoccola  speranno ‘e putereve cuntà n’ata  bbella ccosa!

Staveti bbe’!

ilnapolista © riproduzione riservata