ilNapolista

Koulibaly se magnaje a Simeone, Allan ciento purmune

Napoli-Fiorentina, le pagelle in lingua: solo Mertens non raggiunge la sufficienza, voti pienamente alti pure per Insigne e Milik.

Koulibaly se magnaje a Simeone, Allan ciento purmune

Napoli-Fiorentina 1-0, ‘A vedette accussì

Ce vuleva! Ce vuleva, guagliú ca ajere a ll’ora streuza d’’e ppastarelle dinto a ‘nu san Paolo, troppo gruosso p’’a poca ggente ca ce jette , ‘o Napule turnasse a vvencere e soprattutto ‘o ffacesse mantenenno ‘a porta acrata (inviolata). Era nicessario i ‘o Napule ce accuntentaje vattenno ‘a Fiorentina pure si sulamente pe uno a zzero. È overo ca, soprattutto durante ô primmo ajone (tempo )‘a squatra cuana êss’’avuto sfruttà meglio ddoje o tre bboni accasione avute e nnun ‘o ssapette fà….

Però nun currette nisciunu serio periculo, sapette aspettà, purtà pacienza e a ll’arrancua (ripresa) se dimustraje squatra zucarrona (cinica) capace ‘e casticà ll’avverzario â primma accasiona, accussí cumme succedette ô 79’ quanno Lorenzigno riuscette cu ‘nu bbellu tiro ‘ncruciato a mmettere a ffrutto ‘na granna palla ca sant’Arcadio [trasuto… tarde… ô posto ‘e ‘nu Ciruzzo troppo fora d’’o juoco] lle mettette ‘ncopp’ô pere!Pirciò mo nun stammo a ppelià i a ccercà lefreche: ‘a cosa ‘mpurtante fove ca s’avev’’a vencere e sse vincette, cosa assulutamente nicessaria doppo d’’a mazziata pigliata sette juorne fa a gGenova; cumme fove nicessario ca ‘o Jancone cagnasse coccosa, pure tenenno presente ca ggià marterí 18 se va a bBelcrato a gghiucà ‘nu sibbacco (match) ‘e Ciampionsa contr’âStella rossa; i accussì a ddifennere ‘e pale vedettemo ‘o Creco ô posto d’Ospina i ô posto d’’o Masto nce fove Maksimoviccio ‘nchietta cu ‘o Gialante.

Annante sant’Arcadio lassaje ‘o posto a cCiruzzo però, pe ffurtuna, ggià ô 55’ ‘o Jancone se chiammaje ‘mpanca ll’arillo, troppo luntano dô juoco, poco o niente cercato dê cumpagne… e ffacette trasí ‘o pulaccone capace ‘e fà cagnà faccia â mubbara (partita) e ffance venncere, cumme v’aggiu ditto dànno ô 79’ ‘na granna palla a lLorenzigno.Ll’urdimi quattuordece minute vedetteno ‘o Napule fermà quacche ttentativo d’’a Fiorentina ca però maje ce spaventaje e cquanno Fabbri [5 e ppo ve dico] ammiscaje ‘e ccarte ce mettettemo ‘e tre ppunte dint’â sacca â faccia ‘e quacche ccestariello ca nun manca maje!

Passammo ê ppaggelle:

Karnezis [‘O Creco] 6: Nunn’êtte ‘a fà miracule, visto ca nisciuno ce ll’addimannaje, ma pe grazzia d’’o Cielo purtaje â casa ‘o primmo fuoglio pulito d’’a tempurata (stagione) mettenno ‘a mana p’aizà ‘o pallone ‘ncopp’ a ll’afachia (traversa) ‘int’a cchella sola accasiona ca ‘a Fiorentina ‘o chiammaje a spurcarese ‘e guante cu ‘nu tiro maligno ‘a luntano d’ Eysseric(cio)!

Hysaj [Meza Cucchiara] 6: Êsse pututo fà coccosa ‘e cchiú, ma tutto summato ‘o seje s’’o mmeretaje. E nce ‘o mecco!

Maksimovic 6: Cumplessivamente ‘na bbona atalossa (prestazione) ‘a fora ‘e quacche ppasiglio (passaggio) senza mesura.

Koulibaly [‘O Gialante] 7: N’atalossa (prestazione) arría (magnifica): cassaje dô campo a sSimone, anze s’’o magnaje e ddètte ‘na mana ô cumpagno ‘e sezziona (reparto).

Mario Rui 6: Se facette apprezzà accumpagnanno cuntinuamente ll’azziona cosa ca lle perdona quacche sfregazzo (sbavatura) cca e lla.

Allan [‘O ‘Ncrifato] 6.5: Che ne parlammo a ffà? Nun se ne po’ ffà a mmeno, ciento purmune, cegna (grinta), azaja (caparbietà) e ccazzía (cattiveria) nicessarie, dettaje legge ‘mmiez’ô campo!

Hamsik [Marekiaro] 6: Nce mecco ‘o seje pe ppremio e quacche picculo passo ‘nnante ‘int’â pusizziona nova.

Zielinski 6: Ô ssolito: ‘a chiena i ‘a vacante. Mo granni ccose, mo fessarie arzacche (ingenue).

Callejon  [Peppe ‘a ‘nguenta] 6: ’o Jancone ‘o facette partí quacche mmetro cchiú arreto, e isso se facette truvà pronto annante i arreto.

[Dô 69′ Ounas 6: Facette ‘o duvere suojo.]

Mertens [Ciruzzo] 5.5: Me dispiace, ma nun pozzo darle ‘o seje. Cumme v’aggiu ditto ajere fove troppo luntano dô juoco e ppoco o niente cercato dê cumpagne…facette meno ‘e chello ca ce aspettavemo.

[Dô 55′ Milik [Sant’Arcadio] 6.5: Cagnaje faccia ô sibbacco (match) dètte piso a ll’attacco e ‘na palla dicisiva a lLorenzigno.

Insigne [Lorenzigno] 7: Ggià dê primme minute se dètte da fà mantenennose ‘int’ô vvivo d’’o juoco, ma vedenno poco ‘a porta e sbaglianno quacche accasione; pe ffurtuna ca se facette truvà ô posto justo, ô mumento justo [79’]mettenno a ffrutto ‘na palla a zzuco ‘e caramella ‘e sant’Arcadio.

[Da ll’81′ Rog 6: Tririce minute ‘e trancara (diga) i ‘a facette.]

all. Ancelotti 6: Quanno se vence ‘o primmo a vvencere è ‘o muntarribbo (allenatore) e sse piglia ‘o seje, pure si ajere nun me piacette ‘a dicisione, ca però po s’êtt’’a magnà, ‘e tené fora a ssant’Arcadio pe mmettere a cCiruzzo. Sperammo ca nun fa ‘a stessa fessaria ‘nCiampionsa.

arbitro: Fabbri 5: Grossi fetenzie, si nun me sbaglio, nun ce ne facette, ma siscaje pe troppu tiempo sempe contr’ê nuoste ca dfacevano carí (fallo) quanno traseveno, mentre chille d’’a Fiorentina, p’isso, pisciavano acqua santa p’’o velliculo!
E ffermammce cca, cuntente d’’a nichemata (vittoria) cunquistata; mo si ‘o Cielo ‘o vvo’ ce sentimmo p’’o juorno ‘e san Gennaro diciannove settembre doppo d’’a nacchèlla (trasferta) a bBercrato contr’â Stella Rossa p’’o sibbacco (match) ‘e Ciampionsa.
Staveti bbe’ R.Bracale Brak

ilnapolista © riproduzione riservata