Juventus-Napoli, le pagelle in lingua: bocciati Insigne e Mario Rui, tra i meno peggio ci sono Zielinski, Callejon, Albiol e Koulibaly.
Juventus-Napoli 3-1, 19/9/2018 – ‘A vedette accussì
Che v’aggi’’a dicere guagliú, che ve pozzo dicere? Ca sto’ scunfurtato e ddeluso! E ssí, me penzavo ca ajere jenno a ll’ora sconceca d’’e ppastarelle ‘int’ô cesso d’’a vecchia zoccola ‘o Napule ce ll’avesse fatta a ppurtarese â casa allimeno ‘nu gramo punticiello… ‘mmece chi t’’o ddà, ll’unica cosa ca ce purtajmo â casa foveno ‘e ttre ppalle ‘ncassate da Pastacrisciuta, anze – nun voglio dicere bbuscie – ce purtajmo â casa ‘na meza fijura marrò visto ca apprimma ‘o Napule ce facette fà ‘o core quanto a ‘nu cufenatura passanno ‘nvantaggio ô 10’ cu cCiruzzo ch’êtte sulo appujà dinto ‘na granna palla avuta da Peppe ‘a ‘nguenta e ppo sbracaje malamente e ‘ncassaje cumplessivamente tre ppallette da Mandzukiccio ô 26’ e ô 49’ tutt’’e ddoje vote lassato libbero e ffranco ‘e truvà ‘a porta senza ca nisciuno ‘o cuntrastasse,i ô 76’ da Bonucci ca trasette a sciuliamazzo ‘ncopp’a ‘na palla schizzata verz’ô palo ‘e dritta!
‘Nnzomma guagliú doppo ‘nu quarto d’ora ‘e speranza e ddivertimento arrivajeno 85 minute ‘e sufferenzia e ccate ‘e tuosseco ca c’ttemo agliottere a fforza vedenno cumme chillu figlio ‘e zoccola ‘e Ronaldo, spustato ‘ncopp’â fascia facesse ‘o commeto suĵo sotto a mMeza Cucchiara e o mettesse ‘mmiezo ‘na palla a mmestiere p’’a capa ‘e Mandzukiccio o cercasse isso stesso ‘a porta cuglienno ‘nu palo ca trasfurmaje ‘a palla a ‘mmito p’’o solitu Mandzukiccio ca nun se facette prià e ssignaje ‘a pareglia ca purtaje ‘nnante ‘a vecchia zoccola e ssempe Ronaldo fove prutacunista d’’o tiro ‘e squina (corner) da mancina mannanno ‘a palla verz’ô palo ‘e dritta addó arrivaje bBonucci futtennoce p’’a terza vota. Cosicché mo doppo d’’a settima jurnata stammo a ssulo 15 punte ‘ncrassifica, seje punte dâ vecchia zoccola cu ssulo tredice addaffe (reti) fatte i ‘a bbellezza ‘e diece recovete. E mmo ce avimmo stà accorte a sSassuolo o Interre ca ce ponno fottere pure ‘o siconno posto ‘ncrassifica.
Cumme vedite ‘o fatto è assaje poco allero e nnunn’è cchello ca ce aspettavemo! Pacienza. Passammo ê ppaggelle:
Ospina [Pastacrisciuta] 5,5 – Miezu zifo (voto)mancante pecché sí paraje chello ca putette parà, ma partette ‘nritardo Quanno Ronaldo tiraje ‘a vricciata ch’isso accumpagnaje ‘ncopp’ô palo,e da lla arrivaje justo justo ‘ncopp’ô pere ‘e Mandzukiccio ca – cumme v’aggiu anticipato se ne vedette bbene. ‘Sti ccose ‘nu bbuonu purtiere nunn’ ‘e ffa!
Hysaj [Meza Cucchiara] 4,5 – Jurnata no ‘e ll’arbanese ca s’’a vedette nera sotto a Ronaldo, ca facette ‘e commete suĵe; p’’o riesto maje s’azzardaje a scennere appressuranno (spingendo).
Albiol [‘O Masto] 6 – Facette ‘o duvere suĵo e cquanno servette menaje ‘a palla annante pure a vvienetenne. Fove ll’unico d’’a trasera a ssalvarese da Banti e nnunn’essere nutizziato (ammonito); nun fove certamente itimma (colpa) soja si Mandzukiccio signaje ddoje addaffe (reti) giacché tutt’’e ddoje vote trasette da dereto i esse avut’’a essere ‘nu mediano a ccuntrullarlo.
Koulibaly [‘O Ggialante] 6 – Cumme ‘o cumpagno ‘e sezziona (reparto) facette ‘o duvere suĵo, fove nutizziato (ammonito) senza itimma (calpa) e se vedette ‘nu paro ‘e vote pure ‘int’â muntaca (area di rigore) janca e nnera.
Mario Rui 4 – Culpevole ‘e nunn’avé maje cuntrastato a mMandzukiccio nè ‘a primma, nè ‘a siconna vota e dd’esserse fatto jttà fora quanno ‘o Napule steva riaggenno e nnun puteva restà ‘ndiece; è overo ca quanno Bbanti ‘o nutizziaje (ammoní) ‘a siconna vota ‘o ffacette a ccapa ‘e saciccio,caputianno ‘o carí (fallo), ma ‘o primmo cartellino se ll’êsse pututo sparagnà!
Callejon [Peppe ‘a ‘nguenta ] 6 – S’ammeretasse miezu zifo (voto) mancante p’’a strunzata fatta a ‘nu passo da Szczesny, ma nce mecco seje p’’a bbella cosa ca facette dànno súbbeto palla a cCiruzzo ‘nnaccasiona ‘e ll’uno a zzero pe nnuje. P’’o riesto solita atalossa (prestazione) prusiosa (generosa) sacrificannose ‘o nnicessario. Peccato pe cchella strunzata.
Allan [‘O ‘Ncrifato] 7 – ‘o solitu lione ‘e ll’armidanno (centrocampo): s’’a vedette ‘e bbello luttanno cu Matuidi, e gghiette cuntonuamente ‘mpressione (pressing) ricuperanno palle cumme a cchella ca dètte a pPeppe ‘a ‘nguenta ‘nnaccasione ‘e ll’addaffa (rete) ‘e Ciruzzo. Fove custretto a ddà cchiú ‘e ‘na mana a mMarekiaro ca ‘mmece ‘e correre, cammenaje.
Hamsik [Marekiaro] 5 – Me dispiace, ma tanto se mmereta: nun currette, ma cammenaje, nun cuntrastaje a nnisciuno i ‘a riggia soja fove overamente piccula cosa senza nisciuna ‘mmenzione; ‘nnaccasione d’’o primmo stuco (gol) janco e nniro Mandzukiccio lle passaje annante e isso manco se n’addunaje. E cche? Se fa accussí? Capità, no no e nno! facette bbuono ‘o Jancone a cchiammareselo ‘mpanca.
[Dô 68’ Fabian 5,5 – Trasuto tarde e dint’a ‘nu mumento cumpricato poco riuscette a ffà p’ accuncià ‘e ccose. Ah, si fósse trasuto primma!]
Zielinski 6,5 – Accumminciaje bbastantamente bbuono cu cquacche ‘mprecisione cumpenzata dô ggenio ‘e fà, ma po poco â vota se ne scennette ‘e pressiona e ggià â mmità d’’o primmo ajone nun fove cchiú isso; però nsi’ a ttanno fove uno d’’e cchiú asce (vivace).
[Dô 60’ Malcuitb 5,5 – Trasette doppo ca Banti ce lassaje ‘ndiece cercanno ‘e dà ‘na mana a ll’epata (fase) uffenziva ma nun purtaje zuco. Pacienza.]
Insigne [Lorenzigno] 5 – Se vedette ca ‘o cesso janco e nniro nun lle porta bbuono; ajere Lorezigno nun facette manco ‘o cacchio e ccumme siconna nassia (punta) me deludette.
Mertens [Ciruzzo] 6.5 – Signaje ‘nu stuco (gol) ch’êsse signato pur’i’, ma se facette apprezzà pe ccumme se facette truvà ô posto justo ô mumento justo; p’’o riesto doppo però facette poco ato ggiranno quase sempe luntano dâ muntaca (area di rigore) janca e nnera, casa ca cumplicaje nun poco ‘e ffacenne d’’o Napule.
[Dô 60’ Milik [Sant’Arcadio] 6 – Cumme trasette cu ‘a primma palla ca tuccaje mettette Peppe ‘a ‘nguenta ‘nnant’â porta! Va a ssapé pecché ‘o Jancone nunn’’o facette jucà dô primmo minuto!]
All. Ancelotti [‘O Jancone] 5 – Ajere nun me piacette visto ca facette jucà Meza Cucchiara ca jette ‘int’ê cchiavette cu cchillu cesso ‘e Rolando ca se ne vedette bbene ‘e ll’arbanese e preferette ‘na primma linia liggiera ca doppo ‘na primma risposta pusitiva nun fove cchiú crestiana ‘e dà ‘mpiccio â vecchia zoccola. À dda ancòra faticà pe ffarece capí ‘e ccose a cche s’ammetteno!
Arb. Banti 2 – E ll’aggiu trattato a ‘stu sacchetto ‘e ll’ummeto senza lazzetto ca cumme ‘o Napule signaje venette fora pe cchello ca fove ajere, ‘o dudicesimo jucatore janco e nniro ca se mettette a ssiscà ad capocchiam sempe ‘ndanno d’’o Napule caputianno carí (falli) e ssutterranoce ‘e cartelline jalizze (gialli) date ad capocchiam pe ppartito pigliato sicuro ca primma o doppo c’êsse lassate ‘ndiece, cosa ca puntualmete succedette! Ma se po’ suppurtà chesto d’essere nutizziate (ammonite) si sulo uno dice a ‘nu juventino: “che bbell’uocchie ca tiene” vedennolo ‘e cadé ‘nterra, mentre ‘e chianchiere janche e nnire ponno fà cose ‘e curtellate e sso’ premiate cu ‘o pizzo a rrisa ‘e ll’arbitro?
E ffermammoce cca. Jette cumme jette e ppacienza! Dammoce ‘nu pizzeco ‘ncopp’â panza e gghiammo annanze. Mo, miercurí ca vene nce aspetta ‘nu sibbacco (match) cu ssette parme ‘e saciccio, chillo ‘ncasa contr’ô Liverpool(le) e aggio paura ca turnammo a pperdere… Sperammo ca me sbaglio e ssi dDi’ vo’ v’’o conto ggioverí.
Staveti bbe’.
