Sant’Arcadio Milik è chello ca serve a nnuje, Callejon sccumparette e scumparette

Lazio-Napoli, pagelle in lingua: promossi Insigne, Hysaj ed Allan, da rivedere Koulibaly e Albiol. Ancelotti premiato con un 6.5.

Sant’Arcadio Milik è chello ca serve a nnuje, Callejon sccumparette e scumparette

Lazio-Napoli 1-2 – ‘A vedette accussì

Primma jurnata d’’o campiunato duimiladiciotto/duimila diciannove e pprimmu passo annate guagliú!Cumminfatte ajeressera a ll’Ulimpico rumano ‘a scuatra cuana (azzurra) d’’o Jancone scennette ‘int’â tana d’’a Lazzio e dde rippe o de rappe se purtaje â casa ‘e tre ppunte dànno ‘a risposta â vecchia zoccola ca, tanto pe nnun cagnà, ‘mmerz’ê sseje s’era fatto dà ‘na mana da chella grannalatrina ‘e ll’arbitro Pasqua pe vvattere  ‘o Chievo ô 93’ doppo n’atalossa  (prestazione) nun certo  ‘ntusiasmante d’’e mariuole d’itaglia janche e nnire. Assaje  cunvincente ‘mmece l’atalossa (prestazione) d’’a scuatra cuana (azzurra) contro a cchella d’’o pappavallo ‘e Lotito cu ‘e guagliune d’’o Jancone [ajere cu ‘na muntazzimma (divisa) ‘e ‘nu jettatorio bblu-savoia…] ca facetteno ‘o ppussibbile pe ffà sí ca ll’avventura d’’o mutarribbo (allenatore) lloro accumminciasse cu ttre ppunte  assaje pesante, visto ca servetteno, cumme v’aggiu ditto, a ddà ‘na risposta i  a ttenè ‘o passo d’’a vecchia zoccola i a ffà capí â Lazzio ca nun lle fósse avastato ‘o stuco (gol) overo bbello ‘e Ciro Immobile signato a mmità d’’o primmo ajone (tempo)[25’]; cumminfatte da chillu mumento ‘o Napule ce se mettette cu ‘a panza e ccu ‘o penziero diciso a rrimuntà i a vvencere   guadagnanno  metre  e arrivate ô tentío  (allo scadere) d’’o  primmo ajone (tempo)[47’] sant’Arcadio truvaje ‘nu bbellu   russimmo   (pareggio)e ppacienza si d’addaffe (reti) n’êtte signà ddoje primma ca chillu sacchetto ‘e ll’ummeto Banti[3 e ppo ve dico] ce n’assignasse una bbona…

E tutto chesto doppo n’afachía (traversa) coveta   da Zielinski; arrivate a ll’arrancua (ripresa), sempe cchiú cunvinto ch’êv’’a vencere, nce détte sotto cuntinuanno cu ccegna (grinta) e sciato i arrivate ô 59’   finalmente Lorenzigno, doppo ‘nu primmo ajone (tempo) armegollo (anonimo) turnaje a essere isso mettenno dinto, cu ‘nu tiro azzeccato e ppriciso ‘o difinitivo doje a uno; ‘a  Lazzio feruta cercaje ‘o russimmo  (pareggio), ma maje periculosamente  ‘a fora ‘e ‘nu  palo cuoveto ‘e capa  da Acerbi! ‘Nzomma, cumme aggiu ditto, bbona ‘a primma e ‘ncopp’a ‘nu campo difficile. Peccato pe ll’addaffa (rete) pigliata, ma ‘o ‘mpurtante foveno ‘e tre ppunte e cchille arrivajeno!

Passammo ê ppaggelle:

Karnezis [‘O Creco] 6 – Nisciun’ itimma  (colpa) ‘ncoppa a ll’addaffa (rete) d’ Immobbile ca ne cartiaje a ttre e ttiraje a bbotta sicura: p’’o riesto nun fove particularmente ‘mpignato dâ Lazzio ca  sulo ‘na volta ‘o chiamaje ‘ncausa   i ‘o Creco rispunnette : prisente.

Hysaj [Meza Cucchiara] 6.5 – Atalossa (prestazione) ‘mpurtante a ddritta ‘e ll’arbanese ca difennette a mmestiere e ccercaje ‘e farese vedé annante.

Albiol [‘O Masto] 6 – Certo ‘ncopp’a ll’addaffa (rete) lazziale avette quaccche respunzabbilità ‘nzieme a ll’ati dduje, ma ‘o seje s’’o mmereta pecché po fove capace ‘e bboni cchiusure spicialmente ‘ncopp’a ‘nu paro ‘e cunchiusione.

Koulibaly 6 – Nun ce pozzo mettere ‘e cchiú pecché nun me parette ggià ‘ncundizziona alternanno cose bbone cu quacche fessaria, cumme ‘nnaccasione ‘e ll’addaffa lazziale quanno Immobbile ‘o cartiaje ‘e brutto.

Mario Rui 6 – Se dètte da fà cchiú annante ca arreto tanto è overo ca quacche ppericulo arrivajedê pparte soje.

Allan 6,5 – Se facette ‘nu mazzo tanto currenno cu ccegna (grinta) e asciarra (cattiveria) nicessarie, ricuperanno pallune e ppallune… senza scurdarce ca fove ‘a soja ‘a palla bbona misa a ffrutto da Lorenzigno.

Hamsik 5,5 – Mniezu zifo (voto ) mancante p’’o capitano ca soprattutto durante ô primmo quarto d’ora arrancaje e gghiette ‘int’ê chiavette e cquase pareva ca nun sapeva ch’avesse ‘a fà; pure passanno ‘o tiempo nun riuscette maje a ccuntrullà ‘a manovra nè a urtizzà (verticalizzare) a mmestiere.

[dô 69′ Diawara 6,5 – Chiamato dinto sulo a  ll’urdeme vinti minute,cercaje ‘e ggestiunà (gestire) ‘a palla dànno pure prutezzione difenziva.]

Zielinski 6.5 – Primmo ajone (tempo) d’auta mistaua (livello) facenno pure ‘a fatica ‘e Marekiaro e ccuglienno n’afachia (traversa); a ll’arrancua (ripresa) se vedette ‘e meno.

[dall’84’ Rog – jucaje troppo poco pe mmetterle ‘nu zifo (voto) ]

Callejon [Peppe ‘a ‘nguenta] 6.5 – Accumparette e scumparette, ma quanno jucaje facette bbelli ccose cumme chella palla ca addivintaje ll’uno a uno ‘e sant’Arcadio.

Milik [Sant’Arcadio] 8 – Turnato a essere ‘o jucatore ca sapimmo jucaje cumme sape isso mettennoce curaggio e arbadanía (fisico) e dimustrannose càtelo (letale) sotto porta. Chello ca serve a nnuje! Ajere d’addaffe (reti) ne signaje ddoje e ttutte ‘e ddoje bbone, ma chillu chillu sacchetto ‘e ll’ummeto Banti  annullaje ‘a primma facennose piglià p’’o prozo da chillu figlio ‘e puttana ‘e Radu ca apprimma se menaje cumme a ‘nu zimmaro ‘ncuollo a Koulibalý, dannole ‘na capata ‘int’ô stommaco e ppo se vuttaje ‘nterra facenno vedé ch’era muorto e sse facette mmerecà cumme si avesse tuzzato ‘nfacci’ô cummò cu ‘o specchio… ‘mmece nunn’era overo niente i ‘a sceneggiata era servuta a ffà annullà ‘o stuco (gol) tant’è overo ca trasette a ll’arrancua (ripresa) vispo i arzillo senza turbante.

Insigne 7 –  Cumme v’aggio anticipato: ‘a vacante i ‘a chiena, anze ‘a nzeppata: doppo ‘nu primmo ajone (tempo) armegollo (anonimo) turnaje a essere isso truvanno pure ‘o stuco (gol) ca ce dette ‘e tre ppunte!

[dô 76′ Mertens 6 – Dètte ‘na bbona mana durante a ll’urdeme  minute ‘nfucate!]

all. Ancelotti [‘O Jancone] 6,5 – Quanno se vence soprattutto fora casa, ‘o primmo a sse ne ggiuvò è ‘o muntarribbo (allenatore), ca me pare êsse sulamente riggistrà meglio ‘a tràsera (difesa).

Ar. Banti [3] – Carta canusciuta ‘stu sacchetto ‘e ll’ummeto m’aspettavo ca ce facesse quacche trave ‘e fuoco e nun me sbagliaje cumminfatte, cumme v’aggiu ditto, nun sulo ce annullaje n’addaffa (rete) bbona facennose piglià p’’o prozo da chillu mumirro (guitto)’e Radu ca se futtette â bbonanema ‘e Mario Merola cu ‘a sciniggiata ca facette, ma po cunzentette a ttanti chianchiere e guappe cammurriste lazziale ‘e fà ‘e còmmete lloro senza sanziunarne a nnisciuno o allimmeno cazziarle!

E bbasta accussí, fermammoce cca. Certo me fósse piaciuto ‘e vencere senza piglià addaffe (reti), ma nun putimmo pretennere troppo: accuntentammoce d’’e tre ppunte e gghiammo annante. Ve saluto e ssi a dDio piace ce sentimmo  dummeneca ca vène doppo d’’o scontro casalinco ‘e sàpato vinticinche  cu ‘o Milan(ne) ‘e Reina e ssocie, speranno ca ve pozzo cuntà d’averce miso ‘int’â sacca n’ati ttre ppunte! Staveti bbe’!

ilnapolista © riproduzione riservata