Sant’Arcadio è overo ‘nu marcazzo cu ssette parme ‘e saciccio

Napoli-Crotone, pagelle in lingua: Milik e Insigne promossi, anche per Sarri un voto positivo. Un saluto a Christian Maggio, vero professionista.

Sant’Arcadio è overo ‘nu marcazzo cu ssette parme ‘e saciccio

Napoli-Crotone 2-1, 20/5/2018 – A’ vedette accussì

E accussí guagliú è ffenuto pure st’atu campiunato cu n’ata delusione e ccucente, pecché ce ll’êvemo creduto tutte quante ca fósse stata ‘a vota bbona ‘e vencerlo n’atu cacchio ‘e scutetto, ma pure ‘sta vota ll’âmmu pigliato ‘int’ê rine e simmo arrivate sulo sicunne, cosa ca forze fa cuntento a Dela,ca penza ê pesielle d’’a Ciampionsa, ma nun certo a nnuje ca sapimmo ca ‘o primmo è pprimmo e ll’ate so’ tutte strunze! E ‘mmece ‘sta tempurata (stagione) appeba passata puteva essere chella bbona sulo si Sarri fósse stato meno cucciuto e avesse ausato meglio ‘a uarrada (rosa) a ddispusizziona senza fà jucà sempe ‘e stesse e ccagnanno, quann’era ‘o caso, chille cchiú spumpate… accussí nun êssemo perzo chelli ppoche mubbare (partite) chiave ca ce ànnu fatto perdere ll’accasione. E mmo, mo che putimmo dicere? Sulo: Mannaggia! Mannaggia… chi ll’è stramusica a isso i â capa ‘e vreccia ca tène! Sperammo, ca si rummane, capesse e p’’a tempurata (stagione) ca vène nun ce facesse allargà ‘o core quanto a ‘nu cufenaturo e ppo ce deludesse, facennocelo scennere dint’ê ccazette! Tanto ditto, vedimmo chello ca succedette ajere ô san Paolo cu ll’urdemu sibbacco (match) ‘e ‘stu campiunato ca ‘o Napule jucaje contro ô Crutone, n’ata scuatra assineja (satellite) d’’a vecchia zoccola, ma lle scardaje ‘a zella mettennoce dint’â sacca ‘e tre ppunte tanto pe nchiudere ‘o campiunato a 91 punte a ssulo quatto ppunte dâ vecchia zoccola e mmagnarse mane e ffecato! Che ce vulite fà?! Nun ce penzammo e ppassammo ê ppaggelle:

Reina 5 – Me dispiace ‘e cummentà ll’urdema antraffa (ncontro) d’’o spagnuolo cu nnuje, levannole ‘nu zifo (voto), ma nun ne pozzo fà a mmeno datose ca ajere ‘o Crutone nun se vedette quase maje dê pparte soje e isso fove ‘mmitato a ttuccà palla sulo dê cumpagne ‘e scuatra, gestiunanno (gestendo) ‘a situazziona senza fatica, ma arrivate ô 90’ e cquacche siconno nun riuscette a ffermà ll’unicu pallone cuncesso a Tumminello ca ‘o futtette cu ‘nu tiro ‘a luntano ca isso nun vedette e sse menaje quanno praticamente ‘a palla era ggià trasuta ‘mporta. E ppe fforza po ca Sarri se ncazzaje cumme a ‘na ufera! Bruttu uadajanno (addio) chillo d’’o spagnuolo. Che peccato!

Hysaj [Meza Cucchiara] 6,5 – Mettette ‘a musarola a nNalini senza sufferenzia e ccuntrullaje ‘a curzia ‘e dritta senza prubbleme. Cumprimente.

Albiol [‘O Masto] 6,5 – Ô ssolito cummannaje a mmestiere ‘a trasera (difesa) sempe cuncentrato e ssenza nisciunu sfregazzo (sbavatura).

Koulibaly [‘O Gialante] 6,5 – Dê pparte soje nun se passaje, pure si ddoje o tre vvote arresecaje coccosa riuscenno però sempe a ffarese valé.

Mario Rui 6,5 -Cupuliaje (dialogò) a mmestiere cu lLorenzigno prupunennose cu ccustanza a mmancina pe ttutta ll’antraffa (incontro).

Allan [‘O ‘Ncrifato] 6,5 – Facette, cu ccegna (grinta)e ttubbatta (fermezza) tutto chello ca puteva pe mmettere ‘ndifficultà ll’armidanno (centrocampo) d’’e calavrise, cuntinuanno a essere ancòra ‘nu prutacunista d’’a tempurata (stagione). Bravo!

[Dô 76′ Rog 6 – ‘E stima, pecché poco se nutaje.]

Jorginho 6,5 -Pure ajere se facette apprezzà, currenno tanto, ricuperanno quacche ppalla, ma soprattutto ricamanno a ppuntaggiorno ‘mmiez’ô campo. Sperammo ca Dela nun s’’o vénne!

Zielinski 6 – Miezu zifo (voto) mancante pecché fove isso ca ô 90’ cunzentette a Ttumminello ‘e tirà e ssignà, ma p’’o riesto ‘o guaglione pulacco fove all’aldezza d’’a situazziona e cquase certamente Dela lle rinnova ‘o cuntratto a ppesielle ‘mpurtante e ffa bbuono!

Callejon [Peppe ‘a ‘nguenta] 6,5 – Ô 32’ truvaje ‘o sistema ‘e metterla dinto accumparenno ê spalle d’’o terzino â ‘ntrasatta pe recogliere ‘nu granne jabbro (cross) ‘e Lorenzigno e ffove ‘o sistema justo pe cunchiurere ‘na tempurata (stagione) bbona pure si nun fove mumazza (ottima). Sperammo ca rummane.

Milik [Sant’Arcadio] 7,5 – Nun sulo participaje assaje ô juoco cupulianno (dialogando) cu ‘e cumpagne e turnanno arreto pe ccercà palla, ma pure ajere fove isso, ô 23’, a mmetterla dinto mettenno a ffrutto ‘nu primmo granne jabbro (cross) ‘e Lorenzigno, sbluccanno ‘o sibbacco (match), cuntinuanno a mmantené n’adaffamusta (media-gol) ‘mpressiunante e ddimustranno – si fósse stato nicessario –ch’è overo ‘nu marcazzo (centravanti) cu ssette parme ‘e saciccio. Mo però tengo paura ca Dela fa ‘a penzata ‘e levarese pure a isso cumme facette primma cu cCavani e ppo cu ‘o cainno (traditore)! Nun sia maje; facimmo corna!!!

[Dô 67’ Mertens [Ciruzzo] 6 – Trasette e ‘ncapo ‘e cinche minute lle capitaje ‘a palla bbona, ma Cordaz(ze) ce ‘a mannaje ‘ncopp’ô palo.E ggià: a nNapule tutt’’e purtiere cacciano ‘a scienzia! Che peccato!]

Insigne [Lorenzigno] 7 – Bella e ccunvincente urdema antraffa (incontro) ‘e ‘sta tempurata (stagione) d’’o scugnizzo ‘e Fratta ca ajere se carrecaje ‘a scuatra ‘ncopp’ê spalle e bbassuraje (ispirò) praticamente tutte ll’azzione uffenzive d’’o Napule; da mettere ‘ncurnice chilli duje jabbre (cross) ca foveno mise a ffrutto da sant’Arcadio e dda Peppe ‘a ‘nguenta e ffoveno ll’uno ‘o decimo e ll’ato ll’unnicesimo jusaida (assist) d’’o frattese: ddoje ciucculatine ‘e Gayodin(ne)!

[Dô 75′ Hamsik [Marechiaro] 6 – ‘e stima, pecché nun se nutaje.]

all. Sarri 7 – Miezu zifo (voto) ‘e cchiú pecché me piacette assaje cumme se ‘ncazzaje p’’o stuco (gol) pigliato ô nuvantesimo,pure si ll’itimma (colpa) fove ‘a soja dàtose ca ll’arrancua (ripresa) ll’êsse avuta ‘a fà jucà a rRafael [‘O Prevetariello] e nno a rReina ca ggià steva cu ‘a capa a mMilano!Ajere tutt’’e tifuse ‘ncopp’ê mitrasse (spalti) ‘o ringrazziajeno alluccanno ‘ncoro : “Sarri resta cu nnuje!!” Pare però ca da ‘sta recchia ‘o livernese-napulitano nun ce sente i ‘a situazziona soja è cchella ‘e Giorgio se ne vo’ jí i ‘o vescovo n’’o vo mannà…, ma nisciuno se decide a ffà ‘o primmo passo. Tutto summato si se ne jesse me dispiacesse pecché tene sí ‘a capa tosta, ma ce facette vedé ‘nu bbellu juoco purtannoce a ‘nu passo dô scutetto e nnun sapimmo chillo ca venesse che capa tene i addó è ccapace ‘e purtarce: ‘e certo êssemo da accummincià tutto da capo e ccapo. E vvalla a sbruglià n’ata vota ‘a matassa… valla a sbruglià!

Arb. Banti 6 – ‘Sta vota so’ bbuono: niente ‘a dicere!

Nchiusura voglio mettere ‘nu 7 a Maggio, ca ajere nun ghiucaje, ma pe ll’urdema vota vedettemo passià p”o campo e nce ‘o mecco pe ringrazziarlo ‘e tutte ll’anne ca à unurato ‘a maglia luvarda (azzura) mettenoce sempe cegna (grinta) e ppasiona! Bbona furtuna vicchiarié!!

E ffermammoce cca. Certo me fósse aspettata n’ata cunchiusione… addirittura triunfante…, ma nunn’ è stata cosa: ‘a vecchia zoccola ancòra ‘na vota à chiuso ‘nnante a nnuje. Pacienza dàmmoce n’atu pizzeco ‘ncopp’â panza e ttirammo ‘nnante. À dda stracquà ‘na vota e ppure pe nnuje à dda ascí ‘o sole! Fósse dimane i accussí sia!!

Cusicché guagliú âmmu vista ‘o prazzo (fine) ‘e st’ata tempurata e ssi dDi’ vo’ nun saccio mo nè cquanno, nè ccumme ce sentimmo n’ata vota… P’’o mumento ve ringrazzio ‘e ll’attenziona e vve dico sulo: Staveti bbe’!

ilnapolista © riproduzione riservata