Sassuolo-Napoli, le pagelle in lingua: tanti bocciati, a iniziare da Sarri. Oltre a Callejon, si salvano solo Sant’Arcadio Milik e Hysaj.
Sassuolo-Napoli 1-1, ‘A vedette accussì
Che collera e cche nnervatura ajere ‘mmerz’ê sseje vedenno cumme a Scurreggio Emiglia ‘o Napule jucasse maslamente contr’ô Sassuolo e pperdesse n’atu tramme sciupanno n’ata mubbara (partita) e accuntentannose ‘e ‘nu gramo punticiello afferrannoo p’’e capille sulo a ll’80’ ‘nu scartellato russimmo (pareggio) addó s’êsse avit’’a vencere e sse fósse pure pututo ggià durante ô primmo ajone (tempo), fenuto ‘ncopp’a ll’uno a zzero pe ll’emigliane, sempe ca Lorenzigno nun avesse sciupato no una, ma tre accasione una cchiú grossa ‘e ll’ata, ‘na vota sparacchianno fora ‘nu pallone ca êsse vuluto ferní ‘mporta e n’ati ddoje vote tiranno ‘a palla ‘mbracci’ô purtiere stiso ‘nterra, ‘mmece ‘e fravecarla sott’ô travesagno (traversa), facenno isso ‘na fijura ‘e mmerda e facenno fà ‘na bbella fijura a cConsigli.
Quale fove ‘a cunchiusione guagliú? Cunchiusione ca ce ne turnajemo â casa cu ‘nu punto dint’â sacca, ‘nu punto ca fove acqua ca nun leva sete, dàtose ca ‘nserata po ‘a vecchia zoccola vattette pe tre a uno chillu bleffo d’’o Milàn(ne) e allungaje ‘o passo purtannose â bbellezza ‘e sittantotto punte ‘ncrassifica… p’’a cuntentezza ‘e chille ‘e SKY edd’’e tanti cestarielle ca ce meneno favetta,E mmo ccumme ll’angappammo cchiú a cchella zoccola janca e nnera? Cu ‘o ssale ‘ncopp’â cora? No guagliú, rassignammoce! È ffenuta, è ffenuta e ppure ca ‘e cunte se fanno sott’ô lampione e mmancano ancòra otto sibbacche (match), ma pure ca ne mancasseno ‘e cchiú nun servesse a nniente dàtose ca ‘o Napule accumincianno da Koulibalý, Ciruzzo e lLorenzigno me pare ch’è stracquo e cch’è arrivato e nunn’è ccacchio ‘e vencere cchiú! E mmo putimmo sulo cercà ‘e nu farece fottere pure ‘o siconno posto.
Me dispiace d’’o ddicere, ma ‘e fatte chiste songo e nnun me sto’ ‘mmentanno. Pacienza ‘sta tempurata (stagione)è gghiuta accussí… sperammo jesse meglio chella ca vène… P’’o mumento ce simmo ‘ntussecate tòrtane, casatielle, fellate, mammarelle e ppastiere e ttengo ‘e mmane ca me proreno pe nnun avé pututo piglià a ccarocchie a lLorenzigno, a cKoulibalý e a sSarri, ma che ne parlammo a ffà? Vedimmo ‘e ppaggelle:
Reina 5,5: Nun tenette itimme (colpe) ‘ncopp’a all’addaffa (rete) ‘e Politano lassato libbero e ffranco dô Masto, mentre – pe pparta soja – Koulibalý nun cuntrastaje a pPeluso quanno ‘e capa recugliette chillu tiro ‘e timmuria (punizione) faveza, pe bbia ca s’’a ‘mmentaje ll’arbitro…; però ‘o purtiere nuosto cchiú ddoppo arresecaje ‘e fà ‘a frettata nun mantenno n’atu tiro ‘e Politano, ma – pe ffurtuna – Berardi ll’aizaje ‘a mana e sbagliaje ‘a cunchiusiona difinitiva.
Hysaj 6: Tutto summato fove ‘o meglio d’’a trasera (difesa) cuana o allimmeno ‘o cchiú ppriciso e nnun ghiette maje ‘int’ê chiavette.
Albiol [‘O Masto] 5: Me dispiace, ma ajere nun me piacette cu ll’atalossa (prestazione) soja ca nun fove ‘a solia; ‘ncopp’ô stuco (gol) emigliano nun cuntrullaje a pPolitano, se facette nutizzià (ammonire) e nn’êsse pututo fà a mmeno.
Koulibaly [‘O Gialante] 4,5: Serata no d’’o ggialante braduso (lento) estracquo; ccustantemente ‘ndifficultà cu ‘a corza ‘e Politano e bBerardi, venette zumpato senza prubblema e sse purtaje ‘ncopp’â cuscienza nunn’avé cuntrullato a pPeluso ca ‘e capa cuglienno ‘o travesagno (traversa) favurette a pPolitano ca signaje.
Mario Rui 5,5: ‘E bbuono sulo ca dô pere suojo partette ‘o pallone ca curretto da sant’Arcadio, permettette a pPeppe ‘a ‘nguenta ‘e signà ll’uno a uno, ma – p’’o riesto – troppi prane (errori) ‘e mesura mo annante, mo arreto; nun ce simmo!
Allan [‘O ‘Ncrifato] 5,5: sulo quacche gramo pallunone uffenzivo, ma se vedette ca lle macajeno cegna (grinta) e fforza; spisso arrancaje pur’isso senza truvàb ‘na ficra (idea).Troppo poco!
[da ll’83’ Diawara sv: Che puteva fà jucanno sette minute?]
Jorginho 5: Nun fove ‘a serata soja! Troppo braduso (lento) nun riuscette nè a ccupulià (dialogare), nè a urtizzà (verticalizzare) Fove nutizziato (ammonito) e ddummenca à dda zumpà ‘o Chievo.
[dô 65’ Milik [sant’Arcadio] 7: fósse trasuto primma!Bastaje ca accumparesse ‘ncampo e sse cagnaje ‘o sibbacco (match) cuano (azzurro), se dette da fà giustranno e cumbattenno, accunciaje ‘a palla ‘e Rui pe pPeppe a ‘nguenta entra e ccugliette ‘nu travesagno (traversa) retissante (clamorosa)ô niajo (finale)].
Zielinski 5,5: Nun s’ammereta ‘e cchiú! Troppo attappato (ingolfato) dô muraglione emigliano, nun riuscette Mje a ttruvà spazzio pe sfucarse e rennerse periculuso. E cche ccacchio!
Callejon [Peppe ‘a ‘nguenta] 6: fove ll’unico annante a ffà coccosa; ne signaje dduje ma fove bbuono sulo ‘o siconno, chillo d’’o russimmo (pareggio).
Mertens [Ciruzzo] 5: Nun fove isso: stracquo, maje servuto a dduvere, poco zincatejo (incisivo) e sistematicamente mazzuliato dê madaffie (difensori) emigliane.Ascette primma dô nuvantesimo cu ‘e ggomme ‘nterra.
[dô 75’ Hamsik [Marekiaro] 4,5: Inutile.]
Insigne [Lorenzigno] 4: No, no, no! Che serata marrò; lle mancaje tutto: zurea (ritmo), cegna (grinta) e ffantasia, ê vvote me facette arraggià ‘e brutto e ll’êsse avuto ‘int’ê mmane ll’avesse scardata ‘a zella a bbotte ‘e carocchie soprattutto durante ô primmo ajone (nel primo tempo) quanno – comme v’aggio anticipato sbagliaje tre granni accasione!
All. Sarri 5 – E nun se mmereta cchiú ‘e tanto dàtose ca tene ‘na capa cchiú ttosta d’’a vreccia e nnun se vo’ rennere conto ca quanno se joca cu ‘na scuatra ca aiza muragliune ‘e nove perzone ‘nnante â muntaca (area di rigore) ce ne vo’ allimeno uno auto, forte e ccuraggiuso capace ‘e fà a spurtellate senza metterse paura, ‘e risolvere ‘e capa o allimmeno fà da torre p’’e nassíe (attaccanti) ze’-pochielle.
Arb. Fabbri 4,5‘: Stu ‘mpiacato [ma nun se sape addó], ancòra mannato pe spezzà ancòra ‘e passe ô Napule ce dimustraje ca ggià – pur’isso – sta ‘ncopp’ô stato paca d’Agnelli & socie. Cumminfatte ajere permettette, senza dicere niente ca chille d’’a trasera (difesa) emigliana mazziulasseno a tturno a cCiruzzo cumme tuccaje palla e siscaje sempe contr’ô Napule caputianno carí (falli); pigliaje ‘mpont’ô naso a cchiú dd’uno d’’e nuoste e soprattutto nun ce dètte ‘nu ricore ca Zielinski s’era abbuscato trasenno ‘int’â muntaca (area di rigore) emigliana e cce pigliaje p’’o prozo cuntrullanno cu a varra ca lle cunzola ’a sora, ma lla nce steva appustiato Banti.. figurateve!Che ne parlammo a ffà?!
E ffermammoce cca. Ve saluto e ssi dDi’ vo’ ce sentimmo llunnerí nove abbrile doppo ca ô san Paolo dummeneca otto a ll’ora d”a tiella, scenneno ‘e pariente lasche ‘e chella zoccola ‘e Giuletta, ma nun me faccio diebbete cu ‘a vocca, nun prunostico niente! Staveti bbe’!
