Tonelli rispunnette prisente, Lorenzigno facette ttanti bboni ghiucate

Napoli-Udinese, le pagelle in lingua: promossi Milik, Zielinski e Albiol. Un bravo anche a Sarri. Non benissimo Hamsik e Diawara.

Tonelli rispunnette prisente, Lorenzigno facette ttanti bboni ghiucate

Napoli-Udinese 1-1, ‘a vedette accussì

Pure chesto êvem’’a vedé, guagliú, pure chesto: ‘a sufferenza pe vvencere! Dicimmo ca ô prazzo (alla fine)ajeressera tutto jette a cciammiello, ma chella ca ‘ncopp’â carta êsse avut’’a essere ‘na mubbara (partita) facile contro a ‘na scuatra ca nn’êssem’avut’’a fà unu muorzo.

A ccunte fatte ce custaje ‘na fatica esaggerata pe nne venĺ a ccapo e vvencere e sfruttà ‘o russimmo (pareggio) d’’a vecchia zoccola a cCrotone, accurcianno a cquatto punte ‘a luntananza dâ primma crassiffica jenno accussí, dummeneca ca vene, a tTurino p’’a mamma ‘e tutt’’e màjche (battaglie) ancòra cu ‘na speranzella… E ttutto chesto pecché ll’Udinese, ‘mmece ‘e ven a ffà ‘a pecora destinata ô furno, scennette ô san Paolo dicisa a vvenere cara ‘a pellecchia soja e addirittura pe ddoje vote [41’ e 55’] ppassaje ‘nvantaggio custringennoce a correrle arreto pe rrecuperà e ppo finalmente averne raggiona… Cose ‘e pazze! Rrobba da nun crerere! Passammo ê ppaggelle:

Reina 6,5 – Nun tenette nisciuna respunzabbilità quanno fove superato e vvattuto da Jankto [41’] e dda Ingelssonne[55’], anze se facette apprezzà assaje salvanno ddoje vote cunchiusione d’’o ceco, assaje periculuso.

Hysaj [Meza Cucchiara] 5,5 – Sufferette quanno ll’Udinese attaccaje dô lato suĵo e nun cuntrastaje a cchillu pierepetterra ‘e Jankto [pe mme partuto ‘nnattasallulo (in fuorigioco)] ô mumento [41’] d’’a primma addaffa (rete) d’’e janche e nnire; p’’o riesto rummanette nchiummato ‘int’â camma (zona) soja senza maje daimmà (sostenere) a pPeppe ‘a ‘nguenta.

Albiol [‘O Masto] 6,5 – Stranamente preoccupato facette riggistrà quacche sfregazzo (sbavatura) cumme a cquanno tiranno ,’o pere arreto mancaje ‘e trasí ‘ncopp’ô pallone ca Jankto ô 41’ mettette ‘mporta. Però se facette perdunà ô 64’ quanno cu ‘na granna cabbesera (colpo di testa) mettette dinto ‘o siconno russimmo (pareggio).

Tonelli 7 – Sciveto da Sarri ‘mmece d’’o Vampiro, e miso ’ncampo pe bbia d’’a scualifica ‘e Koulibalý dô primmo minuto, rispunnette prisente e nun sulo furnette ‘na bbona atalossa (prestazione), ma nzerraje ‘a prattica ô 75’ cu ‘na cabbesera (colpo di testa) preputente.

Mario Rui 6 – Accumpagnaje sí cuntinuamente ll’azziona ‘e Lorenzigno ma senza maje truvà ‘o spazzio nicessario… Peccato!

Zielinski 6,5 – Uno d’’e cchiú sistimate; nun sulo se facette spisso tutto ‘o campo ‘e corza, ma spisso spustannose a ddritta cupuliaje cu lLorenzigno mannannolo ô tiro.

Diawara 5,5 – Miezu zifo (voto) mancante pecché ‘a riggia soja fove senza fantasia e gghiette ‘int’ê chiavette quanno ll’Udinese pigliaje curaggio pressanno ‘e nuoste a ttutto campo. Se purtaje ‘ncopp’â cuscienza ‘o siconno vantaggio d’’e jianche e nnire quanno nun chiudenno se perdette a Ingelssonne.

Hamsik [Marekiaro] 5,5 – Me dispiace, ma ‘o capitano me piacette poco: è overo ca fove periculuso ‘nu paro ‘e vote quanno tiraje, ma ‘ngenerale nun giraje addirittura liscianno ‘o pallone ca addivintaje chillo d’’o siconno vantaggio ‘e ll’Udinese; subbeto doppo Sarri s’’o chiammaje ‘mpanca!

[dô 57′ Mertens [Ciruzzo] 6 – Se facette apprezzà cercanno ll’addaffa (rete), nun ‘a truvaje e s’êtt’’accuntentà.]

Callejon [Peppe ‘a ‘nguenta] 6,5 – Pe bbona parta d’’o primmo ajone nun se vedette nè se sentette, però salvaje ‘o sibbacco (match) suĵo a ll’arrancua,tiranno a ppenniello paricchi tire ‘e squina (corner), nzertannose (inserendosi) e ccunchiudenno a mmestiere soprattutto ô 70’ quanno sant’Arcadio mettette dinto ‘o pallone d’’o vantaggio!

[da ll’82’ ROG s.v.- Jucanno sulo p’otto muinute se po’ ffà assaje poco!]

MILIK [sant’Arcadio] 6,5 – Cumplessivamente ll’atalossa (prestazione) soja fove pusitiva: jucaje p’’a scuatra spisso turnanno arreto pe ccupulià (dialogare) e ffove taminno (prezioso) cu ‘e sponne soje [e nn’arricordo una overo bbella ‘e tacco!] Pe pparicchiu tiempo nun riuscette a gghí ô tiro,po però ô 70’ se facette truvà, ô mumento justo i ô posto justo pe mettere dinto ll’addaffa (rete) d’’o vantaggio! Applavuse.

[dô 73′ Allan [‘O ‘Ncrifato] 6 – Trasuto ô mumento justo se piazzaje lla mmiezo e sse facette rispettà.]

Insigne [Lorenzigno] 7 – Se fósse mmeretato pure ‘e cchiú si nun ce avesse fatto aspettà quarantasette minute primma ‘e centrà ‘a porta, ma purtropppo ‘o ffacette e pe cquase tutto ‘o primmo ajone nun dètte cunnimma a ttanti bboni ghiucate, saille (dribbling) e ccorze finalmente, cumme v’aggiu ditto, curunate ô 47’ da n’addaffa (rete) bbella e ‘mpurtante!!

all. Sarri 6,5 – Chi vence ave raggione e ajeressera avette raggiona isso ca andivinaje ‘o rutizzio (turnover) senza ca ‘a scuatra ne patesse e nnun aspettaje troppo quann’êtt’ ‘ammiscà ‘e ccarte!

arb. Calvarese [i ‘a chenca soja, cumpreso chillo d’’a Varra] 5 – Scadente iasso i ‘e suoje, ‘stu ternano nun sulo siscaje (ad capocchiam), ma ce facette ‘a fetenzia ‘e cunvalidà ‘o stuco (gol) ‘e Jankto nun cecanno a vvedé ca era partuto ‘nnattasallulo (in fuorigioco).

E fermammoce cca cuntente d’avé vinciuto e dànnace appuntamento, si dDi’ vo’ a llunnerí ca vene quanno spero ‘e cuntareve ca dummeneca a ssera ‘o Napule è gghiuto a scardà ‘a zella a tTurino â vecchia zoccola e cce riuscito! Staveti bbe’! R.Bracale Brak

ilnapolista © riproduzione riservata