ilNapolista

Allan fove ll’urdemo a ss’arrennere, Marekiaro steva jucanno ‘na chiaveca

Fiorentina-Napoli, le pagelle in lingua: tanti bocciati, tra i peggiori anche Tonelli e Callejon. Insieme ad Allan, Reina si salva dal disastro.

Allan fove ll’urdemo a ss’arrennere, Marekiaro steva jucanno ‘na chiaveca
Foto SSC Napoli

Fiorentina-Napoli 3-0, ‘a vedette accussì

Mannaggia ê cane ‘e canciello guagliú! Che ccollera e cche ttuosseco e soprattutto che scuorno ajere all’ora d’’e ppastarelle e dd’’o rrusolio quanno ‘o Ciuccio jette a fFirenze e sse jette a ppiglià ‘na fremma  scutuliata pe ttre a zzero doppo ‘na mubbara (partita) ca ‘e nuoste, senza coscia e ssenza capa,  nun ghiucajeno proprio dimustranno súbbeto ch’èrano scise ‘ncampo cunzidizziunate da chello ch’era succieso sàpato a ssera a san Siro addó, accumpagnata da chilli duje ciesse a vviento  d’ Orsato e tTagliavento, ‘a vecchia zoccola era juta a vvattere ll’Interre annullanno, praticamente,ll’affiette d’ ‘a scunfitta  cu ‘o Ciuccio… e ttutto chesto no pecché ‘o sottoscritto se fósse sunnato (illuso) ca vincenno a tTurino se fósse  avutato ‘o canisto…i ‘a scuatre ‘e Spalletti  o chella ‘e Di Francesco êsseno rusecato quacche ppunto â vecchia zoccola.

M’’o ssentevo ‘e scennere pe ddereto ê rine chello ca fósse succieso a ssan Siro e cca certamente succede a ll’Ulimpico ‘e Roma…, ma ‘o Napule ‘o ssuĵo ll’êsse avut’ ‘a fà ô stesso e ccumbattere, cu ‘o curtiello ‘mmiez’ê diente nzi’ a ll’urdema jurnata,senza  arrenerse, senza jucà  i addirittura sbracà comme ‘mmece  succedette ajere a  fFirenze, addó – mannaggia ê cane canciello – s’arrennetteno e cce mettetteno ‘o scuorno ‘nfaccia tutte, accummincianno dô muntarribbo (allenatore) SARRI [3,5] ca nun sulo liggette malamente ‘a mubbara (partita) mannanno ‘ncampo  ‘na scuatra  senza coscia e ssenza capa, cundizziunata  da chello ch’era succieso sàpato a ssera a san Siro senza ca isso  ll’êsse fatt’’e bbuche ‘ncapa  p’’e ffà cagnà penziero..,

Ma, pe gghionta ‘e ruotolo gestiunaje (gestí) malamente ‘a situazziona quanno ô 10’ ‘o Gialante  ne fove cacciato fora e ‘mmece ‘e levà a MMAREKIARO [4] ca steva jucanno ‘na chiaveca, levaje ‘o pierno ‘e ll’armidanno (centrocampo) JORGINHO [sv, asciuto tropp’ambressa] e ‘mmece d’’o VAMPIRO,  ffacette trasí a ‘nu TONELLI [4,5] ca, e sse sapeva,  êsse fatta ‘a fijura ‘e  ll’aseno ‘mmiez’ê suone, perdennose pe ddoje vote a sSimeone [ô 34’ i ô 62’]ca puntualmente ce futtette, cumme succedette ô 93’… e ppeggio Sarri  facette quanno ‘ncapunito nun tenette ‘o cuorio ‘e levà a PPEPPE ‘A ‘NGUENTA [4] ca, nervuso e ‘ncunchiudente, aizaje porvera pe ttutt’’o sibbacco (match) e mmettere dinto ‘a BBELVA. Pirciò nun me maravigliaje  quanno ‘a mubbara (partita) s’avutaje a nniro e asseccajemo tre bbuffettune, cu ‘nu paro  quase copia e ‘ncolla. A ‘stu punto êsse ‘a fà ‘e ppaggelle, ma nervuso cumme stongo mettesse 3 a ttutte quante, ma nun fósse justo pe cchilli dduje o tre ca coccosa ‘o ffacetteno… pirciò nun parlanno ‘e chille ca ggià aggiu ditto  mecco ‘e zife (voti) a:

Reina 6,5 – Uno d’’e  poche  a ssalvarese; cu ttre ttacculle (interventi)salvaje pe n’ati ttre vvote ‘a porta soja ca si no ‘a mazzata fósse stata cchiú ppesante.

Hysaj [Meza Cucchiara] – 4,5  Scadente; dâ parta soja Chiesa facette chello ca vulette!

Albiol [‘O Masto] 6 – Êtt’’a fà ‘e straurdinarie, pruvanno a ttené allerta ‘a bbarracca, ma nunn’avastaje. Che peccato!

Koulibaly [‘O Gialante] 4 – Me dispiace, ma tanto se mmereta!Fove fesso e ppesce ‘e cannuccia facenno ‘na fessaria ca ce custaje cara; ll’êss’avut’’a sapé ca, ca pure ‘na sciucchezza, Mazzoleni   nun ce ‘a faceva passà liscia!

Mario Rui 4,5 – Atalossa (prestazione) senza zuco nè ccunnimma nun servette nè a ccuntené nè a appressurà (spingere).

Allan 6,5 – Ll’urdemo a ss’arrennere, cumbattette cu ccegna (grinta)e ccurrenno pe dduje. ‘E cchiú nun putette fà.

[Dô 58’ Zielinski ô posto ‘e Marekiaro 5,5 – Pur’isso  maje ‘int’â mubbara (partita)].

Mertens [Ciruzzo] 4,5 – Nunn’è cchiú isso: senza coscia e ssenza ficre (idee)nun riuscette a ffarese nutà!

[dô 58’ Milik 5 – Trasuto troppo tarde, nun riuscette a ccagnà ‘a storia ‘e ‘na mubbara (partita) signata!]

Insigne [Lorenzigno] 5,5 – Pur’isso ‘mbrugliato ‘mmiez’ô ‘mbruoglio d’’a ‘mbrugliata riuscette a ffà poco e nniente, se ‘nnervusette e nnun ce stette cchiú cu ‘a capa!

arb. Mazzoleni 4 – Carta canusciuta, che ne parlammo a ffà? Nun m’aspettavo ‘e meglio. Se ‘ncazzaje pecché chillo d’’a Varra ‘o scunfessaje ô 10’ e ffove custretto a nnun dà ‘o ricore â Fiorentina, ma s’’a scuntaje cu ciKalidú jettannolo fora; nun cuntento ne nuttizziaje (ammoní) cinche d’’e nuoste e sparagnaje quacche cartellino jalizzo (giallo) ê viulette.

E fermammoce cca! Jette cumme jette e ppacienza; si quaccuno s’era sunnato coccosa ca se scetasse e tturnasse cu ‘e piede ‘nterra! P’’o scudetto si Di’ vo’ se ne parla ‘a tempurata ca vene! P’’o mumento sperammo sulo ‘e ferní ‘stu campiunato senza ati fijure ‘e mmerda, mantenenno ‘o siconno posto!!

Ve saluto  e ccu ll’ajuto d’’o Cielo ce sentimmo llunnerí ca vene pe rraccuntarve d’’o sibbacco (match) ô san Paolo cu ‘o Torino. Staveti bbe’.

ilnapolista © riproduzione riservata