Inter-Napoli, pagelle in lingua: pochi voti alti, tra i promossi ci sono Mertens e Jorginho. Male Callejon e Hamsik, voto 5 a Sarri.
Inter-Napoli 0-0, ‘a vedette accussì
E cche ce vulite fà guagliú! Se vede ca accussí sta scritto lla ‘ncoppa e ddint’ô libbro d’’o destino nuosto..; e cce vulimmo mettere contr’ô destino senz’essere attrezzate pe ffarlo? È inutile, nun serve e cce se fa pure ‘o sanco amaro… P’’o mumento rassignammoce a sunnarce ‘o muorzo sapurito e scetammoce pisciate sotto pe vvedé ca n’ato s’’o sta spuzzulianno. Tengo ‘o ttuosseco ‘mmocca pecché pur’i’ nc’êvo creduto e mme ll’êvo sunnato…, ma oramaje è ‘o mumento ‘e parlarce chiaro faccia a ffaccia: nun simmo ancòra pronte, nn’âmm’’a magnà ancòra furne ‘e pane primma d’essere a ll’aldezza ‘e ‘nu pruggetto ‘mpurtante.
E mme spieco: quanno ‘na scuatra vène meno proprio ô mumento cchiú ‘mpurtante [‘na vota facennose vattere dâ Roma ‘ncasa e subbéto doppo, cumme ajeressera, facennose fermà ‘ncopp’ a ‘nu scunzulato zzero a zzero dô catenaccio ‘e chella faccia ‘e cestunia ‘e Spalletti…] se vede ca nunn’ è ancòra ammatura i à dda aspettà; mettitece pure ‘o fatto ca ajeressera vedettemo chiaro ca paricchie d’’e nuoste s’erano fatte cundizziunà nun sulo da chello fatto da Dybala,dô penziero ‘e Dzeko,ma soprattutto dô muraglione d’’o piscione ‘nterista ‘e ll’addabba (andata) e a ll’ejuda (ritorno) e cce spiecammo cumm’è ca ‘a vecchia zoccola oramaje a mmità mmarzo nce à surpassato e aîmmo voglia ‘e dicere…
Maggio è vvicino e ffort’è si riuscimmo a mmantenere ‘o siconno posto; mo cumme a mmo oramaje ‘a vecchia zoccola tène ‘nu punto cchiú ‘ncrassifica ca addiventano quatto miercurí cu ‘a tarra (confronto) cu ll’Atalanta [scuatra assineja (satellite) d’’a vecchia zoccola e ppirciò destinata a pperdere ], ‘a brica (lo scontro) faccia a ffaccia da jucà a tTurino.. e mme dicite vuje quanno e ccumme ‘e ricuperammo ‘sti quatto punte? No, no, purtroppo mo ‘a valanza penne dâ parta janca e nnera ennuje putimmo sulo sbatterce ‘mpietto e ppigliarce a mmorze ‘e ddete! Primma a Roma po ll’Interre so’ state dduje fecuzzune pesante p’’o suonno d’’e guagliune ‘e Sarri ca giustamente êvemo lassato stà coppe e ccuppette pe ccuncentrarse ‘ncopp’ô campiunato…, ma po so’ vvenute meno proprio ‘int’ô mmeglio ô ccuntrario d’’a vecchia zoccola ca, cuntanno ‘ncopp’a ‘na panca longa assaje, a ll’arbitre i a ttant’ati ccose [ca se chiammano pinnule e sserenghe], cuntinua a vvencere tutto chello ca ce sta da vencere.
E nnuje? Nuje nun tenimmo nè ‘a panca longa [vennerse Striniccio e zZapatone è stata ‘na puttanata esaggerata], nè sciorta [troppa ggente s’è acciaccata], nè ssaluta, nè fforza nicessaria e ttenimmo a ‘nu bbuono mutarribbo (allenatore), ma però cu ‘a coccia tosta, ca tene ‘e ffissazzione soje e nnun cagna penziero manco cu ‘o curtiello sott’â panza e ttenimmo ‘nu presidente ca dint’ô Palazzo conta ancòra cumme ‘o doje ‘e coppe quann’’o triunfo è a mmazze e nunn’à capito ancòra ca cumme s’accattano ‘e jucature, accussí s’accattano arbitre e signalinie Addizziunammo tutto e ddàtose comme diceva Totò (che la somma fa il totale) ce spiecammo ca s’è trattato ‘e ‘nu suonno. Me dispiace, ma ‘o fatto chist’è! Turnammo a ajeressera e ppassammo ê ppaggelle:
Reina 6 ‘- A fora ‘e quacche bbona asciuta urdinaria nunn’êtte ‘a fà assaje
Hysaj [Meza Cucchiara] 6,5 – Difennette a mmestiere marcanno a pPerisic(cio) e se facette vedé pure annante, ma cu ppocu zuco.
Albiol [‘O Masto] 6 – Nun sbagliaje niente, mantenenno ‘o carruggio (rendimento) custante pe cquase tutta ‘a mubbara (partita). Peccato ca se facette nutizzià (amnmonire).
Koulibaly [‘O Ggialante] 6,5 – Jucaje ‘na cifra ‘e pallune facennose truvà sempe pronto e ppusizziunato a mmestiere.
Mario Rui 6 – Avette cu cCandreva quacche prubblema, ma s’’a cavaje sempe bbuono e se mantenette, soprattutto ‘int’ô primmo ajone (tempo) ‘int’ô bbivo d’’o juoco.
Allan 6 – Peccato ca pur’isso facette quacche fessaria ‘int’â trecquarte ‘nterista, ma ce mettette sempe ‘a solita corza i ‘a solita cegna (grinta), ricuperanno pallune lla ‘mmiezo e ddànnose da fà pure si cu ppocu zuco! [da ll’89’ ROG s.v.pe fforza! Ve pare serio farelo trasí pe ‘nu minuto ‘e juoco?]
Jorginho 6,5 – ‘O cchiú mascullo (lucido)d’’a sezziona (reparto), jucaje ‘e primma senza farese ‘mpressiunà, purtanno assignatezza (ordine) a ll’armidanno (centrocampo).
Hamik [Marekiaro] 5,5 – Me dispiace, ma ll’aggi’’a levà miezu zifo (voto) pecché è overo ca tuccaje tanti pallune, ma ne jucaje bbuone sulo poche e paricchie ‘e sbagliaje; ‘e cchiú nun fove priciso quanno cunchiudette!E cche saciccio!
[dô 71′ Zielinski 6 – Trasuto tardulillo nunn’avastaje ll’ajàvia (vivacità) soja pe schiuvà ‘o zzero a zzero d’’o sibbacco (match)].
Callejon [Peppe ‘a ‘nguenta] 5 – No, ajeressera nuin me piacette e i’ ll’êsse levato ô 70’ pe ffà trasí sant’Arcadio… A ddritta nun sfunnaje piglianno spisso ‘a decisione sbagliata e perdenno pure ‘a pussibbilità ‘e tirà a bbotta fremma; mannaje ‘na vota ‘o capitano a ttirà, ma po sparette cumpletamente! E cche saciccio!
Mertens [Ciruzzo] 6 – M’aspettavo ‘e cchiú, ma ‘e cumpagne nunn’ ‘o detteno ‘na mano scurdannoselo spisso ‘mmiezo ‘e duje mammasantissime d’’a trasera (difesa) ‘nterista; allora isso tentaje allimmeno coccosa cu quacche magaria, ma senza zuco; fove però isso ca mannaje ‘mporta Lorenzigno, ca però sbagliaje
[Da ll’87’ Milik [Sant’Arcadio] s.v. – Pe fforza! Ve pare serio farelo trasí pe ttre minute ‘e juoco?]
Insigne [Lorenzigno] 5,5 – Ll’aggi’’a levà pe fforza miezu zifo(voto) Anze ajeressera ll’êsse pigliato a mmuorze ‘ncampo: è overo ca se facette ‘nu mazzo tanto ma jette ‘int’ô nuvanta quanno se trattava ‘e zumpà ll’ommo o ‘e tirà ‘mporta ‘na cagliosa; cumminfatte nun riuscette maje a zzumpà a Skriniar(re), sbagliaje ddoje grosse uccasionee sse bbluccaje ‘nnante a Handanovic(cio).
Sarri 5 – Tanto s’ammereta pecché liggette malamente ‘a mubbara (partita) mannanno ‘ncampo ‘e soliti unnece ca nunn ne cacciajeno niente cu ‘o solito juoco palliggiato e avastaje ‘a pressiona (pressing) ‘nterista pe mmettere ‘ndifficultà ‘o Napule! So’ cumminto ch’êsse avuto, allimmeno dô 65’, pruvà a ccagnà juoco facenno trasí ggenta fresca e ‘mprimmose a ssant’Arcadio e a rRog: è overo ‘a rirere si nun fósse ‘a chiagnere sperà ‘nu miraculo da n’ommo facennolo jucà tre mminute e mmeno: nunn’è ffatto san Gennaro!
Arb. Orsato 3 – E ll’aggiu trattato a ‘stu cecatiello ca mannato a cce spezzà ‘e passe ‘o ffacette ajeressera nun vedenno ‘e tanti carí (falli) ‘nteriste e llassaje correre senza siscà maje, pe ppaura ca ‘o Napule putesse vencere. Cose ‘e pazze! E ddiceno ca chisto è ‘o meglio arbitro ca tenimmo! Si chist’è ‘o meglio penzate ll’ate ch’ànn’’a essere! Aggio paura ca purtroppo pure isso sta ‘ncopp’ô stato paca d’ Agnelli e ssocie.E Dela nun à capito ancòra ca ‘nzieme a cquacche gghiutore s’àdda accattà quacche signalinie e ccocche arbitro! Gnorsí, forze costano assaje,però renneno.
Basta va’, nun ce penzammo cchiú; è gghiuta cumme è gghiuta e ppacienza. Quanno uno sbaglia ‘nu paro d’uccasione ‘mpurtante e nun mena ‘mporta dduje pallune ca s’aspettavano sulo d’essere fravecate ê spalle d’ Handanoviccio, à dda sulo sbatterese ‘mpietto e ffà (mea culpa, mea culpa). C’êvemo sunnato ‘nu bbellu suonno e cce simmo scetate turnanno cu ‘e piede ‘nterra Mo è fernuta, ‘a vecchia zoccola c’è zzumpata ‘ncuollo e ce à levato ‘a purpetta ‘a dint’ô piatto; pigliammone cuscienza e salvammo chello ca se po’ ssalvà…, pecché purtroppo pure ca ce scurciassemo ‘e mmaneche s’è fatto tarde p’’o pruggetto ‘mpurtante. Âmmo perzo ‘o trammo! Peccato!
E ccu cchesto ve saluto e ssi dDi’ vo’ ce sentimmo n’ata vota llunerí ca vene doppo d’’a mubbara (partita) ô san Paolo ‘e dummeneca a ssera contro ô Crifone, speranno ‘e turnà a vvencere.
Staveti bbe’.
