Lorenzingno fove uno d’’e cchiú scetate, Albiol ‘o culosso

Lipsia-Napoli, le pagelle in lingua: tutti oltre la sufficienza, solo Hamsik deludente. Bene Tonelli e Mario Rui, voto alto anche per Sarri.

Lorenzingno fove uno d’’e cchiú scetate, Albiol ‘o culosso

Lipsia-Napoli 0-2, ‘a vedette accussì

Bbuono accussí, bbuono accussí guagliú. Ajeressera, pe ‘na grama vota, ‘e cuane (azzurri) ‘e Sarri me facetteno cuntento e scennetteno ‘ncampo ‘int’ô mastrillo terisco dicise a essere prutacuniste ‘e n’atalossa taminna ( prestazione ottima )e accussí ffove, tant’è overo ca ajeressera se vincette pe ddoje a zzero, mantenenno ‘a porta acrata (inviolata), cosa ca ce cunzettette ‘e ascí dâ cuppetella airupea [cumme speravo ca fósse, datose ca pe nnuje jucarla ancòra nc’êsse putut’essere sulo ‘nu ‘mpiccio p’’o pruggetto ‘mpurtante…], ma ‘o ffacettemo a ccapa auta dimustranno ê terische ca ‘o Ciuccio visto ‘na semmana fa ô san Paolo nun era ‘o Napule overo, benzí ‘nu ritratto a sfuttò d’’a fotocopia sbagliata… addó ca ajeressera jucajeno tutte bbuono e ssulo ‘o capitano [5 e ppo ve dico] nun me piacette! ‘Nzomma, cumme jette e ccumme venette, ajeressera se recugliette chello ca se vuleva: ‘na bbella nichemata (vittoria) e asciscersene dâ cuppetta.

Putimmo essere suddisfatte, allimmeno si aggiu capito bbuono chello ca vuleva ‘a suggità cuana (azzurra).
Passammo ê ppaggelle

Reina 6,5 – P’ ‘a verità, ‘a fora ‘e na granna curaggiosa asciuta a ttuffo ‘mmiez’ê piere ‘e n’avverzario, nunn’êtte ‘a fà assaje…, ma s’’o mmereta cumpletamente pe ccumme jucaje tutta ll’arrancua (ripresa) a ccentro d’’a muntaca (area di rigore) soja pronto [cumme facette] pe ppricipitarze fora a ccuntrastà o anticipà, ‘e pere o ‘e capa ll’avverzario periculuso.

Maggio 6,5 – Me piacetteno ddoje bbelle scese annante d’’e ssoje a ddritta; p’’o riesto se dedicaje sulamente a ll’epata difenziva (alla fase difensiva) senza sufferenzie.

Albiol [‘O Masto] 7 – Lla ddereta fove ‘nu culosso: ‘e capa ‘e ppigliaje tutte isso e ccumplessivamente nun sbagliaje niente, mettenno ‘a musarola a vWerner(re).

Tonelli 6,5 – Ô pprincipio arresecaje ‘e dà ‘nu dispiacere a rReina cu ‘na sfurtunata deviazziona, ma po tutto jette liscio e ffove prutacunista ‘e ‘na brica (duello) scamosa a spurtellate cu Poulsen(ne) ch’êtt’’a fà, cu ‘o centrale nuosto, palla corta.

Mario Rui 6,5 – Me piacette lla a mmancina addó appressuraje (spinse), cupuliaje (dialogò) e ddètte ‘na mano a lLorenzigno. Ô 68’ se nn’êtte ascí pe ‘nu ‘mpiccio sott’â chianta ‘e ‘nu père. Sperammo ca fósse cosa ‘e niente!

[Dô 68’ Hysaj [Meza Cucchiara] 6,5 – Pure si sulo pe ‘na ventina ‘e minute, facette ‘o ssuĵo mettennoce cegna (grinta) e ggenio (voglia) ]

Allan [‘O ‘Ncrifato ] 6,5 – Meno ‘ncrifato d’’o ssolito, ma sempe prisente ricuperanno palle e appujannole.

Diawara 6,5 – Urdinato e ppriciso cu ll’atalossa (prestazione) soja risultaje cunvincente. [Da ll’ 83’ JORGINHO 6 ‘e sima pecché jucaje troppo poco pe ddarle ‘nu zifo (voto)]

Hamsik [Marekiaro ] 5 – Ll’unicu fora sintunia;sempe ‘mpriciso e arrunzone, sbagliaje cchiú ‘e ‘nu ‘nzertamiento (inserimento) facile, dimustranno ‘e nun ce stà cu ‘a capa.

[Dô 65’ Callejon [Peppe ‘a ‘nguenta] 6,5 – Trasette subbeto ‘nsibbacco (nel match), mettenno ‘mmiezo tanti ppalle, ‘nzertannose (inserendosi), servenno a lLorenzigno.]

Zielinski 6,5 – Atalossa(prestazione) pusitiva e zzucosa da veru nassio (attaccante) p’’o stuco (gol) suojo ca ô 32’ signaje cumme ‘e ssegna Aguero; forze overo assumiglia a dDe Bruyne, cumme dice Sarri.

Mertens 6 – Jucaje cchiú ppe ddà palla ca pe mmenarla dinto; me piacette però cumme cupuliaje (dialogò) cu lLorenzigno.

Insigne [Lorenzigno] 7 – Cumprimente! Fove uno d’’e cchiú scetate e ccu ggenio ‘e fà;participaje a ll’azziona d’’o stuco (gol) ‘e Zielinski e arrivate a ll’86’ nchiudette ‘a pratteca cu ‘na jucata da granne figlio ‘e coperativa: s’appustiaje arreto ô terzino e lle passaje ‘nnante pe ddevià ‘a palla ô mumento prupizzio!

all. Sarri 6,5 – Facette vedé ajeressera ‘o Napule overo, chillu tuosto e uttenette chello ca pur’isso vuleva: ‘na bbella nichemata (vittoria) e ascirsene â cuppetta!

arbitro: Taylor e i ‘a chenca soja 5 – ‘Stu ‘ngrese siscaje poco e soprattutto credette a uno d’’e signalinie suoje ca scennette ‘ncampo cu ‘nu vraccio ‘ngessato i ‘a bbannerella teseca a ssignalà sempe attasallule (fuoruigiochi) d’’o Napule.

Basta accussí. Finalmente ce simmo levato ‘nu ‘mpiccio e pputimmo metterce cu ‘a panza i ‘o penziero ô campiunato accumincianno ggià da llunnerí ca vène quanno jammo a cCagliari, naturalmente a vvencere, dàtose ca ll’âmm’’a vencere tutte e ssi dDi’ vo’ ve ne parlo marterì. Staveti bbe’.

ilnapolista © riproduzione riservata