Koulibaly levaje ‘e castagne dô ffuoco, Allan ‘e corza e ccegna

Napoli-Verona, le pagelle in lingua: voti positivi per Marek Hamsik e Lorenzo Insigne, Dries Mertens è parso in ripresa.

Koulibaly levaje ‘e castagne dô ffuoco, Allan ‘e corza e ccegna
Koulibaly - Foto Ssc Napoli

Napoli-Verona, ‘a vedette accussì

Sí,sí e ssí guagliú! Ajere a ll’ora d’’a tiella ô san Paolo, ‘o Napule, facennose perdunà d’avé perduto cu ll’Atalanta ‘ncoppa itaglia,  vincette contro ê pariente ‘e chella zoccola ‘e Giulietta e ffoveno tre ppunte pesante chille ca ce mettettemo dint’â sacca cuntinuanno, ‘ncampiunato, a rrummané ‘ncimm’â crassifica. Peccato sulo ch’êttem’’a fà ‘o cuollo luongo aspettanno ll’arrancua (ripresa) pe vvedé vencere ‘e guagliune ‘e Sarri dàtose ca sulo doppo n’ora e sseje minute ‘o Gialante nuosto, ‘ncopp’a ‘nu tiro ‘e squina (corner) riuscette a sbluccà ‘o risultato ca addeventaje ‘o doje a zzero finale sulo ô 78’ quanno Peppe ‘a ‘nguenta mettette dinto ‘o solitu bbassuerero (suggerimento) ‘e Lorenzigno; ‘mmece primma durante ô primmo ajone nun foveno saciccio ‘e signà cuglienno dduje pale [‘na vota cu Ciruzzo e n’ata vota cu Lorenzigno ]e sbaglianno ‘nu paro ‘e bboni accasione.

Però, tutto summato, bbuono accussí pecché pe ttutt’’o sibbacco (match) Reina rummanette a spasso e sulo a ll’83’ ‘e verunese riuscetteno, senza fà danno, cu pPazzini a ttirà ‘mporta apprufittanno ca ‘o Masto zuppechiava tant’ è vvero ch’êtte ‘ascí! ‘Nzomma ‘o Napule, ‘ncampiunato turnaje a ffà ‘o Napule e ccumplessivamente me piacette pure  si cu quacche sfregazzo (sbavatura) d’’e tre tenure e d’’o capitano. Pacienza: nun se po’ avé tutto dâ vita e dê primme aizze (titolari). Cuntentammoce ‘e vederle ‘e vencere! Passammo ê ppaggelle:

Reina 6 – Sulo ô 78’ Pazzini lle scarfaje ‘e guante; p’’o riesto tuccaje palla sultanto  si fove chiammato ‘ncausa dê socie.

Hysaj [Meza Cucchiara] 6 – Appressuraje (spinse) assaje e sse facette vedé suvrappunennose; però spisso fove ‘mpriciso. Peccato!

Albiol [‘O Masto] 6 – Gestiunaje (gestí) cu ssette parme ‘e saciccio ‘o muvimento dê pparte soje e da lla nun se passaje. Cuoveto da ‘na cianfata ‘ncopp’ô canniello d’’a gamma êtte ‘a stregnere ‘e diente nsi’ a ll’85’, ma po sarri s’’o chiammaje ‘mpanca

[Da ll’85’ Maksimovic s.v.]

Koulibaly [‘O Gialante] 8 – ‘A solita trancara (muraglia) lla ddereto addó jetteno a ttuzzà chi fove fove; ‘e cchiú ajere ‘o Gialante levaje ‘e castagne dô ffuoco a sSarri signanno, cu ‘na granna cabbesera (colpo di testa) ll’addaffa (rete) ca sbluccaje ‘a mubbara (partita). Ll’âmm’’a sulo sbattere ‘e mmane e ddicere: “Grazzie!”

Mario Rui 5.5 – ‘E cchiú nun lle pozzo mettere pecché p’appressurà (spingere) ‘o ffacette sí, ma sbagliaje troppi pasiglie (passaggi) pure fesse i â maràla difenziva (fase difensiva) arrancaje secutanno Romulo.

Allan [‘O ‘Ncrifato] 6 – Atalossa (prestazione) cuncreta fatta  ‘e corza e ccegna (grinta); a ll’arrancua (nella ripresa) però , stracquo sbagliaje quacche ppallone; perdunammolo.

Jorginho 5.5 – Me dispiace, ma nun pozzo metterle ‘e cchiú  datose ca, marcato a ommo, nun riuscette a urtizzà (verticalizzare) a dduvere, cuntentannose ‘e fà ‘o stritto nicessario.

Hamsik [Marekiaro] 6.5 – Tutto summato bbona atalossa (prova) d’’o capitano ca durant’ô primmo ajone (primo tempo) se rennette periculuso ‘nsertannose spisso, mentre ll’arrancua (ripresa) preferette dà ‘na mana lla ‘mmiezo.

[Dô 77’ Zielinski 6 – Trasette pe ffà risciatà ‘o capitano e ppe ddà frischezza ô juoco ‘e mità ccampo i ‘o ffacette.]

Insigne [Lorenzigno] 6.5 – Speraje ca signasse, ma ajere Lorenzigno nun riuscette a essere cuntinuo cu ‘o juoco suojo;  pe troppa pricipitazziona cugliette ‘nu palo  e addirittura se magnaje ‘nu stuco(gol) bbello e ffatto, tiranno cu tutt’’o cuorpo spustato a gghí arreto. ‘Nu campione ‘sti ccose nunn’’e ffà! Se rifacette dànno a pPeppe ‘a ‘nguenta ‘nu zucchero ‘e palla: chella d’’o doje a zzero!

[Da ll’87 Rog 6 – Facette ‘o ssuĵo, pure si pe ppoco.]

Mertens [Ciruzzo] 6.5 – Fove ‘o cchiú arzillo lla ‘nnante mettenno cuntinuamente ‘ndifficultà ‘a trasera (difesa) verunese; sfurtunato cugliette ‘nu palo. Peccato!

Callejon [Peppe ‘a ‘nguenta] 7 – Se muvette, ma nun trasette maje ‘int’ô vvivo d’’o juoco; però quanno Lorenzigno ‘o piscaje cu ‘a palla justa, isso ‘a sfruttaje mettenno dinto ‘o pallone ca nchiudette ‘o sibbacco (match). ‘o ffacesse sempe!

all. Sarri 6 – Quanno se vence vence pure ‘o muntarribbo (allenatore), ma si vulimmo jí annante ‘a scuatra à dda migliurà benniamente (fisicamente) e nnun à dda sciupà ll’accasione!

arb. Abisso 6 – Chisto è mmiezo scemo, ma ce porta bbuono. Cu cchesta d’ajere, ddoje mubbare (partite) arbitrate e ddoje nichemate (vittorie)noste!

E ffermammoce cca, cuntente d’’o primmo posto ‘ncrassifica! Mo cumme a mmo però  nun saccio quanno se torna a gghiucà e ppirciò, si Ddi’ vo’, nun pozzo dareve n’appuntamento priciso. Staveti bbe’!

ilnapolista © riproduzione riservata