Mettiteve appaura, Ciruzzo turnaje! Reina ascette a mmestiere ‘ncopp’a pPalacio

Napoli-Bologna, le pagelle in lingua: Chiriches e Hamsik promossi con riserva, bene Jorginho, Callejon e Insigne. Buon impatto sulla partita per il subentrante Zielinski.

Mettiteve appaura, Ciruzzo turnaje! Reina ascette a mmestiere ‘ncopp’a pPalacio

Tutto a pposto, guagliú! Ajere ô san Paolo a ll’ora d’’a tiella  ‘o Ciuccio cunzignaje ô Bbulogna tre ppurpette [ddoje urigginale cu Ciruzzo ô 37’ i ô 59’  e ll’ata ô 5’ appezzuttata e ‘mpastata da ‘na murtatella [Mbaye ca fenette ‘e menà dint’â porta soja ‘na palla velenosa ‘e Mario Rui ca ce fósse trasuta pe ccacchie d’’e suoje…] e sse jette a ppiglià n’ata vota ‘o primmo posto ‘ncrassifica, â faccia d’’a vecchia zoccola, ‘e chillu cestariello ‘e Ggiggino uocchie-stuorte ca pure ajere steva appustiato ‘ncopp’ê bbemate (spalti) a mmenà ‘a seccia, ma cchiú ‘e farece ‘ncassà da Palacio, lassato libbero e ffranco da Mario Rui ‘nu stuco (gol) doppo appena vinte sicunne, custringennoce a ffà ‘na mubbara (partita) cumbattuta e  ‘nsagliuta nun putette pecché ‘o Napule vincette ô stesso e s’êtt’’a fà dint’ô prozo isso i ‘o Palazzo ca pe spezzarce ‘e passe e accuntentà ‘a vecchia zoccola ce aveva mannato a mMazzoleni [6], ca però ajere, stranamente,  fetenzie nun ce ne facette      dànnoce pure ‘o ricore d’’o doje a uno, chillo ca ô 37’ Ciruzzo mettette dinto cu ‘nu tiro forte e ppriciso!

Arrivate po ô 59’ Ciruzzo cumpletaje ll’pera e mmettette dinto, cu ‘nu tiro a ggiro surprennente ‘o 3 a 1! Se vede ca ajere pure ‘o Cielo tifaje pe nnuje e nnun permettette ca nun vincessemo, accussí comme à dda succedere nsi’ a mmaggio!

Passammo ê ppaggelle:

Reina 7 – Êtt’’a fà ‘nu sulu taccullo  (intervento),ma funnamentale, ascenno a mmestiere ‘ncopp’a pPalacio a ‘nu passo dô siconno musavo (svantaggio), tennenno allerta ‘o Napule!

Hysaj [Meza Cucchiara] 6 –  Atalossa (prestazione) aunesta, senza ‘nfamia  e ssenza applavuse.

Chiriches [‘O Vampiro]  6 meno -‘A chiena i ‘a vacante: durante ô primmo ajone(tempo) sudaje ‘e ssette cammise perdennose ògne ttanto a  pPalacio e cchiú ‘e ‘na vota c’êtte ‘a penzà Reina; meglio a ll’arrancua (ripresa), quanno ‘o bBulogna s’arrennette.

Koulibaly [‘O Gialante] 6 – Facette ‘o sujo senza fà fessarie e ppassanno ‘e minute sagliette ‘e tuono.

Mario Rui 6 – Accumminciaje malamente  facennose surprennere  Palacio,ma po migliuraje e fove isso  ‘o prutacunista ‘e ll’uno a uno.P’’o riesto fove taminno   (sicuro) arreto e se facette vedé spisso appressuranno (spingendo) ‘ncopp’â curzia soja; êss’avut’’a sparagnarese ‘o cartellino jalizzo (giallo) pigliato ô niajo (finale).

Allan [‘O ‘Ncrifato] 6 – Durante ô primmo ajone(tempo) nun me piacette troppo, ma po sagliette ‘e tuono e ô ssolito fove ll’urdemo a mmullà, cunquistanno pallune e ppallune, luttanno e ccurrenno; peccato ca nun cercaje maje ‘a porta.

Jorginho 6,5 – Purtaje arricietto (ordine) senza farese piglià dâ frennesia e ffove attiento e ppriciso.

Hamsik [Marekiaro] 6 meno –  Sbagliaje poco e cupuliaje a mmestiere cu Llorenzigno, facenno ‘e ccose juste ô mumento justo cu ‘nu juoco raggiunato e ppriciso, ma nun cercaje maje ‘a porta.E ll’êsse avut’’a fà, ‘nzertannose (inserendosi) cchiú spisso!

[Dô 66′ Zielinski 6,5 – Trasette a mmestiere e ppurtaje frischezza lla mmiezo mannanno ô tiro quacche cumpagno.]

Callejon [Peppe ‘a ‘nguenta] 6,5 – Nun signaje, ma fove assaje prisente participanno a ttante azzione e crianno cchiú ‘e ‘nu periculo; ‘e cchiú ‘nfilannose ‘nnante ô terzino ‘e dritta ‘o custringette a mmenarlo ‘nterra e s’abbuscaje ‘o ricore d’’o doje a uno!

Mertens [Ciruzzo] 7,5 – Mettiteve appaura, Ciruzzo turnaje e ccu ddoje perne ‘nzerraje ‘a prattica. Che ghiucatore!I

Insigne [Lorenzigno] 6,5 – Trasette subbeto ‘nsibbacco (nel match), urtizzanno (verticalizzando), puntanno ll’ommo, senza maje fermarese; nun truvaje ‘o stuco (gol), ma l’atalossa (prestazione) soja fove auta.

[Da ll’80’  Rog 6 -‘e stima e s’’o mmeretaje]

All. Sarri 6,5 – È overo ca ‘a mubbara (partita) fove ‘nsagliuta e ffaticata e ca ‘a vincette praticamente Ciruzzo, ma tutt’’a scuatra nun perdette maje ‘a capa jucanno cumm’isso vuleva nsi’ a ttruvà ‘na cummincente nichemata (vittoria).

Arb. Mazzoleni 6 – Era stato mannato, comme v’aggiu ditto,  pe spezzarce ‘e passe e accuntentà ‘a vecchia zoccola, però ‘stu bergamasco ajere, stranamente,  fetenzie nun ce ne facette, anze ce dette  pure ‘o ricore sacrusanto d’’o doje a uno!

E fermammoce cca, cuntente e comme è gghiuta e ssi dDi’ vo’ ce dammo appuntamento pe llunnerí ca vene, sperammo ca jenno a bBeneviento ‘o Napule nun fa fessarie e ttorna a vvencere! Staveti bbe’.

ilnapolista © riproduzione riservata