ilNapolista

Dduje spettaculare tacculle ‘e Reina, Albiol e Koulibaly facettene a spurtellate

Atalanta-Napoli, pagelle in lingua: buone prestazion di Allan, Mertens e Hamsik, un po’ giù di tono Insigne e Zielinski. Sarri ha letto bene la partita.

Dduje spettaculare tacculle ‘e Reina, Albiol e Koulibaly facettene a spurtellate
Foto Ssc Napoli

Atalanta-Napoli 0-1, 21/1/2018

Che suddisfazziona e cche bbella cosa ajere a ll’ora ‘e ll’apritivo quanno ‘e guagliune ‘e Sarri jetteno a vvattere, pure si sulo p’uno a zzero, â casa soja una d’’e cchiú scamose scuatre assineje (satelliti) d’’a vecchia zoccola levannose ‘e pacchere ‘a faccia ‘e chello ca era succieso ô san Paolo ‘ncoppa itaglia e rrummanenno ‘ncimm’â crassifica d’’o campiunato â faccia nun sulo d’’e tanti cestarielle ca ce perzeguitano, ma pure ‘e chella fetenzia ‘e ll’arbitro Orsato [3 e ppo ve dico], d’’a vecchia zoccola, d’’o Palazzo e dd’’a varra d’’a sora ca ô 93’ ce annullaje ll’addaffa d’’o doje a zzero, n’addaffa reculare ‘e Marekiaro!Certo ‘a mubbara (partita) fove difficultosa pure pecché ô ssolito,’a scuatra ‘e casa jucaje ‘o sibbacco (match) d’’a vita e ppure ‘na meza cazetta cumme a mMasiello cacciaje ‘a scienza…, ma s’êtt’ ‘a fà cchiú ddinto ‘e dinto ô prozo quanno ô 65’ Ciruzzo recuglienno ‘nu granne bbassuero (suggerimento) ‘e Peppe ‘a ‘nguenta turnaje [doppo nove mubbare (partite)] a ssignà levannoce ‘e ccastagne dô ffuoco.

Dicimmo ca cumplessivamente p’’o Napule chella d’ajere fove n’atalossa (prova) ‘e cascavéglia (maturità) misa a ffrutto doppo n’ora ‘e juoco particularmente sufferta, p’’a cegna (l’aggressività )’e ll’Atalanta e p’’e poche spazzie cuncesse; però ‘ncapo ‘e sissantacinche minute se ne venette a ccapo cu cCiruzzo i’o Napule scancariaje ‘a resistenza ‘e ll’atalantise purtannose â casa tre ppunte ‘mpurtante e ddicisive; pirciò penzo ca ‘a nichemata (vittoria) d’ajere, datose ca fove sudata e ccunquistata ‘ncopp’a ‘nu campo fetente ,vale cchiú d’’e tre ppunte ca ce dette.

Passammo ê ppaggelle:

Reina 7 – Chiammato ‘ncavusa sulo ddoje vote facette dduje spettaculare tacculle (interventi) salvanno ‘o risultato e mmantenenno ‘a porta acrata (inviolata).

Hysaj [Meza Cucchiara] 6 – ‘Ncopp’â curzia soja tenette ‘nu bbrutto accunto, ma isso ‘o fermaje a mmestiere fora ‘e ‘na vota ‘int’a llurdemi ddieci minute quanno c’êtt’’a mettere ‘na pezza ‘o Masto.

Albiol  [‘o Masto] 6,5 – Atalossa (prestazione) pusitiva ‘nchietta cu ‘o gGialante i addó fove nicessario.

Koulibaly 6,5  [‘o gGialante] – Facette a spurtellate pe ttutt’’o sibbacco (match) cu cCornelius(se) senza sbaglià ‘na vota.

Mario Rui 6 – Sufferette, ma se dette da fà.

Allan [‘o ‘Ncrifato] 7 – Ô ssolito atalossa (prestazione) ‘e sustanza fatta ‘e cegna (grinta e ccorza senza maje mullà.

Jorginho 6 – Sufferette dàtose ca Ilicic(ce) lle s’azzeccaje ‘ncuollo cumme a ‘nu franchebbollo, levannole ‘o sciato; meglio quanno ‘mmece d’urtizzà (verticalizzare) e ccustrí ‘o juoco arretraje ricuperanno cchiú ‘e ‘na palla.

Zielinski 5,5 – Miso ô posto ‘e Marekiaro dô primmo minuto, êsse avut’’a dà qualità e ssustanza, ma nun sempe ‘o ffacette; peccato.

[Da ll’85’ Rog  [‘a bBelva] 6 – Facette ‘o ssuojo e ppoco mancaje ca nun signasse ‘o doje a zero.]

Callejon [Peppe ‘a ‘nguenta] 6,5 – Sempe periculuso a ll’epata (fase) uffenziva mttette paura a bBerisha ca però lle dicette no; ‘ncumpenso fove isso ca piscaje a cCiruzzo cu ‘na granna palla ch’addeventaje chella d’’a nichemata (vittoria)! Ch’ato vulimmo?

[Da ll’85’ Maggio 6 – Facette ‘o nnicessario.]

Mertens [Ciruzzo] 6,5 – Nsi’ ô stuco (gol) arrancaje; doppo fove tutto n’atu jucatore comme si se fósse levato ‘na maledizziona ‘a cuollo.

Insigne [Lorenzigno] 6 – M’aspettavo ‘e cchú dô guaglione ‘e Fratta ca ‘mmece ajere me parette senza ggenio.

[Dô 73’ Hamsik [Marekiaro] 6,5 – Sulo ‘nu quarto d’ora p’’o capitano, ma ll’avastajeno pure pe ssignà; peccato ca, nun se sape pecché, ce ll’annullajeno!]

All. Sarri 6 – Liggette bbuono ‘a mubbara (partita) e avette ‘a dicere: grazzie a cCcruzzo ca lle levaje ‘e ccastagne dô ffuoco.

Arb. Orsato 3 – Mannato a spezzà ‘e passe ô Napule cercaje ‘e farlo nchiudenno ll’uocchie e nnun siscanno quase nisciunu carí (fallo) ‘e ll’atalantise, cumpreso ‘nu sbuttulone ‘e Caldara a cCiruzzo ‘int’â muntaca (area di rigore) lloro. Però nun riuscette a ffermarce!

E fermammoce cca, cuntente ‘e comme è gghiuta e ssi dDi’ vo’ ce sentimmo llunnerí ca vene doppo ‘o sibbacco (match) ô san Paolo cu ‘o bBulogna. Staveti bbe’!

ilnapolista © riproduzione riservata