ilNapolista

Reina facette duje miracule, Callejon nun ne vedette una

Napoli-Juventus, pagelle in lingua: molte insufficienze, promossi solo Hysaj, Koulibaly e Zielinski (oltre a Reina). Tra i peggiori, anche Hamsik e Sarri.

Reina facette duje miracule, Callejon nun ne vedette una
Foto Ssc Napoli

Napoli-Juventus 0-1, ‘a vedette accussì

 

Mannaggia chillu scurnacchiato d’’o demmonio guagliú! Che ccollera e cche ddelusiona ajeressera ô san Paolo addó ‘o Ciuccio nun ce ‘o mettette a ppitoffio e nnun’avette raggiona d’’a vecchia zoccola janca e nnera,ajeressera bbardata ‘e cacarella…, anze ll’avette isso dint’ê riente… e mma pe fforza, pe fforza! Chella dicette bbuono ‘a sié Nunziata:”Ce ponno cchiú ll’uocchie ca ‘e scuppettate!” i ajeressera cumminfatte ‘ntribbuna ce steveno troppi cestarielle accumincianno ‘a ggiggino uocchie-stuorte [tifuso ‘nterista]venuto a rrompere ‘o saciccio, nedveddo, agnelli e ssocie,ce secciajeno malamente e cce cuglietteno ‘mparanza i ‘o Napule ‘ncassaje ‘a primma scunfitta ‘ncampiunato, cunfermannose sí ‘ncimma â crassifica d’’o campiunato,ma pe ppoco ancòra [aspettanno ca ogge ê ttre ll’Interre fa unu muorzo d’’o Chievo e ce zompa ‘ncuollo] e senza riuscí a arrassà ‘a vecchia zoccola,anze vedennola accustarse signo ca chist’anno nunn’è dditto ancòra ca è ‘a vota bbona e nun sapimmo ancòra si a mmaggio ce putimmo friggià d’’o trianculillo janco russo e vverde! Però ‘a cosa cchiú bbrutta d’ajeressera fove proprio ca murettemo pe mmano d’’o lota cainno (traditore) ca ô 13’ apprufittaje ‘e ll’unica meza fessaria ‘e Lorenzigno ca, tentanno ‘e fà passà ‘a palla ‘ncapa a De Sciglio, senza vulé cuncedette ‘a repartita (ripartenza) â scuatra d’Allegri, cusicché ‘e llote avetteno ‘o llario ‘o campo visto ca ‘e nuoste steveno tutte attaccanno a ccapa sotta i ‘o cainno, inutilmente curruto apprisso ‘a Mrio Rui, riuscette a ppassà cumme a ‘nu furmine ê spalle d’’o ggialante nuosto recuglienno ‘nu pasiglio (passaggio) a mmestiere’e Matuidí e ffuttenno da poche passe a rReina ca ggià poco primma ll’aveva fermato ‘na vota.

Mannaggia chillu scurnacchiato d’’o demmonio, nun ce vuleva proprio, nun ce vuleva. Pure pecché avettemo cchiú ‘e n’ora pe ttentà ‘e russimmà (pareggiare) e nun ce riuscettemo nun sulo pecché ‘e llote avevano parchiggiato dduje pulmmanne, uno ‘nnant’â porta e n’ato ‘nnant’â muntaca (area di ricore) e ppo pure pecché chella mmunnezza ‘e ll’arbitro Orsato nun ce vulette cuncedere [po ve dico]manco uno d’’e ricure ca ce fósseno aunestamente spettate. Cusicché perdettemo e c’êttem’’a chiejà a llibbretta ‘a scunfitta e cchi sa’ si e cquanno riesco a alliggerí ‘o ttuosseco ca me scennette ‘ncuorpo ajeressera. Lassamo perdere va’. Passammo ê ppaggelle:

Reina 7 – ‘E cchiú ‘e duje miracule, ‘na vota ‘ncopp’ô cainno (traditore),e ‘o siconno ‘ncopp’a ‘nu tiro ‘e Matuidí, ca ancòra se sta facenno ‘e ccroce,nun riuscette a ffà. Peccato.

Hysaj [Meza Cucchiara] 6 – ‘A vecchia zoccola dâ bbanna soja nun détte troppo ‘mpiccio,pirciò isso putette farese vedé spisso annante…, ma niente ‘e che!

Albiol [‘O Masto] 5,5 – Ajeressera fove meno zincatejo (incisivo) d’’o ssolito e se macchiaje ‘e quacche sfregazzo (sbavatura). Me dispiace.

Koulibaly [‘O Gialante] 6 – Tutto summato [cu ttutto ca ‘nnaccasiona ‘e ll’addaffa d’’e llote’mmece d’ accustà a mmancina pe stuppà ‘o cainno (traditore), jette a stregnere inutilmente a ccentro] prubbabilmente, fove ‘o meglio d’’a trasera (difesa) cumbattenno e cuncedenno poco e nniente.

Mario Rui 5 – Sarri scigliette a isso p’’a curzia ‘e mancina e fforze azzardaje sbaglianno pecché ‘o purtughese nun se facette vedé annante e se purtaje ‘ncopp’â cuscienza ll’inutile corza arreto ô cainno senza riuscí a mmetterle ‘o ssale ‘ncopp’â cora!

[Dô 77’ Maggio sv – Trasette a ffrittata fatta e nnun facette niente pe ffarese nutà.]

Allan [‘O ‘Ncrifato] 5,5 – Ajeressera nun me piacette troppo: dê piere suoje nun nascette maje niente ‘e cuncreto e ssí e nno dètte ‘na mana a ttampunà ‘mmiez’ô campo. Troppo poco! Ô Napule fósse servuto ‘mmece ch’isso êsse stato capace ‘e truvà ‘na chesema (varco)addó passà. E nnun ce riuscette.

[Dô 67’ Zielinski 6 – Trasette e ppruvaje a ttruvà chellu spazzio ca ‘o ‘Ncrifato nun aveva truvato e ffove suojo ‘o bbassurero pe lLorenzigno ‘int’’accasione cchiú ppulita ‘e ll’arrancua (ripresa).]

Jorginho 5,5 – Manch’isso se facette apprezzà troppo nun riuscenno maje a urtizzà (verticalizzare) pe ddà tassezza ô Napule. Peccato.

Hamsik 5 [Marekiaro] – Niente ‘a fà! Pocu spazzio e mmubbara (partita) difficiltosa pe mMarekiaro! Ajeressera ll’aspettavemo tanto, ma ‘o capitano nun fove maje periculuso, maje puntuale ‘e ppochi vvote ca tentaje ‘e ‘nzertarse (inserirsi). ‘E cchiú lle capitaje ‘na palla bbona ‘ncopp’ô zzero a zzero e isso s’’a facette passà inutilmente pe ‘nnant’ê piere; aggio paura ca ‘o fatto ca à dda arrivà a mMaradona cchiú ca ‘nu stimulo, è ‘na malerezziona!

Callejon [Peppe ‘a ‘nguenta] 4,5 – Me dispiace, ma ‘e fatte accussí stanno: ajeressera ‘o spagnuolo nun ne vedette una, cumfermanno chello ca se sapeva e cciovè ca doppo ‘nu granne abbío ‘e tempurata (stagione), mo ‘o guaglione è stracquo e s’êsse arrepusà e pproprio nun capisco pecché Sarri nun lle fà piglià sciato facenno jucà a Ounas(se)!

Mertens [Ciruzzo] 5,5 – Cchiú ‘e tanto nun pozzo metterle;pur’isso è stracquo e cchiú ‘e quacche cupuliamiento (duetto) ‘nfra ‘e llinie nu riuscette a ffà, però quanno a ll’arrancua lle fove pussibbile, eccuce cca, e cChiellini cu ‘nu sbuttulone ‘o stennette e Orsato nzerraje ll’uocchie pe nnun vedé.

Insigne [Lorenzigno] 5,5 – Fove overo, ca vista ‘a serata no d’’e cumpagne ‘e sezziona (reparto),isso pruvaje a ffà tutto a ppe isso, ma cu ttutto chellu bburdello ‘e ggente cu ‘a maglia cacarella che vvuó tentà tiro a ggiro, spustannose a ccentro? ‘E cchiú facette chella fessaria ca v’aggiu cuntato tentanno inutilmente ‘e fà passà ‘na palla ‘ncapa a dDe Sciglio, ddànno ‘mmece accussí spazzio â repartita (ripartenza) d’’e llote.

[Dô 77’ Ounas sv. – Trasuto pur’isso quanno‘a frittata fatta e nnun putette fà niente pe ffarese nutà.]

All. Sarri 5 – Quanno se perde ll’itimma (colpa) è ‘mprimmose d’’o mutarribbo (allenatore) e ccumminfatte Sarri presentaje ajeressera ‘nu Napule stracquo, a ccurto ‘e ficre (idee) e ppoco attrezzato pe gghiucà contro a ‘na scuatra cu nnove, diece perzone arreto â linia d’’a palla. Nunn’è ‘na nuvità e s’à dda vedé che s’à dda fà! Allegri ajeressera aveva ggià liggiuto chello ch’êsse pututo fà ‘o Napule… Nun putimmo jí annante accussí:è ‘o mumento ‘e cagnà coccosa, rinnuvarese e soprattutto s’à dda truvà ‘na suluzziona seria. Nun so’ ccose ‘e pochi mumente.

Arb. Orsato 3 – E ll’aggiu trattato a ‘stu cecatiello ca ajeressera pe ddoje vvote nun vulette jí a ccecà dint’â varra d’’a sora e ppe ddoje vote nun ce dètte allimmeno uno d’‘e duje ricure sacrusante ch’ avesse avut’’a darece, ‘na vota quanno cessanno arreto dint’â muntaca (area di rigore) soja, chillu matarazzo ‘e sbreglie d’ Asamoah arrunazaje a mMario Rui carriannolo ‘nterra e cce s’assettaje‘ncuollo e n’ata vota quanno chillu chianchiere ‘e Chiellini, sempe dint’â muntaca (area di rigore) soja, ausanno ‘e mmanere forte pe ffermà a cCiruzzo, lle dette ‘nu sbuttulone e ll’aizaje da terra. Âte capito?Nisciuna d’’e ddoje vote ll’arbitro facette ‘na chieja, anze ‘a primma vota caputaje ‘o carí (fallo) e siscaje ‘na timmuria (punizione) p’Asamoah!Cose ‘e pazze! E ddiceno ca chisto è ‘o meglio arbitro ca tenimmo! Si chist’è ‘o meglio penzate ll’ate ch’ànn’’a essere! Aggio paura ca purtroppo pure isso sta ‘ncopp’ô stato paca d’ Agnelli e ssocie. E Dela nun à capito ancòra ca ‘nzieme a cquacche gghiutore s’àdda accattà quacche arbitro! Forze costano assaje, ma renneno.

Basta va’, nun ce penzammo cchiú; è gghiuta cumme è gghiuta e ppacienza. Mo, senza farce scunfurtà, ce attocca ‘e scurciarce ‘e mmaneche e accummincià n’ata vota dô capo a ffaticà p’’o pruggetto ‘mpurtante. Certo nunn’ è ffacile, ma se po’ ffà. E ll’âmm’’a fà!Nun farlo fósse ‘nu peccato.

E ccu cchesto ve saluto e ssi dDi’ vo’ ce sentimmo n’ata vota ggiovedĺ ca vene doppo d’’a mubbara (partita) ‘e Ciampionsa, miercurí a ssera ‘nnUlanda contro ‘o Feyenoord(e) ca si ‘e ccose vanno bbone, comme ponno e ànn’’a jí e ll’ati scuatre nun fanno pastette, è ‘o sibbacco (match) ce avesse darece ‘o passaggio ‘e turno. Staveti bbe’.

 

ilnapolista © riproduzione riservata