‘O spassatiempo d’’a Ciampionsa, p’’o mumento è ffernuto, turnammo a pparlà ‘e cose serie: d’’o campiunato
Mediaset
Nc’è ppoco ‘a fa, guagliú: nce ponno cchiú ll’uocchie ca ‘e scuppettate… E ccumminfatte ajeressera vedenno ‘int’ô stutio Mediaset(ta) a dduje granne cestarielle: arrigo sacchi e cchillu cainno (traditore) ‘e ciro ferrara, nquacchiato de jaddamma (lebbra) janca e nnera, assettate cumme a ddoje ciucciuettole m’’o ssentette ‘e scennere pe ddereto ê rine ca ce avesseno cuoveto cu ll’uocchie sicche lloro e ccontr’ô Manchester(re)City nun fósse fenuta bbona.
E ppurtroppo bbona nun fernette e nnuje ca c’êssemo avuto levà ‘e pacchere ‘a faccia, nun c’’e llevajemo anze nn’assummajemo n’ati quatto e ajeressera êttem’assaggià ll’amaro d’’a primma scunfitta casalinca ‘e ‘sta tempurata(stagione), speranno ca fósse ‘a primma e ll’urdema. E ddicere ca ‘o sibbacco (match) nun accumminciaje malamente…, anze ‘o Napule êva fatte ‘a primma mez’ora ‘e fuoco mettenno sotto ‘a scuatra ‘e Guardiola e addirittura passanno ‘nvantaggio cu lLorenzigno ô 21’ doppo avé cupuliato (dialogato) cu cCiruzzo ca ‘o lanzaje.
Meza Cucchiara
Po purtroppo ll’uocchie accumminciajeno a ffunziunà e cchi nne facette ‘e pprimme spese fove chillu povero guaglione ‘e Ghoulamme ca ô 31’ se nn’êtte ‘ascí pe bbia ‘e ‘nu zumpòro (incidente) ô denucchio ca ‘o mettette fora uso e ffove sustituito d’’o Vicchiaccone… e ffove tanne ca s’avutaje ‘o canisto i ‘o Manchester(re) apprimma riaggette russimanno (pareggiando) ô 34’ cu Otamendi, datose ca Maggio cunzettette nun saccio a cqua’ pierepetterre ‘ngrese ‘e jabbrà (crossare) p’’a capa d’’o mediano ‘e Guardiola e ‘o Meza Cucchiara, pe pparta soja, ‘o lassaje zumpà senza cuntrasto.
Turnate ‘ncampo pe ll’arrancua ô 49’ succedette ‘o llutto quanno Giorgigno, senza cazzimma ‘mmece ‘e aizà ‘a terra ‘nu ‘ngrese ca asceva dâ muntaca (area di rigore) soja palla ô pere, ‘o lassaje fà e cchillo nun se facette prijà servenno a Stones(se) ‘a palla ca casticaje a rReina i accussí nce truvajemo cu ‘a carna ‘nsotto i ‘e maccarune ‘a coppa e ffovemo custrette a correre arreto ô russimmo (pareggio), ca pe ffurtuna ‘ncappajemo ô 64’ quanno Giorgigno, facennose purdunà ‘a puttanata fatta primma mettette dinto ‘nu ricore abbuscatose dô Masto.
Gli errori di Sarri
A ‘stu punto sbagliaje Sarri ca, ‘mmece ‘e raffurzà ll’armidanno (centrocampo) levanno a gGiorgigno e facenno trasí a dDiawara lassaje ‘e ccose comme steveno e ffacette trasí a ll’82’ a Ounas(se), speranno ‘e vencere. Cosicché, visto ca ggià era asciuto ô 75’ ‘o ‘Ncrifato, ‘o fatto addivintaje scuro assaje e ‘mmece ‘e vencere, pe n’ati ddoje apriusità (ingenuità) d’’e nuoste jettemo ‘nsotto n’ati ddoje vote e tte saluto ce ‘ntussecajemo nuje ‘ntribbuna divano i ‘e scarze cinquantamila ‘ncopp’ ê mitrasse (gradinate).
La situazione in Champions
E mmo? Mo ‘a situazziona d’’o Napule ‘nciampionsa sta appesa a ‘nu filo: so’ sseje ‘e punte ‘nfra nuje i ‘o Shakhtar(re) Donetsk(o) datose ca avimmo pavato caro i amaro ‘mparticulare ‘o primmo passo fauzo ‘ncasa ‘e ll’ucraíni; ‘e cchiú ‘e ddoje bbriche cu ‘o Manchester(re) City à miso ‘nchiaro ca nun se po’ frijere ‘o pesce cu ll’acqua i ‘a panca nosta nun è a ll’aldezza pe rejere ‘o cunfronto cu una d’’e scuatre cchiú ‘nfromma d’Aiuropa! A ‘stu punto putimmo sulo sperà ‘e fà ‘na ‘mpresa cu ‘na nichemata (vittoria) contro lo Shakhtar(re) ca cassasse ‘o doje a uno ‘e Donetsk(e), ma ce serve pure ‘nu favore ‘a Guardiola ‘nnUcraina, addó jesse a vvencere! Sinamparco (comunque) a nnuje che ce ne fotte d’’a Ciampionsa? Nuje âmm’’a penzà ô campiunato! Passammo ê ppaggelle:
REINA 6 ‘A fora d’’e quatte stuche (gol) ‘ncassate senza itimme (colpe) soje, p’’o riesto nunn’êtte ‘a fà ca poco ato!
Difesa
HYSAJ 4,5 Notte ‘a scurdà! Nun marcaje Otamendi ‘ncopp’â primma addaffa (rete) e sbagliaje pure ‘ncopp’â terza; p’’o riesto Sané e Sterling(o) ‘o sgatuffajeno (ridicolizzarono) sempe.
ALBIOL[‘O Masto] 6 Ma sulo pecché se jette a pprucurà ‘o ricore d’’o doje a ddoje e ppecché salvaje ‘a situazzione e n’addaffa (rete) arresecanno ‘a faccia; però êsse avuto ‘a tentà coccosa ‘ncopp’â siconna addaffa (rete)ô 34’ e nnun ‘o ffacette. Peccato!
KOULIBALY 5 Ajeressera nun me piacette mustrannose stranamente ‘nzicuro, spaisato, cunfuso; ‘nzomma atalossa (prova) necativa cu ‘e nassie (attaccanti) d’’o City ca lle detteno filo ‘a torcere; êasse avuto sparagnarese d’essere nutizziato (ammonito) datose ca essenno diffitato mo è ccustretto a zzumpà ‘a brica (sfida) casalinca cu ‘o Shakhtar(re).Nun ce vuleva!
GHOULAM 6 Troppo, troppo jellato: chillu zumpòro (incidente) ô denucchio ‘e dritta ca ‘o mettette fora uso facette perdere troppo ô Napule. Sperammo ca nun s’à dda fermà pe pparicchio. [dô 31’ MAGGIO [‘O Vicchiaccone] 4,5 Facette pesà, e cquanto! ll’asciuta ‘e Ghoulam(me); necativo, comme v’aggiu ditto ‘ncopp’ô siconna e tterza addaffa (rete) ‘ncassate.Purtroppo cu cchestu llignammo, chesti strommole se fanno! ]
Centrocampo
ALLAN[‘O ‘Ncrifato] 6,5 ‘E primme minute se dette assaje ‘a fà cuvernanno ll’armidanno (centrocampo) a mmestiere, po rallentaje comme a ttutte ll’ate. [dô 75’ ROG 4,5 Me dispiace, ma accussí è: ‘ncopp’a ll’azziona d’’o doje a cquatto êsse avut’’a metterce cchiú ccegna (grinta) pe ccuntrastà ll’avverzario, ‘mmece jette cu ‘o si-bemolle. E cche saciccio!]
JORGINHO 6 Urtizzaje (verticalizzò) a mmestiere cercanno ‘e fà arremmarrà (ripartire) ‘e suoje cu ttassezza (velocità); comme v’aggiu ditto mancaje ‘e cazzimma quanno ô 49’ ‘mmece ‘e aizà ‘a terra ‘nu ‘ngrese ca asceva dâ muntaca (area di rigore) soja palla ô pere, ‘o lassaje fà e cce custaje n’addaffa (rete), ma po cu freddezza e pricisione mettette dinto ‘o ricore d’’o doje a ddoje e cchesto va pe cchello facennole mmeretà ‘o seje. [da ll’82’ OUNAS s.v.Trasette troppo tarde pe ffà coccosa.]
HAMSIK[Marekiaro] 5,5 È overo ca ‘e primme tentative foveno ‘e suoje, ma foveno senza zuco e ppo ‘int’ô mumento cchiú difficultuso nun riuscette a ppiglià p’’a mana ‘e cumpagne, s’attrassaje nsi’ a scumparí!
Attacco
CALLEJON[Peppe ‘a ‘nguenta] 5 Fallette, a ttu ppe ttu cu ‘o purtiere ‘o stuco ( gol) d’’o pussibbile tre a ddoje e ffove ‘nu prano (errore) esaggerato, ca decidette ‘o sibbacco (match)datose ca – comme ô ssolito – stuco (gol) sbagliato, stuco (gol) ‘ncassato, s’avutaje ‘o canisto e statte bbuono ê sunature!
MERTENS [Ciruzzo ] 6 Peccato ca Ciruzzo fove cundizziunato da ‘nu prubblema ô muscolo ‘e reto ‘na coscia e avett’’a jucà cu ‘a martellina tirata, si no êsse fatto assaje ‘e cchiú ‘e quanno cupulianno cu lLorenzigno ‘o lanzaje ‘mporta!
INSIGNE [Lorenzigno] 7,5 Cummuvente overo! ‘Nu stuco ( gol),’nu travesagno (traversa), n’atalossa (prova) d’eparco (leader) sacrificannose pure arreto pe nnuvanta minute pe sse ribbellà a ‘nu destino signato!
All. SARRI 5,5 Sbagliaje pur’ isso nun ‘nfultenno ll’armidanno (centrocampo) ‘ncopp’ô doje a ddoje e pp’’o riesto êtt’’a frijere ‘o pesce cu ll’acqua cu ‘na panca nunn’ a ll’aldezza. Sfurtanato a pperdere a gGhoulam(me), cosa ca lle ‘ncasinaje ll’affabbeto. Sperammo ca serassegna a ppenzàô campiunato dàtose ca p’’a cualificazzione ‘o fattomè ccumplicato.
arbitro: BRYCH 6 ‘Stu terisco facette tutto ‘o duvere suojo o quase.
E ffermammoce cca. ‘O spassatiempo d’’a Ciampionsa, p’’o mumento è ffernuto, turnammo a pparlà ‘e cose serie: d’’o campiunato ciovè ; dummeneca ca vene, a ll’ora d’’a tiella nce attocca ‘a nacchella (trasferta) a vVerona contro ô Chievo, n’accunto scommeto, ma si dDi’ vo’ i’ penzo ca ‘o llunnerí doppo, sempe ca ‘o Napule torna a ffà ‘o Napule, ve pozzo cuntà bbelli ccose. Accussí speranno, ve saluto.
