Napoli-Sassuolo, le pagelle in lingua: Mertens, Insigne e Jorginho bene, squadra tutta promossa nonostante qualche disattenzione difensiva.
Napoli-Sassuolo, ‘a vedette accussì
‘A vecchia zoccola s’era abbiata annanze, guagliú, ma nun êva cunziderato ca ll’avverzario ‘e una d’’e scuatre assineje(satelliti) soje, ‘o Sassuolo [miso ‘ncalannario,justo ajere a ll’ora d’’a tiella, comme vuletteno agnelli e ssocie ] fósse stato ‘o Ciuccio e nno ‘nu zzerrizzerro senza valore…
Cosicché ajere doppo magnato, chella faccia ‘e cestunia d’allegri rummanette senza parole vedenno ca ‘o Napule êva vinciuto e ppure largo, pigliannose, n’ata vota isso sulo ‘a cimma d’’a crassifica e dda allora se sta rusecanno ‘nu fenucchio tuosto e ll’è rrummaso ‘mmiez’ê diente! E ddicimmo pure ca ‘o natiggia (risultato) fove bbusciardo dàtose ca ‘nfra tire poco pricise ‘e Marekiaro e lLorenzigno e ttre ppale[uno ‘e Ghoulamme e n’ati dduje d’’o Guaglione, cuovete addirittura cu ‘o stesso tiro] s’êss’avut’’a vencete sbrasanno pe ccinche o seje a uno; nun ghiette accussí e ppacienza, cuntentammoce pure si me dispiacette ‘e nun averne fatte cchiú assaje e de nun avé mantenuta ‘a porta acrata (inviolata) visto ca ‘o Masto ô ? nun riuscette a ccuntrastà a fFalcinelli cunzentennole ‘na cabbesera (colpo di testa) ‘a ‘nu paro ‘e metre e rReina nun ce putette fà niente; cuntentammoce, pure pecché ‘ncopp’ô tre a uno chella scigna, anze chella tre scigne [i’ nun veco,i’ nun sento e i’ nun parlo] ‘e ll’arbitro Pairetto [3] ce siscaje ‘nu ricore contro, ma po, pe ffurtuna, nun ‘o facette tirà, visto ca ll’addetto â VAR(ra) ll’alluccaje dint’â cuffia: “Ma tu che ccacchio hê visto? ‘O carí d’’o Guaglione è ddô lemmeto, no dint’â muntaca (area di rigore), cagna ficra (idea),sparàgnete ‘na fijura ‘e mmerda!” E isso ‘a cagnaje.
Po, ‘nfra ‘na cosa e n’ata se jette ‘nnante nsi’ ô 94’ e cce putettemo mettere ‘e tre ppunte dint’â sacca e ccu cchella d’ajere foveno diece nichemate (vittorie) e ‘nu russimmo (pareggio) ‘ncopp’a unnice sibbacche (match) pe cumplessive trentuno punte. E scusate si è ppoco! E chillo d’ajere fove overo ‘nu bbuonu arcabbanno (viatico) p’’a scuatra ‘e Sarri, ca vincenno s’ appriparaje â dicisiva canfa (lotta) airupea contro ô Manchester City. Passammo ê ppaggelle:
Reina 6 – Ce ‘o mecco, ma nun s’’o mmeretasse dàtose ca ô 40’ nun ‘ncarraje ‘o taggillo (rinvio) cunzentenno a che, a pPolitano ‘ e farese a gGhoulamme e jabrà pe pFalcinelli ca signaje. P’’o riesto urdinaria amministazziona.
Maggio 6,5 – Bbella atalossa (prestazione) d’’o vicchiaccone ca nun ce facette ndummà (rimpiangere) ‘o Meza cucchiara e faccette ‘o ssuĵo ‘ncopp’â curzia ‘e dritta sia a ll’epata difenziva ca a cchella uffenziva addirittura chiammannose ll’applavuso d’’e mitrasse (gradinate).
Albiol [‘o Masto] 6 – Cummannaje a mmestiere ‘a trasera (difesa), ma nun riuscette a ccuntrastà a fFalcinelli ô 41’ quanno ‘o Sassuolo truvaje ‘o russimmo (pareggio) mumentaneo; però po ô 54’ se facette perdunà cu ‘nu jabbro (cross) a zzuco ‘e caramella pe cCiruzzo, ca ‘e panza mettette dinto ‘o tree a uno; e cchesto va pe cchello!
Chiriches [‘OVampiro] 6 – Ma s’ammeretasse miezu zifo mancante pecché ajere sbagliaje coccosa cercanno inutile muvimente cumplicate. Peccato.
Ghoulam 6 – ‘E stima ma s’ammeretasse miezu zifo mancante pecché è overo ca appena putette currette a ddà ‘na mana a lLorenzigno soprattutto durante ô primmo ajone (tempo) e ppecché cugliette ‘nu palo cu ‘nu granne tiro, però Politano ‘o mettette ‘ndifficurtà e s’’o facatte ô 40’ quanno jabbraje (crossò) pe fFalcinelli.
Allan [‘O ‘Ncrifato] 7 – Nunn’accumminciaje bbuono ma po facette ‘na mubbara (partita) ‘ncriscenza facennose valé cu n’atalossa (prestazione) ‘e sustanza e addirittura ô 22’ jenno a ss’arrubbà ‘na palla ‘mmiez’ê piere ‘e Sensi p’’a mettere ‘mporta pe ssott’â panza ‘e Consigli, purtannoce ‘nvantaggio.
Jorginho 6,5 – Sulo quacche ghierro (error) cca e lla, ma p’’o riesto tuccaje ‘nu tummolo ‘e pallune urchestranno ‘a situazziona comme a ‘nu Mascagne.
Hamsik 6 [Marekiaro] – Nun cchiú ‘e tanto pecché è overo ca ‘o capitano dimustraje ‘e stà ‘mpalla, partecipanno ô juoco e ffacennose vedé pure annante, però cchiú ‘e ‘na vota cunchiudette malamente o tiranno ‘ncuollo ô purtiere o sparacchianno fora e nun truvaje ll’addaffa (rete) ca ce fósse pututa stà!
[dô 68′ Zielinski [‘O Guaglione] 6 – P’’a verità, primma ‘e trasí ‘nsibbacco (nel match) ce facette aspettà: sbagliaje cchiú ‘e ‘nu pasiglio (passaggio) e ppe ‘na ventina ‘e minute ggiraje a vvacante; però po se ripigliaje nsi’ a sfresà (sfiorare) n’addaffa (rete) e a ccogliere dduje pale cu ‘o stesso tiro!]
Callejon [Peppe ‘a ‘nguenta] 6,5 – Se facette vedé sempe ‘mmuvimento a ddritta participoanno[54’] pure a ll’azziona d’’o tre a uno.Finalmente [44’] po turnaje a ssignà e ‘sta vota senza nisciunu taglio, ma addirittura direttamente cu ‘nu tiro ‘e squina (corner) ca ce purtaje ‘ncopp’ô doje a uno! Cumprimente!
[dal 76′ Rog 6 – ‘e stima]
Mertens 7 – Taminno (prezioso, cumm’ati vvote, ma ajere nunn’êtt’’a fà ‘e straurdinarie: ll’abbastaje mettere dinto ‘na palla còmmeta,ca servette a nzerrà ‘o trascurzo.
Insigne 6,5 – Nun le pozzo mettere ‘e cchiú pecché si è overo ca pure ajere sfurnaje jusaide (assist) e ttire a ripetizziona, pure ajere nun lle riuscette ‘e truvà ll’addaffa (rete) pe ppoca pricisione; però cumplessivamente atalossa (prestazione)arcabbirra (maiuscola).
[da ll’80’ Giaccherini s.v.]
Sarri 6,5 – Avette risposta pusitiva dâ scuatra, soprattutto ‘a Maggio e da ll’attaccante cu ttutte ‘e ttanti pratteche una ‘nculo a n’ata; êtte però sbuffà pe cquacche svista difenziva.
arbitro: Pairetto 3 – ‘Stu figlio d’arte nun saccio si tène ancòra ‘o pate vivo, ma si è accussí penzo ca ‘o cazzeja pe ccomme se cumpurtaje ajere siscanno ad copocchiam, nutizzianno (ammonendo) mo a cchisto, mo a cchillo pure senza mutivo e soprattutto dànno ‘nu ricore, pe ‘nu carì (fallo) fora muntaca (area di rigore), e ppo, bbuono pe nnuje, fove custretto dâ VAR(RA) a ccagnà dicisione!
E ffermammoce cca dànnoce appuntamento si ‘o Cielo ‘o vvo’ a ggioverí ca vène doppo d’’o sibbacco (match) airupeo ‘e ricresso (ritorno) ‘e miercurí contr’ô M.City ô san Paolo.
Staveti bbe’.