Nessun sette in pagella, ma difesa e Reina meritano tutti 6,5. L’attacco così così, solo Dries sotto la sufficienza
NAPOLI-INTER 0-0
E cche ce vulite fà guagliú? Chille ‘e mutte antiche nun fallesceno maje e ppurtroppo, pe nnuje, ajeressera ô san Paulo succedette esattamente chello ca “DICETTE ‘A VECCHIA: SI NUN TE PONNO ARRUBBÀ ‘A CARNE ‘A COPP’ Ô FFUOCO, T’’A FANNO ABBRUSCIÀ” e ccumminfatte ajeressera chella faccia ‘e cestunia scamazzata ‘e Spalletti [ca, si v’’o spiano, tène cchiú cculo ca anema e, ppe gghionta ‘e ruotolo, manco sano, ma assaje scassato] venuto ‘nzieme ê profuche suoje ‘ntenziunato a ffarece male p’arruvinarce ‘a nona jurnata ‘e campiunato riuscette a ffarece abbruscià ‘a carna ca tenevemo ‘ncopp’ô ffuoco purtannose â casa ‘nu punto fermannoce ‘ncopp’ô zzero a zzero senza riuscerece a ffarece male comm’êsseno vuluto, ma facennoce rallentà ‘a corza senza però llevarece ‘a cimma d’’a crassifica.
E ttutto summato ajeressera se cunfermaje ca ‘o piscione milanese è ssulo furtunato, ma nunn’è fforte [dàtose ca forte è ssulo ‘acito] però tène – chesto sí – ‘nu ddio ‘e purtiere e ppure ajeressera a isso êtte ‘a dicere grazzie pecché Handanoviccio [ch’i’ aggiu sempe apprezzato nun ggià ‘a mo, ma quanno jucava cu ll’ Udinese] levaje dâ porta tre o quatto pallune ch’êsseno ‘mmece pututo essere addaffe (reti).Mettitece po chillu sacchetto ‘e ll’ummeto ‘e ll’arbitro Banti (3) [ca ô 67’ ce nijaje ‘nu ricore a cCiriruzzo ca si ‘o guaglione êsse tenuta ‘a maglia d’’a vecchia zoccola e nno chella luvarda (azzurra)êssem’ avuto] i ‘o cuatro è ccumpleto i ‘a cunchiusione fove ca c’êttem’’a cuntentà ‘nu gramo punticiello frutto d’’o primmo erussimmo (pareggio) d’’a tempurata ( stagione).Pacienza, ‘na vota o ll’ata puteva succerere…
Passammo ê ppaggelle
REINA 6,5 – Poco ‘mpignato, ma quanno êtt’ ‘a risponnere prisente jette overo bbello comme ‘ncollo a bBorja Valero fermato cu ‘nu taccullo (intervento) cu ssette parme ‘e saciccio!
Difesa
HYSAJ 6,5 Atalossa (prestazione) cunvincente visto ca cuncedette poco o niente a pPerisiccio i ê vvote cupuliaje (dialogò) assaje bbuono cu pPeppe ‘a ‘nguenta.
ALBIOL 6,5 Funnamentale ‘o sarvataggio ‘ncopp’â linia ‘e porta ‘ncopp’a ‘nu jabbro (cross) ‘e Vecino; p’’o riesto sicuro, priciso e ssistimato, quanno êtt’’a defennere e cquanno facette arremmarà (ripartire) ll’azziona.
KOULIBALY 6,5 ‘A solita trancara (pilastro).’Mbona sustanza ‘nchietta (coppia) cu ‘o cumpagno ‘e sezziona cassaje dô campo ‘o parasacco (spauracchio) Icardi e cquanno avanzaje palla ô père se chiammaje ll’applavuse d’’e bbemate. (spalti). S’abbuscaje ‘nu cartellino jalizzo (giallo) ca s’êsse pututo sparagnà!
GHOULAM 6,5 Cu ttutto ca Candreva stette ‘nserata e lle dette che ffà, isso truvaje sempe ‘a linia ‘e funno riuscenno a jabbrà (crossare) o a mmetterse ô posto ‘e Lorenzigno, quanno ‘o frattese s’accentrava. ‘Nzomma ‘nu granne terzino!
Centrocampo
ALLAN 6 Tanta corza e ppiere bbuone soprattutto durante ô primmo ajone (nel primo tempo), po a ll’arrancua ( nella ripresa) tiraje ‘a martellina rallentanno e sSarri s’’o chiammaje ‘mpanca. [dô 76’ ROG 6 ‘e stima].
JORGINHO 6,5 Ll’abbastaje ‘e fermarese ‘ncopp’â linia ‘e mità ccampo a ffà ‘o masto ‘e festa dettanno pricise giumetrie ‘ncabbina ‘e riggia.
HAMSIK[Marekiaro] 6- Cca e lla, ‘a chiena i ‘a vacanta; nun fove ancòra isso: nun vedette ‘a porta maje, cchiú ‘e ‘na vota se perdette a cCandreva, però po se ‘mmentaje ‘nu granne bbassurero (suggerimento) pe lLorenzigno ch’êsse pututo sbluccà ‘o sibbacco (match), ma ‘o frattese sbagliaje ‘a tacatarrassa (colpo di testa)
[dô 72’ ZIELINSKI 6 Chiammaje a ffà ‘o spezziale a Handanovic cio cu ‘nu putente tracchenarro (tiro) ‘e mancina ‘a fora.Però po poc’ato.]
Attacco
CALLEJON [Peppe ‘a ‘nguenta] 6 Ajere se facette nutà cchiú ‘mpignato a ddà quacche bbassurero (suggerimento) ca a ffà ll’armabbajo (stoccatore); sinamparco (comunque) ‘o primmo tentativo verz’â porta d’Handanoviccio fove ‘o suojo.
MERTENS [cIRUZZO] 5,5 ‘e cchiú nun pozzo metterle pecché nun cancellaje ‘a bbrutta serata ‘e Manchesterre; è overo ca o Miranda o Skriniarre lle detteno filo ‘a torcere cu ‘e bbone o cu ‘e ttriste, è overo ca Banti lle nijaje ‘nu ricore, ma isso s’êsse avuto ‘mpignà ‘e cchiú prassempio quanno se magnaje ‘o stuco (gol) fatto. ‘Nzomma nun me piacette… E ddicere ch’è ll’uocchio dritto mio!
INSIGNE [Lorenzigno] 6- Perdette ‘na granna accasione, comme v’aggiu ditto, quanno sbagliaje ‘a tacatarrassa (colpo di testa) e rijalaje palla ô purtiere; po ato nun facette ca sparacchià quacche tracchenarro (tiro) fora mesura ca nun levajeno, nè mettetteno.S’à dda tené cunto ca fove ‘nu miezu miraculo vederelo ‘ncampo doppo d’’o ‘mpiccio succieso a mManchesterre, però nuje vulimmo vedé ‘o Lrenzigno cchiú sustanziuso ca vede ‘a porta. Sperammo ca succede miercurí a ssera a gGenuva contr’ô crifone [da ll’81’ OUNAS 6 ‘e stima).
All. SARRI 6- ‘O Napule tentaje ‘e fà ‘o solito juoco crianno sí quacche accasione, ma senza riuscí a sfunnà e fforze isso êsse avuto ‘nventarese subbeto coccosa pe sbruccà ‘a situazziona i ‘o catenaccio ‘nterista! .
arbitro BANTI 3 Carta canusciuta, siscaje ad capocchiam contro a nnuje e cchiú spisso nun siscaje quanno ‘mmece êss’ avuto ‘a farlo e ajere ‘mmece ‘e levarese quacche debbeto ca teneva cu nnuje, aumentaje ‘a ddosa nun nutizzianno (ammonendo) cchiú ‘e ‘nu jucatore ‘nteriste, nun ghittannono fora allimmeno ‘nu paro ‘e lloro: Miranda e Ggagliardini, ca so’ dduje chianchiere e soprattutto nun dànno ., comme v’aggiu ditto, ‘nu ricore a cCiruzzo quanno [67’]Miranda ll’arrunzaje.
E allora fermammoce cca. Ce sentimmo, si dDi’ vo’, â prossima vota, ca è ggioverí ca vene, visto ca se torna a gghiucà miercurí i ‘o Napule va a gGenova contr’ô crifone e spero proprio ca ve pozzo cuntà ca ‘o Napule è tturnato a ccorrere mettenno punte ‘nfra isso i ‘e scuatre ca lle stanno arreto. Staveti bbe’!
