Mertens ha levato ‘e ffelinie dô sette, Hysaj è meza cucchiara

Empoli-Napoli, le pagelle in lingua: Mertens promosso insieme a Insigne, Allan e Jorginho; per Sarri, un 5.5 dovuto all’ingresso intempestivo di Diawara.

Mertens ha levato ‘e ffelinie dô sette, Hysaj è meza cucchiara

Putimmo ringrazzià ô Cielo guagliú e ttutto summato essere cuntente pecché ajere, a ll’ora sconceca ‘e ll’apritivo, ‘o Napule sciso ‘ncampo ô Catellano d’ Empule , cu ‘a muntazzimma (divisa) justa: chella d’’a Maronna ‘e ll’Arco, contr’â scuatra ‘e ll’ischitano Martusciello riuscette a sse purtarese â casa tre ppunte ‘mpurtante vincenno ‘a mubbara (partita) ggià durante ô primmo ajone ( tempo) nchiuso ‘ncopp’ô tre a zzero pe nnuje cu ‘na pareglia ‘e Lorenzigno e ccu ‘nu stuco (gol) ‘e Ciruzzo Mertens, ma arrivate a ll’arrancua (ripresa),va sapenno si pe ‘nu prubblema ‘e cundizziona d’armaddia (fisico) o sulo ‘na catàra (calo) ‘e cuncentrazziona,cu ddoje fessarie ô 69’ cu El Kaddouri e a ll’ 82’ cu mMaccarone se facetteno rimuntà ddoje addaffe e sse mettetteno a rriseco d’essere arrivate o, corna facenno, essere addirittuta surpassate comme capitaje cchiú ‘e ‘na vata p’’o ppassato.Comme però vulette ‘o Cielo nun succedette i ‘e nuoste riuscetteno a sse purtà â casa ‘e tre ppunte puliteliche (preziosi)p’’a brica (lotta) d’’o siconno posto e ttutto chesto soprattutto â faccia sporca e ffetente ‘e chellu sacchetto d’’a mmunnezza ummeta ca è ll’arbitro Damato [5] pe nnun parlà ‘e ttutta ‘a chenca soja, ca si nun ce facette, comm’ati vvote, cchiú ‘nfamità ‘e Catuccio, ajere se divertette a nnutizziarne (ammonirne)â primm’accasione,addirittura quatto d’’e nuoste cumpreso a gGiorgigno ca Sarri, facenno ‘na puttanata, levaje dô campo! Passammo ê ppaggelle:

Reina 5,5 – Me dipiace, ma ‘e cchiú nun lle pozzo mettere pecché si fove tafullo (reattivo) ‘ncopp’ a El Kaddouri ô pprincipio ‘e sibbacco(gara) e ‘ncopp’a tThiamme a ll’arrancua (nella ripresa) arrivato ô 69’, partette troppo tarde ‘ncopp’ô tiro ‘e timmurria (punizione) d’’o marrucchino facennose fottere e addirittura a ll’82’ se facette spiazzà ‘a Maccarone ‘ncopp’ô ricore contro.

Hysaj [Meza cucchiara] – 6 ‘A chiena i ‘a vacanta; pe n’ora facette ‘na bbona mubbara (partita) senza sufferenzia e accumpagnanno ll’azziona cu cqualità;però dâ mmità ‘e ll’arrancua (ripresa) nsi’ ô prazzo (fine) ‘ncopp’â curzia soja jette ‘int’ê chiavette perdenno ‘e cuncentrazziona e dde tabbicca (applicazione).

Chiriches 6 – Se muvette a mmestiere ‘nchietta (in coppia) con Albiolle, ascenno pure bbuono palla ô père.Facette bbuono Sarri a ffà arrepusà ‘o gialante francese nuosto i a cchiammà ‘ncausa ô Vampiro.

Albiol 6 – ‘O meno s’’o mmereta dàtose ca sbagliaje quacche ppasiglio (passaggio) quanno ascette; però p’’o riesto pe cchiú ‘e n’ora nun se facette maje tacarrabbà (superare) e nnunn’arresecaje maje…

Ghoulam 5 – Nun pozzo metterle ‘e cchiú pecché si durante ô primmo ajone (tempo) dètte ‘na bbona mana a ll’azziona uffenziva spisso cu bbuoni iabbre (cross) comme ‘nnaccasione d’’a primma addaffa (rete);però nquacchiaje tutto cosa a ll’arrancua (nella ripresa) pecché nun appressuraje (spinse) cchiú e anze facette ‘a frittata stennenno ‘int’â muntaca (area di rigore) nosta a cKruniccio, cosa ca ce custaje ‘o ricore contro d’’o tre a ddoje ca ce facette sufferí!

Allan 6,5 – Miso ‘ncampo dô primmo minuto fove ‘nfra ‘e cchú muttane (positivi)ricuperanno pallune ‘mpurtante e nun sulo mantenenno ‘a calma ‘int’a ll’rdeme difficultuse diece minute, ma cumbattenno cu ccegna (grinta) e ppricisiona nsi’ ô prazzo (alla fine).

Jorginho 6,5 – Jucaje bbuono libberannose dâ guardia d’’e tuscane e ggestiunanno (gestendo) a mmestiere tanti pallune e mme piacette, anze pozzo dicere ca quann’isso ascette [60’] se stutaje ‘a lucia e ll’armidanno (centrocampo) ne sufferette.

[dô 60’ Diawara 5 – ‘E cchiú ajere nun se mmeretaje dàtose ca avette ‘nu bbrutto tatirro (impatto) ‘ncopp’ô sibbacco (match),nun riuscenno maje a essere viguruso (aggressivo) nè a ddà ‘na mana cauzante ‘int’a ll’rdeme difficultuse diece minute, e sse purtaje ‘ncopp’â cuscienza, ‘nzieme cu pPeppe ‘a ‘nguenta ‘a respunzabbilità d’’o tre a uno dàtose ca nun se facette truvà ô posto suojo pe nchiudere ‘ncuollo ô tuscano ca po ‘o cumpagno cuano stennette cummettenno ‘o carí (fallo) ca cu ‘o tiro ‘e timmurria (punizione) siscato ‘a Damato ce custaje ‘a primma addaffa (rete).]

Hamsik [Marekiaro] 6 – ‘o capitano facette ‘nu bbuonu primmo ajone (primo tempo) sbaglianno poco o niente e ‘na vota asciuto gGiorgigno pruvaje isso a ccummannà ‘a usciola, mo bbuono, mo accussí accussí.

Callejon [Peppe ‘a ‘nguenta] 6 – Niente, ajere nun me piacette! Ll’unica cosa bbona ca facette fove chella ‘e prucurarese ‘o ricore d’’o tre a zzero, ma p’’o riesto se mantenette quase sempe fora dô juoco e soprattutto , comme v’aggiu ditto, cummettette ‘o carí (fallo) ca, sanziunato ‘a Damato, El Kaddouri facette addivintà ll’addaffa (rete) d’’o tre a uno! E cche saciccio!

Mertens 6 – Nun pozzo metterle ‘e cchiú pecché se facette parà ‘o ricore ô pprincipio ‘e sibbacco (match); però po facette ‘o duvere suojo levanno ‘e ffelinie dô sette d’’a porta ‘e Skorupske cu ‘nu granne tiro ‘e timmurria forte e ppriciso; p’’o riesto assieme a quacche bbona jucata, durante ô primmo ajone (tempo) perdette cchiú ‘e ‘na palla e, arrivate po a ll’arrancua (ripresa), se chiammaje fora senza participà cchiú ô juoco.

[da ll’83’st Milik sv – Trasuto tarde avette sulo ‘o tiempo ‘e ggestiunà (gestire) quacche pallone ca però passaje sempe arreto.]

Insigne [Lorenzigno] 7 – Tutto summato ‘o meglio d’’e suoje facette tutto ‘o nnicessario: doppo Crutone, pure ajere, mettette a ssegno ‘na pareglia (doppietta) arrivanno a ddudece stuche (gol) ‘ncampiunato; doppo d’’a fessaria ‘e Ciruzzo, ca aveva falluto ‘o ricore ô pprincipio, fovve isso ca ce penzaje e sbluccaje ‘o sibbacco (match)[19’] sfruttanno ‘na rispinta sbagliata ‘e ‘nu tuscano e ffuttenno a Skorupske ‘ncopp’ô primmo palo sul primo palo. Cchiú ttarde ô 38’ fove isso a ppresentarese da ll’unnece metre pe mmettere dinto ‘a palla d’’o tre a zzero ca parette nchiudere pe ttiempo ‘o sibbacco (match).

[dô 76’ Giaccherini 5 – Nun sse mmereta ‘e cchiú pecché nun trasette cu ‘o muaffo (atteggiamento) justo e nnunn’avette ‘nu bbuonu tatirro (impatto) ‘ncopp’ô sibbacco (match).

all. Sarri 5,5 – Nun lle pozzo perdunà d’avé cagnato ad capocchiam a gGiorgigno e dd’avé fatto trasí Giaccherini [ca facette poco e nniente]] ô posto ‘e Lorenzigno [ca steva jucanno bbuono] e nno ô posto ‘e Peppe ‘a ‘nguenta [ca steva aizanno porvera]; però ricunuscette isso stesso d’avé fatto ‘na strunzata a ccagnà ‘o centrale ‘e ll’armidanno (centrocampo).

Arb. Damato 5 – E ggià v’aggiu ditto ‘e ‘stu sacchetto d’’a mmunnezza ummeta ca cecaje a vvedé bbuono ‘nnaccasione d’’e tre ricure, nun lle parette overo ‘e siscarce chillo contro, ne nutizziaje a cquatto d’’e nuoste, ma sparagnaje ‘nu cartellino russo a cCosta, ‘stu nnacchennello fuceto e cchiafeo ‘e Barletta [comme a ppugliese quase certamente è ttifoso juventino]. À dda fà capí ê suoje ca ànn’’a essere cchiú ffetiente e ca ‘nvantaggio ‘e tre stuche (gol) nun s’à dda dà a nnisciuno ‘a pussibbilità ‘e farece sufferí!

E ffermammoce cca. Dummeneca nun se joca i accussí si dDio vo’ ce sentimmo llunnerí tre abbrile doppo d’’o scontro serale casalinco ‘e dummeneca doje contro â vecchia zoccola. E abbiammo a ffà corna. Staveti bbe’!

ilnapolista © riproduzione riservata