Reina furnette ll’ udú nicessaria, Insigne fove sempre pericoloso

Chievo-Napoli, pagelle in lingua: bocciati Koulibaly, Maksimovic e pure Sarri. Tra i migliori, oltre Insigne e Reina, anche Hamsik e Zielinski.

Reina furnette ll’ udú nicessaria, Insigne fove sempre pericoloso

Chievo-Napoli, ‘a vedette accussì

Sí, sí, sí guagliú!  Nce aspettavemo dô Napule ‘na sola risposta doppo d’’a scunfitta ô Santiago, chella ‘e vencere e vvencere bbuono i ‘e guagliune cuane (azzurri) nce ‘a dètteno ajere qunno jetteno a vvencere pe ttre a uno  a vVerona contro ê pariente lasche [Chievo] ‘e chella zoccola ‘e Giulietta, mettettennose dint’â sacca tre ppunte ‘mpurtante. P’’a verità êssem’avut’’a vencere cchiú llargo, pecché ‘o Napule[durante a ll’aintisso  (ricupero)] se mettette, cu gGiaccherini,  ‘ncopp’ô quatto a uno, ma chillu cecagnuolo d’Irrati i ‘a chenca soja nun ce sfessechiajeno bbuono e ll’arbitro annullaje ll’addaffa (rete) pe n’attasallulo (fuorigioco) ca nun ce steva!  Peccato però pe cchell’addaffa (rete) pigliata ‘ncopp’ô tre a zzero, pe ‘na fessaria esaggerata ‘e Koulibalý! Peccato, overamente peccato pecché ‘o Napule êva duminato pe cquase  ttutto ‘o sibbacco (match) e nun se fósse mmeretato ‘e ‘ncassà ‘nu stuco (gol).Però che ce vulite fà? Se vede ch’è ‘na jastemma menata ca ce à cuoveto, chella ‘e rijalà n’addaffa (rete) a mmubbara. Pacienza! Passammo ê ppaggelle:

Reina 7 – A pparte ‘e ttanti bbuoni tacculle (interventi) fatte  ascenno, furnette ll’ udú (tranquillità) nicessaria a ttutt’’a sezziona arretrata e ffove dicisivo durante ô primmo ajone fermanno ‘na malegna cunchiusiuone  d’Inglese ch’êsse pututo mettere ‘a mubbara (partita) ‘ncopp’a n’atu bbinario. Peccato ca nun ce putette fà proprio niente pe ffermà ‘o tiro d’’o stuco (gol) ‘e Meggiorini!

Hysaj 6 – Tutto summato ‘o cchiú ppusitivo d’’o pacchetto arritrato allimmeno pe tutto ‘o primmo ajone quanno difennette a mmestiere e spisso se facette vedé pure annante a iabrà (crossare) ‘mmiezo; arrivate però  a ll’arrancua (ripresa) tiraje ‘e rimme ‘int’â varca e risciataje.

Maksimovic 5,5  – Atalossa (prestazione) a ddoje facce p’’o guaglione [ècchese Turino] ca jucaje ‘o primmo ajone (tempo) cu ll’itidda  (accuratezza ) nicessaria  danno pure ‘na mana a custruí ll’azziona; a ll’arrancua (ripresa),facette quacche pprano (errore) e perdette  udú (tranquillità) e ppricisione.

Koulibaly 4,5  – Fove ‘o peggio d’’o mazzo; me dispiace, ma ‘e fatte chiste so’:  ‘o gialante sinicalese tène ancòra dint’ê ccosce ‘a coppa affricana e sse vedette; perdette cchiú ‘e ‘nu pallone ‘int’â trecquarte nosta e smarrunaje paricchio difinitivamente ô 73’ cunzentenno a mMeggiorini   e i’ a ffottere a rReina ca, me faccio maraviglia,nun saccio comme fove ca,  ‘ncassato ‘o stuco (gol), nun pigliaje ô centrale ‘e culore e nnun ‘o ‘ncasaje cu ‘a capa dint’a ‘nu  palo. S’’o ffósse mmeretato! Da chillu mumento a gghí ‘nnante Koulibalý nun ne ‘ncarraje cchiú una e ffove custretto a sparacchià ‘ntribbuna ògne palla ca ll’arrivaje. Pe mme è ora ca s’à dda rrepusà ‘nu poco!

Ghoulam 5 – Nun lle pozzo dà ‘e cchiú pecché si fove overo ca ‘ncopp’â curzia soja nun currette pericule difenzive nun riuscette maje a ffarese vedé ‘ncopp’â linia ‘e funno a iabrà(crossare).

Allan 6 – Atalossa (prestazione) suddisfacente allimmeno nsi’ ô ‘mpiccio musculare ca ‘o bluccaje custringenno Sarri a ccagnarlo. Pe cchiú ‘e quaranta minute facette vedé bboni ccose ‘nsertannose (inserendosi),iabranno  (crossando) e ffirmanno ll’ jusaida (assist) p’’o doje a zzero ‘e Marekiaro [dô 42′ Zielinski 6,5 – Miezu zifo (voto) ‘e cchiú pecché trasuto ‘a poco, signaje ll’addaffa (rete) ca êsse pututo nchiudere definitivamente ‘o sibbacco (match) si ‘o  Napule doppo nun se fósse assettato lassanno fà ô Chievo chello ca vuleva].

Jorginho 5,5 – A isso  miezu zifo (voto) mancante pecché pure si jucaje tanti pallune a ll’armidanno(centrocampo) ‘o ffacette cu ppoca pricisione  e rrallentanno troppo ‘o juoco. A ll’arrancua (nella ripresa) jette ‘int’ê chiavette  risultanno affaticato e ssenza maje riuscí a ‘nventarese coccosa p’’e nassíe (attaccanti).

Hamsik [Marekiaro] 6,5 – Signaje e gghiucaje bbuone pe tutto ‘o primmo ajone (tempo) cu ‘nu bbuonu tase (ritmo), ma arrivate a ll’arrancua (ripresa) êtt’’a penzà ca nunn’ era ‘o caso ‘e farese vení ll’affanno; se tiraje ‘a pizza sotto e tte saluto.

Callejon [Peppe ‘a ‘nguenta] 5,5 – Pure a isso miezu zifo (voto) mancante datose ca sí  pe tutto ‘o primmo ajone (tempo)ce mettette cegna (impegno)  però senza  riuscí a ttruvà ‘o stuco (gol), a ll’arrancua  (nella ripresa),forze pe stracquezza,nun se facette maje vedé ‘ncopp’ô ganibbo (versante) uffenzivo.Accumparette ‘nu mumento ô finale, justo pe sbaglià ‘o quatto a uno! E cche saciccio! Penzo ca s’êsse arrepusà pur’isso e fósse ora ca Sarri ô posto suojo  ce facesse vedé ‘o ‘Nimale [Rog]!

Pavoletti 4,5 – Âte voglia ‘e dicere, chist’è ‘nu pacco; aizaje porvera pe ttutto ‘o sibbacco (match)nun riuscenno maje a ttruvà ‘ntesa nè ccu gGiorgigno, nè ccu ‘e cumpagne ‘e sezziona, affullanno inutilmente ‘a muntaca (area di rigore) senza maje crià ‘nu periculo

[dô 71′ Milik 6 – Avastajeno chilli pochi minute jucate pe ddimustrà ca, mo comme a mmo, a ‘stu pulacconePavoletti lle po’ ffà sulo ‘na pippa! Trasette isso e ppe ll’attacco cuano (azzurro) fove si comme fósse schiarato juorno.Menu male ca ce se po’ ccuntà n’ata vota e sperammo ca Sarri se decidesse a ffarelo jucà dô primmo minuto!].

Insigne 7,5 – Se facette ‘a croce perdenno ‘na palla ch’êsse pututo addivintà murtifera (letale), ma se facette perdunà quase subbeto [31’]signanne ‘nu stuco (gol) d’’e suoje cu n’eccezziunale tiro a ggiro.Da chillu mumento  fove sempre pericoloso, mettenno ‘ndifficurtà ‘a tràsera (difesa) ‘e casa soprattutto quanno s’accustava ô lemmeto d’’a muntaca (area di rigore). Tutto summato me dètte ‘a ‘mpressione d’essere ll’unico a ll’arrancua (ripresa) a ttenerne ancòra.

[dô 79′ Giaccherini 6 – ‘O vvuleva fà e avette sùbbeto ‘nu bbuono naío (approccio)cu ll’antraffa (partita); rijalaje ‘na granna palla a  pPeppe ‘a ‘nguenta ca però ‘a sprecaje. Truvaje pure ‘a via ‘e ll’addaffa (rete), ma –  comme v’aggiu ditto –  chillu cecagnuolo d’Irrati i ‘a chenca soja nun ce sfessechiajeno bbuono e cce ll’ annullajeno pe n’attasallulo (fuorigioco) ca nun ce steva!].

All. Sarri 5 – Passaje ll’urdema mez’ora a gguardà ‘o rilorgio preoccupato ca ‘o Napule nun steva cchiú ghiucanno comme sape, ma isso êva fatto poco p’adderezzà ‘a varca. Facette arrepusà a Albiollo i a cCiruzzo [Mertens],ma êsse fatto bbuono a ffarelo pure cu cKoulibalý[mettenno Tonelli o, meglio ancòra, ‘o Vampiro ] e fforze pure Peppe ‘a ‘nguenta [facennoce vedé finalmente ‘o ‘Nimale (Rog) ]. Che fessaria mettere a pPavoletti i a ffa fà ‘o cuollo luongo ô Pulaccone  [Milik]!

Arbitro Irrati i ‘a chenca soja  4 – ‘Ncopp’ a ll’almanacche diceno ca è dde Pistoia, ma ajere dimustraje d’essere ‘e Turino e ppricisamente d’’o Cottolengo: tutto scemo siscaje puntualmente ad capocchiam e cchiú ca spisso ‘ndanno d’’o Napule, nun ce dette ‘nu ricore pe ccarí (fallo) ‘ncuollo a pPavoletti e soprattutto  nun cunvalidaje ll’addaffa(rete) ‘e Giaccherini siscanno n’attasallulo  (fuorigioco) ca nun ce steva !

E ccu cchesto ve saluto guagliú, ddannoce appuntamento, si dDi’ vo’, a ddummeneca  ca vene quanno spero ‘e cuntareve cose bbone doppo d’’ a visita ca sapato vinticinche  ce vene a ffà ll’Atalanta, scuatra travante (satellite) d’’a vecchia zoccola; e ccorna facenno vidimmo po â dummeneca doppo  si ll’interre facesse ‘nu pireto viulento e fósse cacchio  ‘e vatterce ‘a roma ‘e chillu pecuraro ‘e Spalletti! Staveti bbe’!

ilnapolista © riproduzione riservata
  1. Martino Cacciatore 20 febbraio 2017, 22:03

    Bracale, Montieri e Trapani: vi leggo sempre con piacere.

  2. bravo

Comments are closed.