Reina s’arricurdaje d’essere ‘nu granne purtiere, Damato esaggeraje malamente

Genoa-Napoli, le pagelle in lingua.

Reina s’arricurdaje d’essere ‘nu granne purtiere, Damato esaggeraje malamente

Eccuce cca, guagliú e ccunzigliateme vuje ca i’ nun me saccio dicidere: visto ca ajeressera a mMarassi sotto a cchill’uocchie sicche ‘e Preziosi ‘o Napule nun fove isso e nun riuscette a ffà cchiú ‘e ‘nu scunzulato zero a zero cu ‘e crifune genuvesechillo d’ajere fove [comme dice Pepe Reina ] ‘nu punto guadagnato, o  pure  se trattaje ‘e duje punte pperze ? Certo si è ca chella d’ajeressera fove ‘na mubbara (partita) scamosa tosta e ddifficultosa  e tutto summato ‘o Napule nun me piacette dàtose ca sulo tre o quatto vote s’accustaje â porta ‘e Perinno e ffove overamente periculuso sulo ‘nu paro ‘e vote: ô diciuttesimo quanno Marekiaro fove sfurtunato assaje ,fravecanno ‘o pallone ‘nfacci’a ll’alafachia (traversa)  i ô trentaquattressimo quanno ‘ncopp’a ‘nu tiro ‘e squina (angolo)  Milikco, sfruttanno ll’unicu pallone avuto dê cumpagne, ’mpignaje  bbasciugnamente(severamente) ‘o  purtiere russo e bblu. Poco ato ‘a ricurdà pure pecché n’atu paro ‘e vote Cagliecònno sciupaje malamente ‘nu paro accasione ca lle capitajeno sparacchianno a ssalve fora e lluntano dâ porta en’ata vota, ô sittantacinchesimo, chella meza puzza ‘e Lorenzigno, ripetenno ‘a fessaria fatta cu ‘o bBulogna,miso ‘a Marekiaro a tte ppe ttu cu Pperinno, cu ‘na porta aperta, anze spalancata nun sapette fà ‘e meglio ca cunzignà palla ô purtiere! ‘Nu trascurzo a pparte e ppo ve dico ‘o trattamento carogno ca ce riservaje chella mmunnezza cu ‘e nnocche ‘e  ll’arbitro Damato pugliese e ppirciò tifuso juventino! Ddoje e ddoje fa quatto e gghiette a fferní ca pure ajere, comme ggià succieso p’’a tempurata (stagione) passata, cu ‘nu scunzulato zero a zzero, ‘o Napule nun superaje  ôgGenoa e llassaje ‘ncopp’ô tturreno ‘e Marassi dduje punte ‘mpurtante ca addizziunate cu cchille perze a pPescara, sperammo nun ce costano caro!

Passammo ê ppaggelle

Reina 9 – S’arricurdaje d’essere ‘nu granne purtiere e ccu ddoje parate dicisive una a ll’uttantacinchesimo e ll’ata sette minute doppo  dicette ‘e no, pe ddoje vote  a sSimeone evitannoce ‘nu curnute e mmazziate ca nun c’êssemo ‘mmeretato. Pe nun dicere ‘e ‘na rispinta ‘e punio durante ô primmo ajone(tempo) ca servette a llevà ‘a cap’ a pPavoletti ‘nu pallone periculuso. Tutto summato fove ‘o meglio d’’e nuoste dimustranno ca ‘a fessaria fatta cu ‘o bBulogna era stata ‘na cosa passiggiera bbella e scurdata.

Hysaj 6 – Sufferette  paricchio ‘e mmubbadare (iniziative) ‘e   Ocampòsso, spalliggiato da Laxalte. Annante se vedette poco, ma sfresaje (sfiorò) n’adaffa (rete) ‘e cartulina  doppo ‘nu ricato (dribbling) mazzujo (doppio).

Albiol 6,5 – Atalossa mumazza (Ottima prestazione) arresecanno poco e nun sbaglianno quase niente. Nun perdette ‘a capa manco ‘int’ê minute finale esfresaje  (sfiorò) pur’isso  n’adaffa  (rete) ‘int’ê primme  minute ‘e ll’arrancua (ripresa).

Koulibaly 6,5 – Comme spisso glle succede, jette a ddà ‘na mana a Ghoulàmme prutiggennone ‘e prucrissione (avanzate), jucanno d’armaddia (fisico) e nun mettenose paura; Simeone però arresecaje ‘e farlo fesso pe ddoje vote  proprio a ll’urdemo, ma Reina furtunatamente ce mettette ddoje pezze.

Ghoulam 5,5  – Lazoviccio lle facette ggirà ‘a capa pe bbuone quarantacinche minute, abbuscannose peffino ‘nu nafacco(tunnel); migliuraje passanno ‘e minute, ma ll’uniche   iabbre (cross) arrivajeno ‘a tire ‘e squina (corner).

Allan 5 – Atalossaenza chizza e ssenza madda  (prestazione senza infamia e senza lode), ma cu pocu zuco.Pure luttanno ‘ncopp’a ògne pallone jette spisso ‘int’ê chiavette cu Necciamme  e ccu rRincònno.

[dô 73′  Zielinski 5 Trasuto troppo tarde nun fove ‘e granne ajuto â manovra cuana (azzurra):sbagliaje cchiú ‘e ‘nu pallone, pure fesso e, ttto summato, ‘sta vota me deludette.]

Jorginho 6 – Se ne scennette ‘e posa a ll’arrancuaabbuscannose pure ‘nu cartellino jalizzo (giallo) ad capocchiam. P’’o riesto cercaje ‘e fà, cu ‘a bburruda (freddezza) ‘e sempe, ‘o ppussibbile pure si ‘nu tterreno  ‘nfamo i ‘a pressiona (pressing) mutavascia (feroce)crifona nun ll’ajutajeno.

Hamsik 6,5  – Jucaje ‘na cifra ‘e pallune facennose truvà libbero dê cumpagne a cchiú ‘e ‘nu pizzo; se facette però frenà e ccundizziunà  da ll’alafachia (traversa) cugliuta   ô diciuttesimo e nnun se facette cchiú vvedé a ccercà ‘na alla cunchiusione rimandanno ancòra ll’adaffa  (rete)  nummero ciento, ca ce fósse servuta e ccomme!

Callejon 5,5 – Me dispiace, ma ‘o seje nun ce ‘o pozzo mettere pecché si è overo ca currette assaje e sse’mpignaje paricchio,però  nun fove mascullo (lucido)ô mumento ‘e ll’urdemu pasiglio (passaggio) e soprattutto cunchiudette cchiú ‘e ‘na vota spacchianno a ssalve fora e lluntano dê pale.

Milik 6 – Ajere nisciuna adaffa  (rete) e nnisciuna pareglia (doppietta). Cercato poco o niente dê cumpagne cercaje ‘e mettere a ffrutto ll’unica palla decente ca ll’arrivaje, ma ‘o purtiere russo e bblu riuscette a ffermà ‘o pallone; p’’o riesto luttaje sulo sulo contr’ê centrale avverzarie  reclamanno pure ‘nu sacrusanto   ricore ca chillu cecagnuolo ‘e Damato nun lle vulette dà. Peccato! (da ll’82’ Gabbiadini s.v.).

Mertens 5 – Serata no pe ll’arillo bergo: tampinato  (pressato) cumme pigliaje palla dint’â mità ccampo soja, nun risultaje mucarrarro (determinante) comme ‘mmece ati vvote e sbagliaje paricchio, ‘ncazzannose e sparenno dâ sibbacca (gara).

(dô 68′  Insigne 4,5) – Nun cumbinaje niente ‘e cchiú ‘e ll’arillo anze [e ppe cchesto s’ammereta meno d’’o cumpagno] quanno avette ll’accasione bbona pe ppurtà annante ‘o Napule, me ripeto cu ‘na porta aperta, anze spalancata nun sapette fà ‘e meglio ca cunzignà palla ô purtiere! Cose ‘e pazze! Uh ca ll’ànn’accidere e nnun ll’ànn’’a pavà!)

All. Sarri 5,5 – Niente, nun ‘o vvo’ capí ca à dda cagnà modulo; pussibbile ca nisciuno ll’à ditto ca ‘e mmubbare (partite) se venceno a ccentro campo e ca tre arreto bastano i avanzano si ‘o centrocampo è guarnito? Ajere tentaje coccosa facenno trasí jucature cchiú ffrische, ma quann’era ggià tarde e nun ne cacciaje niente pure pecché fove traruto dâ ‘mpricisione ‘e Lorenzigno e pPeppe ‘a ‘nguenta.

Arbitro Damato: 0 spaccato! – Nun ce scurdammo ca ‘stu mammalucco è dde bbarletta e ccumme a ttutte ‘e puglise è ttifuso d’’a vecchia zoccola; oramaje s’è ccapito ca dint’ô palazzo addó ‘a cumanna ‘a chenca d’’a zoccola a strisce è stato diciso ca ô Napule nun s’à dda cuncedere nisciunu ricore, ma chisto  ajeressera a mMarassi esaggeraje malamente e dde ricure nun ce ne dètte addirittura dduje, uno pe ccarì (fallo) ‘e mane ‘e ‘nu pierepetterra crifonee cchill’ato, cchiù retissante (clamoroso) pecché  n’atu crifone delinquente [Orban(no)]  se carriaje a Arcadio ‘nterra a ‘nu metro dâ porta, tiranneselo pe ‘nu vraccio. ‘Nfra ll’ati fetenzie ‘ndanno d’’e cuane (azzurri) po,  ‘nu cartellino russo sparagnato a ‘nu samento  russo e bblu.

Mo primma ‘e lassarce cunzentiteme ‘nu sfogo contro a cchilli quatte pirete d’’a Cazetta d’’a Sporta milanese; ma qua’ figlie dint’â connola ll’avimmo acciso nujaute  napulitane? Pecché ce berzaglieno e cce pigliano p’’o prozo pubblicanno ‘na fotó cu Orban(no) ca secuta a mMilikco ‘nu mumento primma ca s’’o piglia p’’o vraccio e ss’’o carreja ‘nterra e cummentanno sotto “La trattenuta di Orban su Milik per la quale il Napoli ha chiesto il rigore”? Po dice ca uno lle dà ‘o ttu i ‘e mmanna a ffà addó sanno lloro!E fermammoce cca penzanno, comme dicette Pepe, pusitivo e dicenno ca chillo d’ajeressera fove ‘nu punto guadagnato, pure si i’ cuntinuo a ccredere ca se ne so’ pperze dduje e, si ‘o Signore ‘o vvo’ ce sentimmo dummeneca ca vene doppo d’’a mubbara (partita) manzilla (casalinga) contro ô Chievo d’’e pariente ‘e chella zoccola ‘e Giulietta, speranno ca ‘ncasa ‘o Napule torna a ffà ‘o Napule e vvence largo!

Staveti bbe’!

ilnapolista © riproduzione riservata