Le pagelle in lingua di Palermo-Napoli.
Tutto a pposto, guagliù, tutto a pposto! Ajeressera, cu ll’auaja (trasferta) ô bBarbera ‘e Palermo, ‘o Napule fazzaje (conquistò) tutta ‘a posta ‘mpalio e sse purtaje â casa tre ppunte cu n’atalossa(prestazione) mucannaja (convincente) spicialmente a ll’arrancua(nella ripresa)quanno mettette dinto ‘e ttre purpette ca ce facetteno vencere ‘a mubbara, doppo ‘nu primmo ajone affannato, pure si innitto (dominato) contro a ‘nu Palermo ca facette bbarràceme (barricate) jucanno cu ddiec e ‘e lloro arreto â linia d’’a palla. Turnate ‘ncampo però ‘o Napule ce se mettette cu ‘a panza e ccu ‘o penziero e ‘ncapo a ppochi minute primma cu Marekiaro (2’) e ppo cu pPeppe ‘a ‘Nguenta (6’) stupetiaje ‘a bbanda ‘e De Zerbi i ‘o stesso Peppe po ô 20’ ‘o stennette definitivamente e ce ne turnajemo â casa a ppanza chiena e pporta, ‘sta vota, acrata (inviolata). Pirciò tutto a pposto, guagliù, tutto a pposto! Peccato sulo ca Milicko rummanette a vvocca asciutta e nnun signaje. Peccato! Forze se ll’astipaje p’’a mubbara ‘e Ciampionsa… Mettimmola accussí e ppassammo ê ppaggelle:
Reina 6 Comme spisso lle succedette â tempurata (stagione) passata , nun fove chiammato a ffà parate dicisive e sse dimustraje attiento dinto a ll’urdinaria amministrazziona; furtunato, ma quanno ce vo’, ce vo’!, quanno Bruno Henrique ll’aizaje ‘a mana.
Maggio 6- Nun facette agnurà (rimpiangere) a Hysaj â marala (fase) difenziva,però quanno avanzaje purtroppo nun fove sempe priciso: ll’ abbre suoje (i suoi cross) truvajeno spisso spisso ‘na jamma (gamba) avverzaria e tte saluto!
Koulibaly 6,5 – Jucaje cu ggranna attenziona senza nisciuna fessaria; sinamparco (comunque) ‘a serata nun fove particularmente difficultosa visto ca quase maje ‘o Palermo riuscette a arrivà dê pparte soje…, ma quanno ‘o ffacette facette maremnna a ssarachielle!
Albiol 6- Nun ll’attocca ‘o seje chino pecché si â marala (fase) difenziva fove praticamente matàlo (perfetto), p’’o stuco (gol) ca se magnaje durante ô primmo ajone, ‘ntribbuna divano, ce facette chiammà tutto ‘o Paraviso ‘nterra. E nnun ce ‘o ppozzo perdunà!
Ghoulam 7 – Ll’jusaida (L’assist) p’’o zzero a uno ‘e Marekiaro fove ‘a perna ‘e n’atalossa (prestazione) mumazza (ottima):addereto metteno ‘a musarola mo a Embalo e mmo a sSallai,annante se pruunette periculosamente p’’a ‘ntesa cullaudata ca tène cu Insigne.
Zielinski 7 – ‘O guaglione se facette apprezzà pure ajere; miso ‘ncampo p’’o rutizzio (turnover) dô primmo minuto dètte ‘e rrisposte ca Sarri s’aspettava stanno presente cu perzunalità dint’ô vvivo d’’o juoco comme quanno fove prutacunista d’’a chera (incursione) ca ‘nchiudette ‘a prattica cu ‘o siconno stuco (gol) ‘e Peppe ‘a ‘Nguenta [dô 74′ ALLAN s.v.]
Jorginho 6,5 – Facette chello ch’êva ‘a fà dimustranno d’essere ‘o muticadammo (fulcro) d’’a manovra cuana; tuccaje tantissimi pallune e nnun ne sbagliaje nisciuno; avessen fatto quacche istiglia (verticalizzazione) ‘e cchiú fósse stato matàlo (perfetto).
Hamsik 7,5 – ‘O capitano, arzasciarro (simbolo) e bbannera nosta s’ammeretaje miezu zifo (voto) ‘e cchiú p’’avé sbluccato ‘a mubbara (partita) cu ‘o stuco (gol) suojo E mmo, cumplessivamente ne songo 99:99 sfugliatelle ricce cu ‘o Napoli.E nun ce scurdammo ca à ggià firmato pe rrestà cu nnuje nsi’ a cquanno se fa viecchio e sse piscia ‘ncopp’ê scarpe! Cumpletaje ll’atalossa soja cu ‘a solita periculosità ‘nsertannose (inserendosi).Uno d’’e meglie!
Callejon 8 – ‘A solita mazzuja (doppia) fatica, ‘a solita corza senza fermarse, ‘a solita ‘nteliggenza a cchimmà (servizzio) d’’a scuatra e ppe ffà ‘na cosa ‘e cchiú se mettette a ffà ‘o nassía (goleador), firmanno dduje stuche (gol) ca p’’o mumento ‘o metteteno cu bBelotti [Torino] ‘ncimma â lista ‘e ll’artigliere (classifica cannonieri). Ascette pe ppiglià sciato.(dô 69′ Mertens s.v.)
Milik 5,5 – Me dispiace, ma nun partecipaje ô festivallo d’’e nassíe. ‘O cercajeno poco e ‘o servetteno malamente scurdannose ca isso è n’anema longa capace ‘e cabbesera (colpo di testa) ‘e fà cose ‘e pazze.Ascette a ll’arrancua (nella ripresa) [dal 67′ Gabbiadini 5,5 Avette ‘a palla d’’o 4-0 ma nun ‘a sfruttaje, ‘mpappinannose ‘nnante a pPosavec(chie). E cche ccacchio! Ma pe ‘sta vota ‘o perdono]
Insigne 7 – Pe n’ ajone (tempo),’o siconno ll’ azzione cchiú ppericulose d’’o Napule passajeno quase tutte p’’e piere suoje. Cumplessivamente l’atalossa soja fove cu agruppina (vispa) e agnanima (generosa) curunata cu ll’jusaida(assist) p’’o zzero a ddoje ‘e Caglieconno.
All. Maurizio Sarri 7 Solito sistema ‘e juoco cullaudato, ma ‘O rutizzio (turnover) funzionaje i ‘e varie Maggio, Insigne e zZielinski dètteno risposte matàle (ottime). Bravo! Me piacesse però ca se ‘nventasse coccosa pe ffà jucà assieme a mMilikco i a gGabbiadini e vvedé che nn’ascesse.
E fermammoce cca. Ve saluto e vve dongo appuntamento, si ‘o Cielo ‘o vvo’ a mmiercurí ca vene doppo ‘e ll’auaja (trasferta) a cKiev(vo) p’’a mubbara (partita) ‘e Ciampionsa! Staveti bbe’
