Tutto a pposto, guagliú! Ajeressera ô san Paolo, sotto ô patapato ‘e ll’acqua ‘nnante a vinticinchemila perzone ca se facetteno comme a ttanti purpetielle, ‘o Napule vattette a ll’ Atalanta e se jette a rrepiglià chillu siconno posto ‘ncrassifica ca, ‘mmerz’ê sette a gGenova contro ê crifune, ‘a Roma, accumpagnata pe mmano dachella mmunnezza ‘e ll’arbitro Gervasoni s’era mumentaneamente pigliato. Tutto a pposto, guagliú ma, ajeressera ô san Paolo, ‘o risultato fove busciardo pecché si fósse fernuta pe sseje o sette a uno p’’o Napule nisciuno êsse pututo dicere niente!
‘Mmece fenette e c’êttemo accuntentà ‘e ‘nu saràfeco (misero) ddoje a uno pecché d’’a duzzina e cchiú accasione avute, troppo nun foveno sfruttate, pecché capitate ‘ncopp’ê piere sbagliate e ssole ddoje capitajeno ô Pipita ca ‘e mmettette a ffrutto. Ecco e cchesta fove ‘a cosa ca nun me piacette ajeressera: nun essere riuscite a ffà ‘na sbrasata a dduvere comme ce fósse pututo stà. Se vincette però e dèttemo ‘o fatto suojo a ll’atalanta [‘na scuatra ca tenco ‘ncopp’â ponta d’’o vernecale (dello stomaco) pe dduje mutive, uno spurtivo e n’ato storico-pulitico: chillu spurtivo è ca ll’atalanta è ‘na scuatra assineja (satellite) d’’a vecchia zoccola e ggià fósse ‘nu bbuonu mutivo pe mm’’a fà schifà pe mmane ‘e légge…, ma po ce sta ‘o mutivo storico-pulitico ch’è ancòra cchiú cauzante visto ca (pe cchi nun ‘o ssapesse) ll’uttantacinche pe cciento d’’e delinquente, mariuole,ricuttare senz’arte nè pparte, venute ô millottucientosissanta appriesso a garibaldi giuseppe a rromperce ‘o pasticciotto cca bbascio fóveno proprio bergamasche, ca ‘e pozzano accidere addó stanno mo!], se vincette e cchesto conta e ppeccato pe cchillu smaledettu tozzi-tozzi d’’o pallone ‘nfra koulibalý e Albiollo, pallone ca rimbalzaje ê spalle ‘e Reina surprennennolo, [senza ca isso nce putesse fà niente] e dètte a ll’Atalanta ‘o stuco d’’a bbannera ca nun s’’o mmeretaje o se fósse mmeretato.Pacienza! Passammo ê ppaggelle:
REINA 6 Attiento pe cchellu ppoco ch’êtt’’a fà cumme urdinaria amministrazione e bravo cu ‘e piere.’O stuco (gol) pigliato, comme aggiu ditto, nun fove sfarma(colpa) soja, ma ‘na sfurtunata titerma (autogol).
HYSAJ 6,5 Se détte ‘a fà soprattutto pe ddà ‘na mano a Caglieconno a ll’epata ‘e stuzzo (in fase d’appoggio) e ‘ o facette cu cuntinuità spicialmente a ll’arrancua (nella ripresa).
ALBIOL 6 Restaje a gguardia d’’a camma soja cu ccalma e attenziona, dànno n’uocchio a bBorriello e ascenno cu cqualità palla ô pere. Assaje sfurtunato ‘ncopp’ô tozzi-tozzi d’’o pallone ca fruttaje ‘o stuco atalantiso.
KOULIBALY 6 Custretto a allargarese spisso a mmancina pe ddà ‘na mana a Ghoulammo a ccuntrullà a D’Alessandro, e ss’’a cavaje mettennoce cegna (grinta) e armaddia (fisico).Pur’isso assaje sfurtunato ‘ncopp’ô tozzi-tozzi d’’o pallone d’‘o stuco atalantiso.
GHOULAM 6– Durante ô primmo ajone (tempo) jette ‘nsufferenzia quanno êtt’’a recuperà ‘ncopp’a D’Alessandro. Meglio a ll’arrancua (nella ripresa).
ALLAN 6.5 Ce mettette cegna (grinta) e fabbíca (applicazione) venenno fora cu ‘o ppassà d’’e minute; sulo Sportiello e ‘o travesagno (traversa) lle dicetteno ‘e no! Che peccato!
JORGINHO 7 Assaje pusitivo; ‘mmiez’ô campo nun se facette ‘mpressiunà ‘a nisciuno e sfuderaje jucate ca paretteno facile, sulo pecché isso nun ‘e cumplicaje e ffoveno tutte pricise e sistimate, soprattutto tre o quatte lanze ê spalle d’’e difenzure.
HAMSIK 6,5 Soprattutto pe ll’ajuda (assist) ‘e ll’uno a zzero ca fove bbello assaje. Peccato però ca nun le riuscette ‘e truvà ‘o stuco (gol) perzunale, pure si spisso fove periculuso!
CALLEJON 6,5 Stesso trascurzo fatto pe Marekiaro: zifo (voto) ca premia ‘o cruzzo (cross) fatto p’’o doje a zzero d’’o Pipita, pecché p’’o riesto nun sempe fove cúttero (incisivo),pure si currette prupunennose cu ccuntinuità e ccupulianno (dialogando)cu Hysaj. [da ll’80’ EL KADDOURI s.v.]
HIGUAIN 7,5 Pe bbia d’’a scualifica, nun signava ô san Paolo dô vinto ‘e marzo contro ô Genoa: ‘nu diuno ca scatenaje ‘a famma d’’o Pipita, ancora dicisivo [cu ‘e duje stuche (gol) d’ajere:trentunesimo e trentadujesemo ‘ncampiunato ] p’’a nichemata (vittoria). Sarri ‘o facette ascí seje minute primma, ma nun se capette pecché. [da ll’84’ GABBIADINI s.v.]
INSIGNE 6- Mustraje vivacezza (vivacità) e ligazzona (continuità), ma nun signaje,jennoce sulo vicino e sbaglianno pe mmancanza ‘e saffenèja (lucidità). Peccato!. [dô 64′ MERTENS 6 Purtaje frischezza, approfittanno d’’e spazzie, ma nun sfruttaje ll’accasione avute magnannose ‘nu paro ‘e stuche(gol).]
SARRI 6,5 ‘A scuatra custruette assaje, ma recugliette meno d’’o ssemmenato. Quanno se vence, però, vence ‘mprimmose ‘o trainerre… e ajere se vincette.’Na tirata ‘e recchie pecché facette ascí ô Pipita.
GIACOMELLI 5 Chisto è scemo e nnun ne parlo!
E fermammoce cca. Ve saluto e ssi Ddi’ vo’ ve donco appuntamento p’’a prossima vota sempe speranno ca dummeneca ca vene ‘a Roma nun tenesse ‘o stesso mazzo ca tenette ajere a gGenova contr’ê crifune e soprattutto ca ll’arbitro nun le désse ‘na mana; ma ce credo poco, ‘mprimmose pecché joca ‘nacasa contr’ô Chievo e ppo pecché ‘o Palazzo vo’ ‘a Roma siconna!
Staveti bbe’!
