E ppure chesta è fatta guagliú, pure chesta! Ajeressera ô san Paolo. Cu ttutto ca ‘nopp’ê bbemate (spalti) nce steva a mmenà secce chillu cestariello ‘e ggiggino uocchie-stuorte
‘o Napule riuscette a vvattere chilli campanare d’’e pariente lasche ‘e Giulietta cunquistanno ‘e tre ppunte nicessarie p’allungà n’ata vota ‘ncopp’â Roma e p’ancappà, pure si sulo p’’o mumento, ‘ncimma â crassifica chella zoccola janca e nnera ogge favurita dô fatto ca se ll’à dda jí a vvedé a bBergamo cu ll’Atalanta, ca – comme se sape – è ‘na scuatra assineja (satellite) d’’a zoccola e a tTurino pe cuntratto à dda perdere e a bBergamo, ô mmassimo po’ pariggià sempe ca ‘a zoccola nun tene nicessità d’’e tre ppunte. Pe ccuje nun me faccio vajumme (illusioni), pure si spero ‘e sbagliareme e ddico sulo ca ajeressera êssemo pututo vencere cchiú llargo ggià ô prazzo (fine) d’’o primmo ajone (tempo) e nun ce riuscettemo pecché sprecajemo troppe accasione avute e ‘o stuco (gol) d’’e campanare fove ‘nu rijalo d’’o Vampiro ca doppo sulo duje minute pigliaje ‘nu granne zzarro facenno n’amàrtema (erroraccio) ca maje me fósse penzato,e si nun ce fósse stato, ‘e campanare maje e ppo maje êsseno dato ‘mpiccio a rReina…, ma ‘o Vampiro sbagliaje! Peccato! Pe ffurtuna ggià quatto minute doppo ‘o Pipita mettette ‘e ccose a pposto pariggianno e ppo ‘o stesso Vampiro nuosto se facette perdunà ‘a fessaria fatta, jenno a ssignà’o stuco (gol) d’’o doje a uno; po però êttem’aspettà ll’arrancua (ripresa) pe vedé Peppe ‘a ‘nguenta deciderse a mmettere dinto ‘o tre a uno, ma primma quante e cquane accasione sciupate! Troppe! Nun ce facimmo però ‘o sanco amaro pe cchesto, tanto cchiú ‘e tre ppunte nun c’êsseno date! Passammo ê ppaggelle:
REINA 6 – Sfurtunato ‘nnaccasione d’’o stuco (gol) verunese primma pecché nun s’aspettava ‘a fessaria ‘e Chirichesse e ppo pecché, quanno se lanzaje pe pparà ‘a cagliosa ‘e Rigoni, sciuliaje malamente; p’’o riesto rummanette a gguardà chello ca succedeva festiggianno a zzumpe ògne stuco (gol) cuano.
HYSAI 6,5 – Facette a spallate cu M’Poku, recuperanno ‘na cifra ‘e pallune e rrummanette ‘ntricera ‘ncopp’â linia soja visto ca ‘o cercajeno poco pe farlo allungarese annante comme êsse vuluto isso!
CHIRICHES 6 Nce ‘o mecco pe stima e ccomme media ‘nfra ‘o quatto ca se fósse mmeretato p’’a fessaria fatta doppo duje minute dànno ‘o vantaggio ê campanare, e ll’otto pe ccomme s’’a facette perdunà jenno a recogliere ‘nu cruzzo (cross) ‘e Giorgigno e mmettenno dinto ‘o doje a uno.
KOULIBALY 7,5 – Abbituato cu Albiollo, ce mettette quacche mminute a ttrasí ‘nsintunia cu ‘o Vampiro, ma po se capetteno i ‘o gialante (gigante) francese venette fora cu ttutt’’a qualità e ‘a diccà (affidabilità)soja; se chiammaje ll’applavuse ô 20’ cu ‘na sciuliata mazzuja(doppia), nchiudenno po ‘ncopp’a ògne ppallone pe ttutt’’e nuvanta minute
GHOULAM 7 Â primma accasione justa mettette ‘o pallone justo p’’o Pipita, ca però sciupaje ‘o siconno sparannolo fora a uocchie nchiuse; pe nnuvanta minute ll’algerino ‘ncopp’â curzia soja facette chello ca vuleva senza ca maje ca Frey riuscesse a ffermarlo, tanto ca Faouzí arrivaje pure ô tiro e ppoco mancaje ca nun futtette a bBizzarri; praticamente ‘a meglia atalossa (prestazione) d’’a tempurata (stagione)!
DAVID LOPEZ 6 Tutto summato s’’a cavaje dànno dinamichía (dinamismo) ô centrocampo; sfresaje (sfiorò) ‘o palo cu ‘nu bbellu dritto, po però perdette quacche pallone ‘e troppo. [Dô 67′ ALLAN 6 – Tre minute pe farece reggistrà n’ ajuda (assist) pe Caglieconno, ‘nu spezzone ‘e mubbara (partita) pe ricuperà doppo quacche atalossa (prestazione)scagnata (sbiadita)].
JORGINHO 6,5 ‘Nu bbellu cruzzo (cross) p’’a capa d’’o Vampiro ca ce dètte ‘o vantaggio; p’’o riesto durante ô primmo ajone (tempo) nun sbagliaje niente andivinanno tutte ‘e pasiglie (passaggi) bboni ‘nvenzione pure ô pprincipio d’arrancua(ripresa); po però mancaje quacche vvote a ll’epata ‘e culaturo (fase di filtro) lassanno strata libbera ô Chievo, ma senza cunsequenzie!
HAMSIK 7 Manco ajere ‘o capitano riuscette a ccercà i a ttruvà ‘a porta, ma ‘ncumpenso se mettette a ddisposizziona d’’a scuatra cu ‘nu centenaro ‘e pasiglie (passaggi) a mmestiere e cce mettette ‘o ssuojo dànno a Ghoulammo chillo ca addivintaje ‘o pallone d’’o pareggio; mettette po ‘nu bbellu paro ‘e pallune p’Insigne [ca ssciupaje] e ppe Caglieconno [ca finalmente a ll’arrancua (ripresa) mettette a ffrutto]. [Da ll’86’ CHALOBAH s.v.]
CALLEJON 6,5 Safaje (pressò) comme n’anema ‘mpena (ossesso) ggià dô primmo minuto, ma sprecaje assaje o pe precipitazziona [ comme quanno se facette fermà ‘a bBizzarri ‘na cabbesera(testata) bradosa (lenta) ] o pe sfurtuna [quanno Cacciatore le deviaje ‘nu tentativo fora â rezza ]. Pe ffurtuna finalmente a ll’arrancua (ripresa) mettette a ffrutto ll’urdemu tentativo,mettenno dinto ‘o tre a uno!
HIGUAIN 7 Ll’avastajeno seje minute ô Pipita pe ccasticà ‘o Chievo e ddoppo riuscette quase sempe a ss’avutà ‘mmiez’â trasera (retroguardia) ‘e Maranno,ma ô 32’ lle mancaje ‘o tiempo justo pe ttirà; cchiú ttarde facette tremmà ‘o travesagno (traversa) cu ‘na cagliosa ca bBizzarri riuscette a ttuccà deviannola; p’’o riesto cercaje cuntinuamente ‘a porta speranno forze ‘e truvà ancòra quacche stuco (gol) pe suppuntà ‘e cchiú ‘o posto ‘e primmo ‘ncrassifica d’’e nassíe (cannonieri). Pe mmo so’ vintiseje ‘e stuche fatte… e nun so’ ppoche!
INSIGNE 6 Però aggio esaggerato pecché d’’e tre d’’a catena ‘e mancina fove chillo ca soprattutto dint’â primma mez’ora se vedette poco o niente; ô 41’ avette pure ‘na granna accasione, ma ‘a sprecaje malamente mettenno ‘o pallone fora. Sfresaje (sfiorò)sulamente ‘o travesagno (traversa) a ll’arrancua (ripresa), po ascette. [Dô 71′ MERTENS 6 – Vinte minute ‘e muvimento, ma cu ppocu zuco. Peccato!]
SARRI 6 Pecché quanno se vence vence pe pprimmo ‘o trainerro, ma ce avesse spiecà comm’è ca tene poca cunfianza (fiducia) p’’a panca si, ògne vvota, fa jucà sempe ‘e stesse e nnun riesce a ttruvà maje ‘nu bbuco pe ‘nu jucatore comme Gabbiadini! E cche sacicco!
Arbitro DI BELLO 5 ‘A chiena i ‘a vacante, ma ‘e cchiú nun dico.
E ffermammoce cca,cuntente ca all’immeno p’’o mumento e ppe ‘na notte ‘o Napule sta ‘ncimma â crassifica ‘ncumprurietà cu ‘a zoccola janca e nnera, cunfermannoce (e i’ nun me mecco paura d’’o ddicere) ca ,corne facenno, pure st’anno ce putessemo fa ‘o suonno d’’o scutetto. Sempe si ll’arbitre e ttanti cestarielle ce lassano ‘mpace. Accussí sperammo e, ssi dDi’ vo’, ce sentimmo llunnerí ca vene doppo d’’a trasferta a pPalermo. Staveti bbe’.
