Êsse ‘a fa ‘e ppaggelle, ma sto troppo ‘ncacchiato pe ffarele
Ahé e i’ mo cu cchi m’’a piglio, guagliú? Cu cchi m’’o sconto st’ atu cato ‘e tuosseco ca me so’ agliuttuto ajeressera? Cu cchi? Forze sulo cu cquacche bbanda ‘e cestarielle, capiggiata ‘a ggiggino-uocchie-stuorte ca ce à menato ‘a favetta e nce à cuovete malamente… e ttutto chesto pecché nun pozzo credere ca né Sarri, né ‘a scuatra s’êveno ‘mparata ‘a lezziona pigliata a ‘o jummerdummo stadiummo…, ciovè nun pozzo credere ca né Sarri, né ‘a scuatra êveno capito ca ‘o Napule nunn’è scuatra ‘e jí a gghiucà ‘ntrasferta p’’o quarto ‘e bbullito d’’o zzero a zzero, comme ‘mmece succedette pure ajere ô Madricallo addó ‘o Napule resistette nsi’ a ll’uttantatriesemo ‘ncopp’ô zzero a zzero e ppo pigliaje ‘nu stuco quanno nun ce fove cchiú ttiempo pe recuperà, rijalanno ô Villarreale ‘na nichemata (vittoria) ca manco ‘e spagnuole se mmeretaveno nun avenno maje dato ‘mpiccio pe ttutta ‘a mubbara (partita) a rReina, comme pure êva fatto ‘o Napule ca sulo ô cinquantasettesemo cercaje ‘a porta spagnuola cu ‘nu tiro fora berzaglio ‘e Caglièconno.
Troppo poco, troppo poco!
Nun voglio credere però ca s’è rrotta ‘a pazziella e ca ‘o Napule è chillo visto ajeressera a vVillarriala. Voglio sperà ca s’è trattato ‘e ‘na bbrutta casaina (parèntesi) e ca ggià llunnerí, ‘ncampiunato contr’â scuatra d’’o zincaro ‘o Napule tona a ffà ‘o Napule, comme cu ‘a mubbara (partita) ‘e ricresso (ritorno) ô san Paolo ‘a scuatra dà ‘na bbona ‘mparata ‘e crianza ô Villarreale e ssupera ‘e sedicesimo d’E.L. Accussí sperammo.
Ora mo êsse ‘a fa ‘e ppaggelle, ma sto troppo ‘ncacchiato pe ffarele; faccio zimmare e crapette una mbulletta e mmecco quatto e mmiezo a ttutte quante arbitro ulandese cumpreso, ca – pe pparta soja – ce ajutaje p’’a scesa siscanno sempe a ffavvore d’’e spagnuole e nun dànnoce ‘nu ricore sacrusanto!
E ccu cchesto ve saluto e ssi dDi’ vo’ ce sentimmo marterí ca vene doppo ca ô san Paolo scenne ‘a bbanda d’’o zincaro, speranno ca se ne turnasse carreca ‘e maraviglia p’avé pigliata ‘na bbona scusuta ‘e mantesino!
Staveti bbe’!
Raffaele Bracale Brak