Che ddelusione e cche ccollera guagliú!Brutta antraffa (partita) chella d’ajere ê sseje ô san Paolo, fenuta cu ‘nu scunzulato pareggio pe zzero a zzero, add? ‘o Napule, visto ‘ncampo, avesse avut’’a vencere e llargo pe cchello ca ffacette e pp’ ‘e ttante accasione c’avette e nun riuscette a mmettere a ffrutto ‘nu poco pe sfarma (colpa) d’’a roma ca se difennette cu ‘o sanco a ll’uocchie, ma soprattutto pe sfarma (colpa) ‘e Sarri ca sbaglianno furmazziona lassaje fora a mMertenso i ‘o mettette ‘ncampo troppo tarde e ppe sfarma (colpa) ‘e Lrenzigno e mMarekiaro ca sciupajeno ll’uno cinche bboni situazzione e ll’ato ddoje.
Pe pparta soja ‘a roma nun se vedette quase maje annante e nun dètte nisciunu penziero a rReina. ‘A jonta po ce ‘a mettette chella fetenzia internazziunale ‘e Rizzoli [2] ca siscaje pe ttutt’’o tiempo a ssenso unico e cciovè ‘ndanno d’’o Napule e ssulamente durante ll’inutili tre mminute ‘e ricupero se decidette a ssiscà a ffavore d’’o Napule nutitianno (ammonendo) quacche cammurristo d’’e rumanise…
Pe nun dicere ca mentre nun nutitiaje (ammoní)a zZeko pe n’ acatasto (fallo) ‘e mane pecché nun êva ‘nterrutto ‘nu pasiglio (passaggio), p’’o stesso acatasto nutitiaje a mMertenso appena trasuro; e cchesto f?sse stato niente si pe ttutta ll’antraffa (partita)quanno cchiú ca spisso ‘nu paro ‘e profuche rumanise a ‘o Pipita ‘o trattenetteno p”a maglia, p”e cazettune, p”emmutande, p”o sospenzorio, isso avesse cecato a vvedé i a sanziunarle… add?? Nun vedette niente o lassaje correre, comme nun vedette quanno dduje figlie ‘e coperativa strignetteno ‘mmiezo a Mertenso i ‘o menajeno ‘nterra dint’â camm (area) ‘e ricore rumanesa a ‘nu metro dâ porta. Me stongo ancòra addimanno: “Ma dint’ô Palazzo ànnu diciso ca ê jucature d’ ‘o Napule nun s’ànn”a dà ricure, manco si veneno curtelliate?”
Conchiusione, fenette zzero a zzero e ffoveno dduje punte perdute e ‘nu punto guadagnato p’’o prozo scassato d’’a bbanda ‘e monzú garcià add? tutte ‘e scuatre ‘e primma fascia scese ô san Paolo se nn’erano turnate paccheriate a dduvere! Passammo ê ppaggelle:
REINA 6 Guardaje sfilà a llato ll’unica ‘ncurnata ‘e Zeko, e pp’’o riesto nun avette penziere e ffove sicuro quanno ascette.
HYSAJ 6,5 Ll’asse cu Cagliecònno ‘o purtaje a scennere cu eunfa (veemenza) ‘ncopp’â curzia ‘e dritta,assaje cchiú d’’o stesso spagnuolo e dDigne nun fove crestiano ‘e pigliarlo maje; però se facette sèntere pure ‘ntrasera (in difesa) contro a sSalàh.
ALBIOL 6 Arresecaje ‘na ricata (dribbling) doppo tridice minute,e lle riuscette. Nun currette pericule,’nu poco pecché annante ‘a roma se vedette poco e ‘nu poco pecché ‘o cumpagno ‘e sezziona (reparto) lle dètte ‘na granna mana;rizzoli ‘o nutitiaje (ammoní) appena pruvaje a anticipà a zZeko, ma nun s’’o mmeretava!
KOULIBALY 7 ‘Nu muro d’ebbano ca cassaje a zZeko dô campo e ppe ffarele capí ch’ aria tirava ô primmo scontro ‘o lassaje ‘nterra pe cchiú ‘e ‘nu minuto.Da applavuse a scena aperta sott’ â mz’ora ‘a giravota a ccentrocampo , signo ‘e granna sicurtà (sicurezza).
GHOULAM 5,5 – Insigne e mMarekiaro ‘o chiammajeno ‘ncavusa cchiú ‘e ‘na vota, ma isso soprattutto durante ô primmo ajone nun dètte ‘na mana sbaglianno cchiú ‘e ‘nu cruzzo (cross) ‘nteressante; quanno lle riuscette nun truvaje ‘o Pipita a ll’appuntamento.
ALLAN 6 – ‘Nu cane ‘e presa cu sette purmune ca vincette ‘a sfita cu nNainggolanno,mo pe ‘nu cuntrasto, mo pe ‘na corza a ccunquistà palla; a ll’arrancua (ripresa) se ne scennette ‘nu poco.
JORGINHO 5 Nun se facette ‘mpressiunà né da Zeko né da Pjaniccio ch’accurciaje pe pressarlo, ma a ll’epata ‘e bbinna (in fase di costruzione) durante ô primmo ajone facette overamente poco, mentre a ll’arrancua (ripresa) se facette nutà sulo p’’e tire piazzate sbagliate.
HAMSIK 4,5 Dâ pusizziona soja putette decidere si serví a Insigne ‘ncopp’â curzia o ôPipita ‘nnummuco (in profondità), ma sbagliaje mo cu ll’uno, mo cu ll’ato:doppo vinte minute fove troppo debbole ‘o pasiglio (passaggio)p’’o Pipita, troppo forte chillo ô 36′ p’ Insigne. Po ‘o Pipita ‘o mettette ‘nnante â porta e isso nchiudette troppo ‘o tiro ‘e mancina;nun me ricordo chi lle dette n’ata uppurtunità tale e cquale â primma e isso sprecaje pure chella!
CALLEJON 5 Nun saccio si fove Sarri ca ll’assignaje ‘na pusizziona troppo arretrata specialmente dint’ê primme minute o fove ‘na dicisiona soja, cert’è ca accussí facenno nun riuscette a ffarese nutà a ll’epata uffenziva e ssulo ô 49’Zesny,o comme cacchio se chiamm’isso lle levaje ‘nu pallone dê piere. ‘Nu poco cchiú scetato a ll’arrancua(ripresa), ma nunn’ avastaje. Troppo poco! (Dô 67′ MERTENS 6,5 Êsse avut’’a scennere ‘ncampo isso dô primmo minuto e nno accussí tarde; puteva essere ll’antraffa (partita) soja! Rizzoli ‘o nutitiaje (ammoní ingiustamente) pe n’ acatasto (fallo) ‘e mane ca nun êva ‘nterrutto nisciunu pasiglio (passaggio) e nun lle siscaje ‘nu ricore a ffavore quanno dduje figlie ‘e coperativa ‘o strignetteno ‘mmiezo i ‘o menajeno ‘nterra dint’â camma (area) ‘e ricore rumanese) a ‘nu metro dâ porta!
HIGUAIN 5,5 Martirizzato pe ttutta ll’antraffa(partita) dê centrale rumanise ca, specie ‘ncopp’ê tire ‘e squina (corner) ‘o trattenetteno p”a maglia, p”e cazettune, p”emmutande, p”o sospenzorio,e rRizzoli nun cecaje maje a vvedé, né vedette comme Rudigerro lle facette assaggià ‘a ponta d’’e scarpette cunrtinuamente,se facette truvà troppo avanzato ‘ncopp’a ‘nu pasiglio (passaggio) ‘e Marekiaro i è arrivaje troppo tarde ‘ncopp’a n’ ebbra (traversone) ‘e Ghoulammo ô pprincipio d’arrancua (ripresa), ‘ncumpenso se ‘mmentaje n’ esterno priciso ca mettette Marekiaro [ca peròsprecaje] ‘nnante â porta.F?sse servuto una d’’e ddoje magarie fatte a bBulogna, sotto porta…, ma purtroppo nun fove accussí. Peccato!
Insigne 5 Aizaje troppa porvera pe ttutta ll’antraffa (partita);periculuso sí quacche vvota, ma troppo asimmo (inconcludente) comme quanno se ‘ncapunette a nun passà palla e cunchiudette cu ‘nu tiro sballato e lle capitaje cchiú ‘e ‘na vota. (Da ll’88’ EL KADDOURI 5 Lle capitaje ‘na bbona accasiona ‘ncopp’a ‘na rispinta ‘eZesny,o comme cacchio se chiamm’isso, i ‘a scipaje nun riuscenno a ttruvà spazzio e ttiempo pe mmeterla dinto!)
Sarri 5 Quanno se vence è ppure jàdara (merito) d’’o trainerro, ma quanno nun se vence è ppure sfarma (colpa) soja ca, comme ajere, sbagliaje furmazziona lassanno fora a mMertenso e nun tenenno ‘o cuorio ‘e fa risciatà a mMarekiaro e cCagliecònno dànno spazzio a Cialobbà e a mMertenso dô primmo minuto. Fove quase custretto a ddimannà ô Pipita d’avasciarese e isso ‘o ffacette rijalanno ‘nu pallone d’oro a mMarekiaro ca sprecaje. P’’o riesto me parette ca ‘a scuatra perdette ‘e saffeneja (lucidità) e de frischezza mentale e cquanno succede chesto se fenesce pe nun vencere, proprio comme succedette ajere!
‘E chella fetenzia ‘e RIZZOLI v’aggiu ggià ditto, pe ccuje me fermo cca e ssi dDi’ vo’ ve dongo appuntamento a llunnerí ca vene doppo d’’a trasferta a bBergamo speranno ca ve pozzo cuntà bbelli ccose.
Staveti bbe’!
Raffaele Bracale Brak
