Che ccollera e cche delusione guagliú! Soprattutto pe nnuje ca ‘ntribbuna divano ce credevemo e cce penzàvemo ca ‘e jucature cuane (azzurri) [ajere cu ‘a divisa d’’a Maronna ‘e ll’Arco ‘ncuollo] fósseno jute a cKievvo contro ô Dnipro pe vvennicarse ‘e ll’adicuso (ingiusto) pareggio ‘e ll’antraffa (partita) d’affarta (andata) e ppe ffà ‘nu proso tanto â scuatra ucràina cu n’atalossa (prestazione) essusiosa (autoritaria), sumillante (briosa) e spumosa (spumeggiante), ascenno dô campo sputanno sanco e attaccate â canna ‘e ll’ussiggeno, ma cuntente p’averce purtato a vVarzavia a gghiucarce ‘a finala d’E.L. contr’ô Siviglia, cosa ca avesse dato ‘nu senzo a ‘na tempurata (stagione) sprecata e ghiettata a mmare. ‘Mmece chi t’’o ddà, chi t’ ‘o ddà! Ajeressera a cKievvo sott’ ô patapato ‘e ll’acqua fove tutta n’ata storia e vedette ‘ncampo ‘na scuatra cuana senza ggenio, senza cegna (grinta), senza… palle, misa ‘ncampo malamente ‘a don Rafele ca lassaje ‘mpanca a mMarekiaro affidannose â chietta Pipita e gGabbiadini ca però nun fove a ll’aldezza e nun riuscette a avé raggiona ‘e ‘na tràsera (difesa)tosta e nchiusa addó ancòra ‘na vota ‘o purtiere facette ‘o fenomeno e vincette, ancòra ‘na vota, ‘a bbrica (sfida) cu ‘o Pipita ca sinamparco (comunque) fove ll’unico pe ddoje o tre vvote a ccercà ‘a porta, senza riuscirce però. Troppo poco pe cchello ca fósse servuto! Pe ccuje jette a fferní ca dint’a ll’unica accasione ca lle capitaje, cu ‘o solito Seleznyoffo, ‘o Dnipro [ca lle fósse avastato ‘o zzero a zzero pe gghirese a gghiucà ‘a finala] truvaje ‘o stuco ca però s’êsse avuto ‘annullà pe bbia ca ll’ucràino pe cculpí ‘e capa s’era arrampecato ‘ncullo a bBritosso e ppo se ll’era carriato ‘nterra. Ma figurateve vuje si ll’arbitro avesse avuto ‘o cuorio d’annullà ‘o stuco! Ora mo i’ nun voglio truvà peleje…, dico sulo ca si ‘o Napule ‘e DeLa ‘nnitaglia conta quanto ‘o doje ‘e coppa a bbriscula [quanno ‘o triunfo è a mmazze], ve putite figurà quanto conta ‘nnairopa, addó tutte se sentono ‘nderitto ‘e passiarle ‘ncopp’â panza e de scamazzarlo! Ah, si ce stesseno ancòra Ferlaino e Allodi.
Guagliù, paggelle nun ne faccio: sto’ troppo amariggiato e ddeluso; mecco tre a ttutte quante e ll’aggiu trattate!
Cunchiudenno, dicimmo ca pe mmo ‘a tempurata (stagione) è stata fràcasa (fallimentare) sprecata e ghiettata a mmare, ca ce rummanono sulo tre jurnate ‘e campiunato pe ttentà ll’impussibbile. Ma visto chello ch’è ssuccieso ajeressera nun credo ca ‘o vvonno fà. Me dispiace sulo ca a ‘stu punto don Rafele ce lassa e cchillo ca forze arriva [ ‘o zingaro!] nun penzo ch’è mmeglio d’isso.Stammo a vvedé comme se mette DeLa mo c’ à dda rinnuvà tutt’ ‘a scuatra accumincianno dô trainerro!
E nchiudimmola cca. Ve saluto e si dDi’ vo’ ce sentimmo marterí ca vène speranno ca lunnerí contr’ô Cesena, ô san Paolo, ‘o Napule ce facesse stà cuiete!
Staveti bbe’.
R. Bracale Brak