Festa granna ajere ô san Paolo cu ‘o Napule ca cunzignaje tre sfugliatelle ricce e ssenza ‘ncartarle â scuatra ‘e Montella e turnanno a vvencere se mettette dint’â sacca tre punte pesante arrivanno a cquota cinquanta ‘ncrassifica piazzannose ô quarto posto â faccia ‘e chi ce vo’ male e de chi ce mena ‘o nniro ‘e seccia e ppure â faccia ‘e chella fetenzia ‘e Damato (po ve dico) e de chilli tre o quatto ‘ntòntere a ffianco d’isso ca nun cecajeno a vvedé o nun vuletteno vedé ‘nu granne stuco (gol) d’ ‘o Pipita ca cu ‘na cagliosa ‘a trenta metre cugliette apprimma ‘o travesagno (traversa) e ppo mannaje ‘a palla bbuono ‘nu metro dint’â porta. Festa granna ajere ô san Paolo e nun ve partecipaje sulo ‘o Pipita pecché ce penzajeno ô primmo ajone (primo tempo) chill’arillo ‘e Mertenso cu ‘nu tiro d’’e suoje a ggiro e a ll’arrancua (ripresa) apprimma Marekiaro e ppo Cagliecònno mettetteno ‘e ccose ô ssicuro.
I’ mo nun saccio si fove ‘o castico vuluto ‘a Dela o pecché primma o doppo êv’ ‘a succedere ca ‘o Napule turnasse a vvencere, chello ch’è ccerto è ca ajere ‘o Napule se facette rispettà dô primmo a ll’urdemu minuto e nun è dditto ca ‘o terzo posto nun se po’ aggranfà n’ata vota, visto ca ce stanno ancòra tanti antraffe (partite) e ca ‘a Roma fermata ‘ncopp’a ll’uno a uno dô Turino e superata ‘ncrassifica dâ lazzio)tene sulo sette punte ‘e cchiú. I’ ce voglio credere ancòra e ppenzo ca ce credono ancòra pure ‘e cuane (azzurri). Ammènne! Passammo ê ppaggelle:
ANDUJAR:5,5. Miezu voto mancante pecché si fove nuttíco (provvidenziale) ascenno fora dâ camma soja ô pprincipio d’antraffa(partita), ô finale arresecaje assaje cunzignanno palla a bBorgia Valero cu n’applazzamiento (rinvio) sbeteco .
MAGGIO: 6,5.All’epata (in fase) ‘e cupertura jette bbuono currenno nsi’ ô nuvantesimo; peccato ca nun ‘ncarra cchiú ‘nu cruzzo (cross) a ll’epata (in fase) ‘e ‘mpurramiento (spinta)
ALBIOL: 6,5. Sicuro comme ê tiempe bbelle.
KOULIBALY: 6. Atalossa (prestazione) pulita e sistimata d’’o francese miso ‘ncampo dô pprincipio doppo quaccche ghiurnata passata ‘mpanca.
STRINIC: 6. Pure ajere, a ppietto a gGhoulamme, assicuraje cchiú ‘sperienzia e ccupertura.
LOPEZ: 6. Bbarràcema (diga) cunzistente.
GARGANO: 6,5. Riuscette a cchiammarese ll’applavuse d’’o san Paolo cu ‘nu paro d’anattíse (recuperi) ‘a veru cane ‘e presa; p’’o riesto nun ll’addimannate ‘a luna pecché nun è ‘nu riggista e sse vedette.
CALLEJON: 7 Ô ssolito tanta fatica ‘ncopp’â fascia ‘e cumpetenza soja, n’ajuda (assist) a zzuco ‘e caramella pe mMarekiaro e finalmente ‘o stuco (gol) ca tutte ce stevemo aspettanno e ca nchiudette ‘a prattica!
GABBIADINI: 5,5. E mme dispiace, ma miso ‘ncampo ‘mpusizziona centrale nun lle riuscette maje d’essere periculuso sotto porta. (Dô 63° HAMSIK: 7 Trasette e nchiudette súbbeto ll’antraffa(partita) dimustranno ca ô Napule nicessita ‘e ritruvà ‘o sciucquaglio (gioiello) suojo cu ll’arbardiglia [cresta]).
MERTENS: 7 ‘Nsemmana êva dichiarato tutto ll’ ammore suojo pe Nnapule e p’ ‘o Napule. Ajere ‘o ddimustraje signanno ‘nu granne stuco (gol) ca sbluccaje ll’antraffa (partita) (Da ll’81° ZUNIGA: sv).
HIGUAIN: 5,5.Me dispiace ‘e nun puterle mettere ‘e cchiú, ma ajere ‘o Pipita me facette addecrià e scennere ‘o core ‘int’ê ccazette; m’arrecriaje quanne cu ‘na cagliosa ‘a trenta metre, comme v’aggiu ditto, mettette ‘a palla ‘mporta signanno ‘nu stuco (gol) fantastico ca sulo chella ‘nzerta d’aglie fetiente ‘e Damato e ssocie nun vedette e mme cunzulaje cu ‘nu granne ajuda (assist) pe Mertenso, ma po me facette scennere ‘o core dint’ê ccazette quanno se magnaje ‘nu stuco(gol) pistuso (incredibile) a ttu ppe ttu cu Neto! Nun è ppussibbile: uno comme a isso ‘sti ccose nun ll’à dda fà! (30’ st INSIGNE: 6,5 Tre bboni nutizzie: currette e ttanto, tene sempe ‘o pere avvellutato e cunfezziunaje ‘nu granne ajuda (assist)pe Caglièconno).
All BENITEZ 7 Mettette ‘ncampo ‘a furmazziona cchiú uffenziva pussibbile e avette raggiona; ah! Si ll’avesse fatto pure cu ‘a Lazzio! ‘O risultato d’ajere putesse essere n’efudío (viatico) a mmestiere p’acchiappà p’’e capille ‘na tempurata (stagione) ca si no po’ ferní a bbonne famme!
arbitro DAMATO e ‘a scuglietta (combriccola) soja 3 Vecchia carta canusciuta st’avvocato ‘e Barletta(e ccomme a ppugliese quase certamente tifoso juventino) è ‘nu chiafeo, fúceto e sciacqualattuca(incapace) e ati vvote addirittura vennuto!Turnato a diriggere ‘o Napule doppo paricchiu tiempe dê ‘nguacchie fatte precedentemente ‘ndanno d’ ‘o Napule, tentaje ‘e tutto pe dà ‘mpiccio ê cuane mettennose pe ‘mmiez’ê piere d’ ‘e napulitane custrette a scartà primma a isso e ppo ê jucature ‘e Muntella; lassaje correre ‘o juoco viulento e ppruvucatorio d’ ‘e delinquente viola, ausaje dduje pise e ddoje mesure valutanno ‘e falte (falli) ad capocchiam ed esaggeraje cu ‘e cartelline jalizze (gialli) ‘ndanno d’’e cuane (azzurri), ma ‘a fetenzia cchiú ggrossa ce ‘a facetteno quanno nisciuno ‘e lloro [ ciovè isso i ‘a cricca soja e ‘mprimmese ‘nu certo di bella, ca nun se sape chi ‘o veste â matina…] cecaje a vvedé ca ‘a cagliosa d’’o Pipita era trasuta ‘mporta [e ppe bbuono ‘nu metro…] e ca ‘o stuco (gol) era reculare! ‘Mmece lloro nun ‘o vuletteno vedé e nun cunvalidajeno ‘o stuco (gol) d’’o Pipita. Ca ‘e pozzano accidere ‘mparanza, senza pavarle!
E cu cchesto ve saluto e si dDi’ vo’ ve dongo appuntamento mo nun saccio pricisamente a cquanno.
Forza Napule, Ciuccio fa’ tu! Staveti bbe’.
R. Bracale Brak