ilNapolista

Pacienza, vutammo fuoglio. ‘E ppaggelle? Mecco tre a ttutte quante

Pacienza, vutammo fuoglio. ‘E ppaggelle? Mecco tre a ttutte quante

E i’ mo che pozzo dicere?! Cu cchi m’’a piglio?! Cu cchi m’ aggi’ ‘a piglià ‘e chesta ata delusione cucente e de chistu ‘ncazzamiento ca da ajeressera me sta facenno ‘o sanco amaro, guagliú?! Nun ‘o ssaccio, ma aggi’’a sfucà e aggi’ ‘a alliscià quacche ttre! Ajeressera ô san Paolo, ‘nnante a cinquantamile perzone ‘o Napule se facette vattere p’uno a zzero e sprecaje chellu ppoco ‘e vantaggio ca ê quatto ‘e marzo s’era assicurato pariggianno pe uno a uno a ll’Ulimpico ‘e Roma contr’â scuatra d’’o pappavallo ‘e lotito e ajeressera ‘e cuane (azzurri) ancòra cu cchella malaurata divisa ‘nu ginso ‘e ‘na pugnetta cunzignajeno â lazzio ‘a finale ‘e Coppa Itaglia! ‘E cciucciuvettole e cchi ce mena ‘o nniro ‘e seccia ancòra ‘na vota ce ll’ànnu fatta e ce cuglietteno malamente!

Cu cchi m’’a piglio?! Cu cchi m’ aggi’ ‘a piglià? ‘O Napule nun sape vencere cchiú e dimustraje ca ‘ncopp’a ‘sta tempurata (stagione) ce à cacato ‘o cane niro e mmo Dela ave voglia ‘e alluccà e pretennere ‘a don Rafele ‘e purtà tutte… ‘ncastico cu ‘o ggranone sott’ê ddenocchie! Ll’êva ‘a fà primma; mo è ttarde i ‘a frittata è ffatta e nun ce sta niente ‘a fà.

Però, bbuono riflettenno i’ penzo ca [tutto summato] è stato bbuono ca ce simmo scanzato ll’antraffa (partita) finale, pecché si ê sette ‘e ggiugno fossemo jute n’ata vota a rroma a ghiucarce ’a finale ‘e coppa itaglia contro â juve e nno contr’â fiorentina comme m’aspettavo ca succedesse, visto ca ll’Ulimpico nun ce porta bbuono,  forze avessemo fatto ‘a soccia fijura ‘e seje sorde fatta contr’â scuatra ‘e monzú garcià e ce fossemo ‘ncazzate cchiú assaje! Mettimmola accussí e ppigliammoce p’’o prozo nuje stesse. Pacienza, vutammo fuoglio e rassignammoce d’avé menato a mmare n’ata tempurata (stagione) ca ce sta dànno troppi ddelusione e nnisciuna suddisfazziona. Pacienza! ‘E ppaggelle? Sto’ troppo smarrezzato (avvilito) e ‘ncazzato p’essere priciso e circustanziato. Mecco tre a ttutte quante, arbitro e don Rafele cumprese e ll’aggiu trattate pecché nun se po’ pperdere ‘a ‘na scuatra ca tiraje ‘mporta sulo ddoje vote…, ma pure nuje facettemo assaje poco: ‘nu tiro fora, n’ato ca – pe gghionta ‘e ruotolo – ‘ncucciaje ‘o palo, e n’ato braduso (lento) e ccu poca putenza tanto ca fove fermato ‘ncopp’â linia ‘e porta! E cche saciccio! Nun se po’ vvencere accussí!

E mettimmo punto cca. Mo ssi dDi’ vo’, ce sentimmo llunnerí ca vène doppod’ ‘o fullè(match) cu ‘a Fiorentina ca ‘e certo vene ô san Paolo,cu ‘o dente avvelenato p’avé perzo, comme ô Napule, ‘a finale ‘e Coppa Itaglia e vve putito ‘mmagginà ch’antraffa(partita) ‘e sufferenzia ce aspetta.Staveti bbe’!
R. Bracale Brak

ilnapolista © riproduzione riservata