Mannaggia chello ca nun se po’ ddicere guagliú! ‘O mese ‘e marzo è accumminciato ‘na chiaveca: ajeressera a ll’Ulimpico ‘e Turino ‘o Napule pigliaje ‘nu ddio ‘e sciuliamazzo e, ‘ntussecannome ‘a serata, se facette paccherià dâ scuatra ‘e Ventura ca doppo diciattette tentative riuscette a vvencere n’ antraffa (partita) contr’ô Napule. Ma m’’o ssentevo ‘e scennere pe dderete ê rine ca primma o doppo fósse succieso comme me cunfermaje ‘o fatto ca ajeressera durant’ê primme vinte minute d’’o primmo ajone ‘o Napule nun fove cacchio ‘e tuccà palla lassanno ca ‘o Turino facesse chello ca vuleva senza reaggí e i’ m’abbiaje a ttrammià ‘ncopp’â seggia, chiammannòle ‘e muorte a cquante cchiú ce ne stevano e mme preoccupaje malamente cu ttutto ca ‘ntribbuna divano quaccuno me diceva: “Tiene ‘mmano, statte calmo, ca cca se vence p’uno a zzero a ll’arrancua (ripresa)!” Addó?! Pare ca mo te veco vestuto ‘a urzo! Fenette p’uno a zzero, sí, ma pe lloro, e nnuje perdettemo ‘nchiummannoce a 45 punte ‘ncrassifica e ssentenno ‘ncopp’ô cuollo ‘o sciato d’’o pappavallo ‘e Lotito e d’’a Fiorentina. Mannaggia chello ca nun se po’ ddicere guagliú! Che brutta antraffa (partita) e cche delusiona! Passammo ê ppaggelle:
ANDUJAR 6,5: Se facette sentí ‘nfra ‘e pale e ccu ‘e cumpagne;nun arresecaje niente,ascette a mmestiere cu bboni prese aute e ppuggianno (rinviando) luongo e ccu pprecisione. Niente ‘a fà ‘ncopp’ô stuco (sul gol) ‘e Glikco,lassato sulo da Albiòllo e da Striniccio.Pruvvidenziale ‘ncopp’a ‘na timmurría (punizione) viulenta ‘e Bovo.
MAGGIO 5,5: Oramaje ‘stu papunciello se po’ gguardà sulo quanno difenne, ma passata ‘a linia ‘e mità ccampo aiza porvera. E accussí succedette pure ajere! ( da ll’83° DUVAN s.v.:trasette troppo tarde pe ffà coccosa)
ALBIOL 5,5: ô pprincipio d’ antraffa (partita) me parette spaisato e ccu ‘a capa dint’ê nnuvole; po chianu chiano se repigliaje; dinto a ‘nu cuntrasto s’abbuscaje ‘na bbotta dint’ê cchiocche, ma nun s’arrennette. Se purtaje però ‘ncopp’â cuscienza ll’esserse perduto, ‘nchietta cu Striniccio, a gGlikco ‘naccasione d’’o stuco (gol)
KOULIBALY 4: Serata sciaurata d’’o francese ca accumminciaje liscianno ‘nu pallone, cuntinuaje cu ‘nu viulento pasiglio arreto (retropassaggio) justo ‘ncopp’ê pparte cchiú ddellicate d’ Anducàrro, mettette ‘a coppa facenno casino sotto porta d’ ‘o Turino e rignette ‘a mesura rijalanno ‘a centrocampo ‘nu tiro ‘e squina (corner) chillo ca purtaje ô stuco (gol) ‘e Glikco.
STRINIC 5,5: Miezu punto mancante pecché è overo ca nun ghittaje maje ad capocchiam ‘o pallone, jucaje sempe a ccapa auta, ma ‘nchietta cu Albiòllo,se perdette a gGlikco ‘naccasione d’’o stuco (gol). GARGANO 6: Quagliarella ‘o mettette ‘nu poco ‘ndifficultà; quacche ppasiglio (passaggio) a bbienetenne, ma po tanta corza e ttanta cegna (grinta). (Dô 72°INLER 5,5: Nun se vedette comme si nun fósseno state fatte suoje!)
DAVID LOPEZ 6: Perdette quacche pallone ‘mpurtante durant’ê primme minute, po decidette d’accummincià a ffà chello ca sape fà e – allimmeno nfi’ ô 67° – facette trancara (diga) ‘nnante â tràsera (difesa).
CALLEJON 5: Currette tanto, jewtte e vvenette,s’affannaje, ‘o vattetteno e isso nun s’arrennette maje, però nun pugnette comme êsse ‘a pognere! Nun riesce cchiú a vvedé ‘a porta. Peccato.
HAMSIK 5,5: Miezu punto mancante pecché pe troppu tiempo se chiammaje fora, po ‘mpruvvisamente accumparette ‘nventannose ‘nu bbellu tiro periculuso ca però ascette ‘e poco. Avesse avuto fà ‘e cchiú! ( Dô 62°GABBIADINI 6,5: Súbbeto periculuso a ll’epata uffenziva (in fase offensiva); ‘mmitato dô Pipita ca lle mettette ‘o pallone ‘mmano pecché tirasse isso, centraje ‘o palo vascio cu ‘nu bbellu tiro ‘e timmurría [punizione] )
DE GUZMAN 5,5: Miezu punto mancante pure a isso pecché êsse pututo fà ‘e cchiú addó ca ‘o fullè(match) suojo s’arriducette a ‘nu pare ‘e tire ‘a luntano [senza pretese]durante ô primmo ajone e a n’ajuda (assist)a ll’ arrancua [ripresa] p’’o Pipita ca però sciupaje.
HIGUAIN 5: Me dispiace, nun s’ammereta ‘e cchiú! È overo ca avette pochi pallune dicente, ma nun ne cacciaje cunnimma: addizziunaje sulo ‘nu bbuonu tiro ‘e dritta ô pprincipio ‘e ll’arrancua (ripresa) e sprecaje ‘nu tiro ‘e mancina; p’’o riesto cercanno d’’o fà signà, cercaje troppo a cCagliecònno e ppoco a ll’ati cumpagne.
BENITEZ 5: Chillo visto ajere nun fove ‘o Napule! Nun me piacette ll’attiggiamento d’’a scuatra troppo spandatizzo (remissivo).
arbitro IRRATI 4,5: E cchisto nn’è n’ato d’ ‘a Pastafina. Siscaje a bbienetenne ausanno dduje pise e ddoje mesure naturalmente sempe scarze p’’o Napule. ‘E ddecisione soje nun cunvincetteno cchiú ‘e ‘na vota!
E fermammoce cca; mo miercurí ca vene ce aspetta a rRoma ‘a scuatra d’’o pappavallo ‘e Lotito pe ll’ antraffa (partita) ‘e coppa itaglia. Abbiammo a ffà corne e sperammo ca ‘e cuane (azzurri). se repigliano e nnun ce fanno sunnà n’atu bbruttu suonno. E si ‘o Signore ‘o vvo’ ce sentimmo ggioverí ca vene.
Staveti bbe’!
R. Bracale Brak
