ilNapolista

‘O Napule purtroppo è comme ô cane d’’o cacciatore

‘O Napule purtroppo è comme ô cane d’’o cacciatore

I’ nun ce pozzo credere guagliù! E cche saciccio! Ajeressera, ô san Paolo, ‘o Napule perdette n’ata accasione p’accustarese â Roma ca oramaje nun riesce a vvencere cchiú. E cche saciccio! ‘O Napule purtroppo è comme ô cane d’’o cacciatore: quanno êsse ‘a correre pe gghí a recogliere ‘a quaglia còveta, tanno s’accova pe ffà ‘e fatte suoje e se perde ll’accasione. E cchesto succedette ajeressera ô san Paolo quanno ‘o Napule, pure essenno passato ‘nvantaggio ‘e duje stuche (gol) durante â primm’ora ‘e juoco, nun riuscette a nchiudere ‘a prattica e dint’a ll’urdema mez’ora se facette arrivà ‘a chella scuatra ‘e chianchiere ‘nquacchiate ‘e chillu sbruffone ‘e Mancini accuntentannese ‘e ‘nu misero punticiello addó ggià ne teneveno dint’â sacca tre! I’ ancòra nun ce pozzo credere guagliù ca ‘e nuoste foveno accussí ffesse ‘a perdere ll’ennesima accasione. Eppure purtroppo jette accussí e ajeressera ‘o Napule nun riuscette a bbissà ‘a nichessa (vittoria) ‘e ll’antraffa (partita) sustenuta ‘ncopp’ itaglia   ‘na trentina ‘e juorne arreto, lassànnome cu ‘a vocca amara e scunfurtato dâ fessaggine d’Henrique e ssocie, ca sapenno ‘e che panne vesteva (po ve dico) ll’arbitro Rocchi, se facetteno piglià dint’â cajola comme a mmierule ‘e primma asciuta! No, no e nno! Nun se po’ pariggià n’antraffa accussí sprecanno ‘nu tummolo d’accasione pe ssignà, passanno ‘nvantaggio ‘e duje stuche e facennose arrivà dint’a ll’urdemi minute. No, no e nno! Nun se po’! Passammo ê ppaggelle:

ANDUJAR 6 – Nun tenette sfarme (colpe) ‘ncopp’ê stuche (gol); salvaje assaje bbuono ‘ncuollo a pPalassio ô 5°,e ffove sicuro quanno ascette pure si quacche vvota ll’êsse avut’ ‘a fà cchiú primma!

HENRIQUE 5,5 Miezu punto mancante pecché proprio nun lle pozzo perdunà d’essere stato accussí ffesso facennose cogliere a guardà stuorto a pPalassio e dànnole ll’accasione ‘e menarse ‘nterra sott’a ll’uocchie ‘e Rocchi ca ‘nu poco ne jeva truvanno pe siscà ‘nu ricore a ffavore ‘e ll’Interre. Peccato pecché p’’o riesto era stato ‘nu bbuonu terzino nchiudenno a mmestiere ‘a curzia soja e riprepunennose annante puntualmente comme facette quanno (8°) mettette ‘mmiezo ‘na granna palla ‘ncapo a mMarekiaro ca firmaje ll’uno a zzero.

ALBIOL 5,5 – Miezu punto mancante pure a isso pecché si ascette cu sicurtà (sicurezza) palla ô pede dâ trasera (difesa) e chiudette bbuono quanno ‘o pallone arrivaje dint’â camma (area), tenette cchiú ‘e ‘na sfarma (colpa) ‘ncopp’ô stuco (gol) ‘e Palassio,essennose truvato ‘mbrugliato ‘mmiez’ ô ‘mbruoglio d’’a ‘mbrugliata ‘e tutt’ ‘a sezziona senza sapersene ascí!

KOULIBALY: 6,5. ‘Nfracchissabbile (isuperabile) e scamuso (ruvido) ‘o nnicessario, facette ‘na bbona atalossa (prestazione) senza sfregazze (sbavature),priciso quanno chiudette e ddiciso quanno êtt’ ‘ascí a cchi sî ttu e cchi so’ i’ cu ll’attaccante ‘nteriste.

STRINIC 6 Facette chello ch’êv’’a fà e ppure si fove nun troppo prupusitivo, ‘nchiusura s’’a vedette a mmestiere cu Sciachiri ca cercaje ‘e metterlo ‘ndifficultà.

DAVID LOPEZ 6 – Luttaje comme a ‘nu lione pure si ‘e chianchiere ‘e Mancini tentajeno ‘e metterlo fora uso dô pprincipio; isso strignette ‘e diente e cumbattette a ccentrocampo addó foveno sempe dduje cuane (azzurri) contro a ttre. Currette assaje spennenno forze cchiú ‘e quanto putesse; cumminfatte ô finale jette ‘nsotto d’ussiggeno e accuminciaje a arrancà proprio quanno ll’interre accumminciaje a rimuntà. Ma no pe sfarma (colpa) soja.

INLER 6,5 Ritruvato furnette ‘na granna atalossa (prestazione), forze ‘a meglia ‘a quanno don Rafele sta a nNapule; veramente ‘ncuraggiante ‘a criscenza (crescita) d’’o turco- napulitano ca nun facette vermissà (rimpiangere) ll’assenza ‘e Gargano.

CALLEJÒN 5,5 – Miezu punto mancante pure a pPeppe ‘a ‘nguenta pecché si fove overo ca ‘o spagnuolo se dannaje ll’anema pe mettere ‘ndifficultà a dD’Ambrosio e ffove pulitelico (prezioso) pure ‘ncupertura,nun se facette maje vedé ‘ncamma-cunchiusione (zona-gol) e a ll’arrancua (nella ripresa) sparette quase. (Da ll’88° MESTO s.v.)

HAMSIK 7 Ce ne mettette pe ttrasí ‘nfullè (in partita); po ‘ncapo ‘e ‘na mez’ora se decidette a ssaglí ‘ncopp’â scena e ‘o ffacette a mmestiere (comme sape e po’ fà isso quanno sta ‘e ggenio) cu ggiucate chistose (intelligenti)e bbassurere (suggerimenti) d’applavuse nun sempe sfruttate a dduvere dê cumpagne.A ll’ottavo ‘e ll’arrancua (ripresa) mettette ‘a curnice a ll’atalossa soja cu ‘na cabbesera (colpo di testa) sicura e ppricisa ca dètte ‘o vantaggio ê suoje; n’ata perna po fove ll’ajuda (l’assist) p’’o Pipita ca mettette dinto ‘o doje a zzero. Pecché see fa aspettà tanto primma ‘e metterese a gghiucà? Vallo a ssapé!(Da ll’80° GABBIADINI s.v.)

MERTENS 7 ‘A meglia atalossa (prestazione) d’’a tempurata (stagione): currette,zumpaje ll’ommo,ricaje (dribblò), fignulaje (rifiní) comme e cquanno vulette, mannanno ô manicomio sia a sSantònno ca a rRanocchia; ‘nu capolavoro ‘o pallone miso ‘ncopp’ô pere d’’o Pipita ca fallette ‘a cunchiusione! (Dô 73° DE GUZMAN s.v.)

HIGUAÌN 6,5 Nun lle pozzo mettere ‘e cchiú e ppo ve dico: pronti via e accumminciaje a ddà spettaculo dichiaranno guerra a ttutta ‘a tràsera (difesa) ‘nterista e soprattutto a Handanoviccio ,ca però lle levaje dâ porta allimmeno tre o quatto palle-stuco (palle-gol) pulite pulite. Cuntinuaje a ccapa ‘nsotto ll’antraffa (partita) m’’o vvech’ i’ e ffinalmente doppo n’ora truvaje ‘nu granne stuco (gol) cu ‘nu stoppo a seguí e ‘na cagliosa a ggirà ca Handanoviccio vedette sulo ‘e passà. Che stuco! Primma però n’êva sbagliate ‘e cchiú ffacile, uno addirittura ggià fatto. Se vede ca a uno comme è isso ‘e ccose facile nun lle piaceno!

BENÌTEZ 5 Nsi’ ô doje a zzero fove uno d’’e Napule cchiú mmeglie d’’a d’’a tempurata (stagione): attiento arreto, curaggiuso ‘mmiezo e fferoce annante cu Mertenso, Marekiaro e ‘o Pipita portabbannere. Chello ca nun ghiette fove ‘o finale d’antraffa (gara) ca mettette ô scupierto ‘o sicusso (crollo) fisico e mmentale d’’a scuatra ca fove cacchia ‘e piglià dduje stuche (gol) dinto a ‘nu quarto d’ ora addó ca pe settantacinche minute nun aveva suppurtato nisciunu periculo; è overo ca ll’arbitro Rocchi ll’ajutaje p’’a scesa cuncedenno a ll’Interre ‘nu ricore troppo carativo (generoso) e ca vulette vedé pe fforza, ma ‘o Napule sprecaje malamente chella ch’êsse pututa essere ll’accasiona d’’a vita!

l’arbitro ROCCHI 4 Meza cazetta comme a ttutte ‘e sischette italiane, ‘stu commerciante (nun se sape ‘e che…) fiorentino era stato mannato pe spezzà ‘e passe ô Napule ch’êsse pututo ‘mpurtunà ‘a Roma. E lle riuscette! Ggià dô pprincipio ll’interiste   mazziulajeno, senza pietà, ê napulitane (e Lopèzzo ne sapette coccosa….)   e isso, senza tené ‘o curaggio nicessario ‘e piglià pruvvedimente, pigliaje ‘o pallottoliere dispenzanno quacche cartellino “a nnota ‘e lavannara” (voglio dicere addizziunanno ‘e falle.) Quacche decisione ad capocchiam nun se capette, comme nun se capette che cacchio avesse visto isso o avesse fatto Henrique a pPalassio pecché isso lle assignasse ‘o ricore d’’o pareggio. Misteri misteriosi!

E ccu cchesto ve saluto e si ‘o Signore ce ‘o fa vedé ce sentimmo â prossima vota ca mo comme a mmo nun saccio quann’è!

Bbona salute!
R. Bracale Brak

ilnapolista © riproduzione riservata