ilNapolista

‘o Napule turnaje ‘ncampo e ce facette ‘na scicca Pifania

‘o Napule turnaje ‘ncampo e ce facette ‘na scicca Pifania

Finalmente doppo vinte juorne ‘e cuollo luongo, finalmente ajeressera ‘o Napule turnaje ‘ncampo e, avenno alliggerito tutt’ ‘o ppappatorio ‘e Natale e urdemo ‘e ll’ d’anno, ce facette ‘na scicca Pifania cunzignanno ô Cesena ‘na cazetta cu cquatto cresommole dinto, ddoje cu ‘a firma d’’o Pipita, n’ata cu cchella ‘e Cagliecònno e ll’ata cu      cchella ‘e Marekiaro pure si ‘o tabbellino dice ca se trattaje ‘e n’utobbutto (autorete) ‘e Cappelli ‘ncopp’a ‘nu tiro ‘e Marekiaro destinato sinamparco (comunque) ‘nfunn’â rezza!’Nzomma ‘o Napule fistiggiaje a dduvere ‘a Supercoppa vinciuta a dDohà. Peccato sulamente ca ‘e cuane [ajere ‘mmerz’ê sseje, finalmente cu ‘a maglia luvarda i ‘e vrachessine janche e nno cu chillu schifo ‘e divisa ‘nu ginso e ‘na pugnetta] peccato ca nun riuscetteno a tturnà â casa senza piglià stuco (gol). Peccato! Me fósse piaciuto cchiú assaje vencere pe cquatto a zzero.

Però accuntentammòce ô stesso penzanno ca jí a vvencere fora casa – pure si sulo contr’ô Cesena è ssempe ‘na bbella cosa e cca chella d’ajere fove      ‘na nichessa (vittoria) pulitèlica (preziosa),ca ce facette acchiappà ‘o pappavallo ‘e Lotito ô terzo posto cu ttrenta punte, ‘na nichessa (vittoria carreca ‘e significazzione (di significato), ‘na nichessa (vittoria) ca ce ‘mmita a penzà pusitivo e ce dà tanta cunfianza (fiducia) spicialmente ‘nvista d’’o scontro ‘e dummeneca ca vène contr’â juve!!! Passammo ê ppaggelle:

RAFAEL:7 Finalmente riuscette a ddá tranquillità â tràsera (difesa), sbrigannosela a mmestiere ‘nfra ê pale e ppure quanno ascette. Nun ce putette fà niente ‘ncopp’ê stuco ‘e Brienza ca andivinaje ‘nu tiro ‘nfra ‘na ‘nzerta ‘e cosce, senza ca nisciuno ‘o désse ‘mpiccio.
MAGGIO:6,5 Tenette bbotta, quase comme ê tiempe bbelle ‘e ‘na vota facennose valé ‘ncopp’â curzia ‘e dritta.
HENRIQUE:6 S’’a sbrugliaje a mmestiere soprattutto ‘e capa; sulo quacche sfregazzo (sbavatura) però senza cunsequenzie a ll’arrancua (nel secondo tempo).
ALBIOL:6,5 Anticipaje ll’ avverzarie puntualmente.
BRITOS:6 Miso ‘ncopp’â curzia ‘e mancina, ô ssolito fove troppo braduso (lento) e cumplicato (macchinoso) ô mumento d’’o disaccuplamiento (disimpegno), ma gruosse guaje nun ne facette.
GARGANO:7 Pigliaje p’’a mana ‘a scuatra currenno assaje e ‘na vota tanto riuscette pure a ‘ncarrà paricchi pasiglie (passaggi)servenno a mmestiere mo Marekiaro, mo ‘o Pipita. ( dô 67°JORGINHO:6- Facette ggirà palla a ccose fatte; avette però ‘o ttuorto ‘e nun gghí a nchiudere ‘ncuollo a bBrienza.)
DAVID LOPEZ:6 Facette ‘o mestiere suojo ‘e trancara a ccentrocampo.Ll’êsse miso ‘na cosa ‘e cchiú si fósse riuscito a a nchiudere ‘ncuollo a bBrienza, ma nun ‘o ffacette manch’isso!
CALLEJON:7,5 Friccecariello comme ô pprincipio ‘e tempurata(stagione)sbluccaje ‘o risultato cu ‘nu bbellu tiro d’’e suoje turnanno finalmente a mmettere ‘a firma sotto a ‘nu stuco (gol). E cce vuleva proprio visto ca steva a ssicco dô primmo ‘e nuvembre passato! ( da ll’83° RADOSEVIC,:s.v. Ô finale trasette pe ffá piglià sciato ô spagnuolo.)
HAMSIK:8 Pugnette e rricamaje dànno ‘mpiccio ô Cesena ‘ncopp’â trecquarte. S’’a ‘ntennette a mmestiere cu Gargano e cu ‘o Pipita, appaciucaje (propiziò) ‘o stuco ‘e Cagliecònno,furnette ‘na granna ajuda (assist) p’’o Pipita e signaje ‘o terzo stuco cuano ca i’ assegno a isso pure si ‘a palla ‘mporta [ca ce fósse trasuta sinamparco(comunque)] l’accumpagnaje Cappelli.
DE GUZMAN:5,5 Ll’unico d’’o mazzo ca faticaje a ttruvà ‘e mmesure juste, nun pugnette e nun se prupunette risultanno sempe fora fullè (non in partita) e forze fora pusizziona. ( dô 72° MERTENS : 6 Trasette bbuono ‘nfullè quanno oramaje tenette assaje spazzio annante e cupuliaje (dialogò) bbuono cu ‘e cumpagne ‘e sezzione (reparto).
HIGUAIN:9 Attaccaje ‘o spazzio crianno ‘e ccundizzione pe sbluccà ‘o risultato. Addistatto (spietato), ffriddo e ppriciso comme à dda essere n’artigliero (cecchino)   signaje ‘o siconno stuco (gol) e cchillo d’’o quatto a zzero.Se dannaje pe ffá signá pure a mMarekiaro e ce riuscette!

BENITEZ: 7,5 Doppo ‘na mez’ora ‘e cuntrora ‘a scuatra soja se scetaje vincenno largo cosa ca rappresenta ‘o meglio efudío (viatico) ‘nvista d’’o prossimo fullè contr’â vecchia zoccola janca e nnera.

arbitro MASSA s.v. Grossi ffetenzie nun ne facette.

E mettimmo punto cca. Ce sentimmo, a dDio piacenno, ‘a prossima vota doppo d’’o prossimo fullè contr’â vecchia zoccola janca e nnera ca certamente vene cca cu ‘o dente avvelenato, ma ca ô san Paolo trova ‘o ppane adatto pe scugnarle ‘a dentiera. Allimmeno chesto sperammo! Staveti bbe’!
R. Bracale Brak

ilnapolista © riproduzione riservata