Napoli-Roma 2-0: ‘O doje a zzero d’ajere purtaje ‘a firma ’e Benitez

Napoli-Roma 2-0: ‘O doje a zzero d’ajere purtaje ‘a firma ’e Benitez

Ajere, ‘mmerz’ê ccinche, festa granna ô san Paolo, guagliú! Tricchi-tracche, trezziole e bbotte a mmuro pe ‘na nichessa (vittoria) ‘mpurtante ca permettette â scuatra ‘e don Rafele ‘e cunquistà tre ppunte commilfò pe piazzarese, p’’o mumento, ô terzo posto ‘ncrassifica a diciotto punte, a ssulo quatto lunchezze [chelle perdute cu ll’interra e ll’atalanta] dâ Roma aspettanno chello ca succede ogge.Chesto vulevemo e cchesto ‘e guagliune cuane ce detteno cunzignanno â scuatra d’’o Pupone, ‘e chilli dduje nnacchelle ‘e Pianiccio e gGervigno e dde monzú Garcià (ca – si è ppossibbile – me sta cchiú antipatico d’Allegri e dde parrucchino conte)ddoje stecche ‘e turrone d’’e muorte ‘ncartate senza guantiera, â faccia ‘e chi ce vo’ male e de ll’arbitro Tagliavento, mannato a spezzarce ‘e passe. Chesto vulevemo e cchesto ‘e guagliune cuane ce detteno

cu ‘nu primmo ajone(tempo) troppo bbello, ca si fósse fenuto pe tre a zzero p’’o Napule ce fósse pure juto stritto.

A ll’arrancua (ripresa) po ‘o Napule rallentaje ‘a pressiona cunzentenno â Roma ‘e ascí cu ‘a capa fora d’’o sacco, ma senza essere maje periculosa si nun se conta   ‘na grama vota quanno però Florenzi truvaje pronto a Rafaello. Pe tutto ‘o riesto ‘e ll’arrancua (ripresa) po venette fora Koulibalý ca nun sbagliaje niente risultanno ‘na vera trancara (muraglia) e ‘o meglio d’’a tràsera (difesa); accussí â Roma nun riuscette a ppariggià ‘o stuco ca ‘o Pipita cu ‘na granna ggirata êva miso ê spalle ‘e Morgànno De Sanctisso, ô terzo minuto d’’o primmo ajone(tempo) e ffove nurmale ca a ll’uttantasejesimo, doppo tanti accasione perze[‘nfra cuje dduje travesagne (traverse)e cquacche pparata ‘e Morgànno ] , Cagliecònno finalmente riuscesse a anticipà a Morgànno De Sanctisso, e sfruttanno ‘na granna ajuda (assist) d’’o Pipita mettesse dinto ‘o pallone d’’o doje a zzero cunfezziunanno chella ‘mpurtante nichessa (vittoria) comme ve sto’ dicenno, ‘mpurtante pure pecché venette tenenno ‘ncuollo chella jettatoria divisa ‘nu ginso e ‘na pugnetta ca nun saccio pecché se so’ fissate a mmettersela! Passammo ê ppaggelle:

RAFAEL 6 – Quacche bbona asciuta, curaggiosa e ppricisa e ‘na bbona chiusura ‘ncopp’ô primmo palo quanno a pprincipio d’arrancua (ripresa) Florenzi tentaje ‘o colpo; p’’o riesto urdinaria amministrazziona p’’o guaglione brasiliano ca ce facette stà tranquille.

MAGGIO 6 Senza essere ancòra ‘o jucatore ‘e ‘na vota, foven’ato a ppietto a cchillo ‘mpriciso e cunfusiunario ‘e ll’urdemi mise: ritrovaje ggenio e ‘ntusiasmo, trasenno spisso dint’ê repartite luvarde (nelle ripartenze azzurre). ‘Assa fà â Maronna!

ALBIOL 6,5 Urdinato e ppriciso nun sbagliaje niente pure pecché a ffianco a isso nce fove santu Koulibalý ca facette ll’aparzío ( il fenomeno).

KOULIBALY 7,5 ‘O meglio lla ddereto, fove presente a ttutte ‘e pizze jucanno ‘nu fullè aparziale (partita fenomenale), cumbattenno comme a ‘nu lione e cquanno avette ‘o père a llepere, partette comme a bBerrutti e ghiette a sserví ‘na granna palla a cCagliecònno ca però ‘a sciupaje. Che peccato!.

GHOULAM 6,5 – Preferito a bBritòsso,rispunnette prisente cu n’atalossa (prestazione) d’ epípeto (livello) soprattutto arreto adó se facette nutà cu ‘nu paro ‘e chiusure ‘mpurtante.

JORGINHO 7   Miso ‘a don Rafele a ssurpresa ô posto d’Inlèrro se pigliaje p’’a mano ‘o centrocampo giustranno tanti pallune e recuperannone pure tante. Penzo ca ‘o vedimmo spisso n’ata vota lla mmiezo.

LOPEZ 6,5 Jucatore ‘e sustanza,pure ajere ce mettette cegna (grinta) e sciato pe mantènere auto ‘o ritmo e ‘nziem’ê cumpagne ‘e sezziona (reparto) suvrastaje ‘a mediana d’ ‘a Roma, lassanno perdere ricame a ppuntaggiorno ca nun so’ articule suoje. (dall’ 81° INLER 6 Dette rispiro ô spagnuolo dinto a ll’urdemi ddiece minute, ricuperanno cchiú ‘e ‘nu pallone pulitelico   [prezioso])

CALLEJON 7 Ce sta sempe e ppure ajere nce stette; ll’attocca miezu voto ‘e cchiú pe festeggià ll’uttavo stuco (gol)‘ncampionato, ca lle permettette ‘e cunsulidà ‘o primmo posto dint’â crassifica ‘e ll’artigliere (cannonieri); durante ô primmo ajone (tempo) aveva schiggiato ‘o travesagno e subbeto doppo êva sciupato cu ‘nu pallunetto troppo liggiero, ‘na granna ajuda (assist) ‘e Koulibalý. Pe ffurtuna nun sciupaje chillo d’’o Pipita!

Marek HAMSIK 6- Pe ccrescere, sta criscenno, chesto è vverita…, ma à dda essere cchiú ccuncreto:chillu pallone sciupato mannannolo ‘nfacci’ ô travesagno (traversa) durante ô primmo ajone (tempo) ll’anno passato ll’êsse menato dinto! Lle manca ancòra ‘a sicurezza. (dô 66° GARGANO 6 – Trasette cu ‘a maschera ‘e Pulicenella, ascette a cchi sî ttu e cchi songo i’ cu cchiú dd’ uno, mettenno ordine addó ggià ce steva.)

INSIGNE 7 – Lorenzigno sta pruvanno a rritagliarese ‘nu posto ‘mpurtante ‘int’a ‘sta scuatra e cchianu chiano ce sta riuscenno; pure ajere ll’atalossa (prestazione) soja se chiammaje ll’applavuse e lle mancaje sulo ‘o stuco visto ca De Sanctísso durante ô primmo ajone (tempo) dicette ‘e “no” a ‘nu tiro d’ ’e suoje. Peccato, se fósse mmeretato ‘e signà. (dô 72° MERTENS 6 – Quacche scatto e ppoco ato)

HIGUAIN 8 S’è sbluccato e ‘a sensazzione è ca mo nun se vo’ fermà cchiú; p’ajere ‘o tabbellino parla chiaro: chella ggirata ca ce fruttaje ll’uno a zzero fove ‘na perna e lle fa mmeretà ‘nu punto ‘e cchiú, comme pure chella granna ajuda (assist) p’ ‘o doje a zzero ‘e   Cagliecònno, ca mettette ô ssicuro ‘o fullè (partita) e nzerraje ‘a pratica.

BENITEZ 8 ‘O doje a zzero d’ajere purtaje ‘a firma soja facennòlo quase cunziderà ‘o meglio ‘ncampo: dètte ‘a carica ê suoje, priparaje a mmestiere ‘o piano ‘e guerra e scigliette ll’uommene juste dint’ê poste juste; coppola ê ddenocchie! Si ‘a scuatra ‘o sta a ssèntere po’ arrivà luntano!.

Arbitro TAGLIAVENTO 4,5 (‘e stima); venuto a ttagliarce ‘e passe ‘stu tagliaperucchie ‘e Terni ajere nun tenette ‘o curaggio ‘e fermà a cchilli cammurriste ‘e monzú Garcià ca cu Najngolanno ‘ntesta ne facetteno cchiú lloro ca Carlo ‘nFranza e isso abbuzzaje facennome vení a mmente ttutte ‘e ffetenzie ca nce facette p’’o ppassato; pe ffurtuna ca ajere facette palla corta e nun riuscette a danniggiarce!

E mettimmo punto cca. Ce sentimmo viernarí, a dDio piacenno doppo d’ ‘o fullè d’ E.L.. Staveti bbe’!
R. Bracale Brak

ilnapolista © riproduzione riservata