Hamsik ll’êsse juto a ppiglià a ppacchere! Dieci a Koulibaly

Hamsik ll’êsse juto a ppiglià a ppacchere! Dieci a Koulibaly

Ajere a ll’ora d’’e pastarelle, sufferta, ma mmeretata nichessa (vittoria) cuana ô Franchi ‘e Firenze addó chello s’êv’ ‘a fà e cchello se facette guagliú! S’êv’ ‘a vencere e sse vincette e si se fósse vinciuto cchiú llargo nun s’êsse arrubbato niente! ’Mmece se vincette sulo p’uno a zzero, ‘ntussecanno però a mMontella e a Della Valle! E cu ‘a nichessa d’ajere ‘o Napule se piazzaje, p’’o mumento ô terzo posto ‘ncampiunato! E ffove bbello jí a vvencere fora casa dànno cunferma d’’o mumento pusitivo d’’o Napule ca êv’’a cunfermà ‘e riuscí a vvencere nun sulo ô san Paolo, ma pure ‘ngiro p’’o stivale! ‘Nzomma,nun se po’ ca essere suddisfatte d’’a terza nichessa (vittoria) cunzecutiva d’’e cuane (partenopei) (ca vincetteno pure dumneneca passata contro â Roma e dinto semmana cu ‘e sguizzere ‘e ll’Yungboisse), nichessa, chella d’ajere, ca permette a ddon Rafele i ê suoje ‘e rispirà ‘nu poco ritruvanno chella tranquillità perza doppo quacche risultato necativo. Mo âmm’’a aspettà sulo cunferme,forze  pure attraverzo scontre cu avverzarie cchiú cunzistente, cu ‘a certezza ‘e migliurà pusizziona ‘ncrassifica. Accussí sperammo. Passammo ê ppaggelle:
RAFAEL 6,5: Nun è Teina e sbagliaje quacche rimessa, ma ‘a parata salva-risultato, ca i’ comme a ttutte ‘e tifuse stevemo aspettanno ‘a facette ‘ncopp’a ‘nu tiro carogna ‘e Cuadrado.

MAGGIO 6,5: Ajere nun me facette jí fora dâ grazzia ‘e dDio, i è ggià tanto: mantenette bbuono chiunque lle capitaje a ttiro.Dô pere suojo nascette ll’azziona d’’o stuco cuano!

ALBIOL 6,5: È tturnato, è tturnato; ‘o stevemo aspettanno dô pprincipio d’’a tempurata (stagione)e ajere facette n’atalossa (prestrazione)’e granna attenziona pe ttutte ‘e nuvanta minute, senza manco ‘nu sfregazzo (sbavatura)

KOULIBALY 10: Soprattutto p’esserse fatto truvà ô posto justo, ô mumento justo (92°) a ssalvà ‘a nichessa (vittoria) respingenno quase ‘ncopp’â linia ‘nu tiro ‘e Pasquàl(lo). P’’o riesto s’’a vedette a spurtellate cu bBabacar, vincenno sempe isso, attiento e acribbuso (puntuale) ‘ncopp’a ll’anticipe, dimustrannose ‘na vera trancara (muraglia) resistente.

GHOULAM 6,5: Appressuraje (spinse), ma soprattutto s’’a vedette ‘nmarcatura ‘ncopp’a Cuadrado, i ‘o fiorentino êtt’’a fà palla corta cu ll’algerino. Me dispiace ca a ggennajo ‘o perdimmo p’’a coppa d’Affrica.

JORGINHO 5: Quanti pasiglie (passaggi) sbagliate!’Nu paro nun ce ‘e putette perdunà visto ca êsseno pututo libberà ô tiro ‘oPipita e Cagliecònno.

DAVID LOPEZ 6,5: ‘O jucatore ca serveva â mediana cuana! Ricuperaje ‘na cifra ‘e pallune e nne nascetteno accasione assaje ‘nteressante.

INSIGNE 6,5: Peccato ca ‘nu malu ‘mpiccio ô denecchio, doppo appena vintiquatto minute ‘o levaje ‘a miezo, visto ca finché ce stette fove utile e periculuso lanzanno a mmestiere ô Pipita e tiranno ‘e poco a llato. Sperammo ca nun è ‘nu guajo gruosso; Lorenzigno ce serve assaje!( Dô 25° MERTENS 6: Trasette e sse facette súbbeto vedé ô tiro; po se ne scennette ‘e pressione e s’accuntentaje ‘e zumpettià ‘ncopp’â curzia ‘e mancina, crianno sempe ‘nu poco ‘e scumpiglio dint’â tràsera (retroguardia) viola.

HAMSIK 5: Êsse pututo ‘mpezzarme dint’ô televisore, ll’êsse juto a ppiglià a ppacchere! Quanti e cquanti prane (errori) pesante pe uno comme a isso ca tène qualità: sbagliaje sistematicamente ll’urdemu pasiglio (passaggio) e se magnaje ‘nu stuco (gol) sulo annante a nNeto, sciupanno ‘na granna accasione quanno ce fósse vuluta cazzimma e ddicisione! (Dô 75° DE GUZMAN sv Trasette troppo tarde pe ffà coccosa!).

CALLEJON 5,5: Se vedette cchiú arreto ca annante addó nun truvaje ‘o tiro justo; servette però ‘na bella palla ‘ncontropiede a mMarekiaro.Troppo poco!

HIGUAIN 8: Sfresaje (sfiorò) ‘o stuco (gol) tre vvote durate ô primmo ajone (tempo), cu gghiucate una cchiù bbella ‘e n’ata.Cu ‘a terza, si êsse signato se ne fósse caduto ‘o Franchi. Finalmente po all’arrancua  (nella ripresa) truvaje ‘o stuco dicisivo cu ‘na bbella ggirata. ( Da ll’ 85° HENRIQUE sv).

BENITEZ ‘A scuatra soja fove assaje lucente (brillante) ô primmo ajone (tempo), cu ll’unica sfarma (colpa) ‘e nun riuscí a ttruvà‘o stuco (gol). Sinamparco (comunque) dalle e ddalle ‘o cucuzziello addivintaje tallo e a ll’arrancua se vincette e ttutto summato ‘a Fiorentina fove periculosa sulo ‘nu paro ‘e vote, ma nun riuscette a ppassà e ccu cchella d’ajere foveno ggià tre fullè (partite) senza piglià stuco (gol) E nun è ccosa ‘e niente!

arbitro VALERI 5 Nun me piacette, nè isso nè ‘e cullabburatore su?e!Niente ‘e particulare,ma nun le perdono ca   ‘stu libbero prufessiunista (ma nun se sape ‘e che…) rumano siscaje sempe, pe partito pigliato, contro ô Napule caputianno ‘e ffalte (i falli)e sparagnaje cchiú ‘e nu cartellino jalizzo ê viola. Ma sinamparco (comunque) facette palla corta pecché ‘o Napule vincette ô stesso schiattanno ‘ncuorpo a mMontella, a cCecchi gori a carlo conti eô riesto d’’e tifuse viola.

‘Ncuncrusione ‘o Napule dimustraje ‘e stà ‘ncriscenza jenno a vvencere ‘ncopp’ô campo difficile d’’a Fiorentina pure si avettemo aspettà ll’arrancua (ripresa) pe vederlo vencere cu ‘nu bbelle stuco (gol)d’’o Pipita e c’êttem’ âccuntentà ‘e vencere p’uno a zzero addó se n’êsseno pututo fà tre o quatto e ssenza arrubbà niente.A ‘stu punto ‘e nummere dànno raggione â scuatra cuana ca cu ‘e tre ppunte d’ajere – comme aggiu ditto – se piazza ‘nsulitario ô terzo posto ‘ncrassifica arreto a   juve e rroma: p’a scuatra ‘e don Rafele quatto nichesse (vittorie) e dduje paregge dinto a ll’urdemi sseje fullè (gare), cu ‘na media scutetto.Ce sta proprio ‘a magnarese ‘e mmane p’’e punte sprecate ‘mpricedenza.E cu cchesto ve saluto e si ‘o Signore ‘o vvo’ ce sentimmo â prossima vota, ca mo nun saccio ‘e priciso quann’è e contro a cchi. Staveti bbe’!
R. Bracale Brak

ilnapolista © riproduzione riservata