E che saciccio guagliú! Cca ce à cacato ‘o cane niro! Accumminciajemo cu ssette parme ‘e ca…nna.Ajere a ll’’ora d’’o diggestivo, ‘o Chievo venette a ffelicitarce pigliannose tre ppunte, tre e mme mannajeno acido ‘e bucatine â matriciana e ‘o fritto ‘e pesce! E ppe fforza! Cu cchella jettatoria divisa (‘nu ginso e ‘na… pugnetta) ca s’êveno miso ‘ncuollo, addò vulevamo jí? ‘O Napule fove scunfitto, se zucaje ‘a caramella e nun riuscette a ddà ‘na risposta a rroma, juve interra. Ajere ce jette tutto stuorto, tutto! E ddicere ca ‘e cuane doppo ddoje semmane ‘e pulemiche erano state chiammate, arrivanno ô san Paolo, a ffà coccosa pe stutà tutta ‘a ‘ngrogna (malumore) ca aliggiava attuorno â scuatra ppruvanno a ppurtà ‘nu poco ‘e ‘ntusiasmo ch’êsse semp’ accumpagnà e surreggere ‘e guagliune cuane. Ma chi t’’o ddà?‘O Napule se ll’êtt’’ a vedé cu ‘o Chievo, ca spisso,[comme ll’anno passato ca s’era purtato ‘nu punto dô san Paolo] spisso ce aveva fatto magnà morze amare.E ajere fove addirittura peggio; ‘e punte se ne purtaje addirittura tre! Cosicché doppo ‘nu fullé(incontro) sfurtunato e scartellato ca ‘o Napule, tutto summato avette seje – sette accasione pe ssignà e nnun ne sfruttaje manco una, visto ca ‘o purtiere lloro, caccianno ‘a scienza, paraje tutto cosa cumpreso ‘nu ricore tirato dô Pipita…, doppo ‘nu fullé(incontro) sfurtunato e scartellato rummanettemo cu ‘na vranca ‘e mosche ‘mmano sciulianno ggià, e stammo appena â siconna jurnata, a ll’uttavo posto a ttre ppunte da juve, da roma e ppure dô milànno ca a ttarda sera jette a scummà ‘e sanco ‘o Parma, cu ddoje rredde fatte e ddoje ‘ncassate! E che saciccio guagliú! Accumminciajemo, è pproprio ‘o caso d’’o ddicere…,accumminciajemo cu ssette parme ‘e ca…nna.
Passammo ê ppaggelle:
RAFAEL 6 Nun ce putette fà niente ‘ncopp’â rredda d’’e verunese; p’’o riesto fove ‘mpignato poco e nniente e ffove furtunato quanno Maxi Lopezzo, lassato sulo dâ tràsera (difesa) cugliette ‘o travesagno (traversa)
MAGGIO 4,5 Pe ccorrere, currette furmanno ‘na bbona catena a ddritta cu Cagliecònno, ma nun ne cacciaje niente ‘a ‘sta corza, aizanno troppa porvera e sbaglianno sistematicamente ‘o cruzzo (cross).
ALBIOL 5 Tenette ‘ncopp’â cuscienza ‘a rredda verunese giacché ‘mmece ‘e ntervení rummanette a gguardà comme a n’alleccuto a mMaxi Lopezzo ca se ‘mpezzaje e gghiette a ssignà; p’’o riesto nun facette ‘na bbrutta atalossa (prestazione), ma chillu prano (errore) ce custaje ‘a scunfitta e nun ce ‘o perdono!
KOULIBALY 6,5 Nun facette nisciuna fessaria, anze spisso ce mettette ‘na pezza sbruglianno quacche situazziona periculosa; uno d’’e poche a pruvarce ‘ncopp’ê tire ‘e squina (corner)
Zuniga 5 Se decidette a ffà quaccosa sulo a ll’arrancua (ripresa) Durante ô primmo ajone pruvaje a nchiudere ‘ncopp’â rredda, ma nun ce ‘a facette. Meglio a ll’arrancua a ll’epata d’appressurata (in fase di spinta), ma jucaje quacche ppalla ‘nteressante sulo quanno ‘e culleghe jetteno a ccurto ‘e sciato.
INLER 6 – A ppietto ‘e Ggiorgigno fove sempe presente ô juoco e ttutt’’e pallune passajeno p’’e piede suoje; a ll’epata ‘e faglia (in fase di lancio) pe ll’esterne jette bbuono, ma nun fove priciso quanno êtt’’a tirà!
JORGINHO 5 Cchiú ‘e ‘nu passo arreto p’’o centrocampista brasiliano ca nun riuscette maje a sustàtere (impostare) cu cqualità. (dô 73° DE GUZMAN 5 Nun riuscette a ddà sustanza ô centrocampo; se ‘mballaje e nun truvaje cheseme (varchi) cuntentannose ‘e fà ggirà a vvacante ‘a palla.)
CALLEJON 5 Nun fove negativa ll’atalossa soja, risultanno ‘mpurtante dint’ê ddoje epate (fasi)’e juoco,ma ce aspettavemo ‘e cchiú e isso ‘mmece fove troppo luntano dâ porta preferenno quacche inutile bbassurero (suggerimento) p’’e cumpagne. (dô77° DUVAN 5,5 Pruvaje ‘a prucressiona ‘ncopp’â curzia ‘e mancina, luttaje ‘ncopp’a ttutt’’e pallune ‘mpignanno a bBardi ô finale, quanno però ‘e culleche nun ne tenevano cchiú.)
HAMŠÍK 5,5 bBona ll’atalossa (prestazione) soja specialmente ô primmo ajone quanno tutte ll’azzione ‘mpurtante passajeno p’’e piede suoje. A ll’arrancua(ripresa) cuntinuaje a lluttà avasciannose pe ffà juoco, ma fove acqua ca nun levaje sete e nun ne cacciaje custrutto!
INSIGNE 5,5 Ô primmo ajone jucaje tanti pallune cu bbona qualità senza perdere ‘e saffenèja (lucidità). A ll’arrancua (ripresa) fallette ‘na bbona accasione e ascette salvannose dê sische ca s’êsse mmeretato. (dô 58° MERTENS 5 Jurnata no d’’o belga ca perdette paricchi ppalle e nun vedette maje ‘a porta.)
Higuain 5 Jucaje sempe p’’a scuatra dànno qualità â manovra, ma pesano assaje ‘e prane (errori) sotto porta e soprattutto ‘o ricore falluto, tirato cu troppa sicurezza e precipitazziona: êsse avuto aspettà ca Bardi se fósse mosso (comme fove) e ppiazzà ‘a palla a ll’atu lato, mmece ‘e fa fà ‘a bbella fijura ô purtiere, tiranno ‘ncopp’â dritta addó ggià ‘o purtiere s’era lanzato. E cche ccacchio! ‘A tutte ma no dô Pipita!!
BENITEZ 5 Sfarme (colpe) particulare nun ne tenette, ma quanno ‘na scuatra perde, perde pure ‘o trainerro!
Arbitro: GIACOMELLI 5 ‘E stima. Êsse avuto fà ripetere ‘o ricore pecché Bardi se muvette assaje primma e êsse avuto’a jettà fora uno d’’e centrali verunese e nun facette niente ‘e tutto chesto!
E cu cchesto ve saluto e si ‘o Signore ‘o vvo’ ce sentimmo â prossima vota, ca êsse ‘a essere doppo d’’o fullè d’E.L.
Staveti bbe’
R. Bracale Brak