È ‘na jastemma menata, guagliú E nce à cuóvete, mannaggia a cchello ca nun se po’ ddicere! Nce à cuóvete! N’ata delusione cucente guagliú ajere a Udine… A ll’ora d’’e pastarelle ajere nce attuccaje ‘e ‘ncassà ‘a siconna scunfitta d’’o campiunato e mmo doppo tre gghiurnate tenimmo sulo tre ppunte ‘ncrassifica e stammo cunfinate a ‘nu passo dô pricipizzio, luntane n’eternità da Roma e juve. E ccu cchi m’’a piglio? Cu cchi m’’a pozzo piglià? Cu ‘o destino o cu don Rafele?
Cu ttutto ca è ‘a curona d’’a capa mia, m’’a piglio proprio cu don Rafele ca ajere sbagliaje praticamente tutto; a Udine ‘o Napule avesse avut’’a dà cuntinuità â nichessa cu ‘o Spartak (E.L.) pe ddimustrà ca a scunfitta casalinca cu ‘o Chievo era stato sulo n’incidente… E ‘mmece chi t’’o ddà?! Ajere a Udine don Rafele [cu ‘a scusa ca ‘e jucature d’’o fullè (incontro) d’E.L. stévano stracque] facette ‘nu rutizzio (turnover) streuzo, lassanno ‘o povero Pipita a pprerecà dint’ô deserto, orfano ‘e Marekiaro, ‘e Mertenso e dde Inler(ro), mentre ‘ncopp’ê curzie Insigne e zZunica aizàvano porvera e mMaggio nun ‘ncarrava ‘nu cruzzo (cross) manco pe scagno… E ffove naturale ca fernesse a vvrenna, comme fernette giacché doppo n’intero fullè (incontro) ca ‘o Napule duminaje pe cuntinuità ‘e juoco e ppussesso ‘e palla, senza però essere maje vermente periculuso [tranne ô 35° quanno Gargano cu ‘na bbotta ‘a luntano centraje ‘o palo…], doppo tutto chesto facetteno ‘a frittata e succedette ca ô 71° ‘ncopp’a ‘na timmurría (punizione) ‘e Di Natale Koulibaly se facette piglià ‘a n’attacco ‘e cannavarite,nun s’aizaje bbuono ‘a terra, sfresaje ‘e capa ‘o pallone, ‘o mannaje arreto rijalannelo a dDanilo ca, lassato libbero e ffranco a Maggio, steva appustiato ‘a ‘nu metro e mmiezo dâ porta nosta e nun se facette prijà signanno ‘a rredda ca ce cundannaje. È ‘na jastemma menata, guagliú e nun avastajeno ll’urdemi vinte minute p’adderezzà ‘o risultato e scanzarce allimmeno ‘a scunfitta! Me chiagne ‘o core a dd’ ‘o ddicere, ma nun ne pozzo fà a mmeno! Qua’ scutetto e scutetto?! Cca ‘o fatto è sserio e ce avimmo ‘a stà attiente a cchilli quatto o cinche ca stanno arrete a nnuje!
Passammo ê ppaggelle: RAFAEL: 6. Overamente sfurtunato, pigliaje ‘a rredda ‘ncopp’a ll’unicu tiro ‘mporta fatto ‘a ll’Udinese, ma nun ce putette fà niente: Danilo steva appustiato libbero e ffranco a ‘nu metro e mmiezo dâ porta luvarda (azzurra). Ce fósse vuluto ‘nu miraculo e ‘o guaglione nun è attrezzato pe ffarle!
MAGGIO: 4 Oramaje è n’ècchese jucatore e cu ‘o motulo a cquatto è ‘nu pesce fora acqua. Quanno appressuraje (spinse) nun ‘ncarraje ‘nu cruzzo (cross) manco pe scagno; ‘o capolavoro ‘o facette quanno se perdette a dDanilo ‘nnaccasione d’’a rredda ‘e ll’Udinese.
KOULIBALY: 5. ‘Nfi’ ô mumento ‘e chella sciaurata cabbesera(colpo di testa) ca furnette palla a dDanilo, nun ghiucaje malamente. S’à dda allenà ‘e cchiú pe sfruttà a mmestiere ll’artezza ca ‘o Pataterno ll’à dato!
ALBIOL: 6 Facette chello ch’êv’ ‘a fà senza sufferí.
BRITOS: 5 Ô pprincipio ‘e fullè, súbbeto ‘na liturgia adezzosa (intervento goffo); po cercaje ‘e se ripiglià ma nun tène ‘o passo pe gghiucà ‘ncopp’â fascia. E se vedette. GARGANO: 6,5 Comme ê tiempe ‘e Wallerettino Mazzarri,ajere ll’attuccaje ‘e sustàtere (impostare) ‘o juoco; sempre ‘mpriciso cu lanze fove però ‘nu veru strummolo ‘mpazzuto ‘mmiez’ô campo e mmannaje ô manicomio primma ê suoje, ma ccentraje pure ‘o palo cu ‘na bbotta ‘a fora.
DAVID LOPEZ: 6. Tanta sustanza, ma poca qualità. ‘Na cosa è ccerta: nun è mMascherano…
ZUNIGA: 4,5 Miso ‘ncampo a ssurpresa ô posto ‘e Cagliecònno, cchiú ca ‘nu jucatore ‘e pallone me parette uno ‘mmitato ‘a Milly Carlucci a ffà ‘o concorrente ‘e Ballando con le stelle. Quaccuno ll’êsse ‘a spiecà ca tutte chelli nfente, chilli bballette e cchelli ppiuruette nun servono manco ô saciccio. ‘Ncunsistente! ( Dô 64° CALLEJON: 6. Trasette e súbbeto sfresaje (sfiorò) ‘o pareggioca ‘o purtiere creco Karnezis(so) ll’annijaje cu ‘nu miraculo. ‘E tutt’ ata pasta a ppietto cu ‘o culumbiano).
MICHU: 4,5 ‘Na jatta senza ógne, ‘o spagnuolo: braduso (lento) e ‘ntricato (macchinoso)nun se facette nutà (Dô 72° MERTENS: 5,5 Trasuto troppo tarde e a ffrittata fatta nun avette ll’aggio ‘e farese apprezzà).
insigne: 5 Currette, ma a bbacante aizanno porvere senza quaglià maje niente ‘e cuncreto! Me vaco cunvincenno, purtroppo, ch’è ‘nu bbleffo!
HIGUAIN: 6- Prerecaje dint’ô deserto soprattutto durante ô primmo ajone (tempo) quanno nce fove n’abbisso tra ‘o Pipita e ‘o riesto d’’a furmazziona; me facette ‘na cosa ‘ncuorpo vederlo ‘e luttà sulo e senza supporto ‘nfra Danilo e Heurtò e vederlo sbraità p’’e rifurnimente ca nun ll’arrivajeno; s’ammeretasse n’ata cumpagnia e n’atu palcuscenico!
BENITEZ 4,5 Me chiagne ‘o core ma accussí è! Quanno ‘na scuatra perde, ‘o primmo a pperdere è ‘o trainerro; p’’a verità ‘a scuatra avette sulamente ‘a sfarma (colpa) ‘e nun rennerse periculosa annante;ll’Udinese ‘e Stramaccioni facette ‘na partita attienta ‘ndifesa e avette ‘a sciorta ‘e culpí dint’â sola accasiona avuta pe ‘nu sfregazzo (sbavatura) ‘e Koilibay ca passaje ‘a palla arreto e n’ ato dde mMaggio ca se scurdaje ‘e Danilo.Mo don Rafele [ca a ‘stu punto me sento ‘e scennere ca ggiugno nun rinnova ‘o cuntratto] s’à dda appriparà a bbrutti juorne ‘e tensione cu ‘na nova cuntestazione d’ ‘e tifusi, cuntestazione ca sta arret’â squina (dietro l’angolo) e à dda cercà ‘e dà spiecazzione cchiú cunvincente ‘e chelle date pe tentà ‘e fà capí comme maje riprupunette a bBritòsso pe nuvanta minute dopo ‘e nuvanta ‘e Coppa, cu ‘nu Zuniga esterno auto ca jette sistematicamente a ‘mbuttigliarese, cu mMichu trecquartista troppo luntano dô Pipita, cu Davide Lopèzzo ca schierato ‘nchietta (in coppia) cu Gargano levaje qualità â manovra.
Comme pure êsse ‘a spiecà pecché tardaje accussí ttanto a ffà trasí a mMertenso e a cCagliecònno. Pe nun parlà ‘e comme maje â scuatra lle mancano idee ‘ncopp’ê ppalle aute, sia ‘a timmurría (da punizione) ca da tire ‘e squina ( calci d’angolo).E cchi ‘o ssape si tène ‘o ggenio ‘e chiarirle ‘sti ccose!
Arbitro TAGLIAVENTO 3,5 E ll’aggiu trattato! Vulesse proprio vedé ‘o cummissario ‘e campo comme ll’à cunziderato a cchisto parrucchiere ‘e Terni (ca si fa tinture e ppermanente comme arbitraje ajere… ‘e ssignore lle scippano ‘a faccia). Ajeressera ‘stu ‘ntontero, vecchia cunuscenza, sistematicamente se ne futtette d’ ‘o recolamento e ‘e ffalte ‘e ssiscaje ô ccuntrario o, cu ‘a scusa d’arbitrà a ll’ingrese, nun ‘e siscaje proprio, spicialmente si foveno a ffavore d’’o Napule addó ‘mmece fosseno state nicessarie quacche cartellino jalizzo (giallo) o russo cu chilli delinquenti futtute d’ ‘e jucature ‘e Stramaccioni ca facetteno ‘e guappe e ‘e pruvucature!
’Nzomma ‘ncuchiusione cu ‘sta siconna paccheriata ‘e fila ‘ncampiunato ‘o Napule sta chiaramente ‘ncrise… Sinamparco (comunque) facenno corna, nun mettimmo ‘o carro annant’ê vuoje e nun chiammammo a ssan Paolo senza vedé ‘a serpe; aspettammo ca miercurí a ssera ‘o Napule se scetasse dô suonno e me smentesse cu ‘na nichessa (vittoria) larga e cunvincente contr’ô Palermo. Accussí sperammo.E mettimmo punto cca. Si dDi’ vo’ ce sentimmo ggioverí ca vène. Staveti bbene!
R. Bracale Brak
