NAPOLI –PAÒKKO SALONICCO amichevole (02/8/14) 2-0
‘Nzomma, ajeressera ô san Paolo, dint’â serata dedicata a Ciro Esposito, ‘o tifoso muorto poco cchiú ‘e ‘nu mese fa, ricurdato poco prima d’’o fullè (macht), dô presidente Aurelio De Laurentiis ca tenenno pe mmano ‘a mamma d’ ‘o guaglione, Antonella – parola pe pparola – dichiaraje: ”Antonella è la madre d’Italia, à avuto una bellissima idea, quella di creare un qualcosa a Scampia che possa essere d’aiuto nel ricordo di Ciro e d’esempio per i napoletani che vogliono distaccarsi dagli episodi di violenza. Il nome scelto da Antonella è straordinario ‘FRATELLANZA CALCIO IN NOME DI CIRO’: mai piú violenza, lo sport deve rappresentare tutti gli italiani, Antonella è la mamma d’Italia. Nel nuovo stadio del Napoli, sia se sarà rinnovato il San Paolo, che se ne costruiremo uno nuovo, ci sarà un settore intitolato a Ciro Esposito”, ‘nzomma, ve dicevo, ajeressera ô san Paolo, arrivate ô finale ‘o Napule riuscette a nchiudere ‘a prattica signanno ‘a siconna rredda e fissanno ‘o risultato ‘ncopp’ô doje a zzero addó era passato ‘nvantaggio doppo appena dduje minute e tutto faceva penzà ca avesse fatto ‘na sbrasata… e ‘mmece ‘o Paòkko, pigliata ‘a primma carocchia,cumpattaje ‘a difesa, ‘nfultette ‘o centrocampo e avettemo aspettà addirittura ‘o 91° pe vvedé ‘a siconna rredda d’’e cuane.Sperammo ca ‘ncampiunato nun succedesse ‘a stessa cosa e ‘o Napule cu don Rafele s’attrezzasseno pe nun ce fà stà nuvantacinche minute cu ‘o sciato suspeso…
Passammo ê ppaggelle va’:
RAFAEL 6 ‘E stima pecché nun fove maje ‘mpignato seriamente e pe isso fove urdinaria amministrazziona (dô 72° COLOMBO 6,5 – Tene sperienza e se vedette; se facette truvà pronto ô finale rispunnenno a mmestiere a ll’unica cunchiusione periculosa d’’o Paòkko e ‘o pubblico apprezzaje quacche ato ‘ntervento sujo subbracato [sottolineato] da applavuse cunvinte.)
MESTO 6 – Cunfermaje ‘e stà ‘ncundizziona, secutanno comme a ‘na pittima ll’avverzario ‘e turno; rummanette però sempe vascio e se sganciaje pochi vvote. (dô 60°MAGGIO 6 Trasette ‘ncampo diciso e cuncentrato, ma se mantenette sempe vascio e se facette nutà pe ‘nu paro ‘e ‘ntervente bbuone pe risolvere situazzione periculose.)
ALBIOL 6,5 – Nisciuno sfregazzo (sbavatura) p’’o spagnuolo ca liggette bbuono ògne azziona trasenno spisso d’ancerca (anticipo). (dô 68° LUPERTO 6 ‘E faccia e fisicamente assumiglia a Albiollo; pure si nn’à dda magnà furne ‘e pane, sta criscenno e ajeressera dimustraje pure bbona perzunalità, facennose valé ‘ncopp’ô juoco auto.)
KOULIBALY 7 – Nun pozzo ca cunferà tutt’ ‘o bbuono ditto doppo d’’o fullè cu ‘o Kalloní. Nun ne sbagliaje una,sia d’ancerca (anticipo) ca uno contr’ a uno. Attiento ‘ncopp’a ògne cruzzo (cross) dê fasce,’e cabbeza (di testa) nun tenette avverzarie;fisicamente è ‘nu mostro e p’’e crece ajeressere fove notte stà dê pparte soje!
BRITOS 6 Serata senza prubbleme pe ll’ècchese bulugnese: dê pparte soje ‘o Paòkko se vedette poco o niente.’Na sola vota fove pigliato ‘e ‘nfilata, ma senza cunsequenzie e pp’’o riesto urdinaria amministrazione. (dô 46° GHOULAM 6– Se facette vedé appressuranno (spingendo) ‘ncopp’â cuzia ‘e mancina, facenno ciové tutto chello ca nun êva fatto Britòs(so), ma ‘o zuco fove poco.M’aspettavo coccosa ‘e cchiú; avette ‘a ‘mpressione ca ‘o guaglione êsse ‘a smaltí quacche cchilo ‘e troppo! )
GARGANO 6.5 – Don Rafele, ca evidentemente ‘o cunzidera‘o mannaje ‘ncampo dô pprincipio e ‘o Mota rispunnette: “Prisente!” nunustante ‘a cuntestazziona da parte d’ ‘a Curva A ca nun lle perdunaje d’avé vuluto jí a ll’Interre; ma don Rafele nun se fa cundizziunà ‘a niente e si à deciso ‘e cunfermarlo ‘nmaglia luvarda, penzo ca ‘o cunferma.Ajere ‘o Mota se piazzaje annante â difesa pigliannose ‘o spavo ‘ncerato d’essere ‘o primmo punto ‘e riferimento d’’e duje difenzure centrale. Ricuperaje ‘na cifra ‘e pallune tanto ‘a fà passà ‘nsiconno piano ‘a fatica pulitelica (preziosa) ‘e Giorgigno! (dô 62° RADOSEVIC 6.5 Trasette cu granna determinazziona; overo ca s’êsse pututo sparagnà quacche falta (fallo) dinto a ccierti zzone ‘e campo periculose,ma trasette sempe cu cunvinziona trianno (smistando) bbuono ‘o pallone e â siconna accasione ca lle capitaje signaje ‘o sperato doje a zzero.
JORGINHO 6+ Ô Napule lle servono comm’ô ppane ‘e ggiometrie d’’o guaglione brasiliano ca me pare ca è diventato, doppo Dimaro, ‘nu jucatore cchiú fforte e ttuosto pure ‘int’ô mumento ‘e patenza (fase di non possesso) (dô 46° INLER 6 Se ‘mpussessaje d’’o centrocampo súbbeto, facennóse valé pure quanno s’appressuraje [spinse] ‘nnattacco).
Vargas 5,5 Niente ‘e nuovo: aizaje porvera e facette fummo; se ‘mpignaje sí, ma quanno êsse pututo ‘sturmà (creare) superiorità nummereca…nun ‘o facette; ‘nzomma fove fora dô juoco ‘ncapace ‘e cupulià (dialogare) cu ‘e cumpagne ‘e reparto Cagliecónno e mMarekiaro. Pe mme ‘o vennesse mo primma ca âmm’’a pavà a cchi s’’o piglia e ssi s’’o piglia! (dô 46° DZEMAILI 6 Miso ‘ncopp’â trecquarte avette ‘a libbertà ‘e menarse dinto, accussí comme lle piace ‘e fà e nun me dispiacette. ‘A ‘nu tiro suojo sballato nascette ‘o cruzzo (cross) ca Radoseviccio menaje dinto!)
Hamsik 6,5 Cratista (Ottima) ‘a pusitiva atalossa (prova) d’’o capitano sempe presente dint’ô vvivo d’’o juoco, sia attaccanno, sia defennenno pure quanno, a ll’arrancua (ripresa) jucaje assaje largo.(dô 68° PANDEV 5,5 – Troppo ‘mpriciso e ppure sfurtunato; trasuto ‘ncampo, doppo pochi minute se magnaje ‘o pussibbile redebbluo (raddoppio), mannanno ‘a palla a scardà ‘o pizzo d’’o travesagno [traversa])
CALLEJON 7 E menu male ca ‘o tenimmo nuje a ‘stu spagnuolo ca pure ajeressera dimustraje ‘e stà a ll’arriba (al top) p’ ‘o prevío (preliminare) ‘e Ciampionsa. Quanno partette ‘mprufunno ncarraje tiempe e muvimente taglianno p’ ‘a mmità ‘a tràsera (difesa) creca;‘A primma rredda lle riuscette a mmeraviglia e ‘ncap’ ‘e duje minute facette uno a zzero; ‘a siconna ‘a sfresaje (sfiorò) sulamente e ‘o purtiere creco riuscette a menà ‘a palla ‘ncopp’ô travesagno levanno a Cagliecònno ‘o sfizzio ‘e farne ddoje a ll’estrèia (esordio) staggiunale ô san Paolo. Ma ‘ngenerale ògne palla ca tuccaje addeventaje periculosa! (dô 46° MERTENS 6– Nun fove ancòra a ll’arriba (al top) d’’a cundizziona pe ffà chello ca sape e ppo’ ffà ‘ncopp’â fascia, ma allimmeno pe ‘nu paro ‘e vote spaccaje p’’a mmità ‘o Paòkko mannanno ‘mporta ‘nu cumpagno.)
DUVÀN 6- Gli Cu ll’avverzarie nchiuse a rriccio, ‘o matarazzo ‘e sbreglie nun avette nisciuna accasione ‘a sfruttà; pruteggette bbuono ‘a palla,facenno saglí ‘a scuatra, ma ô ssolito nun truvaje ‘a pessata (zampata) pe ffà male! (dô 46° MICHU 6– ‘O guaglione nun fove ancòra ‘ncudizzione e forze ce vo’ assaje tiempo pe vederlo ‘nforma. P’’o mumento se rusecaje ll’ógne ‘mpanca primma ‘e trasí, ma quanno trasette e avette ‘na granna accasione, se ’mpappinaje appiccecannose cu ‘e piere suoje stesse e ‘a perdette.)
BENITEZ 6 ‘E stima, pecché don Rafele tène ancòra ‘a faticà! Avucurie e sperammo ca, comme aggiu ditto, s’attrezzasse pe nun ce fà stà nuvantacinche minute cu ‘o sciato suspeso… ‘Nu ringrazziamento a pparte p’ avé miso ‘ncampo ‘a scuatra cu ‘a maglia luvarda (azzurra) e nno cu chella zezzosa divisa ausata contro ô Kalloní:prubbabbilmente capette pure isso ca purtava jella!
E cu cchesto ve saluto e ve dongo appuntamento, si dDi’ vo’, â prossima vota ca mo nun saccio quann’è!
Raffaele Bracale
