N’atu pareggio strano

È ‘na jastemma menata, guagliú E nce à cuóvete!N’ata delusione guagliú ajere a Udine… Me penzavo ca ‘e guagliune cuane fosseno jute a vvencere facennoce fà ‘na bbona Pasca e facennoce scurdà quacche amarezza ‘e campiunato e d’ E/L …. e ‘mmece chi t’ ‘o ddà, chi t’ ‘o ddà! Ajere ‘ncopp’â rota d’Udine ascette n’atu pareggio scartellato ‘nu poco pecché ‘o Napule, passato ‘nvantaggio nun tenette ll’amice ‘e Maria De Filippo ‘e jucà cu cattiveria e nun fove crestiano ‘e nchiudere ‘a pratica sbaglianno troppi vvote sotto porta friuliana cu Insigne e ccu zZapata, ‘nu poco pecché ll’Udinese cacciaje ‘a scienza difennenose pure a mmuorze, a ccauce, e a ppizzeche,e soprattutto pecché chella fetenzia ‘e ll’arbitro Calvarese ( ca s’ammereta 2) nun sulamente nun ce dètte no uno, ma dduje ricure,quanto pe gghionta ‘e ruotolo convalidaje ‘a rredda ‘e ll’Udinese signata ‘nnurzo’ecose (fuorigioco) Cunchiusione? ‘Ncunchiusione ‘o Napule perdette n’ata accasione e nun me facette gustà cu ‘o core ‘nfesta tòrtano, pastiera, fellata, mammarelle e rruoto ô furno cu ppatane e ppesielle… È ‘na jastemma menata, guagliú, mannaggia ê cane ‘e canciello! A Udine nun se vence cchiú! Passammo ê ppaggelle va’:
REINA 5 – Troppo precipituso ‘o pasiglio (passaggio) ca facette nascere ‘accasione d’’a rredda ‘e ll’Udinese, rredda ca cagnaje ‘o fullé (match) e facette piglià ‘o pappaviento â scuatra ‘e Guidolínno!
REVEILLERE 5 Appressuraje (spinse) poco, restanno quase sempe vascio e cummettenno cchiú ‘e ‘nu sfregazzo (sbavatura); fove isso ca lassaje sulo sulo a Fernandèsso ca signaje pure si steva ‘nnurzo’ecose ca Calvarese e ‘o signalinia nun vuletteno vedé.
FERNANDEZ 5,5 Nun tenette sfarme (colpe) ‘ncopp’â rredda subbíta, ma se facette menà fora e mmo a mMilano contro a ll’Interre n’âmm’’a fà a mmeno. S’à dda dicere però ca ‘e duje cartelline jalizze (gialli) pigliate nun s’ ‘e mmeretaje!
HENRIQUE 5,5 Miezu punto mancante pecché a ll’arranqua cummettette ‘nu paro ‘e sfregazze (sbavature),ma nun tenette sfarme (colpe) ‘ncopp’â rredda subbíta.
GHOULAM 5,5 – S’applicaje assaje ‘nfase difenziva, ma don Rafele nun fove cuntento pe ccomme ‘o ggiuvinotto accumpagnaje ll’azziona e cchiú ‘e ‘na vota ll’êtt’’a cazzià e ‘o cazziaje.
BEHRAMI 5 Jurnata no ‘e Valònno ca ‘ncullabburazziona cu Reina cumbinaje ‘o nquacchio ‘ncopp’â rredda d’’o pareggio nun liggenno bbuono ‘o pasiglio d’’o purtiere; p’’o riesto nun riuscette a ffà ‘o culaturo (filtro) comme ô ssolito. (dô 73° JORGINHO 6 Penzo ca fósse stato meglio sfruttà dô pprincipio ‘e fullé ‘a qualità ssoja pe ggestiunà (gestire) ‘o pallone e ttruvà cheseme (varchi) centrale.)
INLER 5,5 – Alternaje bbelli ghiucate a pprane (errori) ‘a paccheriarlo.Nun riuscette maje a ‘ncarrà ‘ll’urdemu pasiglio (passaggio) ca fove sempe fora mesura.
INSIGNE 5 ‘Nu punto mancante p’ ‘e ddoje fessarie pesante fatte sotto porta. P’’o riesto cercaje d’appressurà (spingere) cupulianno (dialogando) soprattutto cu mMarekiaro.Ma nun avasta pecché ‘a porta ll’êss’ ‘a vedé! HAMSIK 6 – Fove ‘ncondizziona e dde ggenio; tuccaje tanti pallune e cercaje, ma senza furtuna, pure ‘a porta ‘a luntano e mmaje pe vvie centrale. (da ll’ 89° ALBIOL sv)
CALLEJÒN 7 Risultaje pulitelico (prezioso) ‘int’ a ttutt’’e ddoje fase ‘e juoco; jucaje sempe p’’a scuatra e mettette ‘a firma sott’â diciuttesima perna soja ‘e ‘sta straurdinaria tempurata (stagione), perna ca però nun ce servette pe purtarce â casa ‘e tre ppunte. Che peccato!
DUVAN 5,5 Miezu punto mancante p’esserse ‘ncartato mane e ppiere lanzato ‘mporta e avé perza ‘na granna accasione; ‘e bbuono ‘a presenza dint’â camma ‘e ricore friulana e ‘a sponna p’’a rredda ‘e Cagliecònno. (dô 66° PANDEV 6 – Cumbattette ‘ncopp’ a ògne ppallone e nun fóve sfarma soja si ‘e cumpagne ‘o servetteno sempe cu ppalle avete ca jetteno dint’a n’uosso ê centrale friulane)
BENITEZ 5,5 ‘Nu passo addereto d’’a scuatra soprattutto p’’o carattere; ‘na vota subbita ‘a rredda d’’o pareggio, ‘e jucature cuane perdetteno ‘o cuntrollo d’’a situazziona,nun tenetteno cchiú idee, se bluccajeno e quase se sbacantajeno ‘e forza, ggenio e ccegna (grinta) cuntinuanno a ssufferí nfi’ô prazzo (fino alla fine) senza crijà cchiú niente! Ora mo, si comme à ditto don Rafele ‘e fullé ca rrummanono ànn’ ‘a serví a stabbilí qua’ songo ‘e jucature d’’o Napule d’’a tempurata ca véne,me sento ‘e scennere ca putimmo ggià salutà a Insigne, a Inlèrro, a bBehrami e a quacche ato!

arbitro CALVARESE di Teramo 2 ‘E ‘ncuraggiamento. Troppo guaglione e senza ‘sperienzia;sventagliaje troppi cartelline jalizze scuntannosela soprattutto cu ‘e cuane;cunvalidaje ‘a rredda irregulare ‘e ll’Udinese e nun ce dette dduje ricure, uno ‘ncollo a zZapata e n’ato ‘ncuollo a pPandevvo, tutte e dduje abbracciate e tirate ‘nterra ‘a Domizzi.
E cu cchesto ve saluto.Si dDi’ vo’ ce sentimmo ‘a semmana ca vène speranno ca sàpato ‘o Ciuccio jenno a mMilano contro a ll’Interre ‘e Wallerettino Mazzarri se fa perdunà ‘stu pareggio d’Udine. Staveti bbe’!
R.Bracale Brak

ilnapolista © riproduzione riservata