Beneditte santu Mertènso e ssantu Pipita

Beneditte santu Mertènso e ssantu Pipita ca ajere all’ora d’’a tiella ce detteno ‘a suddisfazziona ‘e mannarne mazziate â casa lloro a rReja, a lLotito e ô pappavallo lloro e ce facetteno passà ‘na bbona dummeneca d’’e pParme â faccia ‘e chi ce vo’ male e soprattutto d’’e rumanise ca, pe pparta lloro, sàpato erano state accumpagnate p’’a mano ‘a ll’arbitro a vvattere ll’ atalantise. A nnuje ‘mmece c’era tuccato Luca Banti d’’a sezziona ‘e Livorno, quarto ommo: Di Liberatore, assistente ‘e Linia: Costanzo-Grilli, assistente ‘e Porta: Mazzoleni-Gervasoni.E ssapevamo bbuono ca Banti era chella vecchia cunuscenza e antica fetenzia, (comme ô 99,9 pe cciento ‘e ll’arbitre taliane) ggià ati vvote ‘ncruciata dô Napule ca teneva cchiú ‘e ‘nu debbeto cu ‘e cuane e ca ajere nun se ne levaje nisciuno, pure si ggrossi fetenzie nun ce ne facette e ppo ve dico….. Ma ajere nun ce putette niente! Steva scritto ca ‘o Napule avesse vinciuto e vincette p’’a cuntentezza meja e de tutte ‘e tifuse ‘ntribbuna divano e ‘ncopp’ô san Paolo… E beneditte santu Mertènso e ssantu Pipita! Passammo ê ppaggelle:
REINA 6 Fruntiggiaje a mmestiere a fFelipe Andersònno salvanno ‘e suoje ‘int’ô mumento ‘e difficultà. P’’o riesto nun êtte ‘a fà ‘e straurdinarie; nun ce putette fà niente ‘ncopp’ô diacunale ‘e Luliccio ca Albiòllo se perdette e ffove sfurtunato ‘ncopp’â rredda d’ Onazi.
HENRIQUE 6 Tenette bbuono ‘a pusizziona e cquanno appressuraje (spinse) ‘o ffacette cu cqualità e s’’a spicciaje bbuono quanno, asciuto Giorgigno, êtte ferní ‘o fullé jucanno comme centrocampista.
BRITOS 5,5 Ascette cu ccegna (grinta) dâ tràsera (difesa),ma senza pricisione e cu troppi sfregazze (sbavature) quanno venette pigliato ‘ntassezza ( in velocità) dê tagli jancoceleste verzo ô centro.
ALBIOL 5,5 Stanco jette dint’ê chiavette cchiú ‘e ‘na vota e ffaticaje pur’isso pigliato ‘ntassezza ( in velocità) perdennose spisso ll’avverzario suĵo comme dint’’accasione d’’o vantaggio lazziale; ascette stracquato e ppe ‘nu prubblema fisico.(dô 46° FERNANDEZ 6 Overo ca tenette cchiú ppoca fatica ‘a fà, ma chello ca fove chiammato a ffà ‘o ffacette a mmestiere cuntrullanno quacche repartita (ripartenza) d’’a Lazzio, ca, ‘ndiece, nun dètte troppu fastidio.)
GHOULAM 5,5 Appressuaje (spinse) assaje, ma a scampule ‘e mele cutogne, sbaglianno cchiú ‘e ‘nu cruzzo (cross) e pperdenno quacche ppalla ‘mpurtante ca scatenaje quacche repartita (ripartenza) d’’a Lazzio.
JORGINHO 7 – Jucatore ca oramaje nun se ne po’ cchiú fà a mmeno,ammunito doppo manco ‘nu minuto, nun se facette cundizziunà risultanno ll’unico ca mettette ordine e smistaje ‘e primma.(dô 79° MESTO sv)
BEHRAMI 6 RIcuperaje tanti pallune facenno addecrià ‘o San Paolo. Quanno ‘a Lazzio fove ‘nvantaggio faticaje dànno ‘na mano a sustàtere (impostare) ll’azziona, po s’avasciaje a prutezziona d’’a tràsera (difesa).
INSIGNE 5,5 Miezu punto ‘e cchiú p’avé lanzato a dduvere ô Pipita ‘nnaccasiona d’’o tre a uno, ma p’’o riesto cuntinuaje a aizà porvere pe ttutto ‘o fullé nun vedenno maje ‘a porta, tranne ‘na vota quanno però Berisha se superaje.
PANDEV 6 ‘A chiena e ‘a vacante cu bbelli ghiucate e prane (errori) ‘a pigliarlo a ppacchere; ô finale venette meno dint’ê mmecce, ma quanno cupuliaje (dialogò) dint’ô stritto cu Higuaínno fove ‘nu spettaculo!
MERTENS 7,5 Higuaínno ne signaje tre, ma prubbabbilmente fove ‘o bbelga a ddecidere ‘o fullé:ripurtaje ‘e suoje ‘mparo cu ‘na cannunata ‘a fora dint’ô sette e se prucuraje ‘o ricore sacrusanto cu ll’esazzione (espulsione) ‘e ‘nu lazziale, tutte cose ca cagnajeno faccia ô fullé.Arillo ‘mpazzuto fove ‘nu cuntinuo periculo p’’a scuatra ‘e Reja e ppe fermarlo ll’êtteno sulo ‘a vattere. Don Rafele ‘o sostituette e i’ nun capette ‘o ppecché. (dô 65° CALLEJON 6 Se sacrificaje currenno appriesso a ttutte ll’avverzarie quanno oramaje ‘e cumpagne s’erano fermate.)
HIGUAIN 8,5 Jette a ffà cumpagnia a cchille ca nn’êvano signate tre â Lazzio: Maradona e cCavani. Friddo, diciso e ppriciso ‘a ll’unnece metre mettette ‘mporta ‘a rredda d’’o vantaggio e, gghiuto ‘mpressione, se ne vedette bbene cu ati ddoje rredde una cchiú bbella ‘e ll’ata: ‘a primma libberannose ‘e ll’avverzario ca ‘o marcava e mmettenno ‘a palla ô palo luntano e ‘a siconna cu ‘nu colpo’nsotto a ccicchiarino ‘e café; cu cchille d’ajere foveno vintiquatte ‘e rredde staggiunale ‘e ll’argentino ca cuntinua a ffà maraviglia pe ccomme joca p’’a scuatra, pe ccomme pitta cchiú ‘e n’ ajuda (assist) e ppe ccomme finalizza.
BENITEZ 5,5 Ajere don Rafele nun me cunvincette cu ‘o rutizzio (turnover) pruposto pecché pozzo capí Behrami ô posto d’Inlerro, ma no Britòsso ô posto ‘e Fernandèzzo, ‘o cchiú ‘nforma d’’o reparto arretrato… Vuó mettere a bBritòsso ‘ncampo dô primmo minuto? E ffallo, ma miettele ô posto d’Albiòllo ca sta stracquo comme po se vedette… Pe nun parlà po ‘e Mertènso dô primmo minuto, ma a ssurpresa,ô posto ‘e Cagliecònno e nno d’ Insigne ca venette cunfermato e aizaje porvera. Forze chesto succedette pecché don Rafele vulette fà n’attenziona a DeLa ca ‘ncapo a mme se vo vennere a lLorenzigno e ‘o guaglione à dda jucà pecché si Prandelli s’’o porta ô mundiale, ‘a valutazziona cresce. Jammo annanze; nun me cunvincette ‘a sostituzziona ‘e Mertènso, comme tutto summato nun me cunvincette ‘o fullé d’’o Napule ca lassaje troppu spazzio ê repartite d’’a Lazzio; pe ffurtuna ‘e cuane tenetteno ‘a forza, jute ‘nsotto, pe caputià (ribaltare) ‘o risultato e vvencere ‘o fullé,ma pesajeno ô ssolito quacche pprano (errore) sotto porta e ‘o calo d’’o finale ca ce avesse pututo custà ‘na cugliunatura (beffa) finale, ca ce scanzajemo.
ll’arbitro BANTI 5 E che ne parlammo a ffà? Banti cu ‘o Napule s’è ssempe cumpurtato malamente e ajere nun se smentette; grossi fetenzie nun ce ne facette, ma vulette fà ‘a subbretta mettennose a ddispenzà cartelline jalizze e siscanno falte (falli) ad capocchiam e ce facette ‘na fetenzia ‘mpruspettiva ammunenno ‘ngiustamente a mMertènso ca nun êva fatto niente addó ca Ledesma ‘o spintunaje malamente senza nisciunu mutivo. E aggiu parlato ‘e pruspettiva pecché mMertènso ammunito mo sàpato ca vene nun po’ gghiucà a Udine.E nun dicimmo ato!
Fermammoce cca; si dDi’ vo’ ve dongo appuntamento a ddummeneca ca vene pe ffarve ll’avucurie ‘e ‘na Santa Pasca, cu ‘a speranza ca sàpato ca vene, jenno a Udine, nun ce ‘ntussecammo tòrtano, pastiera, fellata, mammarelle e rruoto ô furno cu ppatane e pesielle!
Staveti bbe’
R.Bracale Brak