Tutto arriva a cchi sape aspettà

Tutto arriva a cchi sape aspettà, guagliú! Tutto arriva! E i’ ‘sta nichessa (vittoria) d’ajere ‘a stevo aspettanno dô vintiquatto ‘e settembre passato quanno ô san Paolo ‘o Sassuolo ce fremmaje ‘ncopp’a ll’uno a uno.
Tutto arriva a cchi sape aspettà e i’ stevo aspettanno ‘e levarce dâ faccia ‘o scuorno ‘e chillu pareggio scunzulato, ca – m’arricordo ancòra – fove tutta sfarma (colpa) ‘e culo’echiummo ca a ll’ebbroca jucava cu nnuje e nun fove cacchio ‘e cuntrastà a zZaza lassannolo libbero e ffranco ‘e mettere ‘a palla ê spalle d’’o pòvero Reina ca nun ce putette fà niente. Ma pe ffurtuna oramaje culo’echiummo joca cu ‘o Sassuolo e oramaje so’ ll’emigliane ca s’ànn’’a zucà ‘o franfellicco, comme se vedette ajere quanno ll’ècchese capitano d’’o Napule comme a ppesce ‘e cannuccia s’ammuccaje ‘a sarda d’a finta d’Insigne ca ‘o rummanette nchiummato ‘nterra e mmettette ê spalle ‘e Pegolo ‘o pallone d’’o doje a zzero, chillo d’’a sicurezza! E cce fremmajemo lla ‘ncopp’ô doje a zzero addó ch’êssemo pututo sbrasà e ffarne n’atu paro. Ma ‘o Cielo nun vulette e c’êttem’’a accuntentà ‘e ddoje rredde sulamente, assicurannoce tre ppunte sustanziuse e ‘mpurtante e levannoce ‘o scuorno dâ faccia! Passammo ê ppaggelle:
RAFAEL 6,5 Sempe attiento quanno ascette ‘ncopp’a cchiú ‘e ‘na punizziona tagliata ‘e Berardi.A ll’arranqua fremmaje cu pruntezza e ppricisione ‘nu diacunale periculuso ‘e Sansone.
MAGGIO 7 Bbona atalossa difenziva d’’o ggiuvinotto ca ricuperaje tanti pallune sbruglianno situazzioni ch’êsseno pututo addivintà periculose.
FERNANDEZ 7 Oramaje ll’argentino nun è cchiú’na surpresa:jucaje veramente a mmestiere ‘nchiusura attienta, pulita e pricisa e ssulo ‘na vota, ma senza cusequenzie se facette superà ‘a Zaza. ‘Ncumpenso ‘nfase ‘e plantamiento (impostazione) ascette sempe alicantemente palla ô pere.
ALBIOL 6,5 Cummannaje ‘a difesa cu ccegna (grinta),sperienzia e determinazziona cuncedenno poco o niente a ll’emigliane e alluntananno ògne minaccia senza stà a ppelià o a ffà cape d’angelo.
GHOULAM 7 Dê pparte soje lle capitaje n’accunto scamuso (cliente difficile) comme a bBerardi, ma tutto summato, isso lle mettette ‘na bbona musarola. Currette assaje senza sparagnarse e ffove bbravo a ccrederce quanno ricuperaje ‘ncopp’â linia ‘e funno ‘o pallone ca, miso a ccentro ce purtaje ‘ncopp’ô meritato uno a zzero cu Dzemaili.P’’o riesto nun sprecaje manco ‘nu pallone e spisso facette repartí ll’azziona.
BEHRAMI 6,5 Nun è ancòra ô ciento pe cciento e se vedette quanno ô finale se ne scennette, ma pe cchiú ‘e n’ora assicuraje granne prutezziona â difesa redubblanno ‘ncuollo a ll’attaccante emigliane. (da ll’ 85° RADOSEVIC sv)
DZEMAILI 7 Sbluccaje ‘o fullé cu ‘a specialità soja: ‘o tiro ‘a fora; a ll’arranqua trasenno Henrique se prupunette ‘mmiez’ê llinie trasenno pe vvie centrali cu ccuntinuità e ppoco mancaje ca nun signasse n’ata rredda quanno ô finale cu ‘nu bbellu tiro cugliette ‘o travesagno (la traversa).
MERTENS 7 Sempe cchiú arillo, pure ajere criaje superiorità nummerica ‘ncopp’â fascia ‘e dritta. Truvaje ‘o curridore pe Ghoulamme ‘int’a ll’azziona ‘e ll’ uno a zzero. Currette sotto e ‘ncoppa ‘ncupertura e ll’êtten’’a fermà cu ‘e ttriste senza ca ll’arbitro pigliasse pruvvedimente; ô nuvantunesimo avette ‘a forza ‘e farne fora a ttre, ma po Pegolo lle dicette ‘e no levannoce ‘o sfizzio d’’o tre a zzero!
HAMSIK 7 Marekiaro turnaje a ffarese vedé ê nivelle (livelli) suoje e soprattutto p’’a primma mez’ora facette vedé ‘e surice vierde a ll’emigliane ca nun ‘o riscetteno a ‘mbavaglià; peccato ca, arrivato ô tiro, fove sempe ‘mpriciso! Se facette apprezzà ‘nfase ‘e cupertura dànno isurrupío (equilibrio) â scuatra. (da ll’80° HENRIQUE 6 Se piazzaje a mmestiere ‘nnante â difesa cunzrntenno ê suoje ‘e passà ô 4-3-3).
INSIGNE 7,5 ‘Na perna soja nchiudette praticamente ‘o fullé: rientraje dâ mancina, nfentaje ‘ncuollo a cculo’echiummo, ‘o lassaje lla comme a ‘nu ntontaro e mmettette ‘o pallone ‘ncopp’ô palo luntano. P’ ‘o riesto se sacrificaje assaje ‘nfase difenziva pe redubblà ‘ncuollo a bBerardi.Peccato ca ô finale sprecaje ddoje accasione p’ arrivà ô tre a zzero; sinamparco (comunque) risultaje ‘o meglio d’’e suoje. Applavuse!
HIGUAIN 6,5 Jucaje sempe p’’a scuatra e ssulo ‘nu granne Pegolo lle ‘mpedette ‘e signà;cupuliaje (dialogò) bbuono cu ‘e cumpagne ‘e sezziona (reparto) e facette saglí ‘a scuatra.Se n’êtt’’a ascí p’’e ccunsequenzie ‘e ‘na denucchiata dulurosa dint’ê rine ca, pe ffermarlo, lle dette a tradimento chillu sicchio ‘e lota ‘e culo’echiummo senza ca ll’arbitro pigliasse pruvvedimente. (dô 70° PANDEV 6,5 – Trasette súbbeto e a mmestiere ‘nfullé (nel match);favurette ‘o sviluppo d’’a manovra e cu ‘na magaria sfresaje ‘na rredda da applavuse).
BENITEZ 7 Êva dimannato â scuatra ‘n’atalossa ‘e maturità e ll’avette cu ttutto ca fove custretto a ffà a mmeno ‘e tre pedine ‘mpurtante: Inlerro, Giorgigno e Cagliecònno. Ora mo ‘e tre ppunte cunquistate ce permettono d’allungà ‘ncopp’â Fiorentina e d’ aspettà cu cunfianza (fiducia) ‘na bbona nutizzia ‘a Roma i ‘e putimmo cunziderà de sustegno (viatico) p’’o fullé d’E.L. contr’ô Swansea ‘e ggioverí ca vene.
arbitro CALVARESE di Teramo 5 E ll’aggiu trattato!Troppo guaglione e ssenza ‘sperienzia; siscaje a bbienetenne, nun vedette chello ch’êsse avut’ ‘a vedé, lassaje correre e sparagnaje a ll’emigliane cchiú ‘e ‘na cazziata e de ‘nu cartellino jalizzo scuntannosela cu ‘e cuane; ‘nzomma pur’isso n’ato d’’a pasta fina.
E cu cchesto ve saluto.Si dDi’ vo’ ce sentimmo viernarí ca vene doppo d’’a trasferta p’’o fullé d’E.L., speranno ca ve pozzo cuntà bbelli ccose. Staveti bbe’!
R.Bracale Brak