‘A nichessa servette sulamente a ffareme magnà ‘o fécato

Che nervatura, guagliú. Tengo ‘o bbeleno fino a ‘mpont’ô musso! Ajeressera ô san Paolo ‘o Napule ascette dô campo chiammannose ll’applavuso ‘e tutto ‘o statio doppo d’avé vinciuto pe ddoje a zzero ‘o fullé contr’ê cannune ‘e ll’Arzenallo, ma ‘a nichessa (vittoria), facenno ‘e cunte sott’ô lampione, servette sulamente a ffareme magnà ‘o fécato pecché ô Napule, pure vincenno, nun lle riuscette ‘e superà ‘o turno e mmo è fora dâ Ciampionsa. Che peccato e cche futtitura! Ê ggiuvinotte ‘e don Rafele nun ll’avastaje ‘e vattere ( 2-0) ll’Arzenallo ô san Paolo (p’ essere sicuri d’’a qualificazziona serveva ‘o 3-0) giacché ‘o Borussia Dortmund pe pparta soja vincette a ll’87° a Marziglia per 2-1. IOveramente ‘nu peccato p’’o Napule, retrucesso a ffà ll’E. L. pe bbia d’’a crassifica â spartata(avulsa) cu tutte ‘e dudice punte cullezziunate, ‘e stesse d’Arzenallo e de Borussia. Ascí cu ddudice punte nun era maje capitato a nnisciuno. A cchi puteva capità? A nnuje! Ma ch’aspetta Dela a ffarle bbenedicere? Ch’aspetta?
A decidere ‘o fullé foveno ‘na perna ‘e Gonzalo Higuaínno ô 73° e nu sbrennente (splendido) pallunetto ‘e Cagliecònno all’urdemo minuto ‘e recupero.Pe pparta soja Armero, a ttu ppe ttu cu ‘o purtiere êva sprecata ‘na granna accasione. Che peccato e cche futtitura! Passammoê ppaggelle: RAFAEL 6 Serata tranquilla p’’o guaglione brasiliano. Una parata ô primmo ajone e quacche asciuta a ll’arrancua.
MAGGIO 5 Troppi bassurere jerrate ( suggerimenti erronei) e sfruttaje poco ‘a pussibbilità ‘e farese vedé dint’â camma ‘ngrese. Sprecaje ‘na bbona accasiona mannanno fora ‘nu pallunetto ‘ncopp’a n’asciuta ‘e Szczesny.
ALBIOL 7 Granna atalossa (grande prestazione) senza nemmeno ‘nu sfregazzo (una sbavavatura) d’’o centrale spagnuolo.Se ll’êtt’’a vedé cu n’accunto scamuso (un cliente difficile) comme a gGiró e ‘o curaje a mmestiere dànno pure ‘na mano ê cumpagne d’’e curzie laterale. FERNANDEZ 7 Surprennente atalossa (sorprendente prestazione) ‘e ll’argentino, ca arresecaje coccosa, ma vincette ògne brica (duello) cu bbona perzunalità e sse levaje ‘a suddisfazzione d’ascí palla ô pere pe sustàtere (impostare) ll’azziona.
ARMERO 5,5 Meglio d’ati vvote, ma ancòra nun ce simmo: troppo ‘e bassurere (suggerimenti) ‘mpricise e ‘e ppalle sprecate. Nun lle perdòno ll’àmartema (erroraccio) fatta a ttu ppe ttu cu Szczesny quanno êsse pututo sbluccà assaje primma ‘o fullé!
BEHRAMI 6,5 A ccunfronto d’ati vvote, quacche jerro (errore) ‘e troppo dint’ê pasiglie (nei passaggi), ma fove fonnamentale redubblanno (raddoppiando)pe fermà ‘e ghiucate tassose (veloci) d’Ozíllo e cumpagne.
DZEMAILI 6 Jucaje ô posto d’Inlèrro e ‘o ffacette a mmestiere! Nun se pigliaje tanti respunzabbilità,ma se facette apprezzà p’’a pressione e ‘o muvimento cuntinuo (pressing e dinamismo).
MERTENS 6,5 Se sacrificaje assaje muvennose pure senza palla; ‘nfase ‘e pussesso po Forze perdette quacche palla ‘e troppo, ma tentaje sempe ‘a jucata pe ccrià superiorità nummèreca.
PANDEV 6 Cupuliaje (dialogò) bbuono dint’ô stritto cu Higuain, pruvanno ‘nu paro ‘e vote ‘a jucata soja a strummolo dint’â camma, ma ‘a difesa nun se facette surprennere. (dô 56° INSIGNE 6,5 Trasette súbbeto ‘nfullé cu bbelli ghiucate ‘e primma e ttante uno contro a uno. Nun truvaje ‘a porta ‘a fora, ma nsi’ ô prazzo (sino alla fine) facette sèntere ‘a presenza soja.)
CALLEJON 7+ Atalossa fantastica d’’o spagnuolo.Se facette apprezzà jucanno senza palla e ffove funnamentale ‘nfase uffenziva; troppo bbella, pure si inutile, ‘a rredda d’’o doje a zzero.
Higuain 7,5 Mettette dinto ‘na granna rredda ‘e pricisione e pputenza ca sbluccaje ‘o fullé e ce dètte ‘a flattenza (l’illusione) d’’o passaggio a ll’ottave; jucaje sempe p’’a scuatra, ma nun avette accasioni ‘mpurtante ‘a fora ‘e duje tire ‘a ‘na pusizziona decentrata.
BENITEZ 8 Spero ca ll’atalossa d’a scuatra finalmente mette ‘na cucchiara ‘e càvicia ‘mmocca a ttutte chille ca criticano ‘o pruggetto tecnico accumminciato cu don Rafele pochi mise fa. Sperammo ca ‘a fernesseno d’allamentarese d’’e jucature ca isso à vuluto assultamente, ‘e chille ca sta cercanno finalmente ‘e valorizzà (aspettanno ‘o mercato ‘e ggennajo), d’’a cundizziona fisica e, soprattutto, d’’o juoco e dd’ ‘a mentalità ‘a granna scuatra cu ttutto ca pe mmo nun tenimmo ancòra tutte jucature d’auto nivello (livello). Certo rummane ll’amarezza ‘e ll’eliminazziona, ma s’à dda tené ‘a cunsapevulezza ca ‘o ddimane po’ essere ‘e tenta luvarda. E nun è dètto ca ll’E.L. fósse ‘a disprezzà!
arbitro KASSAI (Ungheria) 5 ‘A chiena e ‘a vacante; addó vedette e addó cecaje!
E mo? I’ penzo, cu don Rafele, ca, cu ttutta ll’ ll’amarezza ‘e ll’eliminazziona, simmo asciute rinfurzate a nnivello mentale pecché avimmo dimustrato ‘e tené carattere e mmentalità vincente , e avimmo assapurato ancòra ‘o piacere ‘e sènterce ‘e tifuse vicine! Ll’E. L. arriverà a febbrajo; pe mmo turnammo a ppenzà seriamente ô campiunato addó sinamparco (comunque) âmm’’a fà bbella fijura.Senza pressa, senza paura, senza cassura (pausa)!!!
E cu cchesto ve saluto.E si dDi’ vo’ ce sentimmo â prossima vota doppo d’’o fullé ‘e campiunato. Staveti bbe’
R.Bracale Brak