Putimmo essere cuntente, guagliú!

Putimmo essere cuntente, guagliú! Ajeressera ‘o Napule ô san Paolo, pure si fove custretto a lluttà nsi’ ô prazzo (sino alla fine), risulvette ‘a pratica Marziglia vattennolo pe ttre a ddoje e piazzannose p’’o mumento ô siconno posto d’’o ggirone cu ‘na nichessa (vittoria) ‘mpurtante cunzeguita cu ttutto ca ‘ntribbuna, vicino a DeLa ce steva piazzato chillu cestariello ‘e Giggino-uocchie-stuorte, e ccu ttutto ca dint’ê studie SKY nce steva chill’atu marvizzo, scunciglio jettatore ‘e Beppe Bergomi ca siccaje malamente pe ttutt’ ‘o fullé; ma nun ce putetteno e ‘o Napule purtaje ‘mpuorto ‘na granna nichessa pure si cu quacche sofferenza ca forze s’êsse pututo sparagnà, jucanno sinamparco (comunque) ‘nu fullé emuzziunante e cca e lla fatto a mmestiere dê patrune ‘e casa.’E ccose jetteno accussí:’ncapo ‘e diece minute, a ssurpresa, pe sfarma (colpa) ‘e Maggio ca (pigliato ‘a n’attacco ‘e cannavarite) nun ‘o cuntrastaje, passaje ‘o Marziglia cu ‘na cabbesera (colpo di testa) ‘e Andrè Ayew dâ camma (area) piccerella. ‘O Napule pe ‘nu poco restaje frasturnato, ma po se repigliaje e ‘nfra ‘o 22° e ‘o 24° caputaje ‘o risultato primma cu ‘na granna rredda ‘a fora d’ ‘o Turco-napulitano e ppo cu ‘na sarpa(zampata) d’’o Pipita, miso ‘mpusizziona da ‘na cabbesera ‘e Pandevvo.
Ô pprincipio ‘e ll’arrancua ‘o Napule se mettette a gghiucà cuoncio cuoncio e ‘o â primma accasione ‘o Marziglia n’apprufittaje, truvanno ‘nterra ‘o doje a ddoje cu tThauvin, ca sotto porta sfruttaje ‘na granna puttanata ‘e Armero. E allora ‘o Napule se mettette a ffà ‘o Napule arremarranno (ripartendo) a ccapa sotto nsi’ a ttruvà ‘o difinitivo tre a ddoje ancòra cu ‘o Pipita ca sfruttaje a mmestiere ‘na pulitelica ajuda (assist perfetto) ‘e Mertens rijalanno tre punti funnamentale ê suĵe. Ô finale Insigne, ‘a poco trasuto pe ffà risciatà a mMertens, centraje ‘o palo vascio. Poco male; ‘o Napule, strignenno ‘e diente nsi’ ô prazzo (sino alla fine) senza farese cchiú arrivà, vincette, sagliette ô siconno posto d’’o ggirone F e facette ‘nu passo ‘mpurtante verzo â qualificazziona a ll’ottave ‘e Ciampionsa.Pirciò, p’’o mumento tutto a pposto guagliú! Passammo ê ppaggelle:

REINA 6 Sulo cu ‘nu paro ‘e miracule êsse pututo fà coccosa pe ffermà ‘a cabbesera ‘e Ayew, o ‘o rimpallo ‘a duje passe ‘e Thauvin.Ma ‘e miracule ‘e ffa sulo ‘o Pataterno!P’’o riesto nun fove chiammato a ffà cose ‘mpurtante…
MAGGIO 5,5 Nun riuscette quase maje a affunnà ‘ncopp’â curzia ‘e dritta addó mmece Valbuena appressuraje (spinse) paricchio.Pigliato, comme aggiu ditto, ‘a n’attacco ‘e cannavarite acuta, dinto â camma nosta perdette ‘a sfita cu Ayew, nun s’aizaje ‘a terra e nnun ‘o cuntrastaje permettenolo ‘e signà l’uno a zzero p’’e francise.
ALBIOL 7 Tenenno ‘mmano ‘e statistiche,fove isso ca ghiucaje cchiú ppallune ‘e tutt’ ‘o fullé sustatanno (impostando) ll’azziona ‘a dereto cu perzunalità e ssenza nisciuno sfregazzo (sbavatura), ‘a fora ‘e ‘nu rimpallo, senza cunsecuenzie, perzo pe scagno ô finale, ‘nfase difenziva.
FERNANDEZ 6,5 Arresecaje coccosa quacche vvota, ma nun ce refunnette maje niente! Facette girà a mmestiere ‘o pallone e ffove d’ ‘o suĵo ‘o bbassurero (suggerimento) da reto pe Mertenso ca ne pennellaje ll’ajuda (l’assist) d’’o tre a ddoje d’’o Pipita.
ARMERO 5 Veramente grossa ‘a respunzabbilità soja ‘ncopp’â rredda d’’o doje a ddoje ch’êsse pututo custarce caro e amaro; durante â parte centrale ‘e ll’arrancua jette spisso dint’ê chiavette dimustranno chiaramente ca stà ‘ndifficultà cu ‘a fase difenziva,ca sta troppo ‘ncarne e s’êsse ‘a mettere a stecchetto…, ma lle mecco miezu voto ‘e cchiú pe ccomme riuscette a arrivà ‘ncopp’â linia ‘e funno nsi’ ô nuvantesimo.
INLER 7 Ancòra n’atalossa (prestazione) ‘e sustanza. Dint’ô mumento psiculoggicamente cchiú difficultuso adderezzaje ‘a varca ripurtanno ‘o Napole ‘mparo ‘ncopp’a ll’uno a uno e da chillu punto se pigliaje tanti respunzabbilità nun perdenno maje ‘a carma,cuvernanno (gestendo) a mmestiere ‘o pallone pure quanno ‘o Marziglia pruvaje a difennere ‘o pareggio acquattannose dint’â trecquarta soja.
DZEMAILI 6- Nun riuscette a ffà ‘e stessi ccose ca fa Behrami, pure pecché ‘e caratteristiche soje nun songo ‘e stesse’e chelle ‘e Valonno. Srarecaje sí quacche pallone dê piere francise, ma sbagliaje pure chiú ‘e ‘nu bbassurero (suggerimento) (da ll’ 89° BEHRAMI sv)
CALLEJÓN 6- A differenza d’ati vvote nun lle riuscette ‘e sfunnà a ll’attacco; ògne muvimento suĵo ê spalle d’’o terzino fove quase sempe liggiuto e stuppato però, senza stancarese maje ce pruvaje nsi’ ô prazzo (fino alla fine).
PANDEV 5,5 Me dispiace d’’o ddicere, ma ajeressera Pandemonio facette troppo poco; overo ca ‘nfra ê linie nce fove pocu spazzio ma a isso nun lle riuscette ‘e pruteggere palla comme sape e avesse avuto ‘a fà! ‘Nfra ê ccose bbone fatte me ricordo d’ ‘a sponna ‘e capa p’’a primma rredda d’’o Pipita.M’aspettavo però coccosa ‘e cchiú! (dô 65° HAMSIK 6 Trasette a mmestiere ‘nfullé (in partita) facenno ggirà ‘o pallone dint’ô tràfeco (traffico) ô lémmeto d’’a camma (limite dell’area) francese dint’ô mumento d’’a difficultà.)
MERTENS 7- Pronti-via e avette ‘na granna accasione, ma s’’a magnaje; sinamparco (comunque) ‘a chillu mumento fove sempe isso ‘o cchiú ppericuloso soprattutto quanno puntaje ll’ommo ‘nverticale; bbella e pesante assaje ll’ajuda p’’o tre a ddoje d’’o Pipita. (da ll’82° INSIGNE 6,5 Miezu voto ‘e cchiú p’essere trasuto subbeto ‘nfullé; cu ‘na granna ggirata cugliette ‘nu palo ca si fósse trasuto, se ne cadeva ‘o san Paolo! Ô finale ‘mmece ‘e cuvernà (gestire) palla pe ffà scorrere ‘e minute, preferette affunnà cercanno ‘e mettere paura ê francise.)
Higuain 8 Atalossa ‘e granna cuntinuità d’’o Pipita ca me parette cumpletamente ricuperato fisicamente.Jucaje p’’a scuatra, quanno però avette ll’accasione soje, ddoje, da granne artigliero(bomber) nun ‘e sbagliaje: a ttu ppe ttu con Mandanda mettette dinto ‘o pallone d’ ‘o doje a uno e ppo ce rijalaje ‘e tre ppunte seguenno ‘nteliggentemente ll’azziona e sfruttanno a mmestiere ll’ajuda (assist) ‘e Mertenso.
BENITEZ 6,5 Vincettemo e avette raggiona isso, pure si forze arresecaje assaje tenenno fora ggente comme Hamsik e Behrami tenute ‘ncaudo p’’o fullé ‘e Torino contro â juventússa;doppo d’’a rredda ‘ncassata ô pprincipio pe ‘na meza fessaria ‘e Maggio, ‘a scuatra reaggette bbuono e êsse addirittura pututo nchiudere primma ‘a pratica…Scigliette n’ata vota a fFernandèzzo, ô posto ‘e Cannavaro e ncarraje tutto cosa visto ca ‘o guaglione argentino facette n’ata atalossa pusitiva. Armero, nfase difenziva, è cchello ca è ‘e nun è sfarma (colpa) ‘e don Rafele si cu chellu lignammo, chilli strummole se fanno… Secondo me, aspettanno ca tornano zZuzzú e mMesto, ll’unica cosa ca se po’ ffà cu Armero è de metterlo a stecchetto e tenercelo fino a ggennajo quanno s’à dda accattà ‘nu difenzore capace ‘e fà ‘e ddoje fase.
Arbitro: Karasev 5 Pare ca è rrusso, ma arbitraje comme a n’ingrese siscanno poco e nniente soprattutto contro ê marziglise.
E cchesto è cquanto.Fermammoce cca e ve dongo appuntamento, si dDi’ vo’, a llunnerí ca vene doppo d’’o fullé ‘e campiunato ‘e dummeneca a ssera a Ttorino contr’â juventússa addó ‘o Napule va a gghiucà ‘a mamma ‘e tutte ‘e bbattaglie e sperammo ca ve pozzo cuntà d’avé ‘ntussecato a cconte e a ttutte ‘e mariuole d’’a scuatra soja.
Staveti be’!
R.Bracale Brak

ilnapolista © riproduzione riservata