Fernandez se facette apprezzà, Hamsik è turnato a ffà ‘o Marekiaro

Nichéssa(vittoria) ‘mpurtante assaje chella d’ajeressera ô san Paolo,guagliú e ‘mpurtante pe cchiú ‘e ‘nu mutivo: ‘mprimmose pecché ce facette priparà pusitivamente p’’o prossimo fullé ‘nCiampionsa contr’ô Marziglia ca ce vene a ttruvà dint’â semmana, po pecché rappresentaje ‘nu bbuonu sustegno (viatico) p’’a trasferta ca ce aspetta dummeneca ca vène dinto a ô stadium ‘e Torino… e ppo pecché fove ‘a cunferma ca ‘a nichéssa a fFirenze nun era succiesa pe scagno! E nun a ddicere ca fove ‘na passiata! Addò? Overo ca pe vvencere ce avastaje ‘o primmo ajone, ma pe ttutta ll’arrancua ‘o Catania sciso ô san Paolo fove scuatra tosta pure si maje veramente periculosa e ‘e cuane avetten’ ‘a faticà pe purtà ‘mpuorto ‘o risultato e ‘o ffacetteno e spisso avetteno raggiona d’’a difesa catanesa ajeressera ‘mpernata attuorno a ll’ècchese ‘nquacchiate ‘e sozzazza (lebbra) janca e nnera, Le Grottaglie e Almirònno e cchiú ‘e ‘na vota detteno da fà ô purtiere Anducàrro ca fove gruosso e dicette sempe no. ‘Nzomma ô prazzo (alla fine) c’êttem’ ‘a fà dint’ô prozo e accuntentarce ‘e vencere pe ddoje a uno, addó si fósse fenuta cinche a uno nisciuno êsse pututo dicere niente! Voglio sperà ca tutt’’e rredde ca nun ànnu signate s’’e songo astipate p’’o Marziglia e soprattutto p’’a juve. Passammo ê ppaggelle:
REINA 6,5 Nun fove sfarma (colpa) soja ‘a rredda ‘e Castro ca tiraje troppo ‘a vicino pe permettere a pPepe ‘e fà coccosa. P’’o riesto fove ‘mpignato sulo cu quacche palla aveta,ca nun lle dètte prubbleme; ô ssolito dètte granna sicurezza ô reparto e spisso ‘e subbaste (rilanci) suĵe fovene pricise ajude (assist).
MESTO sv Troppo scalugnato, ascette doppo pochi minute pe ‘nu guajo ô denucchio; s’êsse’a fà benedicere assulutamente! (dô 6° UVINI 5,5 Chiammato, isso ca nasce centrale, a gghiucà dint’a ‘na plantiglia (un ruolo)ca nun è ‘a soja ce mettette paricchiu tiempo pe s’adattà â pusizziona laterale e sulamente a ll’arrancua se facette apprezzà. ‘Ncopp’â rredda catanese tenette quacche respunzabbilità pe nun avé fermato chillo ca facette ‘o cruzzo vascio, ma ‘a sfarma(colpa) overa fove d’Armero.)
FERMANDEZ 6 Cunfermaje ‘e prucresse ‘e ll’urdimi fullé pure si quacche vvota sbagliaje ‘o tiempo ‘e ll’anticipo o se facette zucà fora pusizziona.P’’o riesto però, spicialmente a ll’arrancua se facette apprezzà pe quacche ebbainata (ripartenza) e sse facette valé ‘ncopp’ô juoco aveto.
ALBIOL 7 Punto fremmo ‘e don Rafele Benitèzzo, cummannaje cu ccegna (grinta) e pperzunalità, tutto ‘a sezziona arretrata, risulvenno quacche ‘mpiccio (grattacapo) e facette ebbainà (ripartire) a mmestiere ll’azziona.Ô finale, cu granne ‘sperienzia, pruvaje a addurmí ‘o juoco.
ARMERO 5- ‘A chiena e ‘a vacante: sfunnaje cchiú ‘e ‘na vota ‘ncopp’â curzia ‘e mancina crianno accasioni ‘mpurtante, ma po, quanno êss’avuto stuppà a cCastro, s’addurmette cu ‘a zizza ‘mmocca e stette fremmo a guardarlo mentre chillo commetamente metteva ‘mporta ‘o pallone! E che saciccio!
DZEMAILI 5– Jurnata no d’’o svizzero ca, zumpettianno p’’o campo a mmiezu servizzio, facette arrependià (rimpiangere) ‘o turno ‘e rescanzo (riposo) cuncesso ô turco-napulitano Inlèrro; nun riuscette a ffà ‘a parte d’’o direttore d’urchestra e a ccummannà ‘a quatriglia; nun se pigliaje respunzabbilità e spisso passaje ‘a palla arreto. Ô finale se fósse addirittura mmeretato ‘e pacchere quanno se magnaje ‘na rredda ‘ncopp’ a n’asciuta a vvacante (ll’unica!) ‘e Anducàrro.
BEHRAMI 6,5 Nun sulo facette ‘o cane ‘e presa scastranno ‘a miez’ê piere catanise pallune ‘mpurtanti, ma po, visto ca mancava Inlèrro e Dzemaili nun ghieva, se pigliaje quacche respunzabbilità ‘e cchiú. Ô momento cchiú difficultuso d’’o finale travulgente s’avasciaje ancòra ‘e cchiú pe ffà trancara (muraglione) ‘nnante a ll’avverzarie.
INSIGNE 5,5 Nun fove a ll’aldezza d’’o pprincipio ‘e tempurata (stagione).Jucaje paricchi pallune, ma senza zuco e ccunnimma;a ll’urdemo perdette pure tanti pallune. (da ll’ 89° MERTENS sv)
HAMSIK 7 Finalmente me parette ca fósse turnato a ffà ‘o Marekiaro doppo ‘nu luogo periodo ‘e ‘mpagnamiento (appannamento), e nun sultanto p’’a granna rredda signata, ma pe ccomme cuvernaje a mmestiere ‘o pallone e ppe comme facette scattà chiú ‘e ‘na ebbainata (ripartenza). Veramente bbello ‘nu pasiglio (appoggio) ca mettette ‘mporta ô Pipita.
CALLEJÓN 7 Iuperocia (fantastica) ‘a rredda ca sbluccaje ‘o fullé. E foveno seje ‘ncampiunato. Pulitelico (prezioso) ‘nfase ‘e plantamiento (impostazione) e ‘nfase difenziva, poco mancaje ca a ll’arrancua nun mettesse ‘mporta ‘a pareglia (doppietta).
HIGUAIN 6- S’avasciaje spisso pe cupulià (dialogare) a mmestiere cu ‘e cumpagne, ma se facette truvà pure spisso ‘ncamma-rredda (zona-gol) truvanno però ‘nu paro ‘e vote ‘nu granne Anducàrro, mentre ‘int’a n’ata accasione nun lle riuscette ‘e truvà ‘a porta. (dô 78° ZAPATA 6- Pure facenno a spurtellate cu lLe Grottaglie e socie sulo pochi vvote riuscette a ffà saglí ‘e suoje, ma nun fove maje periculoso.)
BENITEZ 6,5 Perdette súbbeto a mMesto pe ‘nu guajo (infortunio) ô denucchio, ma nun facette ‘a fessaria ‘e spustà Albiòllo a dritta, mannanno ‘ncampo a cCannavaro e risulvette ‘a facenna sfruttanno a Uvini comme terzino ‘e dritta.Sinamparco (comunque) ‘o fullé ll’êva liggiuto bbuono e cumm’infatte doppo vinte minute ‘o punteggio era già ‘e doje a zzero. Sfresata (sfiorata) ‘a terza rredda ‘e cuane se rilassajeno ‘nu poco e ‘o Catania signaje arapenno n’ata vota ‘o fullé cu ‘o risultato ca rummanette ‘nforze nfi’ô prazzo (fino alla fine), ma ttutto summato ‘o Napule arresecaje poco e anze avette cchiú ‘e n’accasione p’aumentà ‘a ddosa d’’e purpette date ô Catania e ssulo ‘nu gruosso Anducàrro e ‘a ‘mprecisione sotto porta nun permetteteno ‘e risolvere primma e mmeglio ‘a pratica. Però a ppochi juorne dâ sfita cu ‘o Marsiglia [ca s’à dda vencere assulutamente!], e tenenno pure cunto d’’o fullé ‘e dummeneca ca vene cu ‘a Juventússa,’a cosa cchiú ‘mpurtante era purtà â casa ‘e tre ppunte pruvanno n’atu rutizzio (turn-over) nicessario o ubbligato.E avette raggiona isso, comme ave raggione sempe chi vence!
ll’arbitro IRRATI 6 M’aspettavo peggio ‘a ‘stu guaglione fiorentino e mme mettevo paura ca se fósse levato quacche preta ‘a dint’â scarpa…, ma pe furtuna nun ‘o facette! Sperammo ca nun se guasta p’’a via!
E ccu chesto ve saluto e si dDi’ vo’ ce sentimmo ggiovedí doppo d’’o fullé ‘e Ciampionsa cu ‘o Marziglia.
Staveti be’.
R.Bracale Brak

ilnapolista © riproduzione riservata