Che scuorno, guagliú, che vriogna! Cose ‘e pazze!Ajeressera , doppo d’avé fatto ‘o cuollo luongo p’ ‘a suspensione d’ ‘o campiunato giacché jucava ‘a nazziunala tagliana (e a mme d’ ‘a nazziunala nun me ne passa manco p’ ‘a capa…’mprimmese pecché ce stanno troppi juventini e ppo visto ca so’ nnapulitano pe nnascita e ttagliano sulamente pe fforza), ajere aspettaje ‘o fullé cu ‘o Parma pe vedé si ‘o Napule ce fósse riuscito a llevarese ‘e pacchere ‘a faccia pigliate a tTurino contro â juventússa…., ‘mmece ajeressera sotto ô patapato ‘e ll’acqua, ô san Paolo ‘o Napule ‘ncassaje ‘ncampiunato ‘a terza scunfitta, ‘a primma – e sperammo urdema – casalinca. Si me ll’avesseno cuntato nun ll’avesse creduto, ma ce aggi’’a credere pe fforza, giacché ‘o vvedette cu ll’uocchie mieje ca ‘o Napule nun ghiucaje bbuono,perdenno troppi ppalle e favurenno ‘a nichessa (la vittoria) d’’o Parma ch’era venuto pe ppurtarese â casa ‘nu punto, jucanno ê vvote pure tutt’’e unnece arreto â linia d’’a palla.Succedette però ca ‘e cuane nun riuscetteno a sbluccà ‘o fullé e ‘e ducale, cu cCassano, apprufittajeno primma ‘e’na fessaria ‘e Insigne e ppo d’’o tentennamiento ‘e Britòsso e signajeno ‘na rredda ca ‘e nuoste nun riuscetteno cchiú a rimuntà, tuzzanno sistematicamente ‘nfacci’ô muro ducale. Cunchiusione?’O Napule abbuscaje tumata (vittima) ‘e ‘nu juoco troppo bradúso (lento) e ciapúcero (goffo), tumata (vittima) ‘e ‘na serata stèira (sterile), cu n’inutile giro-palla nun sulo ‘ncampo, ma pure ‘ntribbuna-divano e ll’unichi ccose ‘a ricurdà foveno ddoje accasione sprecate ‘a Higuaínno; p’’o riesto troppa ‘mprecisione soprattutto dâ mità ccammpo a gghí ‘nnante!
Arrivato a ‘stu punto ve sparagno ‘a cronaca e ppasso ê ppaggelle:
REINA 6- Me dètte ‘a ‘mpressione ca fósse partuto ‘nritardo ‘ncopp’ô diacunale ‘e Cassano ca sinamparco (comunque) fove ‘nderizzato a mmestiere. Ô primmo ajone fove bravo a ssalvà ‘ncopp’a ‘nu tiro ‘e Parolo; p’’o riesto nun avette ‘a fà granché.
MAGGIO 5 Rummanette quase sempe assaje vascio a gguardia d’’a camma (zona) soja. ‘Mmece êsse avut’ ‘a fà ato e de cchiú!
ALBIOL 6 S’ ‘a vedette tosta sbruglianno cchiú ‘e ‘na situaziona cumplicata soprattutto dinto a ll’uno contr’ a uno cu bBiabianí e ccu sSansone ca tenevano n’atu passo.
BRITOS 5 ‘O Napule fove custretto a attaccà ‘nmassa e spisso ll’ècchese bulugnese se ll’êtte ‘a vedé a ttu ppe ttu contr’ a uno tassuso (veloce) comme a bBiabianí ma riuscette a stupparlo. Sbagliaje però ô mumento meno adatto quanno avesse avut’ ‘a affruntà a cCassano e mmece temporeggiaje praticamente ‘mmitannolo a ttirà; e cche ccacchio!
ARMERO 5 Arrivaje spisso ‘ncopp’â linia ‘e funno, ma sbagliaje ògne vvota ‘o cruzzo (cross). Sperammo ca don Rafele piglia ‘a decisione ‘e fà jucà ‘o francese pigliato dint’ê salde!
INLER 4,5 Serata no d’’o trurco-napulitano ca sbagliaje troppi bassurere(suggerimenti) pure bastantamente facili. Restaje a gguardà a cCassano ca scenneva pe gghí a ttirà comme si ‘o fatto nun fósse stato d’’o suĵo! (da ll’86° ZAPATA sv)
BEHRAMI 6 Provaje, isso sulo, a cuntrastà tutte ‘e mediane ducale. A ll’arrancua (ripresa) quanno ‘o muro addeventaje cchiú ttuosto fove custretto a sustàtere (impostare) isso, visto ca Inlèrro nun ne vulette sapé.
CALLEJÒN 5,5 ‘O campo pesante ‘o bluccaje assaje; sbagliaje cchiú ‘e ‘nu stoppo mannanno a ccarte quarantotto azzioni ‘mpurtanti. A ll’arrancua(ripresa) ce pruvaje ma senza pricisione.
PANDEV 5,5 – S’avasciaje pe difennere palla, facenno saglí ‘e suoje e arapenno ‘ncopp’ê fasce. Miezu voto mancante pecché facette troppi sbaglie cu ll’urdemu pasiglio (ultimo passaggio) (dô 67° HAMSIK sv Trasette e ascette quase súbbeto pe n’accidente (infortunio)) (dô 76° MERTENS 6 Ufferette vivacezza (vivacità) ê suoje,superanno ll’avverzario e cupulianno (dialogando) a mmestiere cu ‘e cumpagne; pe mme ll’êsse miso assaje primma ô posto ‘e Cagliecònno)
INSIGNE 4,5 Serata no ‘e Lorenzigno: tuccaje tanti e ttanti pallune, ma senza custrutto e ssenza vení a ccapo ‘e coccosa; nun riuscette maje a arrivà ô tiro e cu ll’urdemu pasiglio (ultimo passaggio) se facette sempe sgamà, perdenno pure troppi pallune comme chillo [pesante comme a ‘nu vriccione] ca dètte via libbera a cCassano p’’a rredda dicisiva!
HIGUAIN 5,5 Durante ô primmo ajone fove sempe prisente dint’ô juoco cupulianno (dialogando) a mmestiere cu ‘nu cumpagno e ‘nu paro ‘e vote se prucuraje ‘o spazzio p’ ‘a conchiusione,ma Mirante lle dicette sempe ‘e no!
BENITEZ 5 Quanno se perde ‘a sfarma è ppure d’’o trainerro;chella d’ ajere fove ca don Rafele facette pocu rutizzio(turnover) tenenno ‘ncampo a quaccheduno ca nun steva ‘nghiurnata e nun ‘nfultette ‘o centrocampo. Sinamparco (comunque) ‘o risultato fove busciardo tenenno prisente ca Mirante êtt’ ‘a salvà cchiú ‘e ‘na vota ‘e suoje e ca ‘o Parma a ll’arrancua (ripresa) avette sulo ll’accasione d’’a rredda; però ‘o Napule dètte ‘a ‘mpressione d’essere senza idee e ssenza cumminzione (convinzione), pe nun parlà d’ ‘e ppuríe (dubbi) ‘ncopp’a ll’esterne tutt’’e dduje ‘ndifficultà tattica. Penso però ca è pesata soprattutto ‘a jurnata storta d’ Inlerro,d’Insigne e de cCagliecònno.
arbitro MAZZOLENI 5 Nun ce facette fetenzie, o allimmeno nun me n’addunaje, ma ‘o mecco ‘nu punto mancante pecché m’è antipatico, pecché è bergamasco e pecché è ghiettatore!
E fermammoce cca. Ve dongo appuntameto a mmiercurí ca vene doppo d’’o fullé ‘e Ciampionsa contro ô bBorussia, quanno spero – si dDi’ vo’ – ca ve pozzo cuntà ca ‘o Napule è turnato ‘a Dortmúnd(o) addó à fatto ‘na bbella fijura, nun certo comme a cchella d’ajeressera! Staveti bbe’
R.Bracale Brak
